Adama nu Eva Atuna Gutumagela Nzambi

Lusugu lumoshi, nyoga yatele maga nu Eva tangua diakhalele muene hakhenji. Yazuelele egi: ‘Idi yadiago egi, Nzambi wamitunyisa gudia mabundu a mitshi yagasue ba?’ Eva wazuelele egi: ‘Tuajiya gudia mabundu a mitshi yagasue, uvi tushigo naye gudia mabundu a mutshi umoshi; handaga gula tuadia, mbatufua.’ Nyoga yamuwambelele egi: ‘mbamushigo mufua. Gula muadia mabundu a mutshi wene, mbamubua gifua Nzambi.’ Ndaga yene yakhalele ya giamatshidia ba? Ndo, yakhalele ndaga ya mambo. Uvi Eva watshiginyile genji ndaga yene. Wasendesele gutala mabundu a mutshi wene muavula, gungima wasendesele gusuanguluga nawo. Wadile bundu dia mutshi wene, gungima wahanele nji Adama ha gudia. Adama wakhalele mujiya egi mbaafua gula atuna gutumagela Nzambi, uvi wadile genji bundu dia mutshi wene.

Gungima Yehowa watele maga nu Adama nu Eva mu lusugu luene. Waahudile egi mukunda natshi atunyi gumutumagela. Eva wazuelele egi idi gubola gua nyoga; uvi Adama wazuelele egi idi gubola gua Eva. Yehowa wakayele Adama nu Eva mu gilanga gia Edene handaga atunyile gumutumagela. Wahagela anjelo nu phogo yakhalele mulemuga tshuya ha mufulo wa gilanga gia Edene ha gula avutugago luko.

Yehowa wazuelele nji egi mbawuhana muthu wahuigile Eva ndola. Ishigo nyoga yakhalele muzuela nu Eva; handaga nyoga yana zuela ndo. Uvi yakhalele muanjelo mumoshi wabola watshitshile egi nyoga izuele. Muanjelo muene jina dienji Satana Diabulu. Watshitshile ngenyi ha guhuiga Eva. Mu masugu adi muza Yehowa mbawushiya Satana ha gula ahuigigo luko athu ha gutshita ndaga jiabola.