Khadilo dia Guhana Diana Bata Gusuanguluga

1-2. Mukunda natshi Yehowa watufugile nu luendu lua gukhala nu gusuanguluga tangua tudi muhana athu ako?

TUANA khala nu gusuanguluga guavula tangua tuana hana athu ako gubalega tangua ana gutuhana. Yehowa watufugile ngenyi. (Makal. 20:35) Ndaga yene idi mukotelesa egi tuana khalago nu gusuanguluga tangua athu ako ana gutuhana ba? Ndo, ishigo ngenyi. Tudi mujiya muabonga egi tuana khala nu gusuanguluga tangua athu ako ana gutuhana ima tudi nayo funu. Uvi tuana khala nu gusuanguluga guavula tangua tuana hana athu ako. Idi yadiago egi Yehowa watufugile ngenyi mukunda nu gubonga guetu. Mukunda natshi tuazuela ngenyi?

² Handaga luholo Yehowa watufugile nu khadilo diene, diana gutukuatesa ha gukhala nu gusuanguluga guavula. Tuajiya gukhala nu gusuanguluga guavula gula tudi mukamba maluholo agukuatesa athu ako. Idi diago ndaga yabonga luholo Yehowa watufugile ngenyi!​—Ngi. 139:14.

3. Mukunda natshi Biblia yana tamega Yehowa egi: “Nzambi wa gusuanguluga”?

³ Biblia yana monesa egi athu ana khala nu khadilo dia guhana ana khala nu gusuanguluga, ndaga yene yana gutukuatesa ha gukotelesa mukunda natshi Biblia yana tamega Yehowa egi: “Nzambi wa gusuanguluga.” (1 Tim. 1:11) Handaga muene muthu wa thomo wamonesele khadilo dia guhana, gushigo nga nu muthu wana hana gifua muene. Mupostolo Phaula wamonesele egi Yehowa “muene watuhanele monyo, muene nji wana gutukuatesa ha gudinyigisa nu ha gukhala nu monyo.” (Makal. 17:28) Yadiago, “khapho diagasue diabonga nu gima giagasue giatagana” yana katuga gudi Yehowa.​—Yak. 1:17.

4. Itshi yajiya gutukuatesa ha gukhala nu gusuanguluga guavula?

⁴ Yajiya gukhala egi mukut’etu agasue tuahetele gale gusuanguluga guavula tangua tuamonesele khadilo dia guhana. Tuajiya guheta gusuanguluga guene gula tualandula khadilo dia Yehowa dia guhana. (Ef. 5:1) Mu longo edi, tuza mumona ndaga tuajiya gutshita gula tuakuatesa muthu uvi muene nu gutuhana ndo mersi. Gulonguga ndaga yene guza gutukuatesa ha gulandula gumonesa khadilo dia guhana, ngenyi mbatukhala nu gusuanguluga.

LANDULA KHADILO DIA YEHOWA DIA GUHANA

5. Ima itshi Yehowa wana gutuhana?

⁵ Mu maluholo atshi Yehowa wana monesa khadilo dia guhana? Tutadilenu luholo Yehowa wana monesa khadilo diene. Yehowa wana gutuhana ima tudi nayo funu. Idi yadiago egi tuajiyilego gukhala tangua diagasue nu lujingu luabalega gubonga, uvi tudi muhana Yehowa mersi handaga wana gutuhana ima tuana khala nayo funu. Ha gufezegesa, wana tshita yagasue hagula tuhete ima ya gudia, milele nu fundo dia gukhala. (Ngi. 4:8; Mat. 6:31-33; 1 Tim. 6:6-8) Idi mumonesa egi Yehowa wana gutuhana ima yene handaga idi ginemo gienji ba? Ishigo ngenyi! Na mukunda natshi Yehowa wana gutuhana ima yene?

6. Longo ditshi tuajiya guzula mu Matayo 6:25, 26?

⁶ Yehowa wana gutuhana ima tudi nayo funu handaga wana gutuzumba. Tutadilenu ndaga Yesu wazuelele mu Matayo 6:25, 26. (Tanga.) Yesu wahanele ifezegeselo ya ima yafugile Nzambi. Wahanele gifezegeselo gia tunjila, wazuelele egi: “Tuanago gukuna, tuanago gukatula mbuto nga gujibungisa mu mikala.” Gungima wazuelele egi: “Sh’enu wa mu dilu wana gutudisa.” Gungima wahudile egi: “Enue mushigo nu ndando yavula gubalega tunjila ba?” Longo ditshi tuajiya guzula mu gifezegeselo giene? Yehowa wana zula akombeledi enji nu ndando yavula gubalega shitu jiagasue. Luholo Yehowa wana hana shitu ima ya gudia, esue nji tudi naye gusha mutshima egi mbawutuhana ima tudi nayo funu! Gifua luholo tata wa guzumba wana tagenesa nzala jia enya fami yenji, Yehowa wana hana enya fami yenji ima adi nayo funu handaga wana guazumba.​—Ngi. 145:16; Mat. 6:32.

7. Luholo lutshi tuajiya gulandula khadilo dia Yehowa dia guhana? (Tala nji gifuanesa.)

⁷ Esue nji tuajiya guhana athu ako ima adi nayo funu gula tudi guazumba gifua muana tshita Yehowa. Ha gufezegesa, udi mujiya phangi mumoshi udi nu funu ya ima ya gudia nga milele ba? Yehowa wajiya gugukalegela ha gukuatesa phangi muene. Akombeledi a Yehowa ana khala hehi ha gukuatesa athu ako ana buila malamba. Ha gufezegesa, musungi ya corona virus aphangi a mala nu a akhetu ahanele aphangi akhalele mu lamba ima ya gudia, milele nu ima iko. Aphangi ako ahanele misomo ha gukuatesa mudimo wana kalegewa ha mavu agasue. Akalegele misomo yene ha gukuatesa aphangi a ha mavu agasue abuidile malamba. Aphangi anyi ahanele misomo yene atumagele mbimbi eji jidi mu Hebelu 13:16: “Mujimbilago gutshita ndaga jiabonga nu gukhapha ima mudi nayo nu athu ako, handaga Nzambi wana suanguluga nu milambu ya luholo elu.”

8. Ngolo jiana gutuhana Yehowa jiana gutukuatesa ha gutshita itshi? (Filiphi 2:13)

⁸ Yehowa wana gutuhana ngolo. Yehowa wana khala nu gusuanguluga ha guhana akombeledi enji a gujinginyina ngolo jienji jishigo nu gisugishilo. (Tanga Filiphi 2:13.) Yajiya gukhala egi watogele gale Yehowa ha guguhana ngolo ha gukolesela tangua agulolele nga ndo ha gukolesela mu lamba dimoshi ngenyi. Yajiya nji gukhala egi lusugu lumoshi wamutogele ngolo ha gukalagala ndaga wakhalele najio funu. Tangua Yehowa wahanele mvutu gu gisambu giaye yajiya gukhala egi wazuelele gifua muazuelele mupostolo Phaula egi: “Ngudi nu ngolo jia gukolesela mu ndaga jiagasue handaga Nzambi wana gunguhana ngolo.”​—Fili. 4:13.

9. Luholo lutshi tuajiya gukalegela ngolo jietu ha gulandula gifezegeselo gia Yehowa? (Tala nji gifuanesa.)

⁹ Ikhale tushigo athu atagana, uvi tuajiya gulandula gifezegeselo gia Yehowa mu luholo tudi mukalegela ngolo jietu. Tuajiyilego guhana athu ako ngolo tudi najio. Uvi tuajiya gukalegela ngolo jiene ha gukuatesa athu ako. Ha gufezegesa, tuajiya gukuatesa aphangi a gukola nga adi mukata ha gualondela inzo nga guya guasumbila ima. Gula luholo ludi guene, tuajiya gudihana ha guya muwevua nga gulondega Inzo ya Ufumu. Gula tuakalegela ngolo jietu mu luholo elu mbatukuatesa aphangi’etu a mala nu a akhetu.

10. Luholo lutshi tuajiya gukolesa athu ako mu mbimbi jietu?

¹⁰ Ujimbilago egi mbimbi jiaye nji jiajiya gukolesa aphangi ako. Udi mujiya phangi mumoshi wajiya guheta ngolo gula wamuwambela egi wana suanguluga nu ndaga jiana kalagala muene ba? Udi mujiya phangi mumoshi udi nu funu ya gikhesa ba? Gula idi ngenyi, wajiya gutshita yagasue ha gumonesa phangi muene egi wana gudisagesa mukunda nu muene. Wajiya guya gumutala, gumutamega gu telefone nga gumusonegela mukanda nga mesaje. Ushigo naye gudisagesa mukunda nu ndaga wajiya guezuela. Yajiya gukhala egi mbimbi jiazonda wajiya guzuela nu guzumba, jiene diago phangi muene udi najio funu ha gusala ya gujinginyina gudi Yehowa nu ha gudivua muabonga.​—Ish. 12:25; Ef. 4:29.

11. Luholo lutshi Yehowa wana kalegela ndunge jienji?

¹¹ Yehowa wana gutuhana ndunge. Mulandudi Yakoba wasonegele egi: “Gula muthu gashigo nu ndunge, alandule gujilomba gudi Nzambi, muene mbawumuhana najio handaga wana hana athu agasue, gana monago gubola.” (Yak. 1:5; mbimbi goshi’a diyiji.) Gifua luholo mbimbi jiene jidi guyimonesa, Yehowa gana suega ndo ndunge jienji. Uvi wana gujihana nji gudi athu ako. Yakoba wazuelele luko egi tangua Yehowa wana hana athu ndunge jienji “ganago guabalela,” nga “gana monago gubola.” Gana tshiginago egi tudisagese tangua tuana gumutoga utuameji. Uvi wana tshigina egi tumutoge utuameji wenji.​—Ish. 2:1-6.

12. Ba okazio atshi tuana khala nawo a guwambela athu ako ndaga tuana jiya?

¹² Esue giwa, itshi tudi naye gutshita? Ha gulandula gifezegeselo gia Yehowa, luholo lutshi tuajiya gukhaphela athu ako ndunge jietu? (Ngi. 32:8) Akombeledi a Yehowa ana khala nu ba okazio avula a guwambela athu ako ndaga ana longuga. Ha gufezegesa, tuana hana aphangi ahe-ahe formasio mu mudimo wa gulongesa. Akulu ana khala nu guhuiminyina tangua ana kuatesa akuateshi a mudimo nu aphangi a mala abatijiwe gale ha gujiya luholo ajiya gutagenesa inemo yawo mu hungu. Aphangi ana khala nu eksperianse mu mudimo wa gutunga nu wa gulondega jinzo jia Ufumu nu ba Salle d’Assemblée, ana hana formasio gudi aphangi anyi ashigo nu eksperianse yavula ha gutshita midimo yene.

13. Ha gumonesa egi tudi mulandula gifezegeselo gia Yehowa, itshi tudi naye gutshita tangua tudi muhana athu ako formasio?

¹³ Aphangi adi muhana athu ako formasio adi naye gutshita ndaga gifua muana tshita Yehowa tangua diana hana muene athu ako ndunge jienji. Ujimbilago egi Yehowa wana hana ndunge jienji nu gisemo giagasue. Hene esue nji tudi naye guwambela athu adi muzula formasio ndaga tudi mujiya. Tushigo naye guvua woma egi gula tuawambela athu ako ndaga jiagasue tudi mujiya, ene mbaazula fundo dietu. Tushigo naye nji guzuela egi: ‘Ame ngushigo nu muthu wanguhanele formasio! Muene nji adilongugile hakhenji.’ Makalegelo a luholo elu ashigo naye gukhala mukatshi dia akombeledi a Yehowa. Tudi naye gukhala nu gusuanguluga ha guwambela athu ako ndaga tudi mujiya nu gutshita yagasue ha guahana formasio. (1 Tes. 2:8) Tuana tshigina egi, “ene nji abue athu atagana ha gulongesa athu ako.” (2 Tim. 2:1, 2) Gula tudi muwambela athu ako ndaga tudi mujiya nu gisemo, mukut’etu agasue mbatukhala nu gusuanguluga guavula.

GULA MUTHU GATUHANELEGO MERSI MUKUNDA NU NDAGA TUAMUKALEGELA

14. Luholo lutshi aphangi ako ana monesa egi asuanguluga nu ndaga tuaakalegela?

¹⁴ Tangua tuana hana aphangi’etu ima tudi nayo nga tangua tuana guakalegela ndaga jiabonga, ana suanguluga diago. Ajiya gutusonegela ha gutuhana mersi nga ndo ajiya gutuhana mersi mu luholo luko. (Kol. 3:15) Tangua athu ana gutuhana mersi mukunda nu ndaga tuaakalegela, tuana khala nu gusuanguluga.

15. Ndaga itshi tudi naye guwunguluga gula muthu gatuhanelego mersi?

¹⁵ Uvi matangua ako, athu ako anago gutuhana mersi mukunda nu ndaga tuaakalegela. Yajiya gukhala egi athu ako asuangulugilego nu ndaga tuatshitshi ha guakuatesa nga ndo ashigo muzula nu ndando tangua tuabalegesa, ngolo jietu nga makuta tuakalegela ha guakuatesa. Gula ndaga ya luholo elu yakalegewa, itshi yajiya gutukuatesa ha gubamba gusuanguluga guetu nu ha gutuna guvua khabu? Tudi naye guwunguluga mbimbi jidi mu Makalegelo 20:35 verse yakuata longo edi. Gusuanguluga tuana guvua tangua tuana monesa khadilo dia guhana guana katugago mu luholo muthu muene wajiya gutadila ndaga tuamukalegela. Tuajiya gulandula gumonesa khadilo dia guhana ikhale athu ako ashigo gutuhana mersi. Luholo lutshi? Tutadilenu ndaga jiajiya gutukuatesa.

16. Itshi tudi naye gujiya tangua tudi mukuatesa athu ako?

¹⁶ Jiya egi tangua tuana kuatesa athu ako tuana landula gifezegeselo gia Yehowa. Yehowa wana hana ima yabonga gudi athu ikhale athu ene amuhana mersi nga ndo. (Mat. 5:43-48) Yehowa wana laya egi gula tuahana athu ako ima uvi tushigo gudifelela egi athu ene ‘atuvutudile, gishimbigo gietu mbagikhala giakoma.’ (Luka 6:35) Mbimbi eyi ‘atuvutudile’ idi mumonesa nji ndaga muthu wajiya gutshita ha guhana mersi. Tushigo naye gudisagesa gula muthu gatuhanelego mersi. Tudi naye gujiya egi Yehowa mbawutushimbiga mukunda nu ndaga jiabonga tuana kalegela athu ako, handaga tuana hana ‘nu gusuanguluga.’​—Ish. 19:17; 2 Kol. 9:7.

17. Ndaga itshi ya ndando idi naye gututuma ha gumonesa khadilo dia guhana? (Luka 14:12-14)

¹⁷ Ndaga iko tudi naye gutshita ha gulandula gifezegeselo gia Yehowa tangua tudi mukuatesa athu ako idi gukalegela longo didi mu Luka 14:12-14. (Tanga.) Ishigo yabola gula tuayamba nga gula tuakhaphela athu anyi tudi mumona egi adi nu luholo lua gutuyamba nga lua gutukhaphela ima. Uvi itshi tudi naye gutshita gula tuakotelesa egi tangua tuana khaphela athu ako ima tuana gudifelela egi ene nji atuvutudile? Gula idi ngenyi, tudi naye gukalegela longo diahanele Yesu. Tudi naye gumonesa khadilo dia guhana ikhale gudi athu anyi tudi mumona egi ashigo nu luholo lua gutuvutudila. Ngenyi mbatukhala nu gusuanguluga handaga tudi mulandula gifezegeselo gia Yehowa. Gutshita ngenyi mbagutukuatesa nji ha gukhala nu gusuanguluga ikhale athu ako ashigo gutuhana mersi mukunda nu ndaga tuaakalegela.

18. Itshi yajiya gutukuatesa ha gutuna gutangijila athu ako ndaga jiabola?

¹⁸ Tushigo naye gutangijila athu ako ndaga jiabola. (1 Kol. 13:7) Gula athu tuakuatesa atuhanelego mersi, tuajiya gudihula egi: ‘Athu ene ana khalago diago nu khadilo dia guhana mersi ba? Nga ndo abuitshi mutshima ha gutuhana mersi?’ Yajiya gukhala egi gudi nu ndaga jiko jiatshitshi egi atuhanyigo mersi mu luholo tuadifelela. Athu ako ajiya gusuanguluga muavula nu ndaga tuaakalegela uvi yajiya gukhala lamba gudi ene ha gutuwambela egi asuanguluga. Yajiya gukhala egi adi muvua musonyi luholo athu ako adi guakuatesa handaga mu masugu abalega, ene akhalele mukuatesa athu ako. Ikhale ngenyi nga ndo, gula tudi muzumba diago aphangi’etu, mbatushigo guatangijila ndaga jiabola nu mbatulandula guhana athu ako nu gusuanguluga.​—Ef. 4:2.

19-20. Mukunda natshi idi nu ndando ha gumonesa khadilo dia guhuiminyina tangua tudi mukuatesa athu ako? (Tala nji gifuanesa.)

¹⁹ Tudi naye gumonesa khadilo dia guhuiminyina. Mukunda nu khadilo dia guhana, Fumu Salomo wasonegele egi: ‘Bishila mapha aye mu meya, handaga gungima dia masugu avula mbawaheta luko.’ (Mulo. 11:1) Gifua luholo mbimbi jia Salomo jidi guyimonesa, matangua ako athu ajiya gutuhana mersi mukunda nu ndaga tuaakalegele ‘gungima dia masugu avula.’ Tutadilenu gifezegeselo gimoshi gidi mumonesa ndaga yene.

²⁰ Ivo yavula yabalega gale, mukaji’a mutadi muwendji mumoshi wasonegele phangi mumoshi wa mukhetu wakatugile gubatijiwa mukanda ha gumuhana gikhesa, wamuhanele malongo ajiya gumukuatesa ha gusala yagujinginyina gudi Yehowa. Gungima dia ivo 8, phangi muene wamusonegele nji mukanda, wazuelele egi: “Ngagusonegela mukanda owu ha guguwambela egi ndaga wangusonegele jiangukuatesele muavula diago mu ivo eyi yabalega.” Wazuelele luko egi: “Wangusonegele nu gisemo giagasue, ngana jimbilago nga hazonda verse wasonegele mu mukanda wene.”a Gungima dia gumuwambela malamba gatagenele nawo, phangi muene wazuelele luko egi: “Ngakhalele mutshigina gubemba gutshita ndaga jiagasue nu gubemba gukombelela Yehowa. Uvi verse wangusonegele yakuatele diago mutshima wami, yangukuatesele ha gulandula gusala yagujinginyina gudi Yehowa.” Wazuelele nji egi: “Mu ivo eyi yagasue 8, gushigo nu gima giko giangukuatesele muavula gubalega mukanda waye nu verse wasonegele.” Tangiza luholo mukaji’a mutadi muwendji muene wasuangulugile hahetele muene mukanda wene ‘gungima dia masugu avula’! Esue nji athu tuakuatesele ajiya gutuhana mersi gungima dia masugu avula.

21. Mukunda natshi tudi naye gulandula gifezegeselo gia Yehowa gia gukhaphela athu ako?

²¹ Gifua luholo tuayimonyi, Yehowa watufugile nu luendu luakoma. Ikhale tuana suanguluga tangua athu ana gutuhana, uvi tuana khala nu gusuanguluga guavula tangua tuana khaphela athu ako. Tuana gudivua muabonga tangua tuana kuatesa aphangi’etu Aklisto. Tuana suanguluga nji tangua ana gutuhana mersi. Ikhale atuhana mersi nga ndo, tudi naye gukhala nu gusuanguluga handaga tudi mujiya egi tuakalagala ndaga yabonga. Ujimbilago egi gula udi mukuatesa athu ako, ‘Yehowa mbawuguhana ima yavula gubalega.’ (2 Gudi. 25:9) Idi yadiago egi wajiyilego guhana athu ako ima gubalega luholo Yehowa wana guyitshita! Gishimbigo giana gutuhana Yehowa giana khala nu ndando yavula. Hene aphangi, tulandulenu khadilo dia guhana dia Tata wetu wa mu dilu.