Yesu Wafuzumuga

Guakhalele nu muthu mumoshi wakhalele nu umonyi wavula, jina dienji Yozefe. Tangua Yesu wafile, wayile mutoga Philato njila ha gukatula kimbi gia Yesu gu mutshi. Yozefe walangele kimbi gia Yesu milele ya linene yabonga, wagimbile maji a vumba diabonga; gungima wagihagele mu malumba ahe-ahe. Wahagele seso diakoma ha mufulo wa malumba. Mafumu a nganga-nzambi awambelele Philato egi: ‘Tudi muvua woma, handaga alandudi a Yesu ajiya guya mukatula kimbi gia Yesu, ambi mambo egi wafuzumuga.’ Hene Philato waawambelele egi: ‘Zangulenu masuta muye nawo ha gutalela malumba.’

Gungima dia masugu thathu, akhetu ayile gu malumba mu gimenegena, asangele seso dia gukatula ha mufulo wa malumba. Amonele muanjelo mukatshi dia malumba, waawambelele egi: ‘Muvigo woma. Yesu wafuzumuga gale. Ndenu muwambele alandudi enji ha guya gudibungisa gu Galileya.’

Madiya wa gu Magadala wayile muphushi gudi Phetelo nu Yone. Waawambelele egi: ‘Muthu mumoshi wakatula kimbi gia Yesu!’ Phetelo nu Yone ayile phushi gu malumba. Tangua amonele egi malumba akhalele agithuhu, avutugile gumbo diawo.

Tangua Madiya wavutugile gu malumba, wamonele anjelo muyadi mukatshi, waawambelele egi: ‘Ngushigo mujiya fundo ahagi Fumi’ami.’ Gungima wamonele yala mumoshi, watangijile egi yakhalele muenya mudimo wa dihia, wamuhudile egi: ‘Fumu, ngabuba nguleze fundo wamuhagi.’ Uvi tangua muthu muene watamegele egi, “Madiya!” Wakotelesele mbala imoshi egi yakhalele Yesu. Wakalulugile egi: “Mulongeshi!” wayile gumuyamba. Yesu wamuwambelele egi: ‘Nda uwambele aphangi’ami egi wangumonyi.’ Madiya wayile mbala imoshi gudi alandudi, waawambelele egi ngamona Yesu.

Gungima mu lusugu luene, alandudi mbadi akatugile gu Yelusalema akhalele muya gu Emause. Muthu mumoshi wataganele nayo, asendesele guya hamoshi, waahudile egi itshi mudi muzuela. Azuelele egi: ‘Khenji uvua gaye ndo? Masugu thathu abalega gale, mafumu a nganga-nzambi ashiyile Yesu. Uvi henyaha akhetu ako adi muzuela egi wafuzumuga gale!’ Muthu muene waahudile egi: ‘Enue muana tshigina ndo ndaga jiazuelele baprofete ba? Azuelele egi Klisto mbawushiyiwa gungima mbawufuzumuga.’ Walanduile guakotelesela mbimbi ya Nzambi. Tangua ahetele gu Emause, alandudi atogele muthu muene ha guya nawo. Tangua akhalele mutshigina gudia, muthu muene wakalegele gisambu, akotelesele mbala imoshi egi yakhalele Yesu. Gungima Yesu watotele gutuama diawo.

Alandudi ene ayile muphushi gu inzo apostolo akhalele agudibungisa gu Yelusalema; a awambele ndaga jiagasue amonele. Tangua akhalele mukatshi dia inzo yene, Yesu wazogele gutuama diawo. Thomo alandudi akhalelego mutshigina egi yakhalele Yesu. Yesu waawambelele egi: ‘Talenu mago ami; ngukuatenu. Yasonegewe egi Klisto mbawufuzumuga gu gufua.’