Davidi nu Saula

Tangua Davidi washiyile Goliyate, Fumu Saula wamubuishile fumu wa masuta enji. Davidi wabingile ita yavula, athu akhalele gumuzumba muavula. Tangua diagasue Davidi wakhalele mukatuga gu ita ha guvutuga gu inzo, akhetu akhalele muzoga nu gushiga tungoma nu gukina. Akhalele muyimba egi: ‘Saula washiyile inunu ya athu, uvi Davidi washiya makumi a inunu ya athu!’ Saula wasendesele guvila Davidi fuwa, wakhalele mukamba luholo lua gumushiya.

Davidi wakhalele mujiya gushiga gitare muabonga. Lusugu lumoshi tangua diakhalele muene mushigila fumu Saula gitare. Fumu wamusonuele mulumbu nu ngolo jiagasue. Davidi wadiwungile mbala imoshi, mulumbu wene wakuatele gu gibayi. Gungima, Saula wakambele maluholo avula a gushiya Davidi. Gishina giene Davidi walengele, wayile gudisuega mu mavu a luselenga.

Saula wazudile masuta 3 000, ahatele Davidi. Gungima Saula wahetele gu wina dimoshi diakhalele mosh’a seso fundo Davidi nu athu enji adisuegele. Athu a Davidi amufetesele egi: ‘Wuwu okazio wabonga diago wa gushiya Saula.’ Davidi wayile hehi nu Saula wakokele mulele wenji wa holu. Uvi Saula gajiyilego. Gungima Davidi wavile gikenene luholo ganemeselego muthu Yehowa watombele ha gukhala fumu. Watunyishile athu enji ha guluisa Saula. Gungima watamegele Saula, wamuwambelele egi wahetshi okazio wa gumushiya uvi wamubembi nu monyo. Saula wasombegesele matangi’enji a gukamba gushiya Davidi ba?

Ndo. Walanduile gukamba Davidi ha gumushiya. Mu phipha imoshi Davidi nu muehu wenji Abishayi, anginyile mu phundo ya Saula mu gisuegi. Abnere, suta diakalele mubamba Saula wakhalele gu tulo. Abishayi wawambelele Davidi egi: ‘Wuwu okazio wabonga diago! Ngubembe ngumushiye.’ Uvi Davidi wamuwambelele egi: ‘Yehowa muene hakhenji mbawudi gumushiya. Tuzule mulumbu wenji nu bungu dienji dia meya, tuye nayo.’

Davidi wakandugile holu dia mulundu wakhalele hehi nu phundo ya Saula. Wakalulugile egi: ‘Mukunda natshi wabambelego fumi’aye? Mulumbu wa fumi’aye nu bungu dia meya idi gui?’ Saula wavuile dijui dia Davidi, wazuelele egi: ‘Wakhala naye gungushiya, uvi wangushiyilego. Ngumujiya egi aye mbawubua fumu ha fundo diami gu Isalele.’ Saula wavutugile gumbo dienji. Uvi athu ako a mu fami ya Saula akhalele muzumba Davidi.