Yesu Wakalagala Ndaga ya Thomo ya Gushimana

Masugu thatu abalega gale sendese Natanaele wabuile mulandudi wa Yesu. Yesu nu alandudi enji ako a thomo ayile gu nordi ya distrike dia Galile, gumbo dia alandudi enji. Ayile gu Kana, dimbo dia Natanaele. Dimbo dia Kana diakhalele gu milundu, gu nordi ya Nazaleta, dimbo diakudile Yesu. Atamegewe guene mukunda nu wano wa ulo.

Gin’a Yesu wayile nji gu wano wene. Mariya wakhalele futa dia enya fami ya athu anyi adizudile mu ulo. Idi mumonega egi muene nji wakhalele mukatshia dia athu akhalele muyamba athu. Hene, wamuenene gatshididi egi matombe ahuile, wawambelele Yesu egi: ‘Ashigo luko nu matombe.’—Yone 2:3.

Ngenyi, Mariya wakhalele nu funu egi Yesu akalagale gima gimoshi. Yesu wazuelele mu luholo lumoshi ngenyi ha gumonesa egi watunyine. Wazuelele egi: ‘Mukhetu’eye, ndaga itshi udi naye nu ame?’ (Yone 2:4) Yesu wakhalele Fumu watombewe gudi Nzambi. Hene, sh’enji wa mu dilu wakhalele naye gumudijiga ndaga jia gukalagala, uvi enya fami yenji nga mafut’enji ndo. Mariya wabembele ndaga yene ha mago a Yesu, wawambelele athu akhalele muyamba athu egi: ‘Kalagalenu ndaga yagasue mbayimiwambela muene.’—Yone 2:5.

Akhalele nu mabungu a meya asambano; dibungu diagasue diakhalele mungina ba litre gubalega 40. Yesu wawambelele enya mudimo egi: ‘Zalesenu mabungu pha nu meya.’ Gungima, waadijigile egi: ‘Henyaha, batenu ndambo ya meya, muye nawo gudi muwendeshi wa wano.’—Yone 2:7, 8.

Muwendeshi wa wano wadihudile ha gumona matombe abonga a luholo elu, uvi gakhalelego mujiya egi meya abalumugile matombe. Hene, watamegele yala, wamuwambelele egi: ‘Athu ana guhana thomo matombe abonga. Gula athu akuatewa matombe, wajiya giwa guaahana matombe ashigo abalega gubonga. Uvi aye na wabamba matombe abonga uu nu luenyelu!’—Yone 2:10.

Eyi ndaga ya thomo ya gushimana ya kalegele Yesu. Tangua alandudi enji ahe-ahe amonele ndaga eyi ya gushimana, gutshigina guawo gudi muene guakolele. Gungima dia wano, Yesu, nu gin’enji, nu aphangi’enji ayile gu Kaphelenauma, gu nordi ya bungu dia Kianga gia Galile.