LONGO DIA 16

Itshi Yesu Watshitshile Tangua Diakhalele Muene ha Mavu?

Wajiya Guyizola mu Mashinyi

Athu avula ana mona Yesu mu matangi awo gifua mona wa gitebe, ako ana gumumona gifua profete watema, uvi ako gifua muthu wa gufua. Uvi tuajiya gujiya ndaga jiavula jiamutadila gula tualonguga ndaga jiatadila lujingu luenji ha mavu ba? Mu longo edi, tuza mumona ndaga jiko jia ndando Yesu watshitshile nu luholo jiajiya gutukuatesa.

1. Mudimo utshi wa ndando Yesu watshitshile?

Mudimo wa ndando watshitshile Yesu wakhalele “gulongesa lukuma luabonga lua Ufumu wa Nzambi.” (Tanga Luka 4:43.) Walongesele lukuma luabonga egi Nzambi wakhalele naye guhaga ufumu wenji nga guvernema unu mbawumanesela malamba agasue a athu.a Yesu watshitshile mudimo wakola ivo thathu nu ndambo ha gulongesa athu lukuma luabonga.—Matayo 9:35.

2. Mukunda natshi Yesu watshitshile ndaga jia gushimana?

Biblia yana zuela egi ‘Nzambi wakuatesele Yesu ha gutshita ndaga jia gushimana.’ (Makalegelo 2:22) Nzambi wahanele Yesu ngolo jia guhenesa funji, jia gudisa athu avula, jia gusaga akhashi, nu gufuzumuna athu a gufua. (Matayo 8:23-27; 14:15-21; Mako 6:56; Luka 7:11-17) Ndaga jia gushimana jiakalegele Yesu jiamonesele diago egi Nzambi wamutumile. Jiakhalele nji mumonesa egi Yehowa udi nu ngolo jia gumanesela malamba agasue.

3. Malongo atshi tuajiya guzula mu luholo Yesu wajingile ha mavu?

Yesu wakhalele mutumagela Yehowa mu ndaga jiagasue. (Tanga Yone 8:29.) Ikhale Yesu watagenele nu usageshi ha mavu, uvi watshitshile ndaga jiagasue jiamutogele Sh’enji uu nu gu gufua guenji. Wamonesele diago egi muthu wajiya gukombelela Nzambi nu gujinginyina guagasue ikhale udi mutagana nu malamba. Yesu watubembele “gifezegeselo hagula [tuajiya] gulandula nganyo jienji muabonga.”—1 Phetelo 2:21.

TUKAMBE GUJIYA NDAGA JIAVULA

Tutadilenu luholo Yesu walongesele lukuma luabonga nu ndaga jia gushimana jiatshitshile muene.

4. Yesu walongesele lukuma luabonga

Yesu watshitshile ba kilometre avula mu njila jia fuphi ha gulongesa lukuma luabonga gudi athu avula. Tanga Luka 8:1, gungima zuelelenu mihu eyi yalandula:

Yesu wakhalele mulongesa phamba athu anyi akhalele gudibungisa ha gumutegelela ba?
Itshi Yesu gatshitshile ha guheta athu a gulongesa?

Nzambi wadiangele guzuela egi Masiya mbawulongesa lukuma luabonga. Tanga Yeshaya 61:1, 2, gungima zuelelenu mihu eyi yalandula:

Luholo lutshi Yesu watagenesele profesi eyi?
Udi mutangiza egi mangino athu adi nu funu ya guvua lukuma luabonga ba?

Yesu udi mubalega mu dimbo nu alandudi enji ako.

5. Yesu walongesele malongo a ndando

Yesu galongeselego phamba lukuma luabonga lua Ufumu wa Nzambi, uvi walongesele nji malongo a ndando ana kuatesa athu. Tuzulenu ifezegeselo yazonda idi mu Diskur dienji holu dia Mulundu. Tanga Matayo 6:14, 34 nu 7:12, gungima zuelelenu mihu eyi yalandula:

Malongo atshi a ndando Yesu wahanele mu verse eji?
Udi mutangiza egi malongo ene ajiya gukuatesa athu mangino ba?

Yesu udi muhana Diskur holu dia Mulundu gudi thundu ya mala nu akhetu nu ana.

6. Yesu watshitshile ndaga jia gushimana

Yehowa wahanele Yesu ngolo jia gutshita ndaga jiavula jia gushimana. Ha gumona gifezegeselo gimoshi, tanga Mako 5:25-34 nga ndo tala VIDEO. Gungima zuelelenu mihu eyi yalandula.

VIDEO: Mukhetu Mumoshi Wakhalele Mukata Wasagewa (5:10)

Mu video tuatala, mukhetu munu wakhalele mukata wahagele gutshigina guenji mu ndaga itshi?
Itshi ya gusuanguluisa mu ndaga eyi ya gushimana?

Tanga Yone 5:36, gungima zuelelenu muhu owu walandula:

Ndaga jia gushimana jiakalegele Yesu ‘jiamonesele’ itshi mukunda nu muene?

Yesu wafugama, udi muzuela nu mukhetu mumoshi udi muvua woma gungima dia gumusaga mu luholo lua gushimana gu misongo yenji ya lusanza lua mahatshi.

Wana guyijiya ba?

Ndaga jiavula tuana jiya jiatadila Yesu jiana khala mu mikanda nguana ya Biblia yana tamegewa egi ba Evanjile—Matayo, Mako, Luka, nu Yone. Muthu nu muthu, mu Evanjile yenji wasonegele ndaga jiko jiatadila Yesu jinyi jishigo mu ba Evanjile ako. Gula tuatanga mikanda yene yagasue nguana, tuana kotelesa diago muabonga ndaga jiatadila lujingu lua Yesu.

MATAYO

wasonegele Evanjile ya thomo. Evanjile yene yana zuelela muavula malongo a Yesu, nu malongo enji atadila Ufumu wa Nzambi.
MAKO

wasonegele Evanjile yahihia. Evanjile yene yana zuelela muavula ndaga jia gushimana.
LUKA

wana zuelela muavula isambu ya Yesu nu luholo luakhalele muene mukalegela akhetu ndaga.
YONE

wana zuelela muavula umuthu wa Yesu, wazuelele nji maga avula Yesu wakhalele muta nu mafuta enji nu athu ako.

ATHU AKO ANA ZUELA EGI: “Yesu wakhalele phamba muthu wabonga, uvi gakhalelego Masiya.”

Aye udi mutangiza egi itshi?

NDAGA WALONGUGA

Yesu walongesele ndaga yatadila Ufumu wa Nzambi, watshitshile ndaga jia gushimana, watumagele Yehowa mu ndaga jiagasue.

Mihu ya Guvutugila

Mudimo utshi wa ndando Yesu watshitshile hakhalele muene ha mavu?
Ndaga jia gushimana jiatshitshile Yesu jiakhalele mumonesa itshi?
Malongo atshi a ndando Yesu walongesele?

Longo edi diahua mu lusugu lua:

Desizio Ngazula

Ngudi naye gutala video “Sachez avec certitude que Dieu l’a fait Seigneur et Christ” (2^e partie) nga ndo gutanga Matayo mukhapho 5 uu nu mu 7 ha gujiya ndaga jiavula jiatadila mudimo wa Yesu.

Desizio Diko:

Desizio diko wazula

NDAGA JIKO JIA NDANDO

Ndaga itshi Yesu walongesele muavula?

“Le Royaume de Dieu: son importance pour Jésus” (Inzo Yaleha ya Mutaledi ya 1 Octobre 2014 ya français)

Tala mukunda natshi tuana tshigina egi Yesu watshitshile diago ndaga jia gushimana.

“Les miracles de Jésus: que vous enseignent-ils?” (Inzo Yaleha ya Mutaledi ya 15 Juillet 2004 ya français)

Tanga lumene lua yala mumoshi wasombegesele makalegelo enji tangua dialongugile muene luholo Yesu wakhalele gudisagesa mukunda nu athu ako.

“Je ne vivais que pour moi” (Inzo Yaleha ya Mutaledi ya 1 Octobre 2014 ya français)

Tala ndaga jiatshitshile Yesu jiahagewa mu ndonga gifua luholo jiakalegewe.

“Principaux évènements de la vie terrestre de Jésus” (Traduction du monde nouveau, Appendice A7)

a Malongo 31-33 mbaazuelela muavula Ufumu wa Nzambi.