LONGO DIA 30

Rahabe Wasuega Athu Ayile Mutala Dimbo mu Gisuegi

Tangua enya Isalele ayile mutala dimbo mu gisuegi, ayile gumbo dia mukhetu mumoshi, jina dienji Rahabe. Fumu wa gu Yeliko wajiyile ndaga yene, hene atumile masuta enji ha guya mukamba athu ene gumbo dia Rahabe. Mukhetu muene wasuegele mala mbadi holu dia yangi, wawambelele masuta ha guahata gu khanda iko. Wawambelele mala mbadi ayile mutala dimbo mu gisuegi egi: ‘Ngudi mujiya egi Yehowa mbawumikuatesa nu mbawumihana gifutshi. Ngabuba, ngulayenu egi mbamunguluisa nu enya fami yami.’

Mala ene awambelele Rahabe egi: ‘Tuagulaya egi gushigo nga muthu mumoshi wa mu fami yaye mbawushiyiwa.’ Azuelele luko egi: ‘Udi naye gujitshiga shinga yabenga ha fenetre yaye, ngenyi enya fami yaye mbaashiyiwago.’

Inzo ya Rahabe idi nu shinga yabenga ya gujitshiga ha fenetre, yasala ya gumagana tangua ibayi ya Yeliko yamuagana

Gungima Rahabe waabulumuishile ha fenetre nu shinga. Mala ene ayile gu khanda ya milundu, adisuegele guene masugu thathu, gungima avutugile gudi Yoshua. Gungima enya Isalele azawugile Muta wa Yordane, adilondele ha guya mutambula gifutshi. Yeliko yakhalele dimbo dia thomo enya Isalele abingile. Yehowa waawambelele ha gujieta dimbo mbala imoshi mu lusugu; akhalele naye gutshita ngenyi mu masugu 6. Uvi mu lusugu lua 7, ajietele dimbo mbala 7. Gungima nganga-nzambi jiashigile phungi, masuta ambile milolo yakola ya ita. Ibayi ya dimbo yamuanganele! Uvi inzo ya Rahabe yakhalele holu dia gibayi yabuilego. Rahabe wahulugile nu enya fami yenji handaga washidile Yehowa mutshima.

‘Luholo lumoshi nji, Rahabe . . . wamonewe egi udi muthu wabonga mu midimo yenji, hayambele muene athu atumiwe nu gisemo giagasue nu haazolele muene ha guya mu njila iko?’—Yakoba 2:25