Yesu Udi nu Ivo 12

Yozefe nu Madiya akhalele mujinga gu Nazaleta nu Yesu nu an’awo ako a mala nu a akhetu. Yozefe wakhalele mutshita mudimo wa mabaya ha gukuatesa fami yenji; wakhalele gualongesa ndaga jiatadila Yehowa nu mikhuala yenji. Enya fami yenji akhalele muya gu sinagoga ha gukombelela. Akhalele muya nji givo nu givo gu Yelusalema mukunda nu wano wa Pake.

Tangua Yesu watagenesele ivo 12, enya fami yenji atshitshile vuayaje yaleha ha guya gu Yelusalema. Mu tangua diene, athu avula ajile gu Yelusalema mukunda nu wano wa Pake. Gungima Yozefe nu Madiya asendesele guvutuga gumbo diawo, atangijile egi Yezu wadiangela gale nu athu ako. Amukambele mukatshi dia athu agujiya, uvi amumonelego.

Avutugile gu Yelusalema. Akambele Yesu masugu thathu. Mu lusugu lua thathu ayile mu tempelo. Amusangele guene yagukhala hakatshi dia alongeshi; wakhalele guategelela nu guahula mihu yabonga. Alongeshi akhalele gudihula mukunda nu ndaga jiakhalele muzuela Yesu, hene asendesele gumuhula mihu. Adihudile diago muavula mukunda nu mvutu jienji. Akotelesele egi Yesu wakhalele mujiya muabonga mikhuala ya Yehowa.

Yozefe nu Madiya adisagesele muavula. Madiya wazuelele egi: ‘Mona, tuagukamba mafundo agasue! Wakhadi gui?’ Yesu wazuelele egi: “Muajiyilego egi ngudi naye gukhala monzo ya Tata wami?”

Yesu wavutugile nu mvuaji jienji gu Nazaleta. Yozefe walongesele Yesu luholo lua gutshita mudimo wa mabaya. Udi mutangiza egi Yesu wakhalele muthu wa luholo lutshi hakhalele muene muvuala? Yesu walanduile gukula nu gutema; Nzambi nu athu akhalele gumutshigina.