Yone Mubatiji Walondele Njila

Ivo 17 yabalega gale sendese Yesu gakhalele muhula alongeshi mihu mu tempelo tangua wakhalele nu ivo 12. Yakhalele mu sungi ya printemps, mu givo 29 gia tangua dietu. Athu avula akhalele muzuela ndaga jiatadila Yone, phangi’a Yesu yonu wakhalele mulongesa mu dimbo diagasue gu khanda ya westi ya Muta wa Yordani.

Yone wakhalele muyitugisa athu, ikhale mu muila nga mu mbimbi jienji. Milele yenji yakalegewe nu uvuji wa shamo, luko wakhalele musudiga mukaba wa gilema mu mbunda. Wakhalele mudia matulu nu wigi. Ndaga jitshi gakhalele mulongesa? Wakhalele mulongesa egi: “Balumunyenu mitshima yenu ndaga ya Ufumu wa mu dilu udi gale hehi.”—Matayo 3:2.

Ndaga jiakhalele mulongesa Yone jiakhalele musuanguluisa athu ajile gumutegelela. Athu avula akotelesele egi adi naye gubalumuna mitshima yawo, nu matangi nu makalegelo awo, adi naye nji gubemba ndaga jiabola akhalele mutshita thomo. Athu ajile gumutegelela akatugile gu ‘Yelusalema nu mu Yudea yagasue nu membo a gu khulo ya Muta wa Yordani.’ (Matayo 3:5) Athu avula abalumuine mitshima yawo. Yone waabatijile, waavuwile mu muta wa Yordani. Mukunda natshi?

Wakhalele mubatiza athu ha gumonesa egi athu ene abalumuine diago mitshima mu gubola atshitshile mukunda nu gikotelo gia mukhuala wa Nzambi. (Makalegelo 19:4) Uvi, ishigo athu agasue akhalele naye gubatijiwa. Tangua mafumu a mangumba, Afalese nu Asadoke ajile gudi Yone, waatamegele egi “vungu dia nyoga jia thoga.” Waadijigile egi: “Kalagalenu ndaga jidi mumonesa egi muabalumuna mitshima. Mutangizago mu mitshima yenu egi, ‘Esue tudi ana a Abalahama.’ Ngudi gumiwambela egi: Nzambi wajiya guzugisa seso eji, jibue ana a Abalahama. Luenyelu giphangu gidi gale gia guthuphula ha gubatula mitshi gu miji. Mutshi wagasue ushigo muhaga mabundu abonga, udi naye gukokewa enji nu gumbiwa mu tshuya.”—Matayo 3:7-10, NW.

Athu avula akhalele mutegelela Yone, nu ndaga gakhalele mulongesa jiakuatele mitshima yawo, enji wabatijile athu avula. Hene, atumine nganga-nzambi nu enya Levi ha gumuhula egi: “Aye udi nanyi?”

Yone wazuelele nu mutshima wagasue egi, “ame ngushigo Klisto.”

Amuhudile egi, “Aye udi giwa nanyi? Udi Eliya ba?”

Waavutudile egi: ‘Ndo, ngushigo Eliya.’

Amuhudile egi, ‘Udi profete ba?’ handaga profete wakoma wazuelele Moize udi naye guza.—Mikhuala 18:15, 18.

Yone wavutudile egi, “Ndo gami.”

Ene akolesele gumuhula egi: “Udi giwa nanyi? Tuwambele, tuvutuge nu mbimbi gudi athu atutumi. Aye giwa udi muzuela itshi mukunda nu aye?” Yone wazuelele egi: “Ame ngudi dijui dia muthu udi muta mukanda mu temu egi, ‘Londegenu njila ya Yehowa,’ gifua muazuelele profete Yeshaya.”—Yone 1:19-23, NW.

Ene amuhudile luko egi : ‘Gila aye ushigo Klisto, ushigo Eliya nga Profete, itshi udi giwa mubatijila athu?’ Waahanele mvutu yabonga egi: ‘Ame ngudi mubatiza nu meya. Uvi muthu mumoshi yowu mukatshi dienu, yowu mushigo mujiya, muene udi muza gungima diami.’—Yone 1:25-27.

Yadiago, Yone watshiginyile egi wakhalele mulondega njila, luholo wakhalele mukuatesa athu ha gubalumuna mitshima yawo ha gutshigina Masiya watendelewe, yonu mbawubua Fumu. Yone wazuelele mukunda nu Masiya egi: ‘Muthu udi muza gungima diami wangubalega jingolo. Ame ngushigo watagana ha gukangula jisaphata gu malu enji.’ (Matayo 3:11) Yadiago, Yone wazuelele egi: ‘Muthu udi muza gungima diami wangubalega gukoma, handaga muene wadiangele gukhala gutuama diami, ame khenji nguvualewa gale ndo.’—Yone 1:15.

Yadiago, ndaga jialongesele Yone egi, “Balumunyenu mitshima yenu ndaga ya Ufumu wa mu dilu udi gale hehi,” jiakhalele jiatagana. (Matayo 3:2) Yamonesele diago gudi athu agasue egi gualeha ndo mudimo wa gulongesa wa Yesu Klisto, Fumu watombele Yehowa, uza musendesa.