“Gufuzumuga nu Monyo”

Yesu wakatugile gu Perea, wayile gu khanda ya dimbo dia Betaniya, diakhalele mu githeso gia bakilometre hehi nu mutatu gu esti ya Yelusalema. Mariya nu Mata, aphangi a Lazalo, akhalele mudila mukunda nu gufua gua Lazalo. Athu avula ayile guatala.

Gungima muthu mumoshi wawambelele Mata egi Yesu yowu muza, Mata wayile muphushi ha gumutagana. Yajiya gukhala egi ndaga yazuelele Mata, yene muene nu phangi’enji Mariya akhalele mutangiza sendese masugu nguana; wawambelele Yesu egi: ‘Fumu, ngawakhalele haha, nga mun’etu gafuilego.’ Ishigo mukotelesa egi Mata gakhalelego luko nu felela. Mata wazuelele egi: ‘Ngudi mujiya egi yagasue iwudi mutoga gudi Nzambi, muene mbawuguhana n’ayo.’ (Yone 11:21, 22) Wakhalele mujiya egi Yesu wajiya gukuatesa phangi’enji.

Yesu wamuvutudile egi: ‘Phangi’aye mbawufuzumuga.’ Mata wakotelesele egi, Yesu wakhalele muzuelela gufuzumuga gua athu mu masugu adi muza, felela diakhalele nadio Abalahama nu athu ako. Wamonesele gutshigina guenji egi ndaga yene mbayikalegewa diago, hazuelele muene egi: ‘Ame mujiya egi muene mbawuzuga mu hugo dia gufuzumuga gua masugu a gisugishilo.’—Yone 11:23, 24.

Guakhalele nu luholo egi Yesu amufuzumune mu tangua diene ba? Wawunguluishile Mata egi Nzambi wamuhanele ngolo jiavula gubalega gufua, wazuelele egi: ‘Muthu wangutshigina ame, nga wafua tshima, mbawukhala nu monyo; muthu udi nu monyo, wangutshigina ame mbagalodigo gufua.’—Yone 11:25, 26.

Yesu gazuelelego egi alandudi enji adi mujinga mbaashigo mufua nga hazonda. Wawambelele alandudi enji egi, ikhale muene hakhenji wakhalele naye gufua. (Matayo 16:21; 17:22, 23) Yesu watshiginyile guawambela egi gula muthu wamonesa gutshigina gudi muene, mbawuheta lujingu lua ivo nu ivo. Athu avula mbaheta lujingu luene mu njila ya gufuzumuga. Uvi, akombeledi a gujinginyina anyi mbaakhala mu lujingu mu gisugishilo gia mavu awa mbaashigo mufua nga hazonda. Hakiene, muthu wagasue udi mumonesa gutshigina gudi Yesu wajiya diago gudifelela egi mbagamonyigo gufua gua mayilago nga hazonda.

Yesu wazuelele egi: “Ngudi gufuzumuga nu monyo,” guakhalele diago nu luholo lua gukuatese Lazalo yago wakhalele wafui gale masugu nguana abalega? Yesu wahudile Mata egi: “Watshigina ndaga eyi ba?” Mata wazuelele egi: “Ayi Fumu, ngatshigina egi aye udi Klisto, Mun’a Nzambi udi muza ha mavu.” Mata wakhalele nu gutshigina egi Yesu wajiya gutshita ndaga imoshi, hene wayile phushi gu inzo ha guwambela phangi’enji egi: ‘Mulongeshi waji gale, udi gugutamega.’ (Yone 11:25-28) Mu tangua diene, Mariya wakatugile gu inzo mbala imoshi, athu akhalele nawo amulandudile handaga amonele gifua umuya gu majiamo a Lazalo.

Uvi, Mariya wayile gudi Yesu, wabuile mu malu enji nu gudila, muene nji wazuelele luko gifua phangi’enji Mata egi: ‘Fumu, ngawakhalele haha, nga mun’etu gafuilego.’ Yesu wavuile gikenene giavula luholo wamonele Mariya nu athu avula mudila, nu muene nji wadidile. Ndaga yene yakuatele diago mitshima ya athu akhalele hene. Uvi athu ako azuelele egi: ‘Yesu wakangudile meso a gifofo, gajiyilego gutshita egi Lazalo gafuigo ba?’—Yone 11:32, 37.