Yesu Wafuzumuna Lazalo

Yesu wakhalele nu mafuta thathu akola gu Betaniya. Akhalele Lazalo nu aphangi’enji a akhetu mbadi, Madiya nu Mata. Lusugu lumoshi, hakhalele Yesu ha sambua dia Yordane, Madiya nu Mata amutumidile mbimbi egi: ‘Lazalo udi mukata muavula. Tuabuba, za muphushi!’ Uvi Yesu gayilego mbala imoshi. Watshitshile luko masugu mbadi, gungima wawambelele alandudi enji egi: ‘Tuyenu gu Betaniya. Lazalo udi mubanda tulo, ngumuya guene ha gumuzugisa.’ Apostolo azuelele egi: Gula Lazalo udi mubanda, udi muza muvua muabonga.’ Yesu waawambelele haphelo egi: ‘Lazalo wafi.’

Tangua Yesu wahetele gu Betaniya, Lazalo wakhalele watagenesa gale masugu nguana mu malumba. Athu avula akhalele muza ha guhana Madiya nu Mata gikhesa. Tangua Mata wavile egi Yesu yowu muza, wayile muphushi ha gumutagana. Wazuelele egi: “Fumu, nga wakhadi haha nga mun’etu gafilego.” Yesu wamuwambelele egi: ‘Phangi’aye mbawufuzumuga. Mata, watshigina ndaga eyi ba?’ Mata wazuelele egi: ‘Ngudi mujiya egi mbawufuzumuga.’ Yesu wamuwambelele egi: “Ame ngudi gufuzumuga nu monyo.”

Gungima Mata wayile muwambela Madiya egi: ‘Yesu udi haha.’ Madiya wayile muphushi gudi Yesu, athu avula akhalele gumulandula. Wabuile mu malu a Yesu, wakhalele mudila muavula. Wazuelele egi: ‘Fumu, nga wakhadi haha nga mun’etu yowu nu monyo!’ Yesu wamonele luholo Madiya wakhalele nu gikenene giavula, muene nji wasendesele gudila. Tangua athu amumonele mudila, azuelele egi: ‘Tala, wakhalele muzumba Lazalo muavula!’ Uvi athu ako akhalele muzuela egi: ‘Mukunda natshi gajilego muhuluisa futa dienji?’ Itshi Yesu wakhalele naye gutshita?

Yesu wayile gu malumba. Seso diakoma diakhalele dia gukanga ha mufulo wa malumba ene. Wawambelele athu egi: “Katulenu seso.” Mata wazuelele egi: ‘Idi naye gukhala egi udi gale muzoga vumba, handaga masugu nguana abalega gale.’ Uvi akatuile seso, Yesu wakombelele egi: “Tata, ngudi guguhana mersi luholo wanguvuila. Yadiago, ame mujiya egi wana gunguvuila tangua diagasue. Uvi ngudi muzuela mukunda nu athu adi haha hagula atshigine egi eye wangutumine.” Gungima watamegele mu dijui diakola egi: “Lazalo, zoga!” Ndaga imoshi ya gushimana yakalegewe: Lazalo wazogele mu malumba, wakhalele ya gulanga milele ya linene. Yesu wazuelele egi: “Mujitululenu, mubembenu aye.”

Tangua athu avula amonele ndaga yene, ashile gutshigina gudi Yesu. Uvi athu ako ayile muwambela Afalese ndaga yene. Sendese mu lusugu luene, Afalese akhalele mukamba okazio wa gushiya Yesu nu Lazalo. Mupostolo mumoshi jina dienji Yudasa Isakaliote, wayile gudi Afalese mu gisuegi, waahudile egi: ‘Mbamunguhana makuta guvula gutshi gula ngamihana Yesu?’ Adivile ha gumuhana makuta 30 a utadi wa siliva. Hene Yudasa wasendesele gukamba okazio wa guhana Yesu ha mago a Afalese.