Alandudi Nguana Abua Alowi a Athu

Tangua enya gu Nazaleta akambele gushiya Yesu, wakatugile wayile gu dimbo dia Kaphelenauma, hehi nu Kianga gia Galile, giana gutamegewa luko egi “kianga gia Genesaleta.” (Luka 5:1) Ngenyi, ya tagenesele profesi idi mu mukanda wa Yeshaya, idi muzuela egi athu a gu Galile adi mujinga gu khulo ya kianga mbaamona muanya wakoma.—Yeshaya 9:1, 2.

Tangua diahetele Yesu gu Galile, walanduile gulongesa egi “Ufumu wa mu dilu udi gale hehi.” (Matayo 4:17) Yesu wamonele alandudi enji nguana. Mu masugu abalega, akhalele muwenda nu Yesu, uvi sendese avutugile nu Yesu mu mavu a Yudea, avutugile luko mudimo wawo wa gulowa jishui. (Yone 1:35-42) Henyaha, yakhalele tangua dia gukhala hehi nu Yesu hagula a ahane formasio ya mudimo wa gulongesa, owu mbaalandula gutshita gula muene waya genji.

Tangua Yesu wakhalele muwenda mu khulo ya kianga, wamonele Simona Phetelo, nu phangi’enji Andre, nu mafuta awo ako, wawa mulonda wanda wa gulowela. Yesu wanginyine mu wato wa Phetelo, enji wamudijigile ha gusuenesa wato mukatshi dia meya. Hahetele ene ndambo gualeha, Yesu wakhalele hashi nu wasendesele gulongesa giamatshidia giatadila Ufumu, gudi athu avula akhalele agudibungisa gu khulo ya kianga.

Gungima, Yesu wawambelele Phetelo egi: “Suenesa wato mukatshi dia meya bugu didi jinga, mbenu mawanda enu a gukuatela jishui.” Phetelo wamuvutudile egi: “Fumu, tuatshitshi mudimo phipha yagasue, tuakuatelego nga gima, uvi mukunda nu mbimbi yaye ngudi mumba mawanda.”—Luka 5:4, 5.

Ambile mawanda awo, enji akuatele jishui jiavula. Mawanda awo asendesele gutawuga! Asendesele gutoga mafut’awo akhalele mu wato uko hehi, ha guza guaakuatesa mu phushi. Mawato agasue mbadi azalele pha nu jishui jiavula, jianemele, mawato asendesele gushiwuga. Tangua Phetelo gamonele ngenyi, wafugamele gutuama dia Yesu, wazuelele egi: ‘Fumu, katuga hehi nu ame, handaga ngudi muthu wabola.’ Yesu wamuwambelele egi: ‘Uvigo woma. Sendese mangino, aye mbawukuata athu a monyo.’—Luka 5:8, 10.

Yesu wawambelele Phetelo nu Andre egi: ‘Ngulandulenu, ame mbangumibuisa alowi a athu.’ (Matayo 4:19) Watamegele nji alowi a jishui ako mbadi, Yakoba nu Yone, ana a Zebede. Ene nji atunyilego, amulanduile. Mala awa nguana abembele mudimo wawo wa gulowa jishui, abuile alandudi a thomo a Yesu akhalele gumulandula tangua diagasue.