Tuahetele Malongo Avula Gudi Mulongeshi Wetu Wakoma mu Monyo Wetu

GIFEZEGESELO GIA MVUAJI JIAMI

Mu 1957, mvuaji jiami jiakatugile gu Italie ha guya gu Kindersley, mu dimbo dia Saskatchewan gu Canada. Matangua azonda gungima, mvuaji jiami jialongugile giamatshidia; giamatshidia giene giabuile ndaga yabalega ndando mu monyo wetu. Tangua ngakhalele mona wazonda, tuakhalele mubalegesa matangua avula mu mudimo wa gulongesa nu fami yami; hene, matangua avula ngana zuela mu gulelesa egi ngakhalele “muvundji wa njila wa tangua diazonda” tangua ngakhalele nu ivo 8!

Mvuaji jiami jiakhalelego nu makuta avula, uvi atuhanele gifezegeselo giabonga mu ndaga yatadila gutshita usombegeshi mukunda nu Yehowa. Ha gufezegesa, mu 1963, asumbishile ima yetu yavula ha guheta makuta ajiya gutukuatesa ha guya gu asamble internationale gu Pasadena mu gifutshi gia Californie gu États-Unis. Mu 1972, tuakatugile mu dimbo dietu ha guya mukhala gu Trail mu dimbo dia Colombie-Britannique gu Canada ha gulongesa athu ana zuela zuelelo dia Italien; dimbo diene diakhalele gualeha diago nu dimbo dietu. Tata wakhalele mutshita mudimo wa guwevua nu gulonda ima gu magazin amoshi ngenyi. Watunyile midimo yavula yakhalele naye gumuhana makuta avula handaga wakhalele mutshigina gudihana muavula mu ndaga jia mu nyuma.

Ngudi muhana mvuaji jiami mersi mukunda nu gifezegeselo giabonga atuhanele ame nu aphangi’ami ako thathu. Gifezegeselo giawo giakhalele formasio ya thomo ngahetele mu mudimo wa Yehowa; angulongesele ndaga ngana wunguluga monyo wami wagasue egi: Gula ngasha ndaga jia mu nyuma ha fundo dia thomo, Yehowa mbawungukuatesa.​—Mat. 6:33.

MUDIMO WA TANGUA DIAGASUE

Ngadizudile mu ulo nu Debbie mu 1980; Debbie wakhalele mukhetu wabonga diago, wakhalele gudihana muavula mu mudimo wa Yehowa. Debbie wabuile muvundji wa njila mbeji thathu gungima dia ulo wetu handaga tuakhalele mutshigina gutshita mudimo wa tangua diagasue. Givo gimoshi gungima dia ulo wetu, tuayile muhana mago mu hungu dimoshi diazonda diakhalele nu funu ya alongeshi; gungima ame nji ngabuile muvundji wa njila.

Gungima tualebele muila, tuazudile desizio dia gukatuga ha fundo diene. Uvi tuayile thomo muta maga nu mutadi muwendji wetu. Watuwambelele giamatshidia nu guzumba guagasue egi: “Enue hakhenu mudi mutshita egi ndaga jimiyilago muabonga. Handaga mudi mutadila phamba malamba mudi mutagana nawo. Uvi gula muakamba gumona ndaga jiabonga jidi gumikalegela Yehowa, mbamujimona diago.” Yakhalele diago longo tuakhalele nadio funu. (Ngi. 141:5) Tuakalegele longo diene mbala imoshi, tuakotelesele nji muphushi egi guakhalele diago nu ndaga jiabonga Yehowa wakhalele gutukalegela. Aphangi avula a mu hungu diene atshiginyile nji gudihana muavula mu mudimo wa Yehowa, ikhale akhalele ana azonda nga mavuala nu aphangi ako anyi alumi’awo nga akaji’awo akhalelego Matemue a Yehowa. Tuazudile diago longo dia ndando. Tuakotelesele egi tudi naye gukamba gujiya ndaga jiabonga jiana gutukalegela Yehowa nu gusha mutshima egi muene mbawutukuatesa ha gukolesela mu malamba tudi mutagana nawo. (Mika 7:7) Tuahetele gusuanguluga mu monyo wetu, ndaga jiasendesele nji gubonga.

Alongeshi etu a mu khalasa dia thomo dia avundji a njila tuanginyile akhalele akalagala gale nji mudimo wa tangua diagasue mu ifutshi iko. Atudijigile foto jiawo, atuwambelele malamba ataganele nawo nu ishimbigo ahetele mu mudimo wene, ndaga yene yatuhanele diago nzala ya gubua bamisionere. Gungima tuazudile nji desizio dia gubua bamisionere.

Ha gutagenesa felela diene, mu 1984 tuayile gu khanda ya Québec ana zuela zuelelo dia Français, khanda yene yakhala ha mutango wa bakilometre 4 000 nu Colombie-Britannique. Tuasendesele gulonguga zuelelo dihe-dihe guene nu gujidila nu ndaga jiko. Lamba diko tuataganele nadio diakhalele egi matangua ako tuakhalelego nu makuta avula. Mu tangua dimoshi ngenyi, tuakhalele muya munona thamba mu dihia dia phangi mumoshi. Debbie wakhalele mujiya gutelega thamba jiene muabonga diago! Tualanduile gukolesela mu malamba ene agasue nu gusuanguluga. Tuakhalele mujiya egi Yehowa wakhalele gutukuatesa.​—Ngi. 64:10.

Lusugu lumoshi ngenyi, telefone yetu yadidile. Atutamegele ha guya mutshita mudimo gu Betele ya gu Canada. Tuakhalele nu gusuanguluga uvi muila watulebele nji handaga tuakhalele tuazalesa gale formilere ha guya gu Khalasa dia Gileade. Uvi tuatshiginyile emvitasio yene. Tangua tuahetele guene, tuahudile phangi Kenneth Little, wakhalele mutshita gu Komite ya Filiale egi: “Na itshi mbatutshita gula atutamega gu Khalasa dia Gileade?” Watuvutudile egi: “Mbatutadila ndaga yene gula amitamega.”

Phoso imoshi gungima, atutamegele gu Khalasa dia Gileade. Hene, tuakhalele naye guzula desizio diakoma. Phangi Little watuwambelele egi: “Desizio diagasue mbamuzula didi diabonga, uvi gudi nu lusugu mbamudibela egi ngamuazudile genu desizio diko. Desizio dimoshi didi diabonga gubalega diko; uvi Yehowa mbawumikuatesa mu desizio diagasue mbamuzula.” Tuatshiginyile guya gu Khalasa dia Gileade; uvi gungima dia ivo, tuakotelesele egi longo diatuhanele phangi Little diakhalele dia giamatshidia. Matangua avula, tuana hana nji athu ako longo diene gula atagana nu ndaga ya luholo elu.

MUDIMO WA GIMISIONERE

Tuakhalele nu gusuanguluga ha gukhala mukatshi dia athu 24 akhalele naye gungina mu khalasa dia 83 dia Gileade. Yakhalele mu mbeji ya Avril 1987 gu Brooklyn mu dimbo dia New York. Phangi Ulysses Glass nu phangi Jack Redford ene akhalele alongeshi etu. Gungima dia mbeji thano, tuahetele badiplome mu lusugu lua 6 Septembre 1987. Atutumile ha guya mutshita mudimo gu Haïti hamoshi nu phangi John Goode nu makaji’enji Marie.

Sendese mu 1962, akhalelego luko mutuma bamisionere gu Haïti handaga bamisionere akhalele guene akayewe mu gifutshi giene mu givo giene. Gungima dia phoso thathu, ame nu Debbie tuasendesele gukalagala mudimo gu khanda imoshi yakhalele nu milundu gu Haïti mu hungu diazonda diakhalele nu alongeshi 35. Tuakhalele mavuala, tuakhalelego mujiya ndaga jiavula, tuakhalele nji mukhala hakhetu mu inzo ya bamisionere. Athu a gu khanda yene akhalele diago phutu, avula mukatshi diawo akhalelego mujiya gutanga. Mu tangua diene, ita yazogele mukunda nu ndaga jia politike, mbundudi jiakhalele mutshigina gutambula ufumu, athu akhalele muwenda mu njila, guakhalele nji nu ikudi.

Aphangi a gu Haïti akhalele nu gikhesa nu gusuanguluga; gifezegeselo giawo giatukuatesele muavula. Avula mukatshi diawo akhalele mutagana nu malamba avula, uvi akhalele muzumba Yehowa nu mudimo wa gulongesa. Phangi mumoshi wa mukhetu wa gukola gakhalelego mujiya gutanga, uvi wakhalele mujiya baverse hehi nu 150 mu muto. Malamba tuakhalele mutagana nawo gu khanda yene lusugu nu lusugu atuhanele gikhesa nu atukuatesele ha gulandula gulongesa athu egi phamba Ufumu wa Nzambi mbawumanesela malamba agasue a athu. Tuana khala nu gusuanguluga ha gumona egi athu a thomo tualongesele Biblia gu khanda yene abuile avundji a njila, bapionye spesiale nu akulu.

Tangua tuakhalele gu Haïti, ngatagenele nu muvuala wa yala mumoshi jina dienji Trevor, wakhalele misionere wa enya gikombelelo gia Mormon; tuatele n’enji maga a Biblia mbala jiavula. Ivo yavula gungima, wangusonegele mukanda. Wanguwambelele egi: “Nguza mubatijiwa gu asamble adi muza! Ngudi mutshigina guvutuga gu Haïti ha gutshita mudimo gifua pionye spesiale gu khanda yene imoshi ngakhalele misionere wa enya Mormon.” Wakalegele diago ngenyi; watshitshile mudimo ivo yavula gifua pionye spesiale hamoshi nu mukaji’enji.

MUDIMO GU EUROPE NU GU AFRIQUE

Atutumile ha guya mukalagala mudimo gu khanda ya Europe inyi yakhalele yaleba ha gulongesa lukuma luabonga. Mu 1992, tuahetele gu dimbo dia Ljubljana gu Slovénie; mvuaji jiami jiakudile nji mu dimbo diene gutuama dia guya gu Italie. Mu tangua diene, ita yakhalele mulandula guluiwa gu khanda yakhalele mutamegewa thomo egi Yougoslavie. Betele ya mu dimbo dia Vienne gu Autriche nu babiro a mu dimbo dia Zagreb gu Croatie nu dimbo dia Belgrade gu Serbie ene akhalele mutadila mudimo wa gulongesa gu khanda yene. Mangino, gifutshi giagasue gia gu khanda yene giabuile gale nu Betele yagio.

Tuakhalele naye gulonguga zuelelo dihe-dihe guene nu gujidila nu ndaga jiko. Athu a mu dimbo diene akhalele muzuela egi: “Jezik je težek,” yakotelesa egi “zuelelo dietu didi diakola.” Ndaga yene yakhalele diago ya giamatshidia! Tuasuangulugile nu khadilo diakhalele nadio aphangi dia gutshigina usombegeshi wagasue wakhalele mukalegewa mu ulondegi wetu, tuamonele nji luholo Yehowa wakhalele guakuatesa. Tuamonele nji luholo Yehowa wana londega ndaga nu guzumba guagasue mu tangua diabonga. Tualongugile malongo avula tangua tuakhalele gu Slovénie, uvi malongo ako tualongugile mu membo ako atukuatesele ha gukolesela mu malamba tuataganele nawo guene.

Uvi ndaga jialanduile gusombegesa mu monyo wetu. Mu 2000, atutumile gu Côte d’Ivoire. Mu mbeji ya Novembre 2002, tualengele gu Côte d’Ivoire mukunda nu ita, tuayile gu Sierra Leone. Gifutshi giene giakhalele nji nu ita yatshitshile ivo 11, uvi ita yene yakatugile guhua. Tuavuile gikenene ha gukatuga gu Côte d’Ivoire mu gisagumuisa ngenyi. Uvi malongo tuadiangele guzula mu membo ako atukuatesele ha gukhala nu gusuanguluga.

Tuadihanele muavula mu mudimo wa gulongesa handaga athu avula akhalele mutshigina giamatshidia, tuasuangulugile nji nu aphangi a mala nu a akhetu anyi akolesele mu ita ivo yavula. Aphangi akhalele phutu, uvi akhalele nu gusuanguluga ha guhana athu ako ima akhalele nayo. Phangi mumoshi wa mukhetu wahanele Debbie milele ya gusudiga. Debbie wakhalele mutshigina gutuna, uvi phangi muene wamuwambelele egi: “Tangua tuakhalele mu ita, aphangi a mu ifutshi iko atukuatesele. Henyaha esue nji tudi naye gukuatesa athu ako.” Ame nu Debbie tuazudile nji desizio dia gulandula gifezegeselo giawo.

Gungima tuavutugile gu Côte d’Ivoire, uvi ita yazogele luko guene. Tualengele mu hélicoptère, tuazudile muthu nu muthu phamba kuba dia bakilo 10; yakhalele mu mbeji ya Novembre 2004. Tuabandele mu camp ga masuta a gu France, lusugu lualanduile tuayile gu Suisse. Tuahetele gu Betele ya gu Suisse mukatshi dia phipha; aphangi a gu Komite ya Filiale nu aphangi akhalele mulongesa gu École de formation ministérielle nu akaji’awo atuyambele nu gusuanguluga guagasue, atuhanele ima ya gudia ya tshuya-tshuya nu chocolat jia enya gu Suisse. Tuasuangulugile muavula.

Atutumile gu Ghana mukunda nu tangua diazonda, gungima tuavutugile gu Côte d’Ivoire handaga ita yakhalele muya nu guhua. Gisemo gia aphangi giatukuatesele ha gukolesela mu malamba agasue tuakhalele mutagana nawo nu mu midimo tuakhalele mutshita mukunda nu tangua diazonda mu membo ako. Ame nu Debbie tuana jiya egi ikhale aphangi ana gutuzumba muavula mu ulondegi wa Yehowa, uvi tushigo naye gutangiza egi adi naye gutshita ngenyi handaga idi ginemo giawo. Tuakotelesele nji egi malamba agasue akhalele gutubuila akhalele mukatshi dia formasio yakhalele gutuhana Yehowa.

MUDIMO MU IFUTSHI YA GU KHANDA YA EST

Mu 2006, tuahetele mukanda wa gu Hunji dia Akulu Atuameji wakhalele gutuwambela egi tudi naye guya mutshita mudimo mu ifutshi idi gu khanda ya Est. Tuakhalele naye gulonguga mazuelelo ako nu gujidila nu ndaga jiko, tuatagenele nji nu malamba. Tuakhalele nu ndaga jiko jiavula jia gulonguga gu khanda yene handaga guakhalele nu milonga yavula ya politike nu ya ikombelelo. Tuasuangulugile nu mazuelelo avula akhalele mu mahungu, tuamonele nji gudivua guakhalele mukatshi dia aphangi handaga akhalele mulandula malongo ana gutuhana ulondegi wa Yehowa. Tuasuangulugile nu aphangi a mala nu a akhetu handaga avula mukatshi diawo akhalele mukolesela nu gikhesa giagasue usageshi wa enya fami jiawo, mafuta awo a khalasa, mafuta awo a mudimo nu wa athu ana khala hehi nawo.

Mu 2012, tuayile gu asamble spesiale mu dimbo dia Tel-Aviv gu Israël. Asamble ene akhalele mbala ya thomo akombeledi a Yehowa a gu khanda yene adibungishile avula ngenyi ha gukombelela Yehowa sendese mu Pantekote ya mu givo 33 G.Y. Tuajiyilego gubuita asamble ene mutshima!

Mu ivo yene, tuatumiwe ha guya mutala aphangi a mu gifutshi ginyi mudimo wetu watunyishiwe. Tuayile nu mikanda yetu iko, tuayile mu mudimo wa gulongesa, tuayile nji gu ba asamble azonda akhalele mukalegewa. Masuta akhalele nu mata akhalele musanda ima ya athu mafundo agasue, uvi tuadivuile mu ubambi tangua tuakhalele muwenda nu gutema guagasue nu aphangi ako.

TUAVUTUGA LUKO GU AFRIQUE

Mu 2013, atutumile ha guya mutshita mudimo gu Betele ya Kinshasa mu Congo; gifutshi giene giana khala giakoma nu giabonga, uvi aphangi a mu gifutshi giene ataganele nu lamba dia makuta nu ita yavula. Tangua tuajiyile egi tudi muya guene, tuazuelele egi: “Tudi mujiya Afrique muabonga; tudi hehi ha guya.” Uvi tuakhalele luko nu ndaga jiavula jia gulonguga handaga tuakhalele naye gutshita bavayaje mu njila jiabola. Tuasuangulugile nji nu ndaga jiavula guene gifua luholo aphangi akhalele mukolesela malamba nu gusuanguluga guagasue, guzumba guawo mukunda nu mudimo wa gulongesa nu ngolo ana kalagala ha guya mu gudibungisa gua mu hungu nu gu ba asamble. Tuamonele nji luholo Yehowa wakuatesele mudimo wa gulongesa ha gulandula guya gutuama. Mu ivo tuabalegesele mu mudimo wa tangua diagasue mu Congo, tuahetele malongo avula, tuahetele nji mafuta ana khala gifua enya fami yetu.

Gu gisugishilo gia 2017, atutumile gu Afrique du Sud. Betele ya mu gifutshi egi yakhala yakoma diago, khenji tuakalegele gale mudimo mu Betele ya luholo elu; nu yene midimo tuakhalele naye gutshita yakhalele ihe-ihe mukunda nu esue. Tuakhalele naye gulonguga ndaga jiavula, uvi malongo tuahetele mu mafundo ako atukuatesele. Tuana zumba aphangi a mala nu a akhetu ana kombelela Yehowa nu gujinginyina guagasue sendese mualeha. Tuana khala nu gusuanguluga ha gumona luholo aphangi a gu Betele ana kalagala mudimo mu gudivua ikhale akatuga mu mafundo avula nu adi nji nu ilema ya gudisha. Yehowa wana kuatesa akombeledi enji ha gukhala mu guhuima handaga ana tshita yagasue ha gusudiga umuthu uhe-uhe nu ha gukalegela malongo a Biblia.

Ame nu Debbie tuabalegesa gale ivo yavula mu mudimo wa tangua diagasue; tuatshita mudimo mu mafundo avula, tualonguga mazuelelo avula, tuatshita nji yagasue ha gujidila nu ndaga jiko jiavula. Tuatagenele nu malamba avula, uvi Yehowa watukuatesele, watumonesele nji guzumba guenji gua giamatshidia mu njila ya ulondegi wenji nu mu njila ya aphangi’etu. (Ngi. 144:2) Ndaga jiavula tualongugile mu mudimo wa tangua diagasue jiatukuatesele ha gukhala akombeledi a Yehowa abonga.

Ngana hana mvuaji jiami mersi mukunda nu ndaga jiagasue jiabonga angulongesele; ngana suanguluga nji nu ukuateshi wa mukaji’ami Debbie nu ifezegeselo yabonga ya aphangi a ha mavu agasue. Tangua ame nu Debbie tuana tangigiza mu ndaga mbajitubuila mu masugu adi muza, yana gutukuatesa ha gulandula guzula malongo gudi Mulongeshi wetu Wakoma Yehowa.