LONGO DIA 16
“Phangi’aye Mbawufuzumuga”!
“Yesu wawambelele [Mata] egi: ‘Phangi’aye mbawufuzumuga.’”—YONE 11:23.
LUNGIMBO 151 Jéhovah appellera
NDAGA JIDI MU LONGO EDIa
1. Ndaga itshi mona mumoshi wa yala wakalegele yamonesele egi wakhalele musha mutshima mu felela dia gufuzumuga?
MONA yala mumoshi jina dienji Matthew wakhalele mukata misongo yakola. Akhalele naye gumuphanda iphungu yavula. Lusugu lumoshi hakhalele muene nu ivo 7, wakhalele mutala emisio ya JW Télédiffusion nu enya fami yenji. Emisio yene yakhalele nu lungimbo luakhalele mumonesa luholo mbatuyamba athu afuile gale tangua mbaafuzumuga.b Tangua amanesele gutala emisio yene, Matthew wayambele mvuaji jienji, wawambelele egi: “Mama nu Tata muamona? Gula ame nji ngafua mbangumufuzumuga. Mushigo naye gudisagesa.” Tangiza luholo mvuaji jienji jiakhalele nu gusuanguluga tangua ajiyile egi, mun’awo udi nu gutshigina egi athu mbaafuzumuga diago.
2-3. Mukunda natshi tudi naye gutangigiza felela dietu dia gufuzumuga?
2 Mukut’etu agasue tudi naye gutangigiza muavula felela dia gufuzumuga diana gutuhana Biblia mukunda nu masugu adi muza. (Yone 5:28, 29) Mukunda natshi? Handaga tushigo mujiya tangua tuajiya gutagana nu ndaga imoshi ya lamba, gifua misongo nga gufuisa muthu mumoshi tuana zumba. (Mulo. 9:11; Yak. 4:13, 14) Felela dietu dia gufuzumuga diajiya gutukuatesa ha gukolesela mu malamba ene. (1 Tes. 4:13) Biblia yana zuela egi Sh’etu wa mu dilu wana gutujiya muabonga nu wana gutuzumba muavula. (Luka 12:7) Yehowa wana gutujiya diago muabonga, hene gula tuafua mbawutufuzumuna gifua luholo tuakhalele. Mbatukhala nji muwunguluga ndaga tuatshitshile. Yehowa wana gutuzumba muavula diago, watuhanele felela dia gujinga mayilago. Ikhale tuafua mbawutufuzumuna!
3 Mu longo edi, tuza mumona mukunda natshi tudi naye gusha mutshima egi athu mbaafuzumuga. Tuza nji muzuelela lumene lumoshi lua Biblia ludi diago mukolesa gutshigina guetu. Muto wa lumene wa longo edi wazudiwa mu lumene luene. Udi muzuela egi: “Phangi’aye mbawufuzumuga.” (Yone 11:23) Gungima tuza mumona nji luholo tuajiya gukolesa felela dietu dia gufuzumuga.
MUKUNDA NATSHI TUDI NAYE GUSHA MUTSHIMA EGI ATHU MBAAFUZUMUGA?
4. Gula muthu mumoshi watulaya ndaga, itshi tudi naye gujiya gutuama dia guyitshigina? Hana gifezegeselo.
4 Ha gutshigina ndaga idi gugulaya muthu, udi naye thomo gujiya gula muthu muene udi nu nzala nu ngolo jia guyitagenesa. Tufezegese gale, tangiza egi funji yakola yabolesa inzo yaye. Gungima futa diaye mumoshi waza guguwambela egi: ‘Ngudi gugukuatesa ha gulondega inzo yaye.’ Futa diaye muene wanazuela giamatshidia, udi gumushila nji mutshima egi wajiya gugukuatesa diago. Gula futa diaye muene wana tshita muabonga mudimo wa gutunga, udi nji nu ikadigilo yagasue, mbawumushila diago mutshima egi wajiya gugukuatesa ha gulondega inzo yaye. Itshi tuajiya guzuela giwa mukunda nu laji dia Nzambi dia gufuzumuna athu? Muene udi diago nu nzala nu ngolo jia gufuzumuna athu ba?
5-6. Itshi idi gututshiginyisa egi Yehowa udi nu nzala ya gufuzumuna athu?
5 Yehowa udi diago nu nzala ya gufuzumuna athu ba? Ayi. Yehowa wahanele athu avula asonegele Biblia nyuma yenji ha gusonega laji dia gufuzumuna athu mu masugu adi muza. (Yesh. 26:19; Hosh. 13:14; Gumo. 20:11-13) Gula Yehowa walaya ndaga, wana guyitagenesa diago. (Yosh. 23:14) Yadiago, Yehowa udi nu nzala ya gufuzumuna athu a gufua. Mukunda natshi tuazuela ngenyi?
6 Tutadilenu mbimbi jiazuelele Yobo. Wakhalele mujiya egi ikhale wafua Yehowa mbawumufuzumuna. (Yobo 14:14, 15) Yehowa udi nu nzala yakola ya gufuzumuna nji akombeledi enji agasue anyi afuile gale. Mbawaafuzumuna diago ha gukhala nu sante yabonga nu gusuanguluga. Itshi mbayibuila giwa athu avula anyi afuile uvi ahetelego luendu lua gujiya Yehowa? Yehowa mbawaafuzumuna nji. (Makal. 24:15) Mbawaahana luendu lua gubua mafut’enji nu ha guheta monyo wa ivo nu ivo ha mavu. (Yone 3:16) Yehowa udi diago nu nzala ya gufuzumuna athu.
7-8. Itshi idi gututshiginyisa egi Yehowa udi nu ngolo jia gufuzumuna athu a gufua?
7 Yehowa udi nji nu ngolo jia gufuzumuna athu ba? Ayi, handaga muene udi “Nzambi wa Ngolo Jiagasue.” (Gumo. 1:8) Hene udi diago nu ngolo jia gubinga mbalagaji jienji jiagasue, nu guene gufua. (1 Kol. 15:26) Gujiya ndaga eyi guana gutuhana diago ngolo. Tutadilenu gifezegeselo gia phangi wa mukhetu Emma Arnold. Muene nu enya fami yenji ataganele nu malamba akola mu tangua dia Ita ya Mbadi ya ha Mavu Agasue. Phangi Emma wahanele mun’enji wa mukhetu gikhesa mukunda nu athu akhalele muzumba muene anyi afuile mu camp de concentration Nazi. Wamuwambelele egi: “Gula athu a gufua mbaashigo mufuzumuga idi mumonega egi gufua gudi nu ngolo jiavula gubalega Nzambi.” Uvi ishigo ngenyi, handaga gushigo nga nu gima giabalega Yehowa ngolo! Nzambi wa ngolo jiagasue muene wafugile muthu, udi nji nu ngolo jia gumufuzumuna gula wafua.
8 Ndaga iko idi gututshiginyisa egi Nzambi udi nu ngolo jia gufuzumuna athu a gufua, idi handaga muene gana jimbilago nga ndaga imoshi. Wana tamega themua yagasue mu jina diayo. (Yesh. 40:26) Wana wunguluga nji athu agasue afuile gale. (Yobo 14:13; Luka 20:37, 38) Yehowa wana wunguluga ndaga jiazonda-zonda jiatadila athu anyi mbaafuzumuna muene. Wana jiya luholo athu ene akhalele nu ndaga akalegele gutuama egi afue.
9. Mukunda natshi tudi nu gutshigina egi Yehowa mbawutagenesa laji dienji dia gufuzumuna athu mu masugu adi muza?
9 Tudi nu gutshigina egi Yehowa mbawutagenesa laji dienji dia gufuzumuna athu mu masugu adi muza, handaga muene udi nu nzala nu ngolo jia guyikalagala. Ndaga iko idi gututshiginyisa egi Yehowa mbawutagenesa laji dienji idi handaga wafuzumuine gale athu ako. Biblia idi mumonesa egi Yehowa wahanele Yesu nu akombeledi enji ako agujinginyina ngolo jia gufuzumuna athu. Tutadilenu lumene lua muthu mumoshi Yesu wafuzumuine. Lumene luene ludi mu Yone mukhapho 11.
FUTA DIA YESU WAFUILE
10. Mulonga utshi wabuile tangua Yesu wakatugile gu Betaniya ha guya mulongesa ha sambua dia muta wa Yordane? Itshi Yesu wakalegele? (Yone 11:1-3)
10 Tanga Yone 11:1-3. Tangiza ndaga yakalegewe gu Betaniya gu gisugishilo gia givo 32 G.Y. Mu dimbo diene Yesu wakhalele nu mafut’enji akola, Lazalo nu aphangi’enji a akhetu mbadi; Madiya nu Mata. (Luka 10:38-42) Madiya nu Mata akhalele gudisagesa, handaga phangi’awo Lazalo wakhalele mukata. Mu tangua diene Yesu wakhalele ha sambua dia muta wa Yordane, hene atumile muthu ha guya gumuwambela ndaga yene. Gula muthu wakatuga gu Betaniya ha guya gu Yordane, wakhalele mutshita masugu mbadi mu njila. (Yone 10:40) Ndaga ya gikenene idi egi, tangua muthu muene wahetele fundo diakhalele Yesu, Lazalo wafuile. Ngatshima Yesu wajiyile egi futa dienji wafui, uvi watshitshile luko ha fundo diene masugu mbadi. Gungima wayile giwa gu Betaniya. Tangua Yesu wahetele mu dimbo diene, Lazalo wakhalele watagenesa gale masugu nguana mu malumba. Gungima Yesu wakalegele ndaga imoshi ha gukuatesa mafut’enji nu ha gutumbuisa Nzambi.—Yone 11:4, 6, 11, 17.
11. Lumene lua Lazalo ludi gutulongesa itshi mu ndaga yatadila ufuta wabonga?
11 Lumene elu ludi gutuhana malongo mu ndaga yatadila ufuta wabonga. Ha gufezegesa, tangua Madiya nu Mata atumile Yesu mbimbi, amutamegelego ha guza gu Betaniya. Uvi amuwambelele phamba egi, futa diaye wana zumba udi mukata. (Yone 11:3) Tangua Lazalo wafuile, Yesu wakhalele nu ngolo jia gumufuzumuna ngatshima wakhalele gualeha. Uvi wayile gu Betaniya ha gukhala hamoshi nu mafut’enji Madiya nu Mata. Aye nji wana khala nu futa mumoshi munu wajiya gugukuatesa ngatshima wamutogelego nga gima? Gula idi ngenyi, wajiya diago gumushila mutshima egi mbawugukuatesa mu “tangua dia lamba.” (Ish. 17:17) Esue nji tudi naye gukhala gifua Yesu, tudi naye gukhala mafuta abonga mukunda nu athu ako! Tutadilenu luko lumene luene ha gumona ndaga jiakalegewe gungima.
12. Ndaga itshi Yesu walayele Mata? Mukunda natshi Mata wakhalele naye gusha mutshima mu ndaga yene? (Yone 11:23-26)
12 Tanga Yone 11:23-26. Tangua Mata wavuile egi Yesu waheta hehi nu Betaniya, wayile muphushi ha gumutagana. Wamuwambelele egi: “Fumu, nga wakhalele haha, nga mun’etu gafilego.” (Yone 11:21) Yadiago, nga Yesu wakhalele hene mbala iko nga wasagele Lazalo. Uvi Yesu wakhalele mutshigina gutshita ndaga imoshi ya gushimana diago. Wawambelele Mata egi: “Phangi’aye mbawufuzumuga.” Wamuwambelele ndaga iko yakhalele naye gumutuma ha gutshigina ndaga yene. Wazuelele egi: “Ame ngudi gufuzumuga nu ngudi monyo.” Nzambi wahanele Yesu ngolo jia gufuzumuna athu. Mu tangua diene Yesu wakhalele wafuzumuna gale athu mbadi. Mon’a mukhetu mumoshi wafile, gungima dia matangua azonda wamufuzumuine. Gungima wafuzumuine nji muvuala muko wa yala, yajiya gukhala egi muvuala muene wafuzumugile mu lusugu gafile. (Luka 7:11-15; 8:49-55) Uvi Yesu wakhalele diago nu ngolo jia gufuzumuna muthu wakhalele wafui gale masugu nguana abalega, munu muila wenji wakhalele wasendesa gale gubola ba?
“LAZALO, ZOGA!”
Yesu wavidile mafut’enji khenda jiavula tangua ataganele nu lamba (Tala paragrafe 13-14)
13. Ha gutadila Yone 11:32-35, itshi Yesu wakalegele tangua diamonele muene Madiya nu athu ako mudila? (Tala nji gifuanesa.)
13 Tanga Yone 11:32-35. Tutalenu ndaga jiakalegewe gungima. Madiya phangi’a Lazalo wayile nji ha gutagana Yesu. Wazuelele luko ndaga jiazuelele phangi’enji Mata egi: “Fumu, nga wakhalele haha, nga mun’etu gafilego.” Madiya nu athu akhalele n’enji akhalele nu gikenene giavula diago. Tangua Yesu waamonele mudila, wavile gikenene giavula. Wavidile mafut’enji khenda jiavula, hene muene nji wasendesele gudila. Wakotelesele lamba athu anavua gula afuisa muthu ana zumba. Yadiago, Yesu udi nu nzala yakola ya gukatula ndaga jiagasue jiana gututuma ha gudila!
14. Ndaga yakalegele Yesu tangua diamonele muene Madiya mudila, idi gutulongesa itshi mukunda nu Yehowa?
14 Ndaga yakalegele Yesu hamonele muene Madiya mudila, idi gutulongesa egi Yehowa udi Nzambi wa khenda jiavula. Mukunda natshi tuazuela ngenyi? Gifua luholo tuayimonele mu longo diabalega, Yesu walanduile diago muabonga makalegelo a Sh’enji. (Yone 12:45) Yesu wadidile handaga wavidile mafut’enji khenda jiavula. Ndaga yene idi gutukuatesa ha gujiya egi Yehowa nji wana guvua khenda jiavula tangua tuana dila mukunda nu gikenene. (Ngi. 56:8) Ndaga yene idi naye gugutuma ha gukolesa ufuta waye nu Yehowa Nzambi wa khenda.
Yesu wamonesele egi udi nu ngolo jia gufuzumuna athu (Tala paragrafe 15-16)
15. Gifua luholo Yone 11:41-44 idi guyimonesa, ndaga itshi yakalegewe gu malumba a Lazalo? (Tala nji gifuanesa.)
15 Tanga Yone 11:41-44. Hayile Yesu gu malumba a Lazalo, watogele athu ha gukatula seso diakhalele ha mufulo. Uvi Mata watunyile, wazuelele egi yajiya gukhala muila wenji wasendesa gale guzola vumba. Yesu wamuwambelele egi: “Ngagulezelego egi gula udi nu gutshigina, eye mbawumona lutumbu lua Nzambi ba?” (Yone 11:39, 40) Gungima Yesu watalele gosa, watshitshile gisambu mu dijui diakola. Wakhalele mutshigina guhana Yehowa lutumbu mukunda nu ndaga yakhalele mutshigina gukalegewa. Yesu wamutamegele egi: “Lazalo, zoga!” Lazalo wazogele mu malumba! Yesu wakalegele ndaga imoshi yakhalele mumonega gifua yajiyilego gukalegewa nga hazonda.—Tala note d’étude idi mu Yone 11:17 mu Bible d’étude.
16. Luholo lutshi lumene ludi mu Yone mukhapho 11 ludi mukolesa gutshigina guetu mu felela dia gufuzumuga?
16 Lumene ludi mu Yone mukhapho 11 ludi mukolesa gutshigina guetu mu felela dia gufuzumuga. Luholo lutshi? Tujimbilago ndaga Yesu walayele Mata, wazuelele egi: “Phangi’aye mbawufuzumuga.” (Yone 11:23) Gifua Yehowa, Yesu nji udi nu nzala nu ngolo jia gufuzumuna athu. Luholo Yesu wadidile idi mumonesa egi udi nu nzala yakola ya gukatula gufua nu gikenene athu anavua gula muthu wafua. Tangua Yesu wafuzumuine Lazalo, wamonesele diago egi udi nu ngolo jia gufuzumuna athu. Tutangizenu nji ndaga Yesu wawambelele Mata egi: “Ngagulezelego egi gula udi nu gutshigina, eye mbawumona lutumbu lua Nzambi ba?” (Yone 11:40) Tudi diago nu ndaga jiavula jidi gututshiginyisa egi Yehowa mbawutagenesa laji dienji dia gufuzumuna athu. Itshi tuajiya gutshita ha gukolesa felela dietu dia gufuzumuga?
LUHOLO LUTSHI TUAJIYA GUKOLESA FELELA DIETU DIA GUFUZUMUGA?
17. Itshi tushigo naye gujimbila tangua tudi mutanga mene jia athu afuzumugile jidi mu Biblia?
17 Khala mutanga nu gutangigiza mene jia athu afuzumugile. Biblia yana zuelela mene jia athu nage anyi afuzumugile ha gujinga luko ha mavu.c Khala muzula tangua dia gulonguga mene jiene muabonga. Tangua udi mulonguga mene jiene, jiya egi mene jia mala nu akhetu nu ana anyi afuzumugile jishigo mene jia mambo. Uvi ajingile diago. Kamba gujiya malongo wajiya guzula mu mene jiene. Tangiza luholo lumene luagasue ludi mumonesa egi, Yehowa udi nu nzala nu ngolo jia gufuzumuna athu. Khala nji mutangigiza gufuzumuga gua Yesu handaga gudi nu ndando yavula. Jiya egi athu avula amonele Yesu gungima dia gufuzumuga guenji. Ndaga yene idi diago mukolesa gutshigina guetu.—1 Kol. 15:3-6, 20-22.
18. Luholo lutshi wajiya gukalegela muabonga ngimbo jietu jiana zuelela felela dia gufuzumuga? (Tala nji mbimbi goshi’a diyiji.)
18 Khala nji muyimba “ngimbo jia mu nyuma” jidi muzuelela felela dia gufuzumuga.d (Ef. 5:19) Ngimbo jiene jiana gutukuatesa diago ha gutshigina egi athu mbaafuzumuga diago. Jiana gutukuatesa nji ha gukolesa gutshigina guetu mu felela diene. Khala gujitegelela nu gujiyimba. Gungima muajiya guzuelela mbimbi jia ngimbo jiene mu gukombelela guenu gua mu fami. Kuata mbimbi jia ngimbo jiene mu muto. Gula lusugu watagana nu ndaga imoshi ya lamba nga wafuisa muthu wana zumba, nyuma ya Yehowa mbayiguwunguluisa ngimbo jiene, mbayiguhana nji ngolo jia gukolesela.
19. Ndaga jitshi tuajiya gutangigiza mukunda nu gufuzumuga? (Tala galuanda “Itshi Mbawaahula?”)
19 Tangigiza ndaga mbajikalegewa mu phaladiso. Yehowa watuhanele luendu lua gutangigiza ndaga mbajikalegewa mu mavu ahe-ahe. Phangi mumoshi wa mukhetu udi muzuela egi: “Ngakhalele muzula tangua diavula dia gutangiza luholo mbangukhala mu phaladiso, yakhalele gifua ngudi muvua vumba dia iyaji yabonga.” Tangiza tangua mbawudimona nu akombeledi a Yehowa agujinginyina anyi Biblia yana zuelela. Aye wana khala nu funu ya gudimona nu nanyi? Mihu itshi mbawumuhula? Tangiza tangua mbamukhala hamoshi nu athu wana zumba anyi afile gale. Tangiza mbimbi jia thomo mbawuzuela tangua mbawudimona nu athu anyi afile gale, luholo mbamudiyamba nu luholo mbawuzola masoji a gusuanguluga.
20. Itshi tudi naye gulandula gutshita?
20 Tudi muhana Yehowa mersi mukunda nu laji dienji dia gufuzumuna athu! Tudi musha mutshima egi athu mbaafuzumuga diago, handaga Yehowa udi nu nzala nu ngolo jia guyikalagala. Hene, tulandulenu gukolesa gutshigina guetu mu felela edi diabonga. Gula tuatshita ngenyi, mbatusuena hehi nu Nzambi udi mulaya muthu wagasue egi, ‘athu wakhalele muzumba anyi afile gale mbaafuzumuga!’
LUNGIMBO 147 Nzambi Watulaya Monyo wa Ivo nu Ivo
a Gula wafuishile gale muthu wana zumba, felela dia gufuzumuga diajiya diago gugukuatesa muavula. Luholo lutshi wajiya guwambela athu ako ndaga jiana gugutuma ha gusha gutshigina mu felela diene? Luholo lutshi wajiya gukolesa felela diaye dia gufuzumuga? Longo edi diza gutukuatesa mukut’etu agasue ha gukolesa felela dietu dia gufuzumuga.
b Video ya lungimbo luene idi nu muto wa lumene egi: Idi Hehi ha Guza, yazogele mu emisio ya JW Télédiffusion ya Novembre 2016.
c Tala galuanda, “Huit résurrections dont parle la Bible” mu Inzo Yaleha ya Mutaledi ya 1 Aout 2015 diyiji 4 ya Français.
d Tala ngimbo jidi mu mukanda wetu “Tuyimbilenu Yehowa nu Gusuanguluga Guagasue.” Lungimbo 139: “Tangiza Ndaga Mbawumona mu Phaladiso.” Lungimbo 144: “Tuhagenu Meso mu Gishimbigo!” Lungimbo 151: “Jéhovah appellera.” Tala nji ngimbo jietu jiko jidi mu jw.org, gifua: “Idi Hehi ha Guza,” “Le monde nouveau” nu “Tu verras.”