Aphangi a Mala​—Muana Tshigina Gubua Akuateshi a Mudimo Ba?

1. Luholo lutshi mupostolo Phaula wamonesele egi wakhalele musuanguluga nu akuateshi a mudimo?

AKUATESHI a mudimo ana tagenesa midimo ya ndando mu mahungu. Mupostolo Phaula wakhalele muzula aphangi awa a mala nu ndando yavula. Ha gufezegesa, tangua dia sonegele muene Aklisto a gu Filiphi mukanda, wamenegele akuateshi a mudimo hamoshi nu akulu.​—Fili. 1:1.

2. Luholo lutshi phangi Luis wadivile tangua diabuile muene mukuateshi wa mudimo?

² Aphangi a gukola nga mavuala ana khala nu gusuanguluga guavula ha gutshita gifua akuateshi a mudimo. Ha gufezegesa, phangi Devan wakhalele nu ivo 18 tangua amutombele ha gubua mukuateshi wa mudimo. Uvi phangi Luis watombewe ha gubua mukuateshi wa mudimo tangua dia tagenesele muene ivo 50. Wadivile Luholo lutshi tangua diabuile muene mukuateshi wa mudimo? Udi muzuela egi: “Idi luendu mukunda nu ame ha gutshita gifua mukuateshi wa mudimo, gula ngatangiza guzumba aphangi agasue angumonesele, yana gungutuma nji ha guazumba muavula.” Akuateshi a mudimo avula ana gudivua ngenyi.

3. Mihu itshi tuza mutadila mu longo edi?

³ Gula udi phangi wa yala wabatijiwe gale uvi ushigo mukuateshi wa mudimo, wajiya gudishila felela dia gubua mukuateshi wa mudimo ba? Itshi yajiya gugutuma ha gudishila felela diene? Ndaga jitshi Biblia yana toga udi naye gutagenesa ha gubua mukuateshi wa mudimo? Mu longo edi tuza mu heta mvutu jia mihu eyi. Uvi thomo, tutadilenu midimo akuateshi a mudimo ana tshita.

MUDIMO UTSHI AKUATESHI A MUDIMO ANA TSHITA?

4. Midimo itshi akuateshi a mudimo ana tshita? (Tala nji gifuanesa.)

⁴ Akuateshi a mudimo adi aphangi anyi atombewe mu ukuateshi wa nyuma ya Nzambi ha gukuatesa akulu ha gutagenesa inemo yavula mu hungu. Akuateshi a mudimo ako ana tshita yagasue ha gujiya gula aphangi adi nu terituare nu mikanda ya gulongesela lukuma luabonga. Ako ana kuatesa ha guweva nu gulondega Inzo ya Ufumu. Akuateshi a mudimo ako ana tshita mudimo wa guhana aphangi mafundo, uvi ako ana kuatesa gu sonorizasio mu gudibungisa gua mu hungu. Eyi midimo ya ndando akuateshi a mudimo ana tagenesa. Yadiago, akuateshi a mudimo ana khala nu gutshigina guakola, ana zumba Yehowa nu ana tumagela mikhuala yenji. Ana zumba nji aphangi amala nu akhetu muavula. (Mat. 22:37-39) Ndaga jitshi aphangi a mala abatijiwe gale adi naye gutshita ha gubua akuateshi a mudimo?

5. Ndaga itshi phangi wa yala udi naye gutshita ha gubua mukuateshi wa mudimo?

⁵ Biblia yana monesa makalegelo muthu udi naye gukhala nawo ha gubua mukuateshi wa mudimo. (1 Tim. 3:8-10, 12, 13) Wajiya gubua mukuateshi wa mudimo gula udi mulonguga Biblia nu gutshita ngolo ha gukudisa makalegelo ene. Uvi thomo, udi naye gukamba gujiya ndaga idi gugutuma ha gubua mukuateshi wa mudimo.

ITSHI IDI GUGUTUMA HA GUBUA MUKUATESHI WA MUDIMO?

6. Itshi yajiya gugutuma ha gutshita mudimo mukunda nu aphangi a mala nu a akhetu? (Matayo 20:28; Tala nji gifuanesa dia gizula.)

⁶ Yesu udi diago gifezegeselo giabalega gubonga mukunda nu esue, wakhalele muzumba Sh’enji nu athu muavula, yene ndaga yakhalele gumutuma ha gukalagala ndaga. Guzumba guene guamutumine ha gutshita mudimo wakola nu gutshita midimo inyi athu ako akhalele mutangiza egi ishigo nu ndando ha gukuatesa athu ako. (Tanga Matayo 20:28; Yone 13:5, 14, 15) Gula guzumba gudi gugutuma ha gubua mukuateshi wa mudimo, jiya egi Yehowa mbawugushimbiga nu mbawugukuatesa ha gutagenesa felela diaye.​—1 Kol. 16:14; 1 Phet. 5:5.

7. Mukunda natshi phangi wa yala gashigo naye gukamba gubua mukuateshi wa mudimo hagula athu atutumbuise?

⁷ Mangino ha mavu athu ana tumbuisa athu anyi adi nu inemo, uvi akombeledi a Yehowa ana khala ndo ngenyi. Phangi udi mumonesa guzumba gifua Yesu, gana kamba ndo egi aphangi a mumonesele lutumbu, ginemua nga inemo iko. Gula phangi udi nu makalegelo a luholo elu mu hungu, mbagashigo mutshita midimo iko yazonda-zonda inyi yana toga khadilo dia gudibulumuisa ha gubamba imeme ya Yehowa. Wajiya gudimona gifua udi nu ndando yavula ha gutshita midimo yene. (Yone 10:12) Yehowa mbagashigo mushimbiga muthu udi nu khadilo dia gudikanduisa nga gudimona gifua udi nu ndando gubalega athu ako.​—1 Kol. 10:24, 33; 13:4, 5.

8. Longo ditshi Yesu wahanele apostolo enji?

⁸ Matangua ako, mafuta a Yesu ako akhalele mukamba guheta inemo mu luholo luabola. Ha gufezegesa, tutadilenu ndaga yakalegele Yakoba nu Yone anyi akhalele apostolo a Yesu. Atogele Yesu ha guahana fundo diabalega gubonga mu Ufumu wenji. Yesu gasuangulugilego nu ndaga yene, hene wawambelele apostolo enji agasue 12 egi: “Muthu watshigina gukhala wakoma mukatshi dienu, udi naye gukhala muenya mudimo wenu. Muthu watshigina gukhala muthu wa thomo mukatshi dienu, udi naye gukhala muhiga wa athu agasue.” (Mako 10:35-37, 43, 44) Phangi udi mutshigina gubua mukuateshi wa mudimo nu matangi abonga ha gukuatesa aphangi, mbawukuatesa hungu mu maluholo avula.​—1 Tes. 2:8.

ITSHI YAJIYA GUGUKUATESA HA GUKUDISA NZALA YA GUBUA MUKUATESHI WA MUDIMO?

9. Itshi yajiya gugukuatesa ha gukudisa nzala ya gubua mukuateshi wa mudimo?

⁹ Yadiago wana zumba Yehowa nu wana tshigina gukuatesa athu ako. Uvi yajiya gukhala egi ushigo nu nzala ya gutshita midimo inyi akuateshi a mudimo ana kalagala. Itshi yajiya gugukuatesa ha gukudisa nzala yene? Tangiza gusuanguluga wajiya guheta gula udi mukuatesa aphangi a mala nu a akhetu. Yesu wazuelele egi: “Muthu udi muhana wana khala nu gusuanguluga guavula gubalega muthu udi muzula.” (Makal. 20:35) Muene hakhenji wakhalele mukalagala ngenyi. Wakhalele nu gusuanguluga tangua diakhalele muene mukuatesa athu ako, aye nji mbawusuanguluga.

10. Luholo lutshi Yesu wamonesele egi wakhalele musuanguluga ha gukalegela athu ako? (Mako 6:31-34)

¹⁰ Tutadilenu ndaga jidi mumonesa egi Yesu wakhalele nu gusuanguluga ha gukalegela athu ako. (Tanga Mako 6:31-34.) Mu okazio umoshi, Yesu nu apostolo enji akhalele aguhuila diago. Ayile mukhala fundo dimoshi ene hakhawo ha guhululuga. Uvi thundu ya athu yalanduile, akhalele nu funu egi Yesu alongese. Yesu wakhalele naye gutuna genji handaga muene nu mafuta enji “akhalelego nga nu kumbi dia gudia,” nga ndo wakhalele naye gualongesa tangua dimoshi nga mbadi gungima gawambela egi muajiya guvutuga. Uvi guzumba guenji mukunda nu athu guamutumine ha “gualongesa ndaga jiavula.” Walanduile gualongesa uu nu “tangua ahetele mu ngueze.” (Mako 6:35) Gushigo nu muthu wakhalele gumutuma ha gutshita ngenyi, uvi wayitshitshile handaga “waavidile khenda.” Wakhalele mutshigina gualongesa handaga wakhalele guazumba. Gukalegela athu ako guakhalele musuanguluisa Yesu muavula.

11. Luholo lutshi Yesu wakuatesele athu nu ima akhalele nayo funu? (Tala nji gifuanesa.)

¹¹ Tangua Yesu walongesele thundu ya athu, gasugilego phamba ha gualongesa uvi wahanele nji ima akhalele nayo funu. Wazolele ima ya gudia mu luholo lua gushimana, gungima wawambelele alandudi enji ha guakhaphela nayo. (Mako 6:41) Tangua diakalegele muene ngenyi, wahanele alandudi enji gifezegeselo gidi mumonesa luholo ajiya gukalegela athu ako ndaga. Waamonesele nji egi gukalagala midimo ya luholo elu gudi mukatshi dia midimo ya ndando inyi akuateshi a mudimo adi naye gukalagala. Tangiza gusuanguluga apostolo akhalele nago ha gutshita mudimo wa gukhaphela athu ima ya gudia inyi Yesu wazolele mu luholo luagushimana uu nu tangua “mukut’awo agasue adile, akutshile”! (Mako 6:42) Gifezegeselo egi gidi mumonesa egi Yesu wakhalele gudisagesa mukunda nu athu ako. Tangua diakhalele muene ha mavu, wabalegesele lujingu luenji luagasue ha gukuatesa athu ako. (Mat. 4:23; 8:16) Yesu wakhalele nu gusuanguluga ha gulongesa athu ako, wakhalele nji guahana ima akhalele nayo funu nu gudibulumuisa guagasue. Idi yadiago egi, aye nji mbawukhala nu gusuanguluga guavula gula guzumba gudi gugutuma ha gubua mukuateshi wa mudimo.

12. Mukunda natshi tushigo naye gutangiza egi tushigo nga nu gima gia gukuatesela hungu?

¹² Gula udi mumona egi wajiyilego gubua mukuateshi wa mudimo, ulebigo muila. Idi yadiago egi udi nu makalegelo abonga wajiya gukalegela ha gukuatesa hungu. Tangiza ndaga Phaula wazuelele mu 1 Kolinto 12:12-30, gungima toga Yehowa ha gugukuatesa ha gumona luholo wajiya gukalegela ndaga jiene. Mbimbi jia Phaula jidi mumonesa haphelo egi udi nu ndaga ya ndando ya gutshita mu hungu gifua akombeleledi agasue Yehowa. Gula mangino ushigo mutagenesa ndaga jiana togewa ha gubua mukuateshi wa mudimo, ubembigo felela diene. Uvi tshita ndaga wajiya gukalagala ha gukalegela Yehowa nu gukuatesa aphangi. Khala musha mutshima egi akulu mbaagushila mutshima nu mbaaguhana inemo inyi wajiya gutagenesa.​—Roma 12:4-8.

13. Itshi tuajiya guzuela mukunda nu ndaga jiana togewa ha gubua mukuateshi wa mudimo?

¹³ Jiya egi ndaga jiagasue Biblia yana toga muthu ha gubua mukuateshi wa mudimo, Aklisto agasue adi naye gutagenesa ndaga jiene. Ha gufezegesa, Aklisto agasue adi naye gukhala nu ufuta wakola nu Yehowa, adi naye nji gukhala nu khadilo dia guhana nu gunemesa mikhuala ya Yehowa. Yajiya gukhala egi aye nji wakudishile gale makalegelo avula ana togewa hagula muthu abue mukuateshi wa mudimo. Ndaga itshi phangi wa yala udi naye gutshita ha gubua mukuateshi wa mudimo?

NDAGA WAJIYA GUTSHITA HA GUBUA MUKUATESHI WA MUDIMO

14. Gukhala muthu wa “guhagela mutshima” gudi mukotelesa itshi? (1 Timote 3:8-10, 12)

¹⁴ Henyaha tutadilenu ndaga jiana togewa ha gubua mukuateshi wa mudimo jidi mu 1 Timote 3:8-10, 12. (Tanga.) Mukuateshi wa mudimo udi naye gukhala muthu ana “hagela mutshima.” Mbimbi eyi yajiya nji gubalumuiwa egi “ginemua,” nga “lutumbu.” Uvi ishigo mumonesa egi ushigo naye gulela nga gutshita ilelesa yabonga. (Mulo. 3:1, 4) Uvi idi mukotelesa egi udi naye gutshita ngolo ha gutagenesa inemo yaye. Gula tangua diagasue udi mukalagala muabonga mudimo adi guguhana nu guwumanesela, aphangi agasue mu hungu mbaagushila mutshima nu mbaagunemesa.

15. Mbimbi “ashigo naye gukhala enya makano mbadi” nu “ashigo naye nji gukhala nu nzala ya guheta ima mu luholo luabola” jidi mukotelesa itshi?

¹⁵ Akuateshi a mudimo “ashigo naye gukhala enya makano mbadi” idi mukotelesa egi, adi naye gukhala athu ana zuela giamatshidia nu athu anyi athu ako ajiya gushila mutshima. Adi naye gutagenesa ndaga adi muzuela nu ashigo naye guhuiga athu ako. (Ish. 3:32) “Ashigo naye nji gukhala nu nzala ya guheta ima mu luholo luabola” idi mukotelesa egi, adi naye guzuela giamatshidia tangua adi mukalagala mudimo umoshi ngenyi ha guheta makuta nu gukalegela makuta ene mu luholo luabonga. Ashigo naye gukalegela aphangi Aklisto mu midimo mu luholo luabola ha guheta makuta avula.

16. a) Mbimbi “ashigo naye gukhala athu ana nua matombe avula” jidi mukotelesa itshi? b) Mbimbi gukhala nu “mutshima waphelegeta” idi mukotelesa itshi?

¹⁶ Akuateshi a mudimo “ashigo naye gukhala athu ana nua matombe avula,” idi mukotelesa egi ashigo naye gukhala nu khadilo dia gunua matombe nu athu ana jiyiwa egi ana nua matombe muavula. Adi naye gukhala nu “mutshima waphelegeta,” idi mukotelesa egi adi naye gunemesa mikhuala ya Yehowa. Ikhale ushigo muthu watagana, uvi wajiya gukhala nu ufuta wabonga nu Yehowa, ufuta wene wajiya gugukuatesa ha gukhala nu gusuanguluga.

17. Luholo lutshi phangi wa yala wajiya gumonesa egi ajiya gumushila mutshima tangua gadi ‘mulolewa thomo ha gujiya gula udi watagana’? (1 Timote 3:10; tala nji gifuanesa.)

¹⁷ Akuateshi a mudimo “adi naye nji gulolewa thomo ha gujiya gula adi atagana” idi mukotelesa egi, akulu adi naye gumona inemo ana tagenesa gale, ngenyi ajiya guashila mutshima. Hene tangua akulu adi guguhana mudimo, landula muabonga malongo adi guguhana nu utuameji udi mukatuga mu ulondegi wa Yehowa. Udi naye gujiya mudimo wene muabonga nu tangua udi naye guwumanesela. Gula udi mukalagala muabonga mudimo waye nu gikhesa giagasue, aphangi agasue mu hungu mbaajiya egi wajiya guheta inemo. Akulu khalenu muhana formasio gudi aphangi a mala anyi abatijiwe gale. (Tanga 1 Timote 3:10.) Mu hungu dienu mudi nu aphangi abatijiwe gale anyi adi mavuala ba? Aphangi ene ana tshita gulonguga guawo hakhawo nu gulondega muabonga gudibungisa gua mu hungu ba? Ana hana ba komantere mu gudibungisa gua mu hungu nu gulongesa lukuma luabonga mbeji nu mbeji ba? Gula idi ngenyi, ahanenu inemo ajiya gutagenesa. Gula muatshita ngenyi, mbayikhala gifua mudi ‘gualola thomo ha gujiya gula adi atagana.’ Gula mudi guahana formasio ikhale akatuga gubua mavuala, ajiya gutagenesa ndaga jiana togewa ha gubua akuateshi a mudimo.

18. Gutuna gukhala nga nu “ndaga imoshi yabola” gudi mukotelesa itshi?

¹⁸ Akuateshi a mudimo ashigo naye gukhala nga nu “ndaga imoshi yabola,” yakotelesa egi athu ashigo naye guzuela egi wana tshita ndaga jiabola. Yadiago, athu ajiya gumbila Aklisto mambo gifua luholo ambidile Yesu mambo. Hene Yesu wazuelele egi athu mbaambila alandudi enji mambo. (Yone 15:20) Uvi gula udi mulandula gumonesa makalegelo abonga gifua Yesu, mbawukhala nu lukuma luabonga mu hungu.​—Mat. 11:19.

19. Gukhala nu “mukhetu phamba mumoshi” gudi mukotelesa itshi?

¹⁹ “Mukuateshi wa mudimo udi naye gukhala nu mukhetu phamba mumoshi.” Gula wadizudile gale mu ulo, udi naye gunemesa mukhuala wa Yehowa watadila ulo, yakotelesa egi udi naye gukhala nu mukhetu phamba mumoshi. (Mat. 19:3-9) Phangi wa yala gashigo naye gukalagala uthambi. (Heb. 13:4) Gudi nji nu ndaga jiavula jinyi Aklisto ashigo naye gutshita. Phangi udi mutshigina gubua mukuateshi wa mudimo udi naye gukhala yagujingina gudi mukaji’enji, gashigo naye gukalegela akhetu ako ndaga jidi mumonesa gifua udi guazumba.​—Yobo 31:1.

20. Luholo lutshi phangi wa yala wajiya gumonesa egi udi mutagenesa nzala jia enya fami yenji “mu luholo luabonga”?

²⁰ Mukuateshi wa mudimo “udi naye gutuameza an’enji nu fami yenji mu luholo luabonga.” Gula udi fumu wa fami, udi naye gutagenesa inemo yaye mu luholo luabonga. Udi naye gukhala nu khadilo dia gutuameza gukombela gua mu fami phoso nu phoso. Khala muya muavula mu mudimo wa gulongesa nu mukaji’aye nu an’aye. Khala nji mukuatesa an’aye ha gukolesa ufuta wawo nu Yehowa. (Ef. 6:4) Muthu udi mutagenesa nzala jia enya fami yenji muabonga, wana monesa egi mbawutagenesa nji inemo yenji muabonga mu hungu.​—Fuanesa nu 1 Timote 3:5.

21. Gula ushigo mukuateshi wa mudimo, itshi udi naye gukalagala?

²¹ Phangi wa yala, gula ushigo mukuateshi wa mudimo, longuga longo edi muabonga nu kombelela Yehowa muavula mukunda nu ndaga yene. Kamba gulonguga ndaga jiana togewa ha gubua mukuateshi wa mudimo nu tshita yagasue ha gutagenesa ndaga jiene. Tangiza guzumba wana khala nago mukunda nu Yehowa nu aphangi Aklisto. Kudisa guzumba guaye mukunda nu ene nu tangiza mukunda natshi idi nu ndando ha guakuatesa. (1 Phet. 4:8, 10) Gula wabua mukuateshi wa mudimo, mbawukhala nu gusuanguluga luholo mbawukuatesa aphangi a mala nu a akhetu. Yehowa agukuatese ha gutagenesa felela diaye dia gubua mukuateshi wa mudimo!​—Fili. 2:13.