Longi dia 12

Ndaga Tshi Yanubwa Mu Gufua?

Gufua gudi gukonda lujingu. Gufua gudi gifua tulo tuavula. (Yone 11:11-14) Athu agufua ajiilego guvua, gumona, guzuela, nga gutangiza ata ndaga ingoshi. (Mulongeshi 9:5, 10) Dibundu dia mambo dianulonga egi athu agufua anuya mu gifutshi gia ivule mukunda nu gujinga nu malemba awo afile gale. Bibila dishigo mulonga ngenyi ndo.

Athu agufua ajiilego gutukwatesa, nunji ajiilego gututshita gubola. Mbala jia vula athu anutshita ima ya shigu jiamambuta nu guhana milambu inyi anumona ene egi yajiya gusuanguluisa athu agufua. Ndaga ii yanusuanguluisa Nzambi go mukunda idi mukatuga gu ndaga jia mambo jia Satana. Yajiilego gusuanguluisa athu agufua ata hazonda, mukunda anujingago. Tuajiilego guvua athu agufua woma nga guakombelela. Tudi naye gukombelela khuta Nzambi.​—Matayo 4:10.

Athu a gufua mbaajinga luko. Yehowa mbaumufutumuna athu a gufua haguahua lujingu mu phaladisu dia mavu. Tangua diene didi mu masugu adi muza. (Yone 5:28, 29; Makalegelo 24:15) Nzambi wajiya guzugisa athu afile gale gifua wajiya guzugisa muthu gu tulo.​—Mako 5:22, 23, 41, 42.

Matangi a guzuela egi tuanufua go adi mambo anumuanga Satana Diabulu. Satana nu ndele jienji anutuma athu hagutangiza egi ivule y’athu agufua idi nu monyo nunji yanulowa athu misongo nu guamonesa malamba ako. Satana wanudimba athu, mbala jiavula wanuadimba gu nzoji nu mu gimona-meso. Yehowa wanutuna athu anyi anuzuela nu athu agufua.​—Mikhuala 18:10-12.