Athu 8 Ahuluga gu Mvula Yakola

Nowa wanginyile mu masuwa nu enya fami yenji nu shitu. Yehowa wakangele mufulo, mvula yasendesele gunoga. Mvula yanogele yavula diago, hene masuwa asendesele guzaluga. Meya azalele ha mavu agasue. Athu agasue abola anyi anginyilego mu masuwa, afile. Uvi Nowa nu enya fami yenji akhalele mu ubambi mukatshi dia masuwa. Akhalele nu gusuanguluga guavula luholo atumagele Yehowa!

Mvula yanogele masugu 40 nu phipha 40; gungima yahuile. Meya asendesele gushiginyina mage-mage. Gu gisugishilo masuwa amaganele holu dia milundu. Uvi meya akhalele wawa gawo avula mu mafundo agasue; Nowa nu enya fami yenji akhalelego nu luholo lua guzoga mu masuwa.

Meya asendesele gumigina mage-mage. Nowa nu enya fami yenji atshitshile givo gimoshi nu ndambo mu masuwa. Gungima Yehowa waawambelele ha guzoga mu masuwa; Nowa nu enya fami yenji azogele, yakhalele gifua angina mu mavu ahe-ahe. Ahanele Yehowa mulambu ha gumuhana mersi avula luholo luaahuluishile muene gu Mvula Yakola.

Yehowa wasuangulugile diago nu mulambu wene. Wazuelele egi mbagashigo mushiya luko ima yagasue ha mavu gu Mvula Yakola. Wazolele khongolo ya thomo mu dilu ha gumonesa egi mbawumutagenesa ndaga yalayi muene. Wamonele gale khongolo ba?

Gungima Yehowa wawambelele Nowa nu enya fami yenji ha guvuala ana nu guzalesa mavu.