Khala Muhana Mersi Mukunda nu Athu Atuhanewe “Gifua Makhapho”

1. Ba kado atshi tuahetele gudi Yesu?

GUSHIGO nga nu muthu mumoshi wana khala nu khadilo dia guhana gifua Yesu. Hakhalele muene ha mavu, wakalegele ndaga jia gushimana ha gukuatesa athu. (Luka 9:12-17) Wahanele athu agasue monyo wenji gifua kado. (Yone 15:13) Uu nu tangua diafuzumugile muene, walanduile gumonesa khadilo dia guhana. Gifua luholo lua layele muene, watogele Yehowa ha gumuanga nyuma yenji ha gutulongesa nu gutuhana gikhesa. (Yone 14:16, 17; 16:13) Yesu wana kalegela hungu ha gutuhana ima tudi nayo funu ha gulongesa athu a maluholo agasue ha mavu ndaga yatadila Biblia nu guabuisa alandudi.​—Mat. 28:18-20.

2. Akhuatshi adi mukatshi dia ‘makhapho ahanewe gifua athu’ adi muzuelewa mu Efeso 4:7, 8?

² Tutadilenu ba kado ako atuhanele Yesu. Mupostolo Phaula wasonegele egi tangua Yesu wayile mu dilu, “wahanele athu gifua makhapho.” (Tanga Efeso 4:7, 8.) Phaula wamonesele egi wahanele athu ene ha gukuatesa hungu mu maluholo avula. (Ef. 1:22, 23; 4:11-13) Mukatshi dia “athu” ene mangino tuajiya gutanga, akuateshi a mudimo, akulu nu atadi awendji.a Luholo mala ene ashigo athu atagana, ana jimbila nji ndaga jiko. (Yak. 3:2) Uvi Fumi’etu Yesu Klisto wana guakalegela ha gutukuatesa.

3. Hana gifezegeselo gidi mumonesa luholo mukut’etu agasue tuajiya gukuatesa mudimo wana tshita ‘athu atuhanewe gifua makhapho.’

³ Yesu wahanele mudimo wa ndando gudi ‘athu ahanewe gifua makhapho’ ha gukuatesa hungu. (Ef. 4:12) Uvi mukut’etu agasue tuajiya guakuatesa ha gutagenesa mudimo wawo. Ha gufezegesa, athu ako mukatshi dietu ana tshita mudimo wa gutunga Jinzo jia Ufumu. Ako ana kuatesa athu ana kalagala mudimo wene nu ima ya gudia nga nu ima iko ya ndando. Luholo lumoshi nji, mukut’etu agasue tuajiya gukuatesa akuateshi a mudimo, akulu nu atadi awendji mu ndaga tudi muzuela nga tudi mutshita. Henyaha tutadilenu luholo tuajiya guheta gubonga mu mudimo wakola ana kalagala nu luholo tuajiya guahana mersi nu Yesu munu watuhanele nawo “gifua makhapho.”

AKUATESHI A MUDIMO ANA “KUATESA ATHU AKO”

4. Midimo itshi “Akuateshi a mudimo” akhalele mutshita mu siekle ya thomo?

⁴ Mu siekle ya thomo aphangi ako atombewe ha gubua akuateshi a mudimo. (1 Tim. 3:8) Yajiya gukhala egi, ene akhalele mutshita mudimo ha ‘gukuatesa athu ako’ gifua luholo Phaula wayisonegele. (1 Kol. 12:28) Akuateshi a mudimo ana tshita midimo yavula ya ndando, ngenyi ana kuatesa akulu ha gudihana mu mudimo wa gulongesa nu gubamba imeme. Ha gufezegesa, yajiya gukhala egi akuateshi a mudimo ahanele mago ha gusumba ima akhalele mukalegela ha gusonega Mbimbi ya Nzambi.

5. Midimo itshi ya gudisha akuateshi a mudimo ana kalagala mangino?

⁵ Tutadilenu midimo iko akuateshi a mudimo ana kalagala mu mahungu. (1 Phet. 4:10) Ajiya guahana ginemo gia gutadila ndaga jia mbongo, terituare, mikanda, gutoga mikanda nu guyihana alongeshi, gutshita gu sonorizasio, guyamba athu mu gudibungisa nu gulondega Inzo ya Ufumu. Midimo eyi yagasue idi nu ndando yavula hagula ndaga jia hungu jiyile muabonga. (1 Kol. 14:40) Akuateshi a mudimo ako ana tshita ba diskur mu Gudibungisa gua Lujingu nu Mudimo, ana kalagala nji ba diskur a athu agasue. Mukuateshi wa mudimo wajiya nji gutombewa gifua mukuateshi wa mutadi wa hunji dia mudimo wa gulongesa. Matangua ako, mukulu wajiya gutoga mukuateshi wa mudimo ha guya n’enji mutala phangi udi nu funu ya gikhesa.

6. Ndaga jitshi jiana gututuma ha gusuanguluga nu midimo yakola yana kalagala akuateshi a mudimo?

⁶ Gubonga gutshi aphangi mu hungu ana heta mukunda nu midimo yana kalagala akuateshi a mudimo? Phangi wa mukhetu Beberlyb wana khala gu Bolivie wazuelele egi: “Ngana suanguluga nu gudibungisa gua mu hungu mukunda nu mudimo wana kalagala akuateshi a mudimo. Mudimo wawo ana tshita wana gungukuatesa ha guyimba, guhana komantere, gutegelela ba diskur, guzula malongo mu video nu ifuanesa. Ana tshita yagasue ha gujiya gula athu adi mulandula gudibungisa adi mu ubambi, ana kuatesa nji athu anyi ashigo nu luholo lua guya mu gudibungisa ha gulandula programe mu jinzo jiawo mu njila ya vidéo conférence. Gungima dia gudibungisa, ana londega Inzo ya Ufumu, ana tadila ndaga jia mbongo ana kamba nji gujiya gula aphangi ahetshi mikanda adi nayo funu. Ngudi guahana mersi!” Phangi wa mukhetu Leslie wana khala gu Colombie mulumi’enji udi mukulu, wazuelele egi: “Mulumi’ami wana khala nu funu ya ukuateshi wa akuateshi a mudimo. Gula nga ene ndo, nga wana khala diago nu ndaga jiavula jia gutshita, hene ngudi guahana mersi luholo ana kuatesa ha gutshita mudimo wawo nu gikhesa giagasue.” Aye nji wana suanguluga nu mudimo wana kalagala akuateshi a mudimo a mu hungu dienu ba?​—1 Tim. 3:13.

7. Luholo lutshi tuajiya gumonesa egi tuana suanguluga nu akuateshi a mudimo? (Tala nji gifuanesa.)

⁷ Tudi naye guhana akuateshi a mudimo mersi handaga Biblia idi gututoga ha ‘guhana mersi tangua diagasue.’ (Kol. 3:15) Phangi Krzysztof, udi mukulu gu Finlande udi mumonesa luholo luana hana muene akuateshi a mudimo mersi, udi muzuela egi: “Ngana sonega mesaje, mu mesaje ene ngana sonega verse ya Biblia, ngana zuelela nji luholo mukuateshi wa mudimo mumoshi wanguhanele gikhesa. Mu mukanda wene ngana gumuwambela egi ngana suanguluga nu mudimo wenji.” Phangi Pascal nu mukaji’enji Jael ana khala gu Nouvelle Calédonie, ana tshita gisambu mukunda nu akuateshi a mudimo. Phangi Pascal udi muzuela egi: “Mu masugu abalega, tuakombelele Yehowa muavula mukunda nu akuateshi a mudimo a mu hungu dietu, tuamuhanele mersi mukunda nu ene nu tuamutogele ha guakuatesa.” Yehowa wana tegelela isambu ya luholo elu, hungu diagasue nji diana heta gubonga mukunda nu isambu yene.​—2 Kol. 1:11.

AKULU “ANA KALAGALA MUDIMO WAKOLA MUKATSHI DIENU”

8. Mukunda natshi Phaula wasonegele egi akulu a mu siekle ya thomo akhalele mutshita “mudimo wakola”? (1 Tesalonike 5:12, 13)

⁸ Mu siekle ya thomo, akulu akhalele mutshita mudimo wakola mu hungu. (Tanga 1 Tesalonike 5:12, 13; 1 Tim. 5:17) Akhalele ‘mutuameza’ midimo mu hungu yakotelesa egi, gudibungisa gua mu hungu nu guzula ba desizio hamoshi mu hunji. Akhalele nji muhana aphangi’awo Aklisto malongo nu guzumba guagasue hagula akhale nu gutshigina guakola. (1 Tes. 2:11, 12; 2 Tim. 4:2) Aphangi ene akhalele nji mutshita mudimo wakola ha gutagenesa nzala jia enya fami jiawo nu gutshita yagasue ha gukolesa ufuta wawo nu Yehowa.​—1 Tim. 3:2, 4; Tito 1:6-9.

9. Inemo itshi akulu ana tagenesa mangino?

⁹ Mangino akulu ana khala nji nu ndaga jiavula jia gutshita. Ana khala alongeshi a lukuma luabonga. (2 Tim. 4:5) Ana hana gifezegeselo giabonga mu mudimo wa gulongesa, ana londega ndaga ha gutukuatesa ha gulongesa mu terituare jia mahungu etu nu ana gutuhana formasio ha gulongesa mu luholo luabonga. Ana tshita mudimo gifua manzuji, ana guwutshita nu khenda nu anago gutomba-tomba. Gula phangi mumoshi wakalagala gubola guakoma, akulu ana tshita yagasue ha gumukuatesa ha guvutugila luko ufuta wenji nu Yehowa. Ana tshita nji yagasue hagula hungu dikhale dia phelegeta. (1 Kol. 5:12, 13; Gal. 6:1) Ndaga tushigo naye gujimbila idi egi akulu adi abambi a imeme. (1 Phet. 5:1-3) Ana londega muabonga ba diskur adi mukatuga mu Biblia ha gulongesa aphangi mu hungu, ana tshita ngolo ha gujiya muthu wagasue mu hungu, anaya nji mutala aphangi adi nu funu ya gikhesa. Akulu ako ana tshita mudimo wa gutunga nu gulondega Jinzo jia Ufumu, ako ana londega ndaga jiatadila ba asamble, ako ana tshita gu comités de liaison hospitaliers nga gutshita gu komite yana tala athu adi nu misongo (groupe de visite aux malades,) nu midimo iko ana khala nayo. Akulu ana tshita mudimo wakola mukunda nu esue!

10. Ndaga jitshi jiana gututuma ha gusuanguluga nu mudimo wana tshita akulu?

¹⁰ Yehowa wadiangele guzuela egi abambi a imeme mbaatubamba muabonga mbatukhadigo ‘nu woma nu mbatudigitago.’ (Yel. 23:4) Phangi wa mukhetu Johanna wana khala gu Finlande, wamonele gutagenesewa gua mbimbi eji tangua mama wenji wakatele misongo yakola. Udi muzuela egi: “Ngatshima yakhalele lamba gudi ame ha guwambela athu ako luholo ngakhalele gudivua, uvi mukulu mumoshi ngakhalelego mujiya muabonga wangumonesele khadilo dia guhuiminyina, wakhalele mukombelela nu ame nu wangutshiginyishile egi Yehowa wana gunguzumba. Ngushigo luko muwunguluga ndaga jiazuelele muene, uvi ngudi mujiya egi ngavilego luko woma lusugu luene. Ngudi nu gutshigina egi Yehowa wamutumine mutangua diabonga ha gungukuatesa.” Luholo lutshi akulu a mu hungu dienu agukuatesele gale?

11. Luholo lutshi tuajiya gumonesa egi tudi muhana akulu mersi? (Tala nji gifuanesa.)

¹¹ Yehowa wana tshigina egi tumonese egi tuana suanguluga nu akulu mukunda nu “mudimo wawo.” (1 Tes. 5:12, 13) Phangi Henrietta wana jinga nji gu Finlande, udi muzuela egi: “Akulu ana gutukuatesa nu mutshima umoshi, uvi ishigo mukotelesa egi ene ana khala nu tangua diavula nu ngolo jiavula gubalega athu ako, nga ndo ana tagana ndo nu malamba. Matangua ako ngana guawambela egi: ‘Udi diago mukulu wabonga. Ngudi mutshigina egi aye nji uyijiye.’” Phangi wa mukhetu Sera wana khala gu Türkiyec udi muzuela egi: “Akulu ana khala nu funu ya gikhesa ha gulandula gutshita mudimo wawo. Hene, tuajiya guasonegela mukanda, guatamega ha gudia nawo hamoshi nga guya nawo mu mudimo wa gulongesa.” Gudi nu mukulu mumoshi udi mutshigina guhana mersi mukunda nu ndaga jiana kalagala muene mu hungu ba? Kamba maluholo agumuwambela ndaga jiene.​—1 Kol. 16:18.

ATADI AWENDJI ANA GUTUKUATESA HA GUKHALA NU GUTSHIGINA GUAKOLA

12. Athu atshi ako Yesu wahanele ginemo gia guhana aphangi gikhesa mu mahungu? (1 Tesalonike 2:7, 8)

¹² Klisto wahanele nji aphangi a mala ginemo ha gukuatesa aphangi mu hungu mu luholo luko. Wakalegele akulu a gu Yelusalema ha gutuma Phaula nu Barnabase nu aphangi ako gifua atadi awendji mu mafundo ako. (Makal. 11:22) Mukunda natshi? Handaga a atumine ha gukalagala mudimo akulu nu akuateshi a mudimo akhalele mutshita, yakotelesa egi gukolesa gutshigina gua aphangi mu mahungu. (Makal. 15:40, 41) Aphangi awa a mala adihanele diago ha gutagenesa mudimo waahanewe. Matangua ako akhalele muhaga monyo wawo mu gingonza ha gulongesa nu guhana athu ako gikhesa.​—Tanga 1 Tesalonike 2:7, 8.

13. Inemo itshi atadi awendji ana tagenesa?

¹³ Atadi awendji ana tshita ba vuayaje tangua diagasue. Ako ana wenda ba kilometre avula ha guya mutala mahungu. Phoso nu phoso, atadi awendji ana tshita ba diskur avula, anaya mutala aphangi ha guahana gikhesa, ana tuameza gudibungisa nu avundji anjila, nu akulu, ana tuameza nji gudibungisa mukunda nu mudimo wa gulongesa. Ana londega ba diskur nu ba asamble a lusugu lumoshi nu a masugu thathu. Ana longesa mu makhalasa a avundji a njila, ana londega ndaga mukunda nu gudibungisa gua spesiale gua avundji a njila. Matangua ako, Betele yana guatoga ha gulondega ndaga jiko muphushi.

14. Ndaga jitshi jiana gututuma ha gusuanguluga nu mudimo wakola wana tshita atadi awendji?

¹⁴ Gubonga gutshi aphangi ana heta mu hungu mukunda nu mudimo wa ndando wana kalagala atadi awendji? Phangi mumoshi wa yala gu Türkiye wazuelele egi: “Tangua diagasue atadi awendji anaza gututala, yana gunguhana gikhesa ha gubalegesa tangua diavula ha gukuatesa aphangi a mala nu a akhetu. Ngataganele gale nu atadi awendji avula, uvi gushigo nga nu mumoshi wanguwambelele egi gashigo nu tangua nga ndo gashigo mutshigina guta maga nu ame.” Phangi Johanna tuazuelela gu thunda, wayile mu mudimo wa gulongesa nu mutadi muwendji uvi asangelego nga muthu gu inzo. Wazuelele egi: “Ngana jimbilago lusugu luene. Aphangi’ami agasue a akhetu ana khalago fundo dimoshi nu ame, ngana vua uhote wawo. Mutadi muwendji wanguhanele gikhesa, wangukuatesele ha gumona egi mu mudimo wa Yehowa, gukhala gualeha nu aphangi gudi phamba mukunda nu tangua diazonda, uvi mu mavu ahe-ahe mbatukhala mubalegesa tangua hamoshi.” Athu avula mukatshi dietu ana tangiza matangua abonga abalegesele nu atadi awendji.​—Makal. 20:37–21:1.

15. a) Hagutadila 3 Yone 5-8, luholo lutshi tuajiya gumonesa egi tuana suanguluga nu mudimo wana kalagala atadi awendji? (Tala nji gifuanesa.) b) Mukunda natshi tudi naye gumonesa ginemua gudi akaji’a aphangi ana tshita mudimo wakola mu hungu? (Tala galuanda “Mubuitshigo Akaji’awo Mutshima.”)

¹⁵ Mupostolo Yone wahanele Gayuse gikhesa ha gumonesa khadilo dia guyamba gudi aphangi adi muza guatala mu hungu, wamuwambelele “ha guya guatuala mu njila mu luholo ludi musuanguluisa Nzambi.” (Tanga 3 Yone 5-8.) Esue nji tuajiya gutshita ngenyi gula tudi mutamega atadi awendji gu jinzo jietu ha gudia nawo nga tangua tudi muya mu gudibungisa mukunda nu mudimo wa gulongesa mu semaine spéciale. Phangi Leslie tuazuelela gu thunda wana hana atadi awendji mersi mu maluholo ako. Wazuelele egi: “Ngana toga Yehowa ha gutagenesa nzala jiawo. Ame nu mulumi’ami tuana guasonegela mikanda ha guawambela luholo ana gutukuatesa tangua anaza gutala hungu dietu.” Tujimbilago egi atadi awendji ana tagana nu malamba nu ana huila nji gifua esue. Matangua ako, ana kata, ana gudisagesa nu ana leba nji muila. Hene gula tudi guawambela mbimbi jiabonga nga guahana ba kado, yajiya gukhala mvutu gu isambu yawo!​—Ish. 12:25.

TUDI NU FUNU YA ‘ATHU AHANEWE GIFUA MAKHAPHO’

16. Mu gudivua nu Ishima 3:27, mihu itshi aphangi a mala adi naye gudihula?

¹⁶ Ha mavu a mudidi, tudi nu funu yavula ya aphangi a mala ha gukalagala “gifua makhapho.” Gula udi phangi wa yala wa batijiwe gale, udi hehi ‘ha gukuatesa gula udi nu luholo lua guyitshita’ ba? (Tanga Ishima 3:27.) Udi hehi ha gubua mukuateshi wa mudimo ba? Gula udi gale mukuateshi wa mudimo, udi hehi ha gubua mukulu ba?d Udi hehi ha gusombegesa ndaga jiko mu monyo waye hagula wajiya gungina Khalasa dia Alongeshi a Ufumu ba? Khalasa diene mba diguhana formasio nu mba digukuatesa hagula Yesu agukalegele muavula. Gula udi mumona egi ushigo mutagenesa ndaga jiana togewa, tshita gisambu gudi Yehowa. Toga nyuma yenji ha gugukuatese ha gutagenesa inemo idi guguhanewa.​—Luka 11:13; Makal. 20:28.

17. Athu atuhanewe “gifua makhapho” ana monesa egi Yesu udi Fumu wa luholo lutshi?

¹⁷ Luholo Yesu watuhanele athu atombewe “gifua makhapho” ludi mumonesa egi muene udi gututuameza mu masugu a gisugishilo. (Mat. 28:20) Tudi nu gusuanguluga guavula luholo tudi nu Fumu wa guzumba, wana khala nu khadilo dia guhana, wana jiya ndaga tudi najio funu nu wana gutuhana aphangi a mala ha gutukuatesa. Hene kamba maluholo wajiya guamonesa egi wana suanguluga nu mudimo wakola ana kalagala. Ujimbilago nji guhana Yehowa mersi handaga ‘khapho diagasue diabonga nu gima giagasue giatagana yana katuga gudi muene.’​—Yak. 1:17.