Malongo Atshi Tuajiya Guzula mu Masugu 40 a Gisugishilo Yesu Wabalegesele ha Mavu?

1-2. Itshi yabuile tangua alandudi mbadi a Yesu akhalele muya gu Emause?

MU LUSUGU lua 16 Nisana lua givo 33 Gungima dia Guvualewa gua Yesu (G.Y.) alandudi a Yesu avile gikenene nu woma wavula. Muyadi mukatshi diawo akhalele muya gu dimbo dia Emause, dimbo diene diakhalele ha mutango wa ba kilometre 11 nu Yelusalema. Alandudi ene alebele muila handaga Yesu munu akhalele mulandula washiyiwe. Akhalele gudifelela egi Masiya mbawukalegela enya Yuda ndaga jia gushimana, uvi athu amushiyile. Gungima, ndaga imoshi inyi athu akhalelego mutangiza yakalegewe.

² Muthu mumoshi akhalelego mujiya wasuenele hehi nawo nu wasendesele guwenda nawo. Alandudi asendesele gumuwambela nu gikenene giagasue ndaga jia lamba jinyi jiabuidile Yesu. Muthu muene wasendesele guawambela ndaga jinyi akhalelego naye gubuita mutshima. Wakhalele mukalegela Mbimbi ya Nzambi nu profesi jienji ha guakotelesela gishina Masiya wakhalele naye gumona malamba nu gufua. Tangua ahetele gu Emause, akotelesele egi muthu muene wakhalele Yesu munu Nzambi wafuzumuine! Tangiza gusuanguluga guakhalele nago alandudi tangua ajiyile egi Masiya udi nu monyo!​—Luka 24:13-35.

3-4. Itshi yabuidile alandudi a Yesu? Ndaga jitshi tuza mumona mu longo edi? (Makalegelo 1:3)

³ Yesu wabalegesele masugu 40 ha mavu gutuama egi avutuge mu dilu, mu masugu ene agasue wamonegele gudi alandudi enji matangua avula. (Tanga Makalegelo 1:3.) Mu tangua diene, Yesu wahanele alandudi enji akhalele nu gikenene nu akhalele muvua woma gikhesa. Gungima, akhalele nu gusuanguluga nu ahetele gikhesa gia gulongesa lukuma luabonga lua Ufumu.a

⁴ Tuajiya guzula malongo gula tudi mulonguga ndaga Yesu wakalegele mu masugu ene. Mu longo edi tuza mumona luholo Yesu wakalegele tangua diene 1) ha guhana alandudi enji gikhesa, 2) ha guakuatesa ha gukotelesa muabonga Biblia nu 3) ha guahana formasio ha gutagenesa inemo yakoma. Mu gitshinyi giagasue, tuza mumona luholo tuajiya gulandula gifezegeselo gia Yesu.

KHALA MUHANA ATHU AKO GIKHESA

5. Mukunda natshi alandudi a Yesu akhalele nu funu ya gikhesa?

⁵ Alandudi a Yesu akhalele nu funu ya gikhesa. Mukunda natshi? Handaga athu ako mukatshi diawo abembele jinzo jiawo, fami jiawo nu midimo yawo ha gulandula Yesu. (Mat. 19:27) Luholo athu ako akhalele mubua alandudi a Yesu, akhalele guakalegela ndaga jiabola. (Yone 9:22) Alandudi ene akhalele musombegesa ndaga jiavula mu monyo wawo nu gumona malamba, handaga akhalele mutshigina egi Yesu wakhalele Masiya munu Nzambi walayele. (Mat. 16:16) Uvi tangua Yesu washiyiwe, avile gikenene nu alebele muila handaga akhalelego mujiya ndaga yakhalele naye guabuila.

6. Itshi Yesu wakalegele ha fuzumugile muene?

⁶ Yesu wakotelesele egi alandudi enji akhalele naye guvua gikenene luholo lua file muene, uvi yakhalelego mukotelesa egi akhalelego nu gutshigina guakola. Mu lusugu luafuzumugile muene, wasendesele guhana mafuta enji gikhesa. Ha gufezegesa, wamonegele gudi Madiya wa gu Magadala wakhalele wagumagana hanze hehi nu malumba mudila. (Yone 20:11, 16) Wamonegele nji gudi alandudi enji mbadi anyi akhalele muya gu Emause. Gungima wamonegele gudi mupostolo Phetelo. (Luka 24:34) Longo ditshi tuajiya guzula mu gifezegeselo gia Yesu? Tutadilenu ndaga yakalegewe tangua diamonegele muene gudi Madiya wa gu Magadala.

7. Gifua luholo Yone 20:11-16 idi gu imonesa, ndaga itshi Yesu wamonele Madiya mutshita mu lusugu lua 16 Nisana mu gimenegena? Ndaga yene yamutumile ha gutshita itshi? (Tala nji gifuanesa.)

⁷ Tanga Yone 20:11-16. Mu lusugu lua 16 Nisana mu gimenegena, akhetu avula akhalele muzumba Nzambi, ayile gu malumba ha fundo diafundjiwe Yesu. (Luka 24:1, 10) Tuzuelelenu ndaga yabuidile Madiya wa gu Magadala munu wakhalele mukatshi dia akhetu ene. Tangua diahetele muene gu malumba a Yesu, waasangele a githuhu. Wayile muphushi ha guwambela Phetelo nu Yone. Mala ene mbadi ayile muphushi gu malumba, Madiya waalanduile. Tangua Phetelo nu Yone amonele egi malumba akhalele agithuhu, avutugile gawo guembo, uvi Madiya wasalele hene nu gudila. Gakhalelego mujiya egi Yesu wakhalele gumumona. Yesu wamonele luholo Madiya wakhalele mudila, hene watshiginyile gumuhana gikhesa. Hene wamonegele gudi muene nu wamukalegele ndaga imoshi yamuhanele diago gikhesa. Watele n’enji maga, gungima wamuhanele ginemo gia ndando gia guya muwambela aphangi’enji egi wafuzumuga gale.​—Yone 20:17, 18.

8. Luholo lutshi tuajiya gulandula gifezegeselo gia Yesu?

⁸ Luholo lutshi tuajiya gulandula gifezegeselo gia Yesu? Tuajiya gulandula gifezegeselo gia Yesu gula tudi mumona malamba aphangi’etu adi mutagana nawo nu tudi gudihaga ha fundo diawo nu guakuatesa ha gulandula gukalegela Yehowa. Tutadilenu gifezegeselo gia phangi Jocelyn munu phangi’enji wa mukhetu wafile mu aksida a kola. Wazuelele egi: “Ngakhalele muvua gikenene mbeji jiavula.” Uvi lusugu lumoshi, phangi mumoshi nu mukaji’enji amutamegele gumbo diawo, amuwambelele egi udi nu ndando gu meso a Yehowa. Phangi Jocelyn wazuelele egi: “Yakhalele gifua ngakhalele mushiwuga mu kianga giabuita gidi nu matshipha-tshipha akola, uvi Yehowa wakalegele phangi muene nu mukaji’enji ha gunguhuluisa. Angukuatesele ha gulandula luko gukalegela Yehowa.” Esue nji tuajiya gukuatesa athu ako gula tudi guategelela muabonga tangua adi gutuwambela ndaga jidi guasagesa. Gula tuatshita ngenyi, tuajiya guahana gikhesa ha gulandula gukalegela Yehowa.​—Roma 12:15.

KUATESA ATHU AKO HA GUKOTELESA MBIMBI YA NZAMBI

9. Lamba ditshi alandudi a Yesu ataganele nadio? Luholo lutshi Yesu waakuatesele?

⁹ Alandudi a Yesu atshiginyile malongo adi mu Mbimbi ya Nzambi nu atshitshile yagasue ha guatumagela mu monyo wawo. (Yone 17:6) Uvi akhalelego mukotelesa mukunda natshi Yesu washiyiwe gifua mbundudi. Yesu wajiyile egi alandudi enji akhalele nu gutshigina nu akhalele muzumba Nzambi, uvi wakotelesele egi akhalele naye gukotelesa Mbimbi ya Nzambi muabonga. (Luka 9:44, 45; Yone 20:9) Hene waakuatesele ha gukotelesa ndaga akhalele mutanga mu Mbimbi ya Nzambi. Tutadilenu luholo luayikalegele muene tangua diamonegele muene gudi alandudi mbadi akhalele muya gu Emause.

10. Luholo lutshi Yesu wakuatesele alandudi enji ha gukotelesa muabonga egi wakhalele Masiya? (Luka 24:18-27)

¹⁰ Tanga Luka 24:18-27. Tujimbilago egi Yesu gaawambelelego mbala imoshi gula wakhalele nanyi. Uvi waahudile mihu. Mukunda natshi? Yajiya gukhala egi waahudile mihu yene ha gujiya ndaga akhalele mutangiza. Idi yadiago egi guakhalele nu ndaga akhalele mutangiza. Ha gufezegesa, amuwambelele egi akhalele mutangiza egi mbawubua Fumu gu Isalele nu mbawahuluisa ha mago a enya Roma. Tangua amuwambelele ndaga akhalele mutangiza, Yesu wakalegele Mbimbi ya Nzambi ha guakuatesa ha gukotelesa egi profesi jiavula jiataganele gale mukunda nu ndaga yene.b Mu ngueze yene, Yesu walanduile gukotelesela alandudi enji ako giamatshidia giene. (Luka 24:33-48) Longo ditshi tuajiya guzula mu lumene elu?

11-12. a) Longo ditshi tuajiya guzula mu luholo Yesu wakhalele mulongesa giamatshidia? (Tala nji ifuanesa.) b) Luholo lutshi mulongeshi wa phangi Nortey wamukuatesele?

¹¹ Luholo lutshi tuajiya gulandula gifezegeselo gia Yesu? Thomo, tangua udi mulonguga Biblia nu muthu, khala gumuhula mihu nu gutema guagasue ha gujiya ndaga jidi mutangiza muene. (Ish. 20:5) Gula wajiya matangi’enji, muwambele verse imoshi idi muzuelela ndaga yene ha gumukuatesa. Umuwambelago ndaga ya gukalagala. Uvi kalegela Biblia ha gumukuatesa ha gukotelesa luholo gajiya gukalegela malongo ene mu monyo wenji. Tutadilenu gifezegeselo gia phangi Nortey wana khala gu Ghana.

¹² Tangua Nortey watagenesele ivo 16, wasendesele gulonguga Biblia. Uvi enya fami yenji akhalele mutuna. Itshi yamukuatesele ha gulandula gulonguga? Mulongeshi wenji wamutangele Mukanda wa Matayo mukhapho 10 wana monesa egi Aklisto a giamatshidia adi naye gusagesewa. Phangi Nortey wazuelele egi: “Tangua usageshi wasendesele, ngatshiginyile diago egi ngaheta giamatshidia.” Mulongeshi wenji wa Biblia wamukuatesele luko nu verse ya Matayo 10:16 yana monesa egi tudi naye gukhala atema nu gunemesa enya fami yetu tangua tudi muzuela nawo ndaga yatadila ikombelelo. Tangua phangi Nortey wabatijiwe, wakhalele mutshigina gubua muvundji wa njila, uvi tata wenji wakhalele mutshigina gumutuma gu université. Phangi wakhalele mulongesa Nortey Biblia gamuwambelelego ndaga ya gutshita, uvi wamuhudile mihu ha gumukuatesa ha gukalegela malongo a Biblia ha guzula desizio diabonga. Gubonga gutshi phangi Nortey wahetele? Wazudile desizio dia gutshita mudimo wa tangua diagasue. Sh’enji wamukayele gu inzo. Itshi phangi Nortey udi muzuela mukunda nu ndaga eji? Udi muzuela egi: “Ngudi diago nu gutshigina egi ngazudile desizio diabonga.” Gula tudi mukalegela Biblia ha gukuatesa athu ako, tuajiya guakuatesa ha gubua Aklisto a gukula mu nyuma.​—Ef. 3:16-19.

KUATESA APHANGI A MALA HA GUBUA “GIFUA MAKHAPHO”

13. Itshi Yesu watshitshile ha gusha mutshima egi mudimo wa muhanele Sh’enji mbawulandula gukalegewa muabonga? (Efeso 4:8)

¹³ Tangua Yesu wakhalele ha mavu, wataganesele mudimo wamuhanele Sh’enji mu luholo lua tagana. (Yone 17:4) Uvi gatangijilego egi phamba muene wakhalele naye gutagenesa mudimo wene muabonga. Mu ivo thathu nu ndambo yakalegele muene mudimo wa gulongesa ha mavu, wahanele formasio gudi athu ako. Gutuama egi avutuge mu dilu, washidile alandudi enji mutshima. Waahanele ginemo gia gulongesa lukuma luabonga nu gubamba imeme ya Yehowa. Mukatshi dia alandudi akhalele mutuameza mudimo wene, yajiya gukhala egi ako akhalele nu ivo goshi’a 30. (Tanga Efeso 4:8.) Luholo lutshi Yesu wakalegele masugu 40 a gisugishilo ha mavu ha gukuatesa mala ene a gujinginyina ha gubua “gifua makhapho”?

14. Luholo lutshi Yesu wakuatesele alandudi enji ha gukula mu nyuma mu masugu enji 40 a gisugishilo ha mavu? (Tala nji gifuanesa.)

¹⁴ Yesu wakhalele muwambela alandudi enji ndaga haphelo, uvi nu guzumba guagasue. Ha gufezegesa, wakotelesele egi alandudi ako mukatshi diawo akhalele nu badute, hene waahanele malongo. (Luka 24:25-27; Yone 20:27) Wawambelele ha guzula tangua diavula dia gutala imeme ya Yehowa ha fundo dia gukamba umonyi. (Yone 21:15) Wawambelele nji ha gutuna gufuanesa inemo yawo nu ya athu ako mu mudimo wa Yehowa. (Yone 21:20-22) Waakuatesele ha gukatula matangi abola akhalele nawo mukunda nu Ufumu wa Nzambi nu waakuatesele ha gudihana mu mudimo wa gulongesa lukuma luabonga. (Makal. 1:6-8) Malongo atshi akulu ajiya guzula mu gifezegeselo gia Yesu?

15-16. a) Luholo lutshi akulu ajiya gulandula gifezegeselo gia Yesu? Kotelesa. b) Gubonga gutshi phangi Patrick wahetele luholo amuhanele malongo?

¹⁵ Luholo lutshi akulu ajiya gulandula gifezegeselo gia Yesu? Adi naye guhana formasio gudi aphangi a mala nu anyi adi mavuala ha gutagenesa inemo yavula mu hungu.c Akulu ashigo naye gutangiza egi aphangi adi muhana formasio adi naye gutshita ndaga jiagasue mu luholo luatagana. Adi naye guhana mavuala a mala malongo nu guzumba guagasue hagula ajiya guheta eksperianse nu gukotelesa ndando ya gukhala athu a gudibulumuisa, agujinginyina nu gukhala hehi ha gukuatesa athu ako.​—1 Tim. 3:1; 2 Tim. 2:2; 1 Phet. 5:5.

¹⁶ Tutadilenu luholo phangi Patrick wahetele gubonga mu malongo ahetele muene. Hakhalele muene mona wazonda, wakhalele muzuela nu gukalagala ndaga jiabola gudi athu ako nu gudi akhetu. Mukulu mumoshi wa gukula mu nyuma wakotelesele egi Patrick wakhalele naye gusombegesa, hene wamuhanele malongo haphelo, uvi wayikalegele nu guzumba guagasue. Phangi Patrick udi muzuela egi: “Ngudi nu gusuanguluga luholo mukulu muene wanguhanele malongo ngakhalele nawo funu. Ngakhalele muleba muila tangua ngakhalele mumona aphangi ako a mala muheta inemo inyi ngakhalele mutshigina. Uvi malongo anguhanele mukulu muene angukuatesele ha gujiya egi ndaga ya ndando idi gukalegela aphangi a mala nu a akhetu nu gudibulumuisa guagasue ha fundo dia gukamba phamba guheta inemo mu hungu.” Ndaga ya gusuanguluga idi egi phangi Patrick watombewe ha gubua mukulu hakhalele muene nu ivo 20 nu ndambo.​—Ish. 27:9.

17. Luholo lutshi Yesu wamonesele egi wakhalele mushila alandudi enji mutshima?

¹⁷ Yesu wahanele alandudi enji ginemo gia gulongesa athu lukuma luabonga nu guakotelesela giamatshidia gidi mu Biblia. Alandudi akhalele naye gutangiza egi akhalelego atagana ha gutagenesa ginemo giaahanele Yesu. Uvi Yesu gakhalelego nu badute egi ajiyilego gutagenesa ginemo giene. Wawambelele nji ndaga yene. Wamonesele egi wakhalele guashila mutshima, wazuelele egi: “Luholo Tata wangutumine, ame nji ngudi gumituma.”​—Yone 20:21.

18. Luholo lutshi akulu ajiya gulandula gifezegeselo gia Yesu?

¹⁸ Luholo lutshi akulu ajiya gulandula gifezegeselo gia Yesu? Akulu abonga ana hana aphangi ako formasio nu ana guabembela inemo iko. (Fili. 2:19-22) Ha gufezegesa akulu ajiya gutoga mavuala ha guwevua Inzo ya Ufumu nu guyilondega. Gula akulu ahana aphangi ginemo gimoshi ha gutshita, adi naye guahana formasio nu guashila mutshima egi mbatshita mudimo wene muabonga. Phangi Matthew udi mukulu muhe-muhe wazuelele egi, wasuangulugile luholo akulu amuhanele formasio ya gutshita midimo ya gudisha mu hungu nu luholo akhalele gumushila mutshima egi mbawuyitagenesa muabonga. Udi muzuela egi: “Tangua ngakhalele mujimbila ndaga jiko, akhalele gungukuatesa ha gujiya luholo ngajiya gutshita luko muabonga mu masugu adi muza.”d

19. Tuajiya guzula desizio dia gutshita itshi?

¹⁹ Mu masugu 40 a gisugishilo abalegesele Yesu ha mavu, wakhalele muhana athu ako gikhesa, gualongesa nu guahana formasio. Esue nji tuajiya guzula desizio dia gulandula gifezegeselo gienji muabonga. (1 Phet. 2:21) Muene mbawutukuatesa ha gutshita ngenyi. Handaga wazuelele egi: “Mbangukhala n’enu masugu agasue uu nu gu gisugishilo gia mavu awa.”​—Mat. 28:20.