LONGO DIA 21

Betele idi itshi?

Matemue a Yehowa mbadi adi mukalagala mudimo mu departema ya ifuanesa gu Betele — Fundo diana kalegewa ifuanesa gu États-Unis

Themua wa Yehowa mumoshi udi mukalagala mudimo waguzola mikanda gubetele ya Allemagne — Allemagne

Temue mumoshi wa Yehowa udi muwovua milele gu Betele mu gifutshi gia Kenya — Kenya

Aphangi ana guhaga ima ya gudia gu mesa adi mulondega ima mu inzo ya gudia gu Betele ya Colombie — Colombie

Mu Giebelu, jina Betele diakotelesa “Inzo ya Nzambi.” (Gisendeselo 28:17, 19) Jina diene diatagana diago ha guzuelela jinzo jiji Mathemua a Yehowa ana tunga mu membo avula, mafundo mudimo wa gujiyisa lukuma lua bonga udi mutuamezewa nu gulondegewa. Hunji-dia-Akulu Atuameji dianakhala gu New York, gu États-Unis, fundo didi bilo dia koma dia Mathemua a Yehowa, guanakalegewa mudimo wa gutuameza mabilo a bafiliyale agasue. Anyi agasue anakalagala midimo mu mafundo ene ana guatamega fami ya Betele. Luholo yanakhala mufami ingoshi, anetu amu fami ya Betele nji anakhala fundo dimoshi, anakalagala mudimo fundo dimoshi, anadia fundo dimoshi, anagulonguga Biblia hamoshi.—Lungimbo 133:1.

Fundo dingoshi dia funu anetu afami yene anagudihana nu mutshima ungoshi. Mu Babetele agasue, anetu amala nu akhetu ana gudihana diago tangua dia gasue ha gukalagala gutshigina gua Nzambi nu ndaga jidi mutala Ufumu wa Nzambi. (Matayo 6:33) Anaguafuta ndo falanga uvi anaguahana fundo dia gukhala, ima ya gudia, anaguahana tufalanga tua zonda mukunda nu gusumba ima ya zonda. Muthu wagasue gu Betele udi nu mudimo amuhanele ha gukalagala, yajiya gukhala mu bilo, mu gikhukhu, nga mu fundo dia gudia. Ako anakalagala mudimo mu fundo dia guzola nu gujitshiga mikanda, ako ana komba luphango, guweva milele, nu gulondega mashinyi a luholo nu luholo.

Fundo mudimo wa kola wana kalegewa hagula mudimo wa gujiyisa lukuma lua bonga lua ufumu uye gutuama. Funu ya gudiangela ya Betele idi egi giamatshidia gidi mu Biblia gihetele athu avula. Gifua gamukanda gaga udi nago ha mago gadi mukuatesa athu avula hagujiya gia matshidia. Gasonegewe mu utuameji wa Hunji-dia-Akulu Atuameji enji gatumiwe mu njila ya internet mu jikhama jia baekipe ya abalumunyi mu Babetele amu ifutshi yagasue. Yazolewe mu mashinyi anazola mikanda ya vula mu ntangua dia zonda. Gungima yatumiwe mu mahungu gubalega 110 000. Fami ya betele yana gudihana gu midimo eyi yagasue, enji ana gudihana ha gula mudimo wa gujiyisa lukuma luabonga uwu udi naye gukalegewa phushi phushi utagenesewe.—Mako 13:10.

Akhuatshi anakalagala mudimo gu Betele enji itshi ya londegewe mukunda nu ene?
Mudimo utshi udi naye gukalegewa phushi phushi aphangi agu Betele mumoshi mumoshi ana hana mago?