Khala Mutshigina nu Gudibulumuisa Guagasue egi Gudi nu Ndaga Ushigo Mujiya

1. Luholo lutshi Yehowa watufugile? Mukunda natshi watufugile ngenyi?

YEHOWA watufugile mu luholo lua gushimana diago: tuana tangigiza, tuana longuga ndaga jihe-jihe, tuana jiya luholo lua gukalegela ndaga tualonguga. Mukunda natshi Yehowa watufugile ngenyi? Handaga wana tshigina egi tuzule badesizio abonga adi gudivua nu ndunge jia giamatshidia ha gumukombelela.​—Ish. 2:1-5; Roma 12:1.

2. a) Ndaga jitshi tudi naye gujiya? (Yobo 37:23, 24) (Tala nji gifuanesa.) b) Mukunda natshi idi nu ndando ha gujiya egi tushigo mujiya ndaga jiagasue?

² Tuana khala nu ndunge jia gulonguga ndaga jiavula, uvi gudi nu ndaga jiko jiavula tushigo mujiya. (Tanga Yobo 37:23, 24.) Tutadilenu gifezegeselo gia Yobo. Yehowa wamuhudile mihu yavula ha gumukuatesa ha gujiya egi, guakhalele nu ndaga jiavula gakhalelego mujiya. Ndaga yene yamukuatesele ha gumonesa khadilo dia gudibulumuisa nu gusombegesa luholo luenji lua gutangiza. (Yobo 42:3-6) Esue nji tuana heta gubonga gula tudi mujiya egi tushigo mujiya ndaga jiavula. Gujiya ngenyi guajiya gutukuatesa ha gukhala athu a gudibulumuisa nu gusha mutshima egi Yehowa mbawutuwambela ndaga tudi najio funu ha guzula badesizio abonga.​—Ish. 2:6.

3. Itshi tuza muzuelela mu longo edi?

³ Mu longo edi, tuza muzuelela ndaga tushigo mujiya nu malamba tuajiya gutagana nawo mukunda nu ndaga jiene. Tuza nji mumona egi ishigo ndaga yabola gula tushigo mujiya ndaga jiko. Ndaga tuza mulonguga jiza gutukuatesa ha gusha mutshima egi Yehowa udi nu ‘ndunge jiatagana,’ wana gutuwambela ndaga tudi najio funu.​—Yobo 37:16.

TUSHIGO MUJIYA TANGUA GISUGISHILO MBAGIZA

4. Ha gutadila ndaga jidi mu Matayo 24:36, ndaga itshi tushigo mujiya?

⁴ Tanga Matayo 24:36. Tushigo mujiya tangua mbadiza gisugishilo gia mavu awa. Tangua Yesu wakhalele ha mavu, gakhalelego mujiya “lusugu luene nu tangua diene.”a Gungima wawambelele apostolo enji egi Yehowa udi watagana ha gujiya tangua ndaga jimoshi ngenyi jidi naye gukalegewa. (Makal. 1:6, 7) Yehowa watombele gale tangua mbadiza gisugishilo gia mavu awa, uvi esue tushigo mujiya lusugu luene.

5. Tuajiya gudivua gikhuatshi luholo tushigo mujiya tangua gisugishilo mbagiza?

⁵ Ha gutadila ndaga jiazuelele Yesu, tushigo mujiya gula tudi naye gunengena matangua guvula gutshi gutuama egi gisugishilo gize. Gula tuana nengena gale lusugu luene sendese mualeha, tuajiya guleba muila nga gutuna gumonesa luko khadilo dia guhuiminyina. Yajiya nji gukhala lamba ha gukolesela tangua enya fami yetu nga athu ako adi gutusegulula. (2 Phet. 3:3, 4) Tuajiya gutangiza egi gula tuajiya diago lusugu luene, mbayikhala yaleba ha gumonesa khadilo dia guhuiminyina nu gukolesela tangua athu ako adi gutusegulula.

6. Mukunda natshi idi ndaga yabonga luholo tushigo mujiya tangua lusugu lua Yehowa mbaluza?

⁶ Yehowa gatuwambelelego tangua mbadiza gisugishilo, uvi tudi nu luendu lua gumonesa diago egi tuana gumukombelela handaga tuana gumuzumba nu tuana gumushila mutshima. Felela dietu diakhala dia gukombelela Yehowa mayilago, handaga gutshigina guetu gudi muene mbagushgio musuga tangua gisugishilo mbagiza, uvi mbagukhala mayilago. Ha fundo dia gudisagesa mukunda nu tangua mbadiza “lusugu lua Yehowa,” idi ndaga yabonga ha gutangiza gubonga mbagutubatela lusugu luene. Gutshita ngenyi mbagutukuatesa ha gukhala nu ufuta wakola nu Yehowa nu mbatutshita yagasue ha gumusuanguluisa.​—2 Phet. 3:11, 12.

7. Ndaga jitshi tuana jiya?

⁷ Idi nu ndando ha gutangiza ndaga tudi mujiya. Tuana jiya egi gisugishilo gia mavu awa giasendesele mu 1914. Mu njila ya Biblia, Yehowa wasonegesele profesi jidi mumonesa egi masugu a gisugishilo asendesele mu givo giene. Watuwambelele nji ndaga jiazonda-zonda jiakhalele naye gukalegewa ha mavu gungima dia givo giene. Gishina giene, tudi diago musha mutshima egi ‘lusugu luakoma lua Yehowa luasuena hehi.’ (Sef. 1:14) Tudi mujiya nji mudimo Yehowa udi mutshigina egi tutshite, yakotelesa egi gulongesa athu avula ‘lukuma luabonga lua Ufumu.’ (Mat. 24:14) Tuana longesa lukuma luabonga mu ifutshi 240 nu mu mazuelelo gubalega 1 000. Tushigo nu funu ya gujiya “lusugu luene nu tangua diene” hagula tusendese gulongesa lukuma luabonga nu gikhesa giagasue.

TUSHIGO MUJIYA LUHOLO YEHOWA MBAWUTSHITA NDAGA

8. Mbimbi ‘mudimo wa Nzambi wa giamatshidia’ jidi mukotelesa itshi? (Mulongeshi 11:5)

⁸ Tuana jiyago ‘mudimo wa Nzambi wa giamatshidia.’ (Tanga Mulongeshi 11:5.) Mbimbi jidi mu verse eyi jidi mumonesa ndaga yana tuma Yehowa ha gukalagala ndaga imoshi ngenyi nga ndaga yana gumutuma ha gutagenesa felela dienji. Tuajiyilego gujiya diago mukunda natshi Yehowa wana bemba egi ndaga imoshi yikalegewe nga gujiya ndaga mbayikalagala muene ha gutukuatesa. (Ngi. 37:5) Biblia yana fuanesa ‘mudimo wa Nzambi wa giamatshidia’ nu luholo luana sombegesa mona mu vumo dia gin’enji. Enya ndunge ana jiya ndo luholo mona wana sombegesa mu vumo dia gin’enji; luholo lumoshi nji, tushigo mujiya diago luholo Yehowa mbawukalagala ndaga.

9. Luholo tushigo mujiya diago ndaga mbajikalagala Yehowa, itshi tuajiya gusendesa gutangiza?

⁹ Gula tushigo mujiya diago luholo Yehowa mbawutukuatesa, yajiya gututuma ha gukhala nu badute tangua tudi mutshigina guzula badesizio. Ha gufezegesa, yajiya gukhala lamba ha gubemba ndaga jiko tuana tshita ha gudihana muavula mu mudimo wa gulongesa nga guya fundo didi nu funu ya alongeshi. Nga ndo tuajiya gutangiza egi, Yehowa gana suangulugago nu esue handaga tushigo mutagenesa mafelela etu a mu nyuma. Yajiya nji gukhala egi tudi mubalegesa tangua diavula mu mudimo wa gulongesa uvi tushigo muheta athu a gulonguga nawo Biblia. Nga ndo tudi mutagana nu malamba mu mudimo wa Yehowa.

10. Luholo tushigo mujiya ndaga mbajikalagala Yehowa, khadilo ditshi tudi naye gukudisa?

¹⁰ Luholo tushigo mujiya ndaga mbajikalagala Yehowa, yajiya gutukuatesa ha gukudisa khadilo dia gudibulumuisa. Gutshita ngenyi guajiya nji gutukuatesa ha gujiya egi Yehowa wana kalagala ndaga mu luholo luabonga gutubalega. (Yesh. 55:8, 9) Yajiya gutukuatesa luko ha gushila diago Yehowa mutshima egi mbawutagenesa nzala jietu. Gula mudimo wetu wa gulongesa nga mudimo uko wa Ufumu udi muzola mbuto yabonga, tuana tumbuisa Yehowa. (Ngi. 127:1; 1 Kol. 3:7) Gula ndaga jiayilego muabonga gifua luholo tuakhadi gudifelela, tudi naye gujiya egi Yehowa wana mona ndaga jiagasue. (Yesh. 26:12) Tudi naye gutshita ndaga tuajiya gutshita nu gulandula gumushila mutshima egi mbawutukuatesa. Ngatshima Yehowa gatutuamezelego mu luholo lua gushimana gifua luholo luayikalegele muene mu tangua dikulu, uvi tudi naye gusha mutshima egi mbawututuameza.​—Makal. 16:6-10.

11. Ndaga jitshi jia ndando tudi mujiya mukunda nu Yehowa?

¹¹ Tuana jiya egi Yehowa wana kalagala ndaga mu luholo luabonga nu guzumba guagasue nu gutema. Wana zula nu ndando ndaga tuana gumukalegela nu jinyi tuana kalegela aphangi’etu Aklisto. Tuana jiya nji egi Yehowa washimbigile athu akhalele yagujinginyina gudi muene.​—Heb. 11:6.

TUSHIGO MUJIYA NDAGA MBAJITUBUILA HAMENE

12. Ha gutadila Yakoba 4:13, 14, ndaga jitshi tushigo mujiya?

¹² Tanga Yakoba 4:13, 14. Tuana jiya ndo ndaga mbayitubuila hamene. Ha mavu awa tuana tagana nu ndaga jinyi tuatangijilego egi jiajiya gutubuila. (Mulo. 9:11) Gishina giene, tuajiyilego gujiya gula ndaga tuadifelela ha gutshita mbajibinga nga ndo gula mbatukhala nu monyo ha gujikalagala.

13. Luholo tushigo mujiya ndaga jiagasue mbajitubuila mu masugu adi muza, yajiya gututuma ha gudivua gikhuatshi?

¹³ Yajiya gukhala lamba ha gukolesela handaga tushigo mujiya ndaga jiagasue mbajitubuila mu masugu adi muza. Luholo lutshi? Gula tuasendesa gudisagesa muavula, tuajiya gutotesa gusuanguluga guetu. Ndaga jia lamba jiajiya gutubuila mu gisagumuisa jiajiya gutuhana gikenene giavula diago. Gula ndaga jiakalegewego gifua luholo tuakhadi gudifelela, tuajiya guleba muila.​—Ish. 13:12.

14. Itshi tudi naye gutshita ha gukhala nu gusuanguluga gua giamatshidia? (Tala nji ifuanesa.)

¹⁴ Tangua tuana kolesela mu malamba, tuana monesa diago egi tuana kombelela Yehowa handaga tuana gumuzumba. Biblia idi mumonesa egi tuajiyilego gunengena egi Yehowa atubambe mu malamba agasue ajiya gutubuila. Tushigo naye nji gutangiza egi Yehowa walondele gale ndaga mbajitubuila mu monyo wetu. Yehowa wana jiya egi tuajiya gukhala nu gusuanguluga ikhale tushigo mujiya ndaga jiagasue mbajitubuila mu masugu adi muza. Uvi tuajiya gukhala nu gusuanguluga gula tudi mukamba utuameji wenji nu tudi gumutumagela. (Yel. 10:23) Tangua tuana kamba utuameji wenji gutuama dia guzula badesizio, tuana khala nu matangi gifua akhalele nawo Yakoba hazuelele muene egi: “Gula Yehowa watshigina, mbatukhala nu monyo, mbatutshita gima gigi, nga gima ginyi.”​—Yak. 4:15.

15. Itshi tudi mujiya mukunda nu masugu adi muza?

¹⁵ Tuanago gujiya ndaga jiana bua lusugu nu lusugu, uvi tuana jiya egi Yehowa watulayele monyo wa ivo nu ivo ikhale ha mavu nga mu dilu. Tuana jiya egi Nzambi ganamba ndo mambo nu gushigo nga gima giajiya gumukanga njila ha gutagenesa ndaga jialayele muene. (Tito 1:2) Nzambi muene hakhenji udi muzuela egi: ‘Ngadiangele guzuela ndaga mbajiza, sendese mualeha ngazuelele ndaga jidi khenji jibua galego.’ Ndaga Biblia yadiangele guzuela mu tangua dikulu jiatagenesewe, luholo lumoshi nji ndaga jiatulayele Yehowa mukunda nu masugu adi muza, mbajitagenesewa. (Yesh. 46:10) Tudi mujiya nji egi gushigo nga ndaga yajiya gukanga Yehowa njila ha gutuzumba. (Roma 8:35-39) Muene mbawutuhana ndunge, gikhesa nu ngolo tudi najio funu ha gukolesela mu ndaga jiagasue mbajitubuila mu masugu adi muza. Tuajiya diago gusha mutshima egi Yehowa mbawutukuatesa nu mbawutushimbiga.​—Yel. 17:7, 8.

YEHOWA WANA GUTUJIYA MUABONGA GUBALEGA LUHOLO TUANA GUDIJIYA

16. Yehowa wana jiya ndaga jitshi? Ndaga yene idi gututuma ha gudivua gikhuatshi? (Ngimbo 139:1-6)

¹⁶ Tanga Ngimbo 139:1-6. Mufugi wetu wana jiya ndaga jietu jiagasue. Ha gufezegesa, wana jiya ndaga tuana tangiza nu luholo tuana gudivua. Wana jiya ndaga tuana zuela nu ndaga jidi mu mutshima wetu. Wana jiya nji ndaga jiagasue tuana kalagala nu ndaga jiana gututuma ha gujitshita. Fumu Davidi wazuelele egi Yehowa wakhala tangua diagasue hehi nu esue nu wana gutukuatesa. Idi diago ndaga ya gushimana ha gumona luholo Nzambi wa Ngolo Jiagasue, Mufugi wa dilu nu mavu wana gudisagesa mukunda nu esue! Davidi wazuelele egi: ‘Luholo udi gungujiya ludi gungukolela ha gukotelesa. Ujiyi wene udi mubalega ndaga jiagasue ngajiya gukotelesa.’​—Ngi. 139:6.

17. Mukunda natshi yajiya gukhala lamba ha gutshigina egi Yehowa wana gutujiya muabonga?

¹⁷ Ndaga tuana tagana najio mu fami jietu, mu gifutshi gietu nga ndaga tualongugile gutuama dia gujiya giamatshidia, jiajiya gutukanga njila ha gutshigina egi Yehowa udi Tata waguzumba nu wana gudisagesa mukunda nu esue. Tuajiya nji gutangiza egi Yehowa udi gualeha nu esue nu gajiyilego luko gututshigina mukunda nu gubola tuakalegele mu masugu abalega. Matangua ako Davidi wadivuile nji ngenyi. (Ngi. 38:18, 21) Yajiya gukhala egi gula muthu udi mutshita diago ngolo ha gusombegesa makalegelo enji nu gutumagela mikhuala ya Nzambi wajiya gudihula egi, ‘gula Nzambi wana gungujiya diago, mukunda natshi udi gungutoga ha gutshita ndaga jidi lamba mukunda nu ame?’

18. Mukunda natshi idi nu ndando ha gutshigina egi Yehowa wana gutujiya muabonga gubalega luholo tuana gudijiya? (Tala nji ifuanesa.)

¹⁸ Tuajiya diago gutshigina egi Yehowa wana gutujiya muabonga gubalega luholo tuana gudijiya, wana mona nji makalegelo etu abonga anyi esue hakhetu tuajiyilego gumona. Yehowa wana mona ndaga jiabola tuana kalagala, uvi wana gutuzumba handaga wana kotelesa luholo tuana gudivua nu ndaga yana gututuma ha gutshita ngenyi. (Roma 7:15) Tuajiya guheta ngolo tudi najio funu ha gusala ya gujinginyina gudi Yehowa nu gumukombelela nu gusuanguluga guagasue gula tuakotelesa egi wana tala phamba makalegelo etu abonga.

19. Itshi tudi mujiya mukunda nu Yehowa?

¹⁹ Tudi mujiya egi Yehowa udi guzumba. Ndaga yene idi diago ya giamatshidia. (1 Yone 4:8) Tudi mujiya nji egi mikhuala yenji yana monesa guzumba guenji mukunda nu esue nu wana tshigina egi tukhale nu lujingu luabonga. Tudi mujiya luko egi Yehowa wana tshigina egi tuhete monyo wa ivo nu ivo. Wahanele gibawu ha gutagenesa ndaga yene. Gibawu giene giana gututshiginyisa diago egi ikhale matangua ako tuana tshita ndaga jiabola, uvi tuajiya gukombelela Yehowa mu luholo luana tshigina muene. (Roma 7:24, 25) Tuana jiya nji egi “Nzambi udi wakoma gubalega mitshima yetu nu wana jiya ndaga jiagasue.” (1 Yone 3:19, 20) Yehowa wana gutujiya muabonga nu wana sha mutshima egi mbatusala yagujinginyina gudi muene.

20. Itshi yajiya gutukuatesa ha gutuna gudisagesa muavula mukunda nu ndaga tushigo mujiya?

²⁰ Yehowa wana gutuwambela ndaga jiagasue tuana khala najio funu. Hene, ha fundo dia gudisagesa mukunda nu ndaga tushigo mujiya, tudi naye gusha matangi etu mu ndaga jiabalega ndando. Gula tuatshita ngenyi, mbatumonesa egi tuana shila diago Yehowa mutshima egi ‘muene udi nu ujiyi watagana.’ (Yobo 36:4) Gula tushigo mujiya ndaga jiko mangino, tuana jiya egi Yehowa mbawulandula gutulongesa ndaga jihe-jihe mayilago. Tuana khala nji nu gusuanguluga handaga mbatubembigo gulonguga ndaga jihe-jihe jiatadila Nzambi wetu.​—Mulo. 3:11.