Yoyada Wamonesa Gikhesa

Yezabele wakhalele nu mun’enji mumoshi wa mukhetu jina dienji Ataliya; mona muene wakhalele nu makalegelo abola gifua gin’enji. Wadizudile mu ulo nu fumu wa gu Yuda. Tangua mulumi’enji wafile, mun’enji wasendesele guhinyina ha fundo dienji. Uvi tangua mun’enji wafile, Ataliya wadibuishile fumu wa gu Yuda. Gungima wakambele luholo lua gushiya athu agasue mu fami ya ufumu; washiyile athu agasue akhalele naye gubua mafumu gu Yuda, washiyile nji nu ene ajigulu enji. Athu agasue akhalele gumuvila woma.

Nganga-nzambi Wakoma Yoyada nu mukaji’enji Yehosheba akhalele mujiya egi ndaga jiakhalele mutshita Ataliya jiakhalele jiabola diago. Ahagele monyo wawo mu gingonza tangua asuegele mujigulu wa Ataliya mumoshi wa yala wa gitebe, jina dienji Yoase. Akhalele gumusasa mu tempelo.

Tangua Yoase watagenesele ivo 7, Yoyada wabungishile mafumu agasue nu enya Levi, waawambelele egi: ‘Bambenu muabonga mufulo wa tempelo, nga muthu mumoshi ganginyigo.’ Gungima, Yoyada wabuishile Yoase fumu wa gu Yuda, wamusudigile gifulu gia ufumu gu muto. Enya gu Yuda azuelele mu dijui diakola egi: ‘Fumu akhale nu monyo!’

Tangua Ataliya wavile athu avula muhaga matululu mu tempelo, wayile mbala imoshi guene. Hamonele muene egi abuisa Yoase fumu, wakalulugile egi: “Anguyila giphungi! Anguyila giphungi!” Mafumu amukuatele, amuzolele hanze, amushiyile. Itshi atshitshile mukunda nu ndaga jiabola jiabembele muene mu gifutshi?

Yoyada wakuatesele athu ha gukota gikotelo nu Yehowa; amulayele egi mbamukombelela phamba muene. Yoyada wamuangele tempelo ya Bale nu wasasumuine isongo itshinyi-itshinyi. Watombele nganga-nzambi nu enya Levi ha gutshita mudimo mu tempelo hagula athu ajiya gukombelela Yehowa guene. Watombele nji athu ha gubamba mifulo ya tempelo hagula muthu wa usala ganginyigo. Gungima nganga-nzambi Yoyada nu mafumu ako azudile Yoase, amuhagele ha nguasa ya ufumu. Enya Yuda asuangulugile muavula. Asendesele gukombelela Yehowa mu guhuima, handaga Ataliya nu gikombelelo gia Bale giakhalelego luko. Wamona luholo gikhesa gia Yoyada giakuatesele athu avula?