Yesu Wasaga Muthu mu Lusugu lua Guhululuga

Afalese akhalelego muzumba Yesu, akhalele mukamba okazio wa gumukuata. Azuelele egi Yesu gashigo naye gusaga muthu mu Lusugu lua Guhululuga. Lusugu lumoshi, Yesu wamonele gifofo mutoga makuta mu njila. Wawambelele alandudi enji egi: ‘Talenu luholo ngolo jia Nzambi jikuatesa muthu yowu.’ Wafitshile mate hashi, waafutuile nu mavu, gungima wakungile muthu muene gu meso. Yesu wamuwambelele egi: ‘Nda uzue meya mu gijiba gia Siloe.’ Muthu muene watshitshile gifua luholo luazuelele Yesu, wasendesele gumona. Yakhalele mbala ya thomo ya gumona mu monyo wenji.

Athu adihudile diago. Azuelele egi: ‘Muthu yowu muene wakhalele mu njila mutoga ima, ishigo ngenyi?’ Muthu muene wazuelele egi: ‘Ngavualewe gifofo!’ Athu amuhudile egi: ‘Luholo lutshi udi mumona?’ Tangua muthu muene waawambelele ndaga jiakalegewe, amubatele gudi Afalese.

Muthu muene wawambelele Afalese egi: ‘Yesu wafutula mavu nu mate wangukunga gu meso, gungima wanguwambela egi nda uzue meya, tangua ngazui meya hene ngamonyi.’ Afalese azuelele egi: ‘Yesu gashigo musaga athu mu ngolo jia Nzambi, handaga udi guasaga mu Lusugu lua Guhuluguga.’ Uvi athu ako azuelele egi: ‘Gula ngolo jienji jishigo mukatuga gudi Nzambi, na luholo lutshi ludi muene mukalagagala ndaga eji jiagasue?’

Afalese atamegele mvuaji jia muthu muene, a ahudile egi: ‘Luholo lutshi mun’enu adi mumona?’ Mvuaji jienji jiavile woma handaga Afalese akhalele muzuela egi muthu wagasue washa gutshigina gudi Yesu udi naye gukayewa mu sinagoga. Hene azuelele egi: ‘Tushigo mujiya muhulenu muene hakhenji.’ Afalese ahudile muthu muene mihu yavula. Muthu muene waawabelele egi: ‘Ngamiwambela gale ndaga jiagasue ngudi mujiya. Mukunda natshi mudi mulandula gunguhula?’ Afalese avile khabu, amubishidile hanze.

Yesu wayile gudi muthu muene, wamuhudile egi: ‘Udi musha gutshigina gudi Masiya?’ Muthu muene wazuelele egi: ‘Ayi mbangusha gutshigina gudi Masiya, gula ngamujiya.’ Yesu wazuelele egi: ‘Ame ngudi Masiya.’ Yesu wamonesele diago muthu muene gisemo. Wamusagele, gungima wamukuatesele ha gumonesa gutshigina.