Yehowa Watukuatesele ha Gujidila nu ha Gukhala nu Gusuanguluga mu Mafundo Agasue Tuakhalele

Phangi Kassholm nu mukaji’enji anginyile mu Khalasa dia Gileade mu 1979, gungima a atumile ha gukalagala mudimo gu Iran, gu Île Maurice, gu Birmanie, gu Tanzanie, gu Ouganda nu gu Zaïre. Hakhalele ene gu Khalasa dia Gileade, mulongeshi wawo phangi Jack Redford, waahanele longo dimoshi egi adi naye gutshigina usombegeshi wagasue nu gukhala nu gusuanguluga mu mafundo agasue mbaatuma. Longo diene diaakuatesele muavula tangua diagasue akhalele guatuma ha guya muhana mago mu mafundo ahe-ahe. Tuabembenu atutele lumene luawo.

Phangi Mats, tuwambelenu luholo muajiyile giamatshidia.

Phangi Mats: Tata wami wakhalele gu Pologne mu sungi ya Ita ya Mbadi ya ha mavu agasue, wamonele luholo enya gikombelelo gia Katolike akhalele mutshita ndaga jiavula jiabola. Matangua avula wakhalele muzuela egi: “Ngudi mujiya egi gikombelelo gia giamatshidia giana khala guene!” Gungima ngakotelesele egi ndaga jiakhalele muzuela muene jiakhalele jia giamatshidia. Ngasumbile mikanda yavula inyi athu akhalele ayikalegela gale ha gutanga. Mukatshi dia mikanda yene, guakhalele nu mukanda umoshi wakhalele mutamegewa egi La verité qui conduit à la vie éternelle. Jina dia mukanda wene diangusuanguluishile muavula, ngawutangele wagasue mu phipha yene imoshi ngawusumbile. Tangua ngamanesele guwutanga, ngakotelesele diago egi ngaheta giamatshidia!

Sendese mu Avril 1972, ngatangele mikanda yavula ya Matemue a Yehowa, ngahetele nji mvutu gu mihu ya Biblia ngakhalele muhula. Ngadivuile gifua muadivuile muenya mungenda Yesu wazuelele mu gifezegeselo gienji gimoshi munu wayile musumbisa ima yenji yagasue ha gusumba musanga wa ndando wahetele muene. Ame nji tangua ngahetele “musanga” wa ndando wa giamatshidia, ngabembele felela ngakhalele nadio dia gungina gu université ha gubua munganga. (Mat. 13:45, 46) Ngabatijiwe mu lusugu lua 10 Decembre 1972.

Gungima dia givo, mvuaji jiami nu galenge gami ga yala atshiginyile nji giamatshidia nu abatijiwe. Ngabuile muvundji wa njila wa tangua diagasue mu Juillet 1973. Mukatshi dia avundji a njila a mu hungu dietu, guakhalele nu phangi mumoshi wa mukhetu wabonga nu wakhalele muzumba Yehowa muavula, jina dienji diakhalele Ann-Catrin. Tuadizumbile, tuadizudile nji mu ulo mu 1975, gungima tuabalegesele ivo nguana mu dimbo dia Strömsund; diakhala dimbo diabonga dia gu Suède, athu avula akhalele nji mutshigina lukuma luabonga.

Phangi Ann-Catrin: Tata walongugile giamatshidia hakhalele muene gu université gu Stockholm. Ngakhalele phamba nu mbeji thathu mu tangua diene, uvi tata wakhalele muya nu ame mu gudibungisa nu mu mudimo wa gulongesa. Mama gakhalelego musuanguluga nu ndaga yene, wakhalele nji mutshigina gumonesa egi Matemue a Yehowa akhala nu mambo. Luholo gakhalelego mumona gubola gua Matemue a Yehowa, wasombegesele matangi enji gungima wabatijiwe. Ame nji ngabatijiwe nu ivo 13; tangua ngatagenesele ivo 16, ngabuile muvundji wa njila. Ngayile mu dimbo dia Umeå ha gukuatesa ha fundo diakhalele nu funu ya alongeshi avula; gungima dienji ngabuile pionye spesiale.

Gungima dia ulo wetu, ame nu Mats tuakhalele nu gusuanguluga ha gukuatesa athu avula ha gujiya giamatshidia. Mukatshi dia athu tualongesele, guakhalele nu muvuala wa mukhetu mumoshi jina dienji Maivor; gungima dia gujiya giamatshidia, wabembele felela dienji dia gutshita saga, wabuile muvundji wa njila nu wakhalele mulongesa muavula nu galenge gami ga mukhetu. Muene nu galenge gami ga mukhetu anginyile mu Khalasa dia Gileade mu 1984, ana kalagala mudimo wa gimisionere mu gifutshi gia Équateur.

Itshi yamikuatesele ha gujidila nu usombegeshi nu ha gukhala nu gusuanguluga mu midimo yenu?

Phangi Mats: Akhalele gututoga ha guya mu mafundo avula a gudisha. Uvi ndaga yakhalele gutukuatesa ha gujidila nu usombegeshi wagasue yakhalele gulandula gifezegeselo gia Yesu, muavula-muavula khadilo dienji dia gudibulumuisa. (Kol. 2:6, 7) Ha gufezegesa, ha fundo dia gutoga aphangi tuakhalele musanga ha gujidile nu ndaga tuakhalele mutshita, tuakhalele mutshita yagasue ha gujiya gishina akhalele mukalagala ndaga mu luholo lua gudisha nu esue. Tuakhalele mutshigina gujiya matangi awo nu ndaga jiko jiavula jia mu dimbo diawo. Luholo tuakhalele mulandula gifezegeselo gia Yesu, yakhalele yaleba gudi esue ha gujidila nu usombegeshi nu ha gukhala nu gusuanguluga mu midimo yetu.​—Ngi. 1:2, 3.

Phangi Ann-Catrin: Mutshi wana khala nu funu ya muanya hagula ukule muabonga ha fundo wakunyiwe luko. Yehowa wakhalele diago “muanya” mukunda nu esue. (Ngi. 84:11) Watuhanele aphangi a mala nu a akhetu akhalele gutuzumba muavula. Ha gufezegesa, mu hungu dietu dia mu dimbo dia Téhéran gu Iran, aphangi akhalele nu khadilo dia guyamba nu dia guhana muavula. Ndaga yene yakhalele gutuwunguluisa mene jiavula jia athu akhalele nu khadilo dia guyamba tuana tanga mu Biblia. Tuakhalele mutshigina gukhala mu gifutshi gia Iran, uvi mu Juillet 1980 mafumu a leta atunyishile mudimo wa Matemu a Yehowa guene; atuhanele nji phamba masugu mbadi ha guzoga mu gifutshi giene. Atutumile gu Zaïre (gifutshi giene giana tamegewa mangino egi Congo-Kinshasa) gu Afrique.

Tangua ngavuile egi atutuma gu Afrique, ngadidile. Ngavuile woma mukunda nu mene akhalele gungutela jia nyoga nu misongo yakhala guene. Uvi phangi mumoshi nu mukaji’enji akhalele mafuta etu, ene nji akalegele mudimo gu Afrique; atuwambelele egi: “Muvuigo woma! Ndenu guene, tudi mujiya egi muza gusuanguluga nu Afrique.” Ndaga azuelele jiakhalele diago ngenyi! Aphangi a mala nu a akhetu akhala nu khadilo dia guyamba nu guzumba. Uvi gungima dia ivo 6, atunyishile mudimo wetu gu Zaïre, tuakhalele naye gukatuga guene; ngatogele Yehowa egi: “Ngabuba, tubembe tukhale gu Afrique.” Ndaga yene yangulelesele handaga ngasombegesele matangi ami mukunda nu Afrique.

Gubonga gutshi muahetele mu ivo eyi yagasue muabalegesa gale?

Phangi Mats: Mudimo wetu wa gimisionere watukuatesele ha gukuata ufuta wakola nu bamisionere ako a mu ifutshi ya gudisha nu a mu mafundo a gudisha. Mu mafundo ako tuakhalele muya, tuakhalele nu gusuanguluga ha gulongesa athu avula Biblia; matangua ako tuakhalele mulongesa muthu nu muthu athu hehi nu 20! Ngajiyilego gubuita mutshima guzumba nu gisemo aphangi a gu Afrique atumonesele. Tangua tuakhalele muya nu gutala mahungu gu Tanzanie, mafuta etu avula akhalele gutuyamba “gifua mudi guvula gua ima akhalele nayo” luholo akhalele mutshigina egi tuhage gamiyo getu gakhalele nu sugu mukatshi hehi nu jinzo jiawo. (2 Kol. 8:3) Ndaga yakhalele gutusuanguluisa muavula yakhalele lumene. Ame nu Ann-Catrin tuakhalele mukhala hashi mu ngueze, tuakhalele muzuelela ndaga jiabalega mu lusugu, tuakhalele nji muhana Yehowa mersi mukunda nu ukuateshi wenji.

Phangi Ann-Catrin: Gukhala mukatshi dia aphangi a ha mavu agasue guana gungusuanguluisa muavula. Tualongugile mazuelelo avula gifua Farsi, Français, Luganda nu Swahili; tualongugile nji ndaga jiavula jia mu mafundo avula. Tuahanele aphangi akatuga gubatijiwa formasio, tuakuatele mafuta abonga, tuakhalele nji nu gusuanguluga ha gukombelela Yehowa hamoshi nawo.​—Sef. 3:9.

Tuamonele nji ima yavula yabonga yafugile Yehowa. Tangua diagasue tuakhalele mutshigina ginemo gihe-gihe mu mudimo wa Yehowa, yakhalele gifua Yehowa wakhalele nu esue tangua diagasue ha gututuameza. Watulongesele ndaga jiavula jinyi tuakhalelego naye gudijiyila hakhetu.

Malamba atshi muataganele nawo? Itshi yamikuatesele ha gukolesela?

Phangi Mats: Mu tangua dimoshi ngenyi, tuakatele misongo yavula gifua malaria. Ann-Catrin waphendewe nji mbala jiavula. Tuakhalele nji gudisagesa mukunda nu mvuaji jietu handaga akhalele athu a gukola; uvi tuana hana enya fami yetu mersi luholo aakuatesele tangua tuakhalele mu midimo yetu. Aakuatesele nu guhuiminyina nu guzumba nu gusuanguluga guagasue. (1 Tim. 5:4) Ikhale ngenyi, matangua ako tuakhalele muvua gikenene handaga tuakhalele mutshigina guya ha gukuatesa mvuaji jietu ha fundo dia guakuatesela gualeha.

Phangi Ann-Catrin: Mu 1983, ngakatele misongo ya choléra tangua tuakhalele mukalagala mudimo gu Zaïre. Munganga wawambelele Mats egi: “Katuga nu mukaji’aye mu gifutshi egi mangino!” Tuavutugile gu Suède mu lusugu luanduile, tuayile mu aviyo yana bata ima handaga guakhalelego nu aviyo jiko.

Phangi Mats: Tuadidile muavula handaga tuatangijile egi mudimo wetu wa gimisionere wahua. Ikhale munganga watuwambelele egi Ann-Catrin mbagashigo muvua muabonga, uvi ndaga jiabalegelego ngenyi, wavuile genji muabonga. Gungima dia givo, tuavutugile luko mu Zaïre; tuayile mu hungu dimoshi diazonda dia zuelelo dia Swahili gu Lubumbashi.

Phangi Ann-Catrin: Tangua tuakhalele gu Lubumbashi, ngamitshile vumo uvi gungima vumo diene diazogele. Tuakhalelego mutshigina guvuala ana, uvi ngavuile gikenene giavula luholo vumo diene diazogele. Mu tangua diene dia lamba, Yehowa watuhanele kado ga ndando tuakhalelego mutangiza. Tuasendesele gulonguga Biblia nu athu avula diago. Hungu dietu diakhalele nu alongeshi 35, athu akhalele muza mu gudibungisa akhalele 40; uvi gungima dia givo, alongeshi abuile 70, athu akhalele nji muza mu gudibungisa abuile 220. Tuadihanele muavula mu mudimo wa gulongesa, Yehowa watukuatesele nji muavula; ndaga yene yanguhanele gikhesa. Matangua avula, tuana landula gutangiza nu guzuelela bebe wetu; tudi munengena tangua Yehowa mbawumanesela gikenene gietu mu Phaladiso.

Phangi Mats: Mu tangua dimoshi ngenyi, Ann-Catrin wahuidile muavula. Ame nji ngakatele misongo ya cancer ga mu mala, anguphandele nji mu luholo luakola. Mangino ngudi muabonga, Ann-Catrin nji wana landula gudihana muavula mu mudimo wa Yehowa.

Tudi mujiya egi aphangi etu ako ana tagana nji nu malamba. Mu 1994 gungima dia ita yazogele gu Rwanda, tuayile mutala aphangi mu mafundo alengele ene. Gutshigina guawo nu khadilo diawo dia guyamba nu dia gukolesela yatukuatesele diago ha gukotelesa egi Yehowa udi nu ngolo jia gukuatesa akombeledi enji adi mutagana nu malamba.​—Ngi. 55:22.

Phangi Ann-Catrin: Tuataganele nu lamba diko tangua tuayile gu wano wa gukangudiwa gua Betele ya gu Ouganda mu 2007. Gungima dia wano, tuakhalele muvutuga mu dimbo dia Nairobi gu Kenya mu gamiyo nu bamisionere ako nu aphangi a gu Betele, tuakhalele athu 25. Gutuama egi tuhete gu mididilo ya gifutshi gia Kenya, gamiyo gamoshi gajile gutukuma. Muthu wakhalele muwendesa gamiyo nu aphangi ako thano afuile mbala imoshi; phangi muko wa mukhetu wayile mufuila gu opitale. Tuana nengena nu mitshima zagu-zagu ha gumona luko aphangi etu ene!​—Yobo 14:13-15.

Ame nji nganamenele phuta jiavula, uvi ngavuile muabonga. Ame nu Mats nu aphangi ako tualanduile gudisagesa mukunda nu aksida yene. Gikenene giene giakhalele gungujila muavula mu phipha, giakhalele gunguzugisa nu gungusuginyisa monyo, ngakhalele muvua gifua ngudi mutshigina gutshita crise cardiaque. Ngakhalele muvua woma wavula. Uvi gukombelela Yehowa nu gutanga verse jia Biblia tuakhalele mutshigina guatukuatesele ha gukolesela. Tuayile nji mumona minganga, ndaga yene yatukuatesele nji muavula. Mangino, tuanago luko guvua gikenene giavula mukunda aksida yene, tuana toga nji Yehowa ha gukuatesa aphangi ako adi mutagana nu malamba a luholo elu.

Tangua muakhala muazuelela malamba enu, muazuedi egi Yehowa wamibatele “gifua mayi a gibisu.” Ndaga yene idi mukotelesa itshi?

Phangi Mats: Mbimbi jiene jiakatuga mu gishima gimoshi gia mu zuelelo dia Swahili giana zuela egi “Tumebebwa kama mayai mabichi,” nga ndo “Atubatele gifua mayi a gibisu.” Gifua luholo muthu wana bata mayi a gibisu muabonga hagula abudigago, Yehowa nji watukuatesele nu guzumba guagasue mu midimo yagasue tuakhalele mukalagala. Tuakhalele nu ima yagasue tuakhalele nayo funu, matangua ako tuakhalele nayo yavula gubalega. Yehowa watumonesele guzumba guenji nu watukuatesele nji mu njila ya gisemo giatumonesele aphangi a gu Hunji dia Akulu Atuameji.

Phangi Ann-Catrin: Ngudi mutshigina guzuelela ndaga imoshi yatubuidile idi mumonesa luholo Yehowa watukuatesele. Lusugu lumoshi, angutamegele gu telefone ha gunguwambela egi tata wakhalele mu opitale gu Suède, wakhalele nji mukata muavula. Mats wakhalele mukata malaria, wakhalele khenji gavua galego muabonga; tuakhalelego nji nu luholo lua gufuta transport ha guya gumutala. Tuazudile desizio dia gusumbisa gamiyo getu. Gungima phangi mumoshi nu mukaji’enji anyi avuile ndaga yene atutamegele gu telefone, atuwambelele egi akhalele mutshigina gufutshila muthu mumoshi mukatshi dietu transport. Phangi muko wa mukhetu wa gukola watutamegele nji, wakhalele nu caisse imoshi yakhalele muene mubambela makuta yasonegewe egi: “Mukunda nu gukuatesa muthu udi mu lamba.” Yehowa watukuatesele diago mu tangua diazonda ha guheta makuta a gufuta transport!​—Heb. 13:6.

Mu ivo yagasue 50 muabalegesa mu mudimo wa tangua diagasue, malongo atshi muazudile?

Phangi Ann-Catrin: Ngakotelesele egi ‘gukhala tedie nu gusha mutshima’ gudi Yehowa guene guatukuatesele ha gukhala nu ngolo. Yehowa wana gulua mukunda nu esue tangua tuana gumushila mutshima. (Yesh. 30:15; 2 Gudi. 20:15, 17) Gudihana muavula mu midimo yagasue tuakalegele mukunda nu Yehowa, guatukuatesele ha guheta ishimbigo yavula gubalega ima tuakhalele naye guheta gula tuakalegele midimo iko.

Phangi Mats: Longo dia ndando ngazudile didi egi ngudi naye gushila Yehowa mutshima mu ndaga jiagasue nu gukamba gujiya luholo muene mbawungukuatesa. (Ngi. 37:5) Wana gungukuatesa gale gifua mualayele muene. Tuana landula gumona luholo Yehowa wana gutukuatesa mu mudimo wetu tuana kalagala mangino gu Betele ya gu Birmanie.

Tudi mujiya egi mavuala agasue adi mutshigina gudihana muavula mu mudimo wa Yehowa, mbaakhala nji nu luendu lua gumona guzumba guenji gua giamatshidia gunu guatumonesele muene. Tudi musha mutshima egi mbayikhala ngenyi gula abemba egi Yehowa a akuatese ha gujidila nu usombegeshi wagasue mbatagana nawo nu ha gukhala nu gusuanguluga mu midimo yawo.