LONGO DIA 17
LUNGIMBO 99 Tudi nu Aphangi Avula Diago
Tushigo Hakhetu
“Mbangumikuatesa.”—Yesh. 41:10.
MU GUHIHIA
Tuza mumona maluholo nguana Yehowa wana gutukuatesa.
1-2. a) Mukunda natshi tushigo naye guzuela egi tudi hakhetu tangua tudi mutagana nu malamba? b) Itshi tuza muzuelela mu longo edi?
GULA tudi mutagana nu malamba akola, tuajiya gudivua gifua tudi mu gishitu giakoma nu tushigo mumona luholo lua guzoga. Uvi tujimbilago egi tushigo hakhetu. Tata wetu wa mu dilu wana mona malamba tuana tagana nawo nu udi gutulaya egi mbawutukuatesa ha gukolesela mu malamba ene. Yehowa udi gutuwambela nu guzumba guagasue egi: “Mbangumikuatesa.”—Yesh. 41:10.
2 Mu longo edi, tuza mumona maluholo Yehowa wana gutukuatesa: 1) wana gututuameza, 2) wana gutuhana ima tuana khala nayo funu, 3) wana gutubamba nu 4) wana gutuhana gikhesa. Yehowa udi gutuwambela egi ikhale tuatagana nu malamba a luholo lutshi, muene mbagashigo gutubuita mutshima. Mbagashigo nji gutubemba nga hazonda. Yadiago, tushigo hakhetu.
YEHOWA WANA GUTUTUAMEZA
3-4. Luholo lutshi Yehowa wana gututuameza? (Ngimbo 48:14)
3 Tanga Ngimbo 48:14. Yehowa wana jiya muabonga egi tuajiyilego gudituameza hakhetu, wana jiya nji egi tuana khala nu funu ya utuameji wenji. Luholo lutshi Yehowa wana tuameza akombeledi enji mangino? Wana guyikalagala mu njila ya Biblia. (Ngi. 119:105) Yehowa wana gutukuatesa mu njila ya Mbimbi yenji ha guzula badesizio abonga nu ha gukudisa makalegelo ajiya gutukuatesa ha gukhala nu gusuanguluga mangino nu masugu adi muza.a Ha gufezegesa, wana gutuwambela ha gutotesela athu ako nu mutshima umoshi, guzuela guamatshidia mu ndaga jiagasue nu guamonesela guzumba gua giamatshidia. (Ngi. 37:8; Heb. 13:18; 1 Phet. 1:22) Gula tuakudisa makalegelo awa, mbatubua mvuaji jiabonga, yala nga mukhetu wabonga, mbatubua nji mafuta abonga.
4 Yehowa wana gututela mene jia athu avula mu Biblia anyi ataganele nu malamba nu akhalele gudivua gifua esue. (1 Kol. 10:13; Yak. 5:17) Gula tudi mutanga mene jiene nu tudi mukalegela malongo tuazula, mbatuheta gubonga mu maluholo mbadi. Lua thomo, mbatukotelesa egi ishigo esue hakhetu tudi mutagana nu malamba mu monyo wetu, aphangi avula atagenele nji nu malamba a luholo lumoshi, Yehowa waakuatesele nji ha gukolesela. (1 Phet. 5:9) Lua mbadi, mbatujiya luholo tuajiya gukolesela mu malamba ene nu gukhala nu gusuanguluga.—Roma 15:4.
5. Akuatshi Yehowa wana kalegela ha gututuameza?
5 Yehowa wana gututuameza nji mu njila ya aphangi’etu a mala nu a akhetu.b Ha gufezegesa, atadi awendji ana guza gututala mu mahungu ha gutuhana gikhesa. Badikur ana kalagala ana kolesa gutshigina guetu nu ana gutukuatesa ha gukhala mu gudivua nu aphangi. (Makal. 15:40–16:5) Akulu nji mu hungu ana kalagala ngolo ha gutukuatesa ha gukhala nu ufuta wabonga nu Yehowa. (1 Phet. 5:2, 3) Mvuaji nji jiana kuatesa an’awo ha guzumba Yehowa, ha guzula badesizio abonga nu ha gukhala nu makalegelo abonga. (Ish. 22:6) Aphangi a akhetu a gukula mu nyuma ana hana gifezegeselo giabonga gudi mavuala a akhetu mu makalegelo awo abonga, mu malongo nu gikhesa ana guahana.—Tito 2:3-5.
6. Itshi tudi naye gukalagala ha guheta gubonga gua utuameji wa Yehowa?
6 Yehowa watuhana utuameji tudi nawo funu ha guzula badesizio abonga nu ha gukhala nu gusuanguluga. Itshi tudi naye gukalagala ha guheta gubonga gua utuameji wenji? Ishima 3:5, 6 idi muzuela egi: ‘Zegemena gudi Yehowa nu mutshima waye wagasue, uzegemenago ndunge jiaye.’ Gula tuatshita ngenyi, ‘muene mbawutudijiga njila yabonga,’ yakotelesa egi mbawutukuatesa ha gutuna gudikambela milonga yavula nu ha gukhala gusuanguluga mu monyo wetu. Tudi nu gusuanguluga ha gujiya egi Yehowa wana mona ndaga tuana tagana najio nu wana gutuhana malongo abonga ajiya gutukuatesa!—Ngi. 32:8.
YEHOWA WANA GUTUHANA IMA TUANA KHALA NAYO FUNU
7. Mu maluholo atshi ako Yehowa wana gutuhana ima tuana khala nayo funu? (Filiphi 4:19)
7 Tanga Filiphi 4:19. Yehowa ganago gutukuatesa phamba mu nyuma uvi wana shimbiga nji ndaga tuana kalagala ha guheta ima ya gudia, milele nu fundo dia gubanda. (Mat. 6:33; 2 Tes. 3:12) Tudi mujiya egi ishigo ndaga yabola ha gudisagesa mukunda nu ima eyi, uvi Yehowa udi gututoga ha gutuna gudisagesa muavula mukunda nu ima yene. (Mat. 6:25) Mukunda natshi? Handaga Tata wetu gajiyilego nga hazonda gubembe akombeledi enji a gujinginyina mu tangua dia lamba. (Mat. 6:8; Heb. 13:5) Tudi naye gumushila mutshima egi mbawutagenesa nzala jietu gifua luholo ludi gutulaya muene.
8. Itshi yakalegele Yehowa mukunda nu Davidi?
8 Tutadilenu luholo Yehowa wakuatesele Davidi. Tangua diakhalele muene mulenga Fumu Saula, Yehowa wamuhanele nu enya mudimo enji ima akhalele nayo funu. Hatangijile Davidi mu luholo Yehowa wamukuatesele mu tangua diene, wazuelele egi: ‘Ngakhalele muvuala henyaha ngabua muthu wa gukola, uvi khenji ngamonele galego muthu wabonga mubembewa, nga an’enji muya nu gulomba ima ya gudia.’ (Ngi. 37:25) Aye nji wamonele gale luholo Yehowa wakuatesele akombeledi enji mu tangua dia lamba gifua muakatesele muene Davidi.
9. Luholo lutshi Yehowa wana kuatesa akombeledi enji mangino gula lamba diaabuila mu gisagumuisa? (Tala nji ifuanesa.)
9 Yehowa wana gutukuatesa nji gula lamba dia gisagumuisa diatubuila. Ha gufezegesa, tangua nzala yakola yanginyile gu Yelusalema mu siekle ya thomo, Aklisto a mu membo ako atumidile Aklisto a gu Yelusalema ima. (Makal. 11:27-30; Roma 15:25, 26) Mangino nji, akombeledi a Nzambi ana monesa khadilo diene tangua ana khaphela aphangi awo a Aklisto ima. Gula lamba diabua mu gisagumuisa, akombeledi a Yehowa ana kuatesa aphangi atagana nu lamba, ana guahana ima adi nayo funu gifua: ima ya gudia, meya, milele nu ihemba. Aphangi ana tshita mudimo wa gutunga ana londega jinzo jia aphangi nu Jinzo jia Ufumu jinyi jiabolesewe. Akombeledi a Yehowa ana khala nji hehi ha gukalegela malongo a Biblia ha guhana gikhesa gudi aphangi atotesa jinzo jiawo nga aphangi’awo.c
Luholo lutshi Yehowa wana gutuhana gikhesa mu tangua dia lamba? (Tala paragrafe 9)e
10-11. Malongo atshi wazula mu lumene lua Borys?
10 Yehowa wana kuatesa nji athu anago gumukombelela. Luholo lumoshi esue nji tuana kamba ba okazio ha gumonesa gisemo gudi athu anyi anago gukombelela Yehowa. (Gal. 6:10) Gutshita ngenyi guajiya guakuatesa ha gulonguga ndaga jiavula jiatutadila nu jiatadila Yehowa. Tutadilenu lumene lua Borys, wakhalele fumu wa mavula amoshi gu Ukraine. Borys gakhalelego Temue wa Yehowa, uvi wakhalele mukalegela Matemue a Yehowa akhalele mungina gu mavula enji ndaga nu gisemo giagasue. Tangua ita yazogele mu dimbo diawo, Borys walengele mu dimbo diko dia mu gifutshi giawo dinyi diakhalelego nu ita, aphangi etu a mu dimbo diene amukuatesele. Gungima, wayile mu gudibungisa gua Guwunguluga Gufua gua Yesu. Borys udi muzuela egi: “Ngudi muhana Matemue a Yehowa mersi yavula luholo angukuatesele nu gisemo giagasue.”
11 Esue nji tuajiya gulandula gifezegeselo gia Tata wetu wa mu dilu gula tudi muzumba athu agasue ikhale ashigo Matemue a Yehowa. (Luka 6:31, 36) Gula tudi mukalagala yagasue ha guzumba athu, yajiya guakuatesa ha gubua alandudi a Klisto. (1 Phet. 2:12) Uvi ikhale athu ene azula desizio dia gukombelela Yehowa nga ndo, mbatukhala nu gusuanguluga handaga Biblia idi muzuela egi muthu udi muhana wana khala nu gusuanguluga guavula.—Makal. 20:35.
YEHOWA WANA GUTUBAMBA
12. Luholo lutshi Yehowa mbawutubamba mu sungi ya lamba diakola? (Ngimbo 91:1, 2, 14)
12 Tanga Ngimbo 91:1, 2, 14. Mangino, Yehowa wana bamba akombeledi enji mu ndaga yagasue yajiya gubolesa ufuta wawo n’enji. Mbagashigo mubemba nga hazonda egi Satana akange akombeledi enji njila ha gumukombelela mu luholo luana tshigina muene. (Yone 17:15) Mu sungi ya “lamba diakola”, mbatusha mutshima egi Yehowa mbawutukuatesa ha gulandula gukhala nu gutshigina guakola nu mbawutuhuluisa.—Gumo. 7:9, 14.
13. Mu maluholo atshi Yehowa wana bamba muthu wagasue mukatshi dietu?
13 Luholo lutshi Yehowa wana bamba muthu wagasue mukatshi dietu? Wana gutukuatesa mu njila ya Biblia ha gukotelesa ndaga jiabonga nu jiabola. (Heb. 5:14) Gula tudi mukalegela ndaga tuana longuga mu Biblia, mbayitukuatesa ha gukhala nu ufuta wakola nu Yehowa; mbatuzula nji badesizio abonga anyi mbaatukuatesa ha gukhala nu gusuanguluga. (Ngi. 91:4) Yehowa wana gutubamba nji mu njila ya hungu dienji. (Yesh. 32:1, 2) Aphangi’etu a mala nu a akhetu ana zumba Yehowa nu ana gumutumagela. Gula tudi mubalegesa nawo tangua mu gudibungisa gua mu hungu, mu mudimo wa gulongesa nga tangua tudi mutshita ndaga jiko, mbatuheta gikhesa nu mbayitukuatesa ha gutuna gutshita ndaga jiabola.—Ish. 13:20.
14. a) Mukunda natshi Yehowa wana bemba egi tutagane nu malamba? b) Felele ditshi Ngimbo 9:10 didi gutuhana? (Tala nji mbimbi goshi’a diyiji.)
14 Mu tangua dikulu, Yehowa wabambele akombeledi enji ako hagula ashiyiwago. Uvi gakhalelego guyitshita tangua diagasue. Biblia yana zuela egi ‘ndaga tuatangijilego’ jiajiya gubuila muthu wagasue. (Mulo. 9:11) Yehowa wabembele egi akombeledi enji ako atagane nu usageshi nga gufua ha gumonesa egi Satana udi muenya mambo. (Yobo 2:4-6; Mat. 23:34) Ndaga jia luholo elu jiajiya nji gutubuila mangino. Yajiya gukhala egi Yehowa mbagashigo mutshita ndaga ya gushimana ha gumanesala malamba etu, uvi tudi naye gusha mutshima egi muene mbagashigo mubemba athu ana gumuzumba.d—Ngi. 9:10.
YEHOWA WANA GUTUHANA GIKHESA
15. Luholo lutshi tuana heta gikhesa mu njila ya gisambu, Biblia nu mu njila ya aphangi a Aklisto? (2 Kolinto 1:3, 4)
15 Tanga 2 Kolinto 1:3, 4. Matangua ako, tuana tagana nu ndaga jia lamba gifua gudisagesa, gikenene nga guleba muila. Yajiya gukhala egi udi mutagana nu ndaga imoshi ya lamba idi gugutuma ha gudivua hakhaye. Gudi nu muthu udi mukotelesa luholo udi gudivua ba? Ayi, Yehowa udi gugukotelesa. Yehowa ganago gumona phamba malamba tudi mutagana nawo, uvi “wana gutukuatesa mu malamba etu agasue.” Luholo lutshi? Tangua tuana bubila Yehowa mu gisambu, muene wana gutuhana “guhuima guabalega ndaga jiagasue athu ajiya gukotelesa.” (Fili. 4:6, 7) Tuana heta nji gikhesa tangua tuana tanga Biblia. Gutanga Biblia guana gutukuatesa ha gumona egi Yehowa wana gutuzumba, wana gutulongesa ha gutshita ndaga nu gutema nu wana gutuhana felela. Tuana heta nji gikhesa tangua tuana longuga Mbimbi ya Nzambi mu gudibungisa gua mu hungu nu gudi aphangi a mala nu a akhetu ana gutuzumba muavula.
16. Longo ditshi wazula mu lumene lua phangi Nathan nu mukaji’enji Priscilla?
16 Ha gumona luholo Yehowa wana gutukuatesa nu gutuhana gikhesa, tutadilenu gifezegeselo gia phangi Nathan nu mukaji’enji Priscilla, ana khala gu États-Unis. Mu ivo yabalega, azudile desizio dia guya fundo diakhalele nu funu ya alongeshi a Ufumu. Phangi Nathan udi muzuela egi: “Tuakhalele musha mutshima egi Yehowa mbawutukuatesa hagula ndaga jiagasue jibalege muabonga.” Uvi tangua ahetele ha fundo diene, asendesele gukata nu atagenele nu lamba diakola dia makuta. Ndaga yene yaatumina ha guzula desizio dia guvutuga gumbo diawo, ikhale ngenyi alanduile gutagana nu lamba dia makuta. Phangi Nathan udi muzuela egi: “Ngadihudile egi mukunda natshi Nzambi gatukuateselego gifua luholo tuatangijile. Ngasendesele nji gudihula gula ngatshitshile ndaga yabola.” Gungima dia masugu, Nathan nu Priscilla akotelesele egi Yehowa gaabembelego mu tangua diene dia lamba. Phangi Nathan udi muzuela luko egi: “Mu tangua diene dia lamba, Biblia yakhalele gifua futa dietu diakola handaga tuakhalele muheta gikhesa nu utuameji mu Mbimbi ya Nzambi. Gumona luholo Yehowa watukuatesele ha gukolesela mu malamba ene, yatukuatesele ha gusha mutshima egi gula tuatagana nu lamba mu masugu adi muza, muene mbawulandula gutukuatesa.”
17. Luholo lutshi phangi Helga wahetele gikhesa? (Tala nji gifuanesa.)
17 Aphangi a mala nu a akhetu ajiya nji gutukuatesa mu ndaga jiko. Luholo lutshi? Tutadilenu gifezegeselo gia phangi Helga, wana khala gu Hongrie. Wakhalele gudisagesa muavula mukunda nu ndaga imoshi ya lamba yakhalele mutagana nawo muene mu ivo yabalega. Yajiya gukhala egi tangua diana tangiza muene malamba ene, wana kotelesa egi Yehowa wakalegele aphangi ha gumuhana gikhesa. Udi muzuela egi: “Yehowa wakhalele gungukuatesa tangua diagasue diakalele mumona muene egi muila wanguleba mukunda nu mudimo ngakhalele mukalagala, luholo ngakhalele musansa mun’ami wakhalele mukata nu malamba ako ngakhalele mutagana nawo. Mu ivo eyi yagasue 30 yabalega, Yehowa walanduile gunguhana gikhesa. Wakhalele gunguhana gikhesa mu njila ya mvutu jiabonga jiakhalele muhana aphangi mu gudibungisa gua mu hungu. Aphangi akhalele gungutumina bamesaje, mikanda nu akhalele ngunguhana gikhesa tangua ngakhalele nu funu ya ukuateshi.”
Luholo lutshi Yehowa wajiya gugukalegela ha gukuatesa athu ako? (Tala paragrafe 17)
18. Luholo lutshi tuajiya guhana athu ako gikhesa?
18 Tudi diago nu luendu lua gulandula gifezegeselo gia Yehowa ha guhana aphangi ako gikhesa. Luholo lutshi tuajiya guyikalagala? Tuajiya guategelela nu guhuiminyina guagasue tangua adi gutuwambela ndaga, guzuela mbimbi jidi muhana gikhesa nu guahana ima adi nawo funu gula luholo ludi guene. (Ish. 3:27) Tudi naye guhana athu a maluholo agasue gikhesa ikhale anyi anago gukombelela Yehowa. Gula athu tuana khala nawo hehi adi gudisagesa nga adi mukata nga ndo adi nu gikenene tuana guya guatala, tuana guategelela nu tuana guatangela verse ya Biblia ha guahana gikhesa. Gula tudi mulandula gifezegeselo gia Yehowa “Nzambi wa ukuateshi wagasue,” mbatukuatesa aphangi’etu a Aklisto tangua adi mutagana nu malamba nu mbayituma athu anago gukombelela Yehowa ha gukamba gujiya ndaga jiavula jiamutadila.—Mat. 5:16.
YEHOWA MBAWULANDULA GUTUKUATESA
19. Yehowa wana gutukalegela itshi? Luholo lutshi tuajiya gulandula gifezegeselo gienji?
19 Yehowa wana gudisagesa muavula mukunda nu athu ana gumuzumba. Ganago gutubemba tangua tuana tagana nu malamba. Gifua luholo mvuaji jiana bamba an’awo nu guzumba guagasue, Yehowa wana bamba nji akombeledi enji a gujinginyina. Wana gututuameza, wana gutuhana ima tuana khala nayo funu, wana gutubamba nu wana gutuhana gikhesa. Tuana landula gifezegeselo gia Tata wetu wa mu dilu tangua tuana kuatesa aphangi nu tuana guahana gikhesa mu tangua dia lamba. Ikhale tudi mutagana nu malamba, tuajiya gulandula gusha mutshima egi Yehowa mbawutukuatesa handaga watulayele egi: ‘Muvuigo woma, ame ngudi n’enu.’ (Yesh. 41:10) Ndaga eyi idi diago gutuhana gikhesa ha gujiya egi tushigo hakhetu.
LUNGIMBO 100 Accueillons-les avec hospitalité
a Tala longo “Prenons des décisions qui honorent Dieu” mu Inzo Yaleha ya Mutaledi ya 15 Avril 2011 ya français.
b Tala paragrafe 11-14 jia longo “Khala Mulandula Utuameji wa Yehowa” mu Inzo Yaleha ya Mutaledi ya Fevrier 2024.
c Wajiya gutanga mene jiko jia aphangi jiakatuga guzonga gula wasonega mbimbi “guakuatesa athu abuila lamba” nga “opérations de secours” ha fundo dia gukambela mu jw.org.
d Tala “Questions des lecteurs” mu Inzo Yaleha ya Mutaledi ya Fevrier 2017 ya français.
e UKOTELESHI WA GIFUANESA : Aphangi a gu Malawi atagana nu lamba dia gisagumuisa, adi muheta ima ya gudia nu ima iko nu gikhesa mu malongo adi guahana aphangi.