Yesu Watomba Saula

Saula wakhalele muenya Roma, wavualewe gu Talese. Wakhalele Mufalese, wakhalele mujiya mikhuala ya enya Yuda muabonga; wakhalele nji musagesa Aklisto. Wakhalele mu ngina mu jinzo jia Aklisto agasue, wakhalele mukuata mala nu akhetu ha guamba mu bologo. Wakhalele nji hene tangua athu ashiyile Etiene nu maseso.

Uvi Saula gasugilego phamba gu Yelusalema. Watogele nganga-nzambi wakoma njila ha guya mukuata Aklisto mu dimbo dia Damase. Tangua Saula wahetele hehi nu dimbo dia Damase, kiajiji giakatugile mu dilu nu guhenya, giabulumugile ha fundo diakhalele muene. Saula wabuile hashi. Wavile dijui dimoshi gumuwambela egi: ‘Saula, mukunda natshi udi gungusagesa?’ Saula wahudile egi: ‘Aye nanyi?’ Dijui diene diazuelele egi: ‘Ame Yesu. Nda gu Damase, mbaguguwambela ndaga udi naye gutshita.’ Mu tangua diene, Saula wabuile gifofo. Hene amukuatele gu koko, ayile n’enji uu nu gu Damase.

Guakhalele nu Muklisto mumoshi mu dimbo dia Damase, jina dienji Ananiase. Yesu wamuwambelele mu vizio egi: ‘Nda gumbo dia Yudasa mu bala-bala diana tamegewa egi Magana, ukambe muthu mumoshi, jina dienji Saula.’ Ananiase wazuelele egi: ‘Fumu, ngavi gale lumene lua yala muene! Udi mumba alandudi aye mu bologo!’ Uvi Yesu wamuwambelele egi: ‘Nda! handaga ngatombi Saula ha gulongesa lukuma luabonga gudi athu a ifutshi iko.’

Tangua Ananiase wamonele Saula, wamuwambelele egi: ‘Phangi Saula, Yesu wangutuma ha guza gugukangula meso.’ Mbala imoshi, Saula wasendesele luko gumona. Walongugile ndaga jiatadila Yesu, gungima wabuile mulandudi wenji. Gungima dia gubatijiwa, Saula wasendesele gulongesa mu sinagoga hamoshi nu alandudi ako. Udi mutangiza egi enya Yuda adivile luholo lutshi tangua amonele Saula mulongesa ndaga jiatadila Yesu? Azuelele egi: ‘Yowu ishigo muthu wakhalele mukuata alandudi a Yesu ba?’

Saula walongesele athu akhalele gu Damase ivo thathu. Enya Yuda akhalelego muzumba Saula, hene ayile giphungi ha gumushiya. Uvi aphangi ajiyile ndaga yene, hene amulengesele. Amumbile moshi’a musanda, amubulumuishile mu shinga hanze ya dimbo.

Tangua Saula wahetele gu Yelusalema, wakambele gudibungisa nu aphangi. Uvi aphangi ene akhalele gumuvila woma. Mulandudi mumoshi wakhalele nu gisemo giavula jina dienji Barnabase, wamubatele gudi apostolo, waakotelesele egi Saula wasombegesele diago. Saula wasendesele gulongesa lukuma luabonga nu gikhesa mu hungu dia gu Yelusalema. Gungima asendesele gumutamega egi Phaula.