Ngatshima Wakalagele Ndaga jia Gushimana, Enya gu Nazaleta Amutunyile

Yesu wakalegele mudimo lusugu lua mudidi. Gungima dia gukatuga gu dimbo dia Dekapholi, Yesu wasagele mukhetu mungoshi wakhalele mukata misongo ya lusanza lua mahatshi. Wafuzumuine nji mun’a Yayilo wa mukhetu. Uvi gasugishilego phamba nu muene. Hakatugile Yesu gumbo dia Yayilo, ifofo mbadi yamulanduile, yakhalele mukaluluga egi: ‘Tuvuile khenda, Mun’a Davidi.’—Matayo 9:27.

Tangua atamegele Yesu egi “Mun’a Davidi,” mala ene amonesele gutshigina guawo egi Yesu wakhalele muthu udi naye guhingana nguasa ya ufumu wa Davidi, egi muene udi Masiya. Yesu watshitshile gifua gashigo mutegelela gutamega guawo; Yajiya gukhala egi watshiginyile gutala gula athu ene mbaalandula gumutamega, uvi ene nji abembelego. Hanginyine Yesu monzo, mala ene mbadi amulandudile. Yesu waahudile egi: ‘Mudi nu gutshigina egi ame ngajiya gutshita ndaga eyi ba?’ Azuelele nu gutshigina guagasue egi: “Ayi, Fumu.” Ngenyi, Yesu waakuatele gu meso, wazuelele egi: “Ndaga imitshitshiwe gifua mudi gutshigina guenu.”—Matayo 9:28, 29.

Mu tangua diene, asendesele gumona! Yesu waawambelele ndaga luholo gakhalele muwambela athu akhalele muene musaga, waatunyishile ha gutela athu ako lumene. Uvi luholo akhalele nu gusuanguluga guavula, ayile muta lumene luene gudi athu avula mu mafundo a gudisha.

Hakatugile mala ene mbadi, athu anginyishile luko muthu mumoshi gakhalelego muzuela handaga wakhalele nu demo. Tangua Yesu wazolele demo diene, muthu muene wasendesele guzuela. Thundu y’athu yashimanele, azuelele gamba: ‘Khenji gumuenega galego ndaga ya luholo elu mu Isalele.’ Afalese akhalele hene. Akhalelego nu luholo lua gutuna ndaga ya tshitshile Yesu. Uvi, asendesele luko gusha giphapha mukunda nu ngolo jiana gukalegela Yesu ha guzola bademo, azuelele egi: ‘Muene udi mukatula nyuma jiabola mu jina dia fumu wa bademo.’—Matayo 9:33, 34.

Matangua azonda gungima, Yesu wavutugile gu Nazaleta, fundo dia kudile muene uvi giphungu egi wayile nu alandudi enji. Sendese Yesu walongesele mu sinagoga ya dimbo diene, mbeji jiavula jia balega gale. Thomo athu asuangulugile nu ndaga jiagasue jiazuelele muene, uvi gungima atunyile malongo enji, akambele nji luholo lua gumushiya. Henyaha Yesu wavutugile luko guene ha gulola gukuatesa luko athu ene.

Mu Lusugu lua Guhuluguga, Yesu wayile mu sinagoga ha gulongesa. Athu avula adihudile egi: “Muthu owu wahetele ndunge eji nu milonga eyi ya gushimana gui?” Azuelele luko egi: ‘Muene gashigo mun’a muenya mabaya ba? Gin’enji gashigo Mariya, aphangi enji a mala ashigo Yakoba nu Yozefe nu Simona nu Yuda ba? Aphangi’enji a akhetu agasue ashigo mukatshi dietu ba? Hene, muthu owu wahetele ngolo eji jiagasue gui?’—Matayo 13:54-56.

Athu akhalele mujiya egi Yesu wakhalele muenya gu Nazaleta. Adihudile egi: ‘Tuamumonele tangua gakhalele mukula, luholo lutshi muene wajiya gukhala Masiya?’ Wahanele ijiyishilo yavula—ikhale ndunge jiakola jia Yesu nga ndaga jia gushimana jiatshitshile muene—uvi ene amutunyine. Nu enya giphuta gia Yesu amutunyine handaga akhalele ajidila gale n’enji. Gishina giene Yesu wazuelele egi: ‘Profete wana nemesewa muagasue uvi mu dimbo dienji dia gubutshiwa ndo nu mu fami yenji.’—Matayo 13:57.

Yesu wayitugile luholo athu amoneselego gutshigina. Gishina giene gatshitshilego ndaga jia gushima jiavula guene, ‘uvi wasagele phamba athu azonda luholo wahagele mago holu dia mito yawo.’—Mako 6:5, 6.