Yesu Wayile gu Yelusalema nu Fami Yawo

Tudi mu printemps. Mu tangua diene, Yozefe nu enya fami yenji, nu mafuta awo, nu aphangi’awo ako akhalele gudilonda ha guya gu Yelusalema. Ana guya gale guene givo giagasue. Akhalele muya guene ha gukalagala wano wa Pake, gifua muakhalele mutoga Mukhuala. (Mikhuala 16:16) Gula muthu wakatuga gu Nazaleta ha guya gu Yelusalema, udi naye guwenda bakilometre 120. Athu agasue akhalele nu gusuanguluga, nu ndaga jiavula jia gulonda. Mu tangua diene, Yesu wakhalele nu ivo 12, wakhalele musuanguluga muavula nu luendu lua guya gu wano nu lua gumona luko tempelo.

Gudi Yesu nu enya fami yenji, wano wa Pake wakhalelego ndaga ya gukalagala phamba lusugu lumoshi. Lusugu lualanduile lusugu lua Pake, luakhalele gisendeselo gia wano wa mapha adi ashigo a gumba levire. Wano wene wakhalele mukalagala masugu sambadi. (Mako 14:1) Wano wene wakhalele nji mukatshi dia sungi ya Pake. Ha gukatuga gumbo diawo gu Nazaleta ha guya gu Yelusalema, nu masugu akhalele mubalegesa gu Yelusalema, uu nu guvutuga guawo, yakhalele guaazula phoso jiyadi. Uvi mu givo ginyi, Yesu wakalegele ndaga imoshi, enji ndaga yene yakalegele egi abalegese masugu avula gu Yelusalema. Ajiyile ndaga yene tangua akhalele muvutuga gu Nazaleta.

Tangua akhalele muvutuga, Yozefe nu Mariya atangijile egi Yesu udi mukatshi dia aphangi’awo nu mafuta awo akhalele muya nawo njila imoshi. Habuile phipha, amaganele; mu tangua diene, amonelego Yesu. Hene, amukambele mukatshi dia aphangi’awo, uvi amumonelego. Mun’awo watotele! Yozefe nu Mariya avutugile gu Yelusalema ha gumukamba.

Amukambele lusugu lua mudidi, uvi amumonelego. Mu lusugu lua mbadi nji, amumonelego. Ajile gumumona mu lusugu lua thathu, mukatshi dia sugu imoshi ya tempelo. Amusangele mukatshi dia alongeshi a enya Yuda. Wakhalele guategelela, guahula mihu, nu guayitugisa mukunda nu ndunge jienji.

Mariya wamuhudile egi: ‘Mun’ami, mukunda natshi watukalagala ngenyi? Tala, sh’aye nu ame tuagukamba gale nu gikenene giavula.’—Luka 2:48.

Yesu wayitugile luholo ene akhalelego mujiya fundo gakhalele. Hene, waahudile egi: ‘Mukunda natshi muakhadi gungukamba? Enue muajiyilego egi ngudi naye gukhala monzo ya Sh’ami ba?’—Luka 2:49.

Tangua Yesu wadimonele nu mvuaji jienji, avutugile gu Nazaleta, enji walanduile guatumagela. Walanduile nji gukula mu ndunge nu mu gitala. Ngatshima Yesu wakhalele galenge, wakhalele muzumbiwa gudi Nzambi nu gudi athu. Yadiago, sendese ulenge wenji, Yesu udi gifezegeselo giabonga handaga wakhalele musha ndaga jia mu nyuma ha fundo dia thomo, wakhalele nji gutumagela mvuaji jienji.