Yesu Wamonega Gudi Alowi a Jishui

Gungima dia gumonega gua Yesu gudi apostolo enji, Phetelo wayile mulowa jishui mu Kianga gia Galilea. Wakhalele nu Toma nu Yakoba nu Yone nu alandudi ako. Alowele phipha yagasue uvi akuatelego nga ishui imoshi.

Mu gimenegena gia lusugu lualanduile, amonele muthu mumoshi ha mbungu. Muthu muene waahudile ha sambua dia kianga egi: ‘Muakuata jishui ba?’ Ene amuhanele mvutu egi: “Ndo!” Muthu muene waawambelele egi: “Mbenu wanda gu khanda ya madia ya wato.” Akalegele gifua muaawambelele muthu muene, wanda wazalele pha nu jishui, akhalelego nu luholo lua guwunana. Yone wakotelesele mbala imoshi egi muthu muene wakhalele Yesu. Hene wazuelele egi: “Yonu Fumu!” Phetelo wadimbile mu muta mbala imoshi, wasendesele guzua uu nu hahetele muene ha mbungu. Alandudi ako alanduile mu wato.

Tangua ahetele ha mbungu, amonele dipha nu ishui holu dia makala a tshuya. Yesu waawambelele ha gulezela ndambo ya jishui hagula adie. Gungima wazuelele egi: “Izenu mudie.”

Tangua amanesele gudia, Yesu wahudile Phetelo egi: ‘Wana gunguzumba gubalega mudimo wa gulowa ba?’ Phetelo wamuvutudile egi: “Ayi Fumu, aye mujiya egi ngana guguzumba.” Yesu wamuwambelele egi gula idi ngenyi, “disa ana a imeme yami.” Yesu wamuhudile luko egi: ‘Phetelo, wana gunguzumba ba?’ Phetelo wamuvutudile egi: “Ayi Fumu, aye mujiya egi ngana guguzumba muavula diago.” Yesu wamuwambelele egi: “Bamba imeme yami yazonda.” Yesu wamuhudile mbala ya thathu. Phetelo wavuile gikenene giavula. Hene wamuvutudile egi: ‘Fumu, aye wana jiya ndaga jiagasue, udi mujiya egi ngana guguzumba.’ Yesu wamuwambelele egi: “Disa imeme yami yazonda.” Gungima wawambelele Phetelo egi: “Landula gunguhata.”