Diabulu Walola Yesu

Tangua Yesu wabatijiwe, nyuma ya Nzambi yamubatele mu mavu a luselenga. Gadilego nga gima gimoshi masugu 40, hene nzala yakola yamukuatele. Gungima Diabulu wajile mulola Yesu nu wamuwambelele egi: “Gula udi mun’a Nzambi, wambela maseso awa abue mapha.” Uvi Yesu wamuhanele mvutu idi mu Biblia egi: ‘Yasonegewe egi: ‘Muthu gashigo naye gukhala nu monyo phamba mukunda nu mapha. Uvi udi naye gutegelela mbimbi jiagasue jidi muzoga mu kano dia Yehowa.’

Gungima Diabulu wawambelele Yesu egi: ‘Gula udi diago mun’a Nzambi, tshiphuga holu dia yangi dia tempelo ubue hashi, handaga yasonegewe egi: ‘Nzambi mbawutuma anjelo enji ha guguyamba.’ Yesu wavutugile luko ndaga jidi mu Biblia egi, yasonegewe luko gamba: ‘Ushigo naye gulola Yehowa Nzambi waye.’

Gungima Satana walezele Yesu mawufumu agasue a ha mavu nu umonyi nu lutumbu, wamuwambelele egi: “Mbanguguhua ima eyi yagasue gula wangufugamena nu wangukombelela.” Uvi Yesu wamuwambelele egi: ‘Satana, katuga! handaga yasonegewe egi udi naye gukombelela phamba Yehowa.’

Gungima Satana wakatugile, anjelo ajile nu ahanele Yesu ima ya gudia. Sendese lusugu luene Yesu wakhalele mulongesa lukuma luabonga lua Ufumu, handaga wene mudimo wajidile muene ha mavu. Athu akhalele musuanguluga muavula nu ndaga jiakhalele mulongesa Yesu, hene akhalele gumulandula fundo diagasue diakhalele muya muene.