Malongo Tuajiya Guzula mu Mbimbi jia Gisugishilo Jiazuelele Mala Akhalele Muzumba Nzambi

1. Mukunda natshi tudi naye guzula malongo gudi athu agukola?

MUKUT’ETU agasue tuana tshigina egi atukuatese ha guzula badesizio abonga. Tuajiya guheta ukuateshi wene gudi akulu nga gudi Aklisto ako agukula mu nyuma. Gula Aklisto ene adi athu agukola tushigo naye gutangiza egi malongo awo ashigo luko nu ndando mangino. Yehowa wana tshigina egi tuzule malongo gudi athu agukula. Luholo abalegesa gale ivo yavula mu mudimo wenji, adi nu eksperianse nu ndunge jiavula gutubalega.​—Yobo 12:12.

2. Itshi tuza muzuelela mu longo edi?

² Mu tangua dikulu, Yehowa wakhalele mukalegela mala agukola anyi akhalele gumuzumba ha gutuameza akombeledi enji nu guahana gikhesa. Tutadilenu gifezegeselo gia Moize nu gia Davidi nu gia mupostolo Yone. Ajingile mu sungi jia gudisha, ndaga jia monyo wawo jiakhalele nji jia gudisha diago. Gutuama egi afue, mukut’awo agasue ahanele malongo abonga gudi mavuala. Mala awa agasue akhalele muzumba Nzambi, amonelesele egi idi nu ndando ha gutumagela Nzambi. Yehowa watshiginyile egi mbimbi jiawo jia gutema jisonegewe mu Biblia ha gutukuatesa mangino. Hene ikhale tudi mavuala nga athu agukola, mukut’etu agasue tuajiya guheta gubonga gula tudi muzula tangua dia gutanga malongo ene. (Roma 15:4; 2 Tim. 3:16) Mu longo edi, tuza mutadila mbimbi jiagisugishilo jiazuelele mala awa thathu agukola nu malongo tuajiya guzula mu mbimbi jiene.

‘MBAMUKHALA NU MONYO MASUGU AVULA’

3. Midimo itshi Moize wakhalele mutshita?

³ Moize wakalegele Yehowa mudimo wakola monyo wenji wagasue. Wakhalele profete, nzuji, mutuameji nu musonegi. Moize wakhalele nu eksperianse yavula mu monyo wenji! Wazolele enya Isalele mu uhiga gu Ejipitu nu wamonele nji ndaga jiavula jia gushimana jiakalegele Yehowa. Yehowa wamukalegele ha gusonega mikanda ya thomo thano ya Biblia, wasonegele nji mukanda wa Ngimbo 90, yajiya gukhala nji egi muene wasonegele mukanda wa Ngimbo 91 nu mukanda wa Yobo.

4. Akhuatshi Moize wahanele gikhesa? Mukunda natshi?

⁴ Matangua azonda gutuama egi Moize afue hakhalele muene nu ivo 120, watamegele enya Isalele agasue ha guawunguluisa ndaga jinyi Yehowa wakalegele mukunda nu ene. Ivo yavula gutuama, enya Isalele ako amonele ndaga jia gushima jiakalegele Yehowa nu luholo luahanele muene enya gu Ejipitu ndola. (Guz. 7:3, 4) Amonele luholo Yehowa wakhaphumuine Kianga Giabenga nu awendele nji mu mavu a gimigina mukatshi dia kianga giene. Amonele nji luholo Yehowa washiyile Farao nu masuta enji. (Guz. 14:29-31) Mu mavu a luselenga Yehowa wakhalele guabamba nu guahana ima akhalele nayo funu. (Mikh. 8:3, 4) Tangua enya Isalele ahetele hehi ha gungina mu Mavu a Gutendelela, Moize wakalegele tangua diene dia gisugishilo gia monyo wenji ha guahana gikhesa.a

5. Luholo lutshi mbimbi jia gisugishilo jiazuelele Moize mu Mikhuala 30:19, 20 jiakhalele naye gukuatesa enya Isalele?

⁵ Ndaga jitshi Moize wazuelele? (Tanga Mikhuala 30:19, 20.) Wawambelele enya Isalele egi mbaakhala nu lujingu luabonga mu masugu adi muza. Enya Isalele akhalele naye gujinga ivo yavula mu mavu anyi Yehowa walayele ha guahana. Mavu ene akhalele abonga diago nu akhalele muzola mbuto jiavula! Moize wazuelele mukunda nu mavu ene egi: ‘Gifutshi gidi nu membo akoma nu abonga anyi muatungilego, nu jinzo jia guzala nu ima yabonga ya maluholo agasue inyi muakalegelego mudimo ha guyiheta, nu mawina a meya anyi muahagelego nu ilanga ya vinyo nu mitshi ya olive inyi muakunyilego.’​—Mikh. 6:10, 11.

6. Mukunda natshi Nzambi wabembele egi enya ifutshi iko abinge enya Isalele?

⁶ Moize watemesele nji enya Isalele. Enya Isalele akhalele naye gutumagela mikhuala ya Yehowa ha gulandula gujinga mu gifutshi giene giabonga. Moize wawambelele egi gula atomba ha gutegelela Yehowa nu asala yagujinginyina gudi muene, mbaasala nu monyo. Uvi enya Isalele atunyile gawo gutumagela Yehowa. Hene Nzambi wabembele egi enya Asiliya a abinge. Gungima enya Babilona nji a abingile nu ayile nawo mu uhiga.​—2 Maf. 17:6-8, 13, 14; 2 Gudi. 36:15-17, 20.

7. Malongo atshi tuajiya guzula mu mbimbi jiazuelele Moize? (Tala nji gifuanesa.)

⁷ Ndaga eyi idi gutulongesa itshi? Idi gutulongesa egi gula tudi mutumagela Yehowa, tuajiya guheta monyo wa ivo nu ivo. Gifua luholo enya Isalele akhalele hehi nu Mavu a Gutendelela, esue nji tudi diago hehi nu mavu ahe-ahe anyi Nzambi watulayele, gualeha ndo mavu ene mbaabua luko phaladiso. (Yesh. 35:1; Luka 23:43) Diabulu nu bademo enji mbaashigo luko mukhala guene. (Gumo. 20:2, 3) Ikombelelo ya mambo mbayishigo luko muhuiga athu. (Gumo. 17:16) Ba guvernema mbaashigo luko muhana athu ana tuameza ene lamba. (Gumo. 19:19, 20) Mbundudi mbajishigo mukhala guene. (Ngi. 37:10, 11) Athu agasue mbaatumagela mikhuala ya Yehowa nu mbaakhala hamoshi mu guhuima. Athu mbaakhala nu guzumba nu mbaakhala gudishila mutshima. (Yesh. 11:9) Tudi munengena diago gutagenesewa gua ndaga eji! Idi nu ndando ha gutumagela Yehowa, gula tuatshita ngenyi tuajiya diago gulandula gujinga mu phaladiso ivo nu ivo.​—Ngi. 37:29; Yone 3:16.

8. Luholo lutshi felela dia gujinga mayilago diakuatesele phangi mumoshi wa misionere? (Yuda 20, 21)

⁸ Gula tudi mutangigiza muavula felela dia tuhanele Nzambi dia gujinga ivo nu ivo, yajiya gutukuatesa ha gumutumagela ikhale tudi mutagana nu malamba. (Tanga Yuda 20, 21.) Laji edi diajiya nji gutukuatesa ha gulandula gulua nu guleba guetu. Phangi mumoshi wa yala wakalegele mudimo wa gimisionere ivo yavula mu Afrique udi muzuela ndaga yakhalele mutshita muene gula matangi abola amujila. Wazuelele egi: “Ngakotelesele egi ngajiyilego gungina mu phaladiso gula ngushigo mutumagela Yehowa, ndaga yene yangukuatesela ha gukolesela mu malamba ngakhalele mutagana nawo nu gukombelela luko Yehowa muavula. Yehowa wangukuatesele ha gulandula gumukalegela.”

“MBAWUBINGA”

9. Malamba atshi Davidi wataganele nawo mu monyo wenji?

⁹ Davidi wakhalele fumu wakoma. Wakhalele nji musonega nu guyimba ngimbo, wakhalele suta nu profete. Wataganele nu malamba avula diago. Ivo yavula Davidi wakhalele gudisuega handaga Fumu Saula wakhalele mukamba gumushiya. Gungima dia gubua Fumu, Davidi wakhalele nji gudisuega handaga mun’enji Abasaloma wakhalele mukamba gumutambula ufumu. Ikhale Davidi wataganele nu malamba awa agasue nu wakalegele nji gubola guakoma, uvi wasalele yagujinginyina gudi Nzambi. Yehowa wazuelele egi Davidi udi ‘muthu wana kalagala diago ndaga jiana tshigina muene.’ Tudi naye diago gutegelela malongo a Davidi!​—Makal. 13:22; 1 Maf. 15:5.

10. Mukunda natshi Davidi wahanele mun’enji Salomo malongo gutuama egi abue fumu?

¹⁰ Ha gufezegesa, tutadilenu malongo anyi Davidi wahanele mun’enji Salomo munu wakhalele naye gumuhingana. Yehowa watombele Salomo ha gutunga tempelo fundo athu akhalele naye gumukombelela. (1 Gudi. 22:5) Salomo wakhalele naye gutagana nu malamba. Ndaga jitshi Davidi wamuwambelele? Tutadilenu ndaga jiene.

11. Hagutadila 1 Mafumu 2:2, 3, malongo atshi Davidi wahanele Salomo? Gubonga gutshi Salomo wakhalele naye guheta gula watumagela malongo ene? (Tala nji gifuanesa.)

¹¹ Ndaga jitshi Davidi wazuelele? (Tanga 1 Mafumu 2:2, 3.) Davidi wawambelele mun’enji Salomo egi gula watumagela Yehowa, mbawubinga mu monyo wenji. Gishina giene, mu ivo yavula Yehowa wahanele Salomo ima yavula yabonga nu wamukuatesele mu maluholo agudisha. (1 Gudi. 29:23-25) Watungile tempelo yabonga diago nu wasonegele nji mikanda iko ya Biblia, ndaga jiko jiazuelele muene jidi mu mikanda iko ya Biblia. Wajiyiwe muavula mukunda nu ndunge nu umonyi wenji. (1 Maf. 4:34) Gifua luholo Davidi wazuelele, Salomo wakhalele naye gubinga gula watumagela Yehowa Nzambi. Ndaga yagikenene idi egi tangua Salomo wabuile muthu wagukola, wayile mukombelela Nzambi jiko. Yehowa gasuangulugilego nu ndaga yene, hene wabembele gumuhana ndunge jia gutuamezela athu mu luholo luabonga.​—1 Maf. 11:9, 10; 12:4.

12. Ndaga jinyi Davidi wawambelele Salomo jidi gutulongesa itshi?

¹² Ndaga eyi idi gutulongesa itshi? Idi gutulongesa egi gula tudi mutumagela Yehowa, muene mbawutushimbiga. (Ngi. 1:1-3) Yadiago Yehowa gatulayelego egi mbawutuhana umonyi nu lutumbu gifua luahanele muene Salomo. Uvi gula tudi gumutumagela, muene mbawutuhana ndunge ha guzula badesizio abonga. (Ish. 2:6, 7; Yak. 1:5) Malongo ana gutuhana Yehowa ajiya gutukuatesa ha guzula badesizio abonga mu ndaga yatadila mudimo, makhalasa, makuta nu saga jia gubalegesela tangua. Gula tudi mutumagela malongo ene, mbatubamba ufuta wetu nu Yehowa nu mbatuheta monyo wa mayilago. (Ish. 2:10, 11) Mbatuheta nji mafuta abonga nu mbatuheta utuameji tudi nawo funu ha gukhala nu gusuanguluga mu fami.

13. Itshi yakuatesele phangi Carmen ha guzula desizio diabonga?

¹³ Phangi Carmen wana khala gu Mozambique, wakhalele mutangiza egi gulonguga makhalasa aleha mbagumukuatesa ha gukhala nu lujingu luabonga. Wanginyile gu Université ha gulonguga ndaga jiatadila gutshita ba plan nu gutunga jinzo (architecture). Wazuelele egi: “Ngakhalele musuanguluga muavula nu ndaga ngakhalele mulonguga. Uvi ndaga jiene jiakhalele gunguzula tangua nu ngolo jiavula. Gu université tuakhalele musendesa gulonguga mu 7:30 uu nu mu 18:00. Yakhalele lamba ha guya mu gudibungisa gua mu hungu. Ndaga yene yalebesele ufuta wami nu Yehowa. Ngakotelesele egi ngakhalelego mulandula malongo a Yehowa.” (Mat. 6:24) Phangi Carmen wakombelele Yehowa mukunda nu ndaga yene nu watshitshile ba recherche mu mikanda yetu. Wazuelele luko egi: “Tangua akulu nu mama anguhanele malongo abonga, ngazudile desizio dia gukatuga gu université ha gukalegela Yehowa mu mudimo wa tangua diagasue. Gutshita ngenyi guangukuatesele ha guzula desizio diabonga mu monyo wami, nganago gudibela nga hazonda mukunda nu desizio diene.”

14. Ndaga itshi ya ndando Moize nu Davidi akhalele muzuelela?

¹⁴ Moize nu Davidi akhalele muzumba Yehowa muavula nu akhalele mujiya egi yakhalele nu ndando yavula ha gumutumagela. Mu mbimbi jiawo jia gisugishilo, ahanele athu ako gikhesa ha gulandula gifezegeselo giawo nu gusala yagujinginyina gudi Yehowa. Atemesele nji athu ako ha gujiya egi gula asalelego yagujinginyina gudi Yehowa, muene mbawatuna nu mbaashigo muheta ishimbigo yalayele muene. Malongo awo adi nu ndando yavula mukunda nu esue mangino. Gungima dia ivo yavula, mukombeledi muko wa Yehowa wamonesele nji egi gusala yagujinginyina gudi Nzambi gudi nu ndando yavula.

“GUSHIGO NU NDAGA YAJIYA GUNGUSUANGULUISA MUAVULA GUBALEGA EYI”

15. Ndaga jitshi mupostolo Yone wamonele mu monyo wenji?

¹⁵ Yone wakhalele muposotolo munu Yesu Klisto wakhalele muzumba muavula. (Mat. 10:2; Yone 19:26) Wakhalele mubalegesa tangua diavula nu Yesu mu mudimo wa gulongesa, wamonele nji ndaga jiagushimana jinyi Yesu wakalegele nu wasalele yagujinginyina gudi muene mu tangua dia lamba. Wamonele luholo ashiyile Yesu nu wamonele nji tangua dia fuzumugile muene. Wamonele nji luholo hungu dia Uklisto diakhalele mukula. Yone wajingile muavula, wamonele nji luholo lukuma luabonga “lualongesewe ha mavu a mudidi.”​—Kol. 1:23.

16. Akhuatshi ana heta gubonga mu mikanda yasonegele Yone?

¹⁶ Tangua Yone wabuile muthu wa gukola, wa hetele luendu lua gusonega mikanda iko idi mu Mbimbi ya Nzambi. Mukatshi dia mikanda yene, tuajiya gutanga mukanda wa Gumonesa. (Gumo. 1:1) Muene wasonegele evanjile idi nu jina dienji. Mu ukuateshi wa nyuma ya Nzambi, wasonegele nji mikanda thathu iko idi nu jina dienji. Mukanda wenji wa thathu wawusonegelele Gayuse Muklisto mumoshi wakhalele yagujinginyina gudi Nzambi. Yone wakhalele gumuzumba gifua mun’enji wa mu nyuma. (3 Yone 1) Idi naye nji gukhala egi guakhalele nu athu ako avula anyi Yone wakhalele muzumba gifua an’enji a mu nyuma. Ndaga jiasonegele muthu owu wa gukola wakhalele muzumba Nzambi, jiana kuatesa alandudi a Yesu uu nu mangino.

17. Ha gutadila 3 Yone 4, itshi yana bata gusuanguluga gua giamatshidia?

¹⁷ Ndaga jitshi Yone wasonegele? (Tanga 3 Yone 4.) Mu mukanda wenji wa thathu, Yone wasonegele egi wakhalele nu gusuanguluga luholo aphangi’enji Aklisto akhalele mutumagela Nzambi. Uvi mu tangua diene, athu ako asendesele gulongesa malongo mambo mu hungu, ndaga yene yakhaphumuine athu mu hungu. Uvi athu ako akhalele “mulandula guwenda mu giamatshidia.” Akhalele mutumagela Yehowa nu ‘guwenda mu gudivua nu mikhuala yenji.’ (2 Yone 4, 6) Aklisto awa agujinginyina akhalele musuanguluisa Yone nu Yehowa Nzambi wawo.​—Ish. 27:11.

18. Malongo atshi tuajiya guzula mu ndaga jiazuelele Yone?

¹⁸ Ndaga yene idi gutulongesa itshi? Idi gutulongesa egi gusala yagujinginyina gudi Yehowa guana bata gusuanguluga. (1 Yone 5:3) Ha gufezegesa, tuana khala nu gusuanguluga handaga tuana jiya egi tuana suanguluisa Yehowa. Yehowa wana suanguluga nji tangua tuana lenga miheto ya Satana nu gutumagela mikhuala yenji. (Ish. 23:15) Anjelo nji ana suanguluga. (Luka 15:10) Esue nji tuana khala nu gusuanguluga tangua tuana mona aphangi’etu ana sala yagujinginyina gudi Yehowa, ikhale tangua alolewa ha gukalagala ndaga yabola nga tangua adi mutagana nu usageshi. (2 Tes. 1:4) Hene tangua mavu awa a Satana mbaashiyiwa, mbatukhala nu gusuanguluga ha gujiya egi tuasalele yagujinginyina gudi Yehowa.

19. Ndaga itshi phangi Rachel wazuelele mukunda nu gulongesa athu ako giamatshidia? (Tala nji gifuanesa.)

¹⁹ Tuana khala nu gusuanguluga tangua tuana longesa athu ako lukuma luabonga. Phangi Rachel wana khala gu République dominicaine, wakotelesele egi gulongesa athu ako giamatshidia giatadila Yehowa gudi luendu luakoma. Wakuatesele athu avula ha gukombelela Yehowa. Wazuelele egi: “Ngana suanguluga muavula tangua ngana mona athu ngalongesele Biblia mukudisa guzumba guawo mukunda nu Yehowa, nu gumushila diago mutshima nu luholo asombegesele ndaga jia monyo wawo ha gumusuanguluisa. Ikhale ngakhalele mutshita ngolo ha gualongesa giamatshidia, uvi ngana khala nu gusuanguluga guavula.”

GUBONGA TUAJIYA GUHETA MU MBIMBI JIA GISUGISHILO JIAZUELELE MALA AKHALELE MUZUMBA NZAMBI

20. Mu ndaga jitshi tudi luholo lumoshi nu Moize, Davidi nu Yone?

²⁰ Ivo yavula ya balega gale sendese tangua Moize, Davidi nu Yone akhalele nu monyo. Luholo ajingile ludi diago lua gudisha nu luholo tudi mujinga mangino. Uvi mu ndaga jiavula tudi nawo luholo lumoshi. Ha gufezegesa, akhalele mukombelela Nzambi wa giamatshidia gifua esue. Mangino esue nji tuana kombelela Yehowa, tuana gumushila mutshima nu tuana kamba utuameji wenji gifua ene. Gifua mala ene a gukola, esue nji tuana sha mutshima egi Yehowa wana shimbiga athu anyi ana gumutumagela.

21. Gubonga gutshi mbatuheta gula tudi mulandula ndaga jiazuelele Moize nu Davidi nu Yone nu tudi mutumagela Yehowa?

²¹ Mukut’etu agasue tulandulenu mbimbi jia mala awa agukola akhalele muzumba Nzambi nu gutumagela mikhuala ya Yehowa. Ngenyi Yehowa mbawutushimbiga nu mbawutukuatesa. Mbatuheta monyo wa ivo nu ivo! (Mikh. 30:20) Mbatukhala nu gusuangulaga handaga mbatusuanguluisa Tata wetu wa mu dilu, wana taganesa nzala jietu gubalega luholo tuajiya guyitangiza.​—Ef. 3:20.