Wana Guyijiya ba?
Itshi nganga-nzambi jiakhalele gu tempelo ya gu Yelusalema jiakhalele mutshita nu mahatshi a shitu akhalele mushiya ha giwotshielo?
NGANGA-NZAMBI jia gu Isalele ikulu jiakhalele muhana milambu ya shitu jiavula ha giwotshielo gu tempelo givo giagasue. Muenya ndunge Josephus wa muenya Yuda wa mu siekle ya thomo, wasonegele egi gu wano wa Pake, akhalele mushiya imeme gubalega 250 000 ha guhana milambu; mahatshi avula akhalele diago mumuangewa ha giwotshielo. (Levi 1:10, 11; Lutang. 28:16, 19) Mahatshi ene akhalele muya gui?
Enya sianse ayile nu kushima (guphunda) ha fundo diakhalele thomo tempelo yatungile Helode gutuama egi ishiyiwe mu givo 70 G.Y. Akotelesele egi guakhalele nu kanale gamoshi gakhalele muhana njila hagula mahatshi abulumuge, azoge mu tempelo.
Tutadilenu ima mbadi yakhalele mutshita egi giwotshielo gikhale giaphelegeta:
Mawina akhalele goshi’a giwotshielo: Mukanda ukulu wa enya Yuda wana tamegewa egi Mishna, wana khala nu mikhuala nu kutime jia enya Yuda, wasonegewe mu givo 200; wana zuelela nji luholo meya nu mahatshi akhalele muzoga gu giwotshielo. Wana zuela egi guakhalele nu mawina mbadi gu khanda ya giwotshielo. Mahatshi a milambu nu meya akhalele muwevuela giwotshielo akhalele muzogela mu mawina ene, akhalele mubulumugila mu kanale ha guya mu baba dia Kidelona.
Enya sianse ana tshigina nji egi ndaga yana zuela mukanda wene ukulu idi ya giamatshidia. Mukanda umoshi wa mene jia enya Yuda udi mumonesa egi enya sianse amonenele bakanale hehi nu fundo diakhalele tempelo. Yajiya gukhala egi akhalele mukalegela bakanale ene ha guzolela mahatshi a milambu nu meya mu tempelo.
Meya avula: Nganga-nzambi jiakhalele mukalegela meya avula ha guwevua goshi’a giwotshielo nu ha gubulumuishila mahatshi. Jiakhalele muzula meya ene mu dimbo. Meya ene akhalele mukatuga mu bakanale, mawina, mawina a gubambela meya nu bapisine. Muenya sianse Joseph Patrich udi muzuela egi, guakhalelego nu tempelo iko mu tangua diene yakhalele nu luholo luabonga ngenyi lua gubata meya abonga gu tempelo nu guzola abola.”