Yone udi Mulondega Njila

Tangua Yone mun’a Zakaliya nu Elizabete wakudile, wabuile profete. Yehowa watumine Yone ha gulongesa athu egi Masiya mbawuza. Hafundo dia gulongesa mu ba sinagoga nga mu membo, muene wayile mulongesa mu mavu a luselenga. Athu akhalele mukatuga gu Yelusalema nu mu membo agasue a gu Yudea ha guza mutegelela ndaga jiakhalele mulongesa Yone. Waalongesele egi ha gusuanguluisa Nzambi, adi naye gubemba gutshita ndaga jiabola. Tangua avile ndaga jiakhalele mulongesa muene, avula mukatshi diawo abembele gutshita ndaga jiabola, hene Yone waabatijile mu Muta wa Yordane.

Yone gakhalelego mukamba gukhala nu ima yavula-vula. Wakhalele musudiga milele yalondewe nu uvuji wa shamo, wakhalele mudia matulu nu wigi wa mu foto. Athu akhalele gudihula muavula diago. Nu ene Afalese anyi akhalele enya lulendo nu Asadoke akhalele muza gumutala. Yone waawambelele egi: ‘Mudi naye gusombegesa makalegelo enu nu gubalumuna mutshima. Mutangizago egi mudi nu ndando yavula handaga mudi muzuela egi mudi ana a Abalahama. Gukhala ana a Abalahama gushigo mukotelesa egi mudi ana a Nzambi.’

Athu avula amuhudile egi: ‘Itshi tudi naye gutshita ha gusuanguluisa Nzambi?’ Yone waawambelele egi: ‘Gula udi nu milele iyadi, hana umoshi gudi muthu muko udi mulamba.’ Udi mujiya mukunda natshi Yone waawambelele ngenyi? Wakhalele mutshigina egi alandudi enji ajiye egi ha gusuanguluisa Nzambi, adi naye guzumba athu ako.

Yone wawambelele afutshishi a gitadi egi: ‘Khalenu muzuela giamatshidia, mukhadigo mumba mambo.’ Wawambelele nji masuta egi: “Mumbilago athu mambo ha guafunda.”

Nganga-nzambi nu enya Levi ayile nji ha gutala Yone, amuhudile egi: “Aye udi nanyi?” Athu agasue akhalele mutshigina gumujiya.’ Yone waawambelele egi: ‘Ame ngudi dijui dia muthu udi muta mukanda mu mavu a luselenga, ngudi mukuatesa athu ha gujiya Yehowa gifua luholo Yeshaya wazuelele.’

Athu akhalele musuanguluga nu ndaga jiakhalele mulongesa Yone. Avula mukatshi diawo akhalele gudihula gula muene wakhalele Masiya. Uvi muene waawambelele egi: ‘Gudi nu muthu wangubalega gukoma udi muza. Ngushigo ngatagana ha gujitulula shinga jia saphata jienji. Ame ngudi mubatiza nu meya, uvi muene mbawumibatiza nu nyuma yabonga.’