Yesu Watomba Apostolo 12

Gungima dia gutshita mudimo wa gulongesa givo gimoshi nu ndambo, Yesu wakhalele naye guzula desizio dimoshi dia ndando yavula. Akhuatshi Yesu wakhalele naye gutomba ha gutshita n’enji mudimo? Akuatshi Yesu wakhalele naye guhana formasio ha gutuameza Hungu dia Uklisto? Yesu wakhalele nu funu ya ukuateshi wa Yehowa ha guzula desizio diene. Hene, wayile mukhala gu mulundu hakhenji, wakombelele phipha ya mudidi. Mu gimenegena, watamegele alandudi enji, watombele apostolo 12 mukatshi diawo. Aye mujiya majiya a apostolo ene? Akhalele: Phetelo, Andele, Yakoba, Yone, Filipho, Tadayo, Baletelemi, Toma, Matayo, Yakoba mun’a Alafayo, Simona nu Yudasa Isakaliote.

Apostolo ene 12 akhalele mutshita n’enji vuayaje hamoshi. Yesu waahanele formasio, gungima waatumile ha guya mulongesa. Yehowa waahanele ngolo jia gukaya bademo nu gusaga athu.

Yesu wakhalele mutamega apostolo ene 12 egi mafut’enji; wakhalele guashila mutshima. Afalese akhalele mutangiza egi aposotolo anginyilego makhalasa nu akhalele athu agithuhu. Uvi Yesu waahanele formasio ha gutshita mudimo wa gulongesa. Akhalele nu Yesu mu tangua dia gubalega ndando mu monyo wenji ha mavu; yakotelesa egi gutuama egi afue nu gungima dia gufuzumuga guenji. Yesu nu Apostolo enji agasue akhalele enya gu Galileya. Ako mukatshi diawo akhalele nu akhetu.

Apostolo akhalelego athu atagana, akhalele nji mujimbila. Matangua ako akhalele muzuela ndaga gutangiza ndo; akhalele nji muzula badesizio abola. Matangua ako akhalelego mumonesa khadilo dia guhuiminyina. Amanele nji ha gujiya muthu udi nu ndando yavula mukatshi diawo. Uvi akhalele gawo athu abonga; akhalele muzumba Yehowa. Gungima dia gufua gua Yesu, ene atuamezele Hungu dia Uklisto.