“Atamege Akulu”

1. Luholo lutshi Yehowa wamonesele egi wana zula imeme yenji nu ndando yavula?

YEHOWA wana zula imeme yenji nu ndando yavula. Wayisumbile nu mahatshi a Yesu, wahanele nji akulu a mu hungu ginemo gia gubamba imeme yenji. (Makal. 20:28) Nzambi wana tshigina egi akulu abambe imeme yenji muabonga. Akulu ana landula utuameji wa Klisto tangua ana hana imeme ya Yehowa gikhesa nu ana guyikuatesa ha gusala ya gujinginyina gudi muene.​—Yesh. 32:1, 2.

2. Yehowa wana gudisagesa muavula mukunda nu akuatshi? (Ezekiele 34:15, 16)

² Yehowa wana gudisagesa mukunda nu imeme yenji yagasue, uvi wana gudisagesa muavula gubalega mukunda nu imeme idi mukata. Wana kuatesa imeme idi mukata mu nyuma mu njila ya akulu. (Tanga Ezekiele 34:15, 16.) Uvi wana tshigina egi tukambe ukuateshi gula tuamona egi idi nu ndando. Yehowa wana tshigina egi tumukombelele ha gutoga ukuateshi, uvi wana tshigina nji egi tukambe ukuateshi gudi ‘abambi a imeme nu alongeshi’ a mu hungu.​—Ef. 4:11, 12.

3. Gubonga gutshi mukut’etu agasue tuajiya guheta gula tudi mujiya ginemo giana khala nagio akulu?

³ Mu longo edi, tuza mumona luholo Yehowa wana kalegela akulu ha gutukuatesa mu nyuma. Tuza nji muhana mvutu gu mihu eyi: Tangua ditshi tudi naye gutoga ukuateshi gudi akulu? Mukunda natshi tudi naye guatoga ukuateshi? Luholo lutshi akulu ana gutukuatesa? Ikhale tushigo getu mutagana nga nu lamba dimoshi mangino, uvi mvutu tuza muheta gu mihu eyi jiza gutukuatesa ha gukhala nu khadilo dia guhana Yehowa mersi mu luholo luana kalegela muene akulu ha gutukuatesa nu gujiya ndaga tudi naye gukalagala gula tudi mutshigina egi atukuatese.

TANGUA DITSHI TUDI NAYE ‘GUTAMEGA AKULU’?

4. Mukunda natshi tudi muzuela egi Yakoba 5:14-16, 19, 20 idi muzuelela misongo ya mu nyuma? (Tala nji ifuanesa.)

⁴ Mulandudi Yakoba wamonesele luholo Yehowa wana kalegela akulu ha gutukuatesa; wasonegele egi: “Gula gudi nu muthu udi mukata mukatshi dienu, muene atamege akulu a mu hungu.” (Tanga Yakoba 5:14-16, 19, 20.) Mu verse eji, Yakoba udi muzuelela muthu udi nu misongo ya mu nyuma. Udi mutoga muthu udi mukata ha gutamega akulu a mu hungu uvi minganga ndo. Udi mumonesa nji egi muthu udi mukata wajiya guvua muabonga gula amutotesela gubola guenji. Gusaga misongo ya mu nyuma guana khala luholo lumoshi nu gusaga misongo ya mu muila. Gula tudi mukata, tuana guya gudi munganga, tumuwambela luholo tudi gudivua, gungima tuana landula malongo ana gutuhana muene. Luholo lumoshi nji, gula tudi mukata mu nyuma, tudi naye guya gudi akulu, tuawambela mulonga wetu, gungima tudi naye gutumagela malongo a Biblia mbaatuhana.

5. Luholo lutshi tuajiya gujiya egi ufuta wetu nu Yehowa udi muya nu guleba?

⁵ Mu mukanda wa Yakoba mukhapho 5, Yakoba udi gutuwambela ha gukamba ukuateshi wa akulu gula tuamona egi ufuta wetu nu Yehowa udi muya nu guleba. Idi ndaga yabonga gula tuakamba ukuateshi wa akulu gutuama dia gukalagala ndaga yabola yajiya gubolesa ufuta wetu nu Yehowa! Tushigo naye gudihuiga hakhetu. Biblia idi gutuwambela egi tuajiya gudihuiga ha gutangiza egi tudi nu ufuta wabonga nu Yehowa uvi mu guzuela guabonga tushigo getu nawo. (Yak. 1:22) Aklisto a mu siekle ya thomo a mu hungu dia Sarde akhalele nji mutangiza ngenyi, uvi Yesu waawambelele egi Yehowa gakhalelego luko musuanguluga nawo. (Gumo. 3:1, 2) Ndaga yajiya gutukuatesa ha gujiya gula tudi nu ufuta wabonga nu Yehowa idi gufuanesa gikhesa tuakhalele nagio tangua tuabatijiwe nu luholo tudi mangino. (Gumo. 2:4, 5) Tuajiya gudihula egi: ‘Gutanga Biblia nu gutangigiza ndaga ngudi mutanga guana gungusuanguluisa gifua luholo ngakhalele guyitshita thomo ba? Ngana landula guya mu gudibungisa guagasue ba? Ngana gudilondega muabonga gutuama dia guya mu gudibungisa guene ba? Ngana landula guzula mudimo wa gulongesa nu ndando yavula ba? Ngana balegesa tangua diavula ha gukamba nu gutangiza makuta ba?’ Gula mukatshi dia ndaga eji jiagasue tuamona egi gudi nga nu ndaga imoshi tushigo luko mutshita muabonga, idi mumonesa egi tushigo luko nu ufuta wakola nu Yehowa. Gula tushigo nu luholo lua gulondega ufuta wetu nu Yehowa esue hakhetu nga ndo gula tuakalagala gale ndaga yabola, tudi naye gutoga ukuateshi gudi akulu.

6. Gula muthu wakalagala gubola guakoma, itshi adi naye gutshita?

⁶ Uvi gula muthu wakalagala gubola guakoma gunu guajiya gutshita egi azolewe mu hungu, udi naye guya mumona akulu. (1 Kol. 5:11-13) Muthu wa luholo elu gashigo naye gukamba gudilondela ndaga mu luholo luenji, uvi udi naye gukamba ukuateshi wa akulu hagula amukuatese ha guvutugila ufuta wenji nu Yehowa. Yehowa wajiya gututotesela gubola guetu mu njila ya gibawu gula tuatshita ‘ndaga jidi mumonesa egi tuabalumuna mitshima.’ (Makal. 26:20) Ndaga imoshi mukatshi dia ndaga jiene tuajiya gutshita idi guya muwambela akulu gubola tuakalagala.

7. Athu atshi ako ajiya gutoga ukuateshi gudi akulu?

⁷ Akulu anago gukuatesa phamba athu akalagala gubola guakoma uvi ana kuatesa nji athu adi aguleba mu nyuma. (Makal. 20:35) Ha gufezegesa, wajiya gutangiza egi ushigo luko nu ngolo jia guluisa nzala jiabola. Yajiya gukhala lamba gula gutuama dia gujiya giamatshidia wakhalele munua ima yabala, wakhalele gutala pornografi nga ndo wakhalele mutshita uthambi. Gula idi ngenyi, uvigo woma ha gutoga ukuateshi. Wajiya guwambela mukulu munu udi mumona egi mbawugutegelela muabonga, mukulu muene wajiya gugukuatesa ha gujiya egi Yehowa mbawusuanguluga nu aye gula watuna gutshita ndaga jiabola. (Mulo. 4:12) Gula waleba muila mukunda ndaga yene, akulu ajiya gugukuatesa ha gujiya egi luholo udi gudivua ludi mumonesa egi wana zula ufuta waye nu Yehowa nu ndando nu udi muthu wagudibulumuisa.​—1 Kol. 10:12.

8. Tudi naye guwambela akulu tundaga tuagasue tuabola tuakalagala ba? Kotelesa

⁸ Tushigo naye guwambela akulu tundaga tuagasue tuabola tuakalagala. Ha gufezegesa, tangiza egi wawambela phangi mumoshi wa yala nga wa mukhetu ndaga nu khabu jiagasue nga ndo wamuwambelelego nayo nu gisemo. Gula ndaga ya luholo elu yagubuila, ha fundo dia guya muwambela mukulu ndaga yene, wajiya gukalegela longo diahanele Yesu ha gukamba guhuima nu phangi muene. (Mat. 5:23, 24) Wajiya gukamba mu mikanda yetu malongo adi muzuelela makalegelo gifua: gutuluga, guhuiminyina nu gudikanda nu gukamba luholo wajiya gumonesa makalegelo ene mu masugu adi muza. Uvi gula wamona egi ushigo mutagana ha gumanesela ndaga yene, wajiya giwa gukamba ukuateshi gudi mukulu. Mu mukanda wasonegele Phaula gudi Aklisto a gu Filiphi, watogele phangi wa yala mumoshi jina dienji dishigo mujiyiwa ha guya mukuatesa Evodi nu Sentishe ha gulondega ndaga yakhalele guasagesa, luholo lumoshi nji mukulu mumoshi wa mu hungu dienu wajiya gugukuatesa.​—Fili. 4:2, 3.

MUKUNDA NATSHI TUDI NAYE GUTOGA UKUATESHI GUDI AKULU?

9. Mukunda natshi tushigo naye guvua musonyi ha guwambela akulu gubola tuakalagala? (Ishima 28:13)

⁹ Tudi naye gukhala nu gutshigina nu gikhesa ha gutoga ukuateshi gula tuakalagala gubola guakoma nga ndo tushigo mubinga luko nzala jiabola. Tushigo naye guvua musonyi ha gutoga ukuateshi gudi akulu. Mukunda natshi? Gula tudi mutumagela ndaga jialondele Yehowa ha gutukuatesa, mbatumonesa egi tuana gumushila mutshima nu malongo enji mbaalandula gutukuatesa ha gukhala nu ufuta wabonga n’enji. Tuana jiya egi tuana khala nu funu ya ukuateshi wenji ha gulandula gutshita ndaga jiabonga. (Ngi. 94:18) Hagula egi Yehowa atutotesele gubola tuakalegele, tudi naye guwambela akulu gubola guene nu gubemba gutshita ndaga jiabola.​—Tanga Ishima 28:13.

10. Itshi yajiya gutubuila gula tudi mukamba gusuega gubola guetu?

¹⁰ Gula tuawambela akulu gubola tuakalagala, Yehowa wajiya gututotesele nu tuajiya gukuata luko ufuta wabonga n’enji. Uvi gula tuasuega gubola guene, mbayitubatela malamba avula. Tangua Fumu Davidi wakambele gusuega gubola guenji, wamonele malamba avula. (Ngi. 32:3-5) Gula muthu udi mukata nga ndo wanamana wabalegesa tangua diavula nu gukamba ndo usagi, yajiya gumubatela malamba avula, luholo lumoshi nji gula muthu wakalagala gubola uvi gashigo muwambela akulu wajiya gubolesa ufuta wenji nu Yehowa. Yehowa gana tshiginago egi ndaga ya luholo elu itubuile, hene udi gututoga ha guwambela akulu handaga wana gutukuatesa mu njila yawo ha gukuata n’enji ufuta.​—Yesh. 1:5, 6, 18.

11. Itshi yajiya gubua gula tuasuega gubola guakoma guakalegewa?

¹¹ Gula tudi musuega gubola guetu, tuajiya nji gubatela athu ako malamba. Tuajiya gulengesa nyuma ya Nzambi mu hungu nu gutshita egi aphangi a mala nu a akhetu akhadigo luko mu guhuima. (Ef. 4:30) Luholo lumoshi nji, gula tuajiya egi phangi mumoshi wakalagala gubola guakoma, tudi naye gumukuatesa ha guya muwambele akulu ndaga yene.a Uvi gula esue nji tuasuega gubola guakoma guakalagala muthu muene, yajiya gutubatela malamba. (Levi 5:1) Guzumba guetu mukunda nu Yehowa gudi naye gututuma ha guwambela akulu gubola guakoma guakalagala phangi muene. Gula tuatshita ngenyi, mbatukuatesa hungu ha gusala diaphelegeta nu mbatukuatesa muthu wakalagala gubola ha gulondega luko ufuta wenji nu Yehowa.

LUHOLO LUTSHI AKULU ANA GUTUKUATESA?

12. Luholo lutshi akulu ajiya gukuatesa muthu udi waguleba mu nyuma?

¹² Biblia yana wambela akulu ha gukuatesa athu ashigo luko nu ufuta wabonga nu Yehowa ha guvutugila luko ufuta wawo n’enji. (1 Tes. 5:14) Gula wakalagala gubola, akulu ajiya guguhula mihu yajiya guakuatesa ha gukotelesa matangi aye nu luholo udi gudivua. (Ish. 20:5) Yajiya gukhala lamba ha guta maga nu akulu handaga udi muvua musonyi mukunda nu ndaga wakalagala; uvi mbayikhala ndaga yabonga gula waawambela ndaga yagubuila. Uvigo woma egi akulu mbaatangiza egi udi mulaba guzuela ‘izuele-zuele.’ (Yobo 6:3) Akulu mbaashigo gugusophesa mbala imoshi mukunda nu ndaga udi muzuela, uvi mbaagutegelela muabonga ha gujiya ndaga jiagasue gutuama egi aguhane malongo adi mukatuga mu Biblia. (Ish. 18:13) Akulu ana jiya egi yana toga tangua ha guhana muthu malongo ajiya gumukuatesa, hene matangua ako ana jiya egi ashigo naye gusuga phamba ha gugutesa maga uvi gudi nu ndaga jiavula ajiya gutshita ha gugukuatesa.

13. Luholo lutshi akulu ajiya gutukuatesa mu njila ya gisambu nu malongo a Biblia? (Tala nji ifuanesa.)

¹³ Gula watamega akulu, mbaashigo guguwambela ndaga jiajiya gugusagesa. Uvi mbaakombelela mukunda nu aye. Yehowa mbawutegelela isambu yawo handaga yana “khala nu ngolo jiavula.” Isambu yene mbayigukuatesa ha guheta ngolo jiavula gubalega luholo udi mutangiza. Mukatshi dia ndaga mbaatshita, ‘mbaagukunga maji mu jina dia Yehowa.’ (Yak. 5:14-16) “Maji” ene adi giamatshidia gidi mu Mbimbi ya Nzambi. Akulu mbaakalegela verse jia Biblia ha guguhana gikhesa nu ha gugukuatesa ha guvutugila luko ufuta waye nu Yehowa. (Yesh. 57:18) Malongo a Biblia mbaaguhana, mbaagukuatesa ha gulandula gutumagela Yehowa. Mu njila ya ukuateshi wa akulu, wajiya guvua dijui dia Yehowa didi guguwambela egi: ‘Njila yenyeyi, ilandule.’​—Yesh. 30:21.

14. Ha gutadila Galatiya 6:1, luholo lutshi akulu adi naye gukuatesa muthu “wakalagala ndaga yabola”? (Tala nji ifuanesa.)

¹⁴ Tanga Galatiya 6:1. Muklisto udi mutshita “ndaga yabola” gana nemesago mikhuala ya Nzambi. Ndaga yabola adi muzuelela mu verse eyi yajiya gumonesa desizio diabola nga gubola guakoma. Guzumba mbagutuma akulu ha gukamba “gumukuatesa nu gutuluga guagasue.” Mbimbi ya Greke yabalumuiwe egi “gumukuatesa” yajiya nji gumonesa luholo munganga wana kuatesa muthu wabogoga ha guvutula luko gifuwa muabonga. Munganga wabonga wana monesa gutema tangua didi muene musaga muthu wabogoga hagula egi avigo lamba diavula. Luholo lumoshi nji, gula akulu adi mukuatesa muthu wakalagala gubola anago gumuwambela mbimbi jiajiya gumusagesa, uvi ana gumuhana malongo nu gisemo giagasue. Biblia yana wambela akulu ha ‘gumonesa gutema.’ Tangua ana gutukuatesa ha gukolesa ufuta wetu nu Yehowa, ene nji ana jiya egi ashigo athu atagana nu ana tshita nji gubola. Adi naye gumonesa gutema nu ashigo naye gutangiza egi ene ana tshita ndaga jiabonga gubalega muthu adi muhana malongo. Hene adi naye gukhala athu a gudibulumuisa nu enya khenda.​—1 Phet. 3:8.

15. Itshi tuajiya gutshita gula tudi nu ndaga idi gutusagesa?

¹⁵ Tuajiya gushila akulu a mu hungu dietu mutshima, handaga Yehowa wana guawambela ha gutuna guwambela athu ako gisuegi gietu. Wana gualongesa nji ha guhana malongo adi mukatuga mu Biblia uvi mu matangi awo ndo. Wana guakuatesa nji ha gujiya luholo ajiya gutukuatesa mu ndaga tudi mutagana najio. (Ish. 11:13; Gal. 6:2) Akulu ana khala nu makalegelo a gudisha, ako ana khala nu eksperianse yavula gubalega, uvi gula tudi nu ndaga idi gutusagesa, tuajiya guyiwambela mukulu wagasue tuatshigina. Gula tuawambela gale mukulu mumoshi mulonga wetu, ishigo nu ndando ha gukamba malongo gudi mukulu muko nu gutangiza egi mbawutuwambela ndaga tudi mutshigina guvua. Gula tuana tshita ngenyi, tuajiya gukhala gifua athu adi mutshigina guvua ndaga jidi guasuanguluisa uvi ashigo mutshigina guvua ndaga jidi mulongesa Yehowa mu njila ya Mbimbi yenji. (2 Tim. 4:3) Gula tuaya muwambela mukulu mumoshi ndaga idi gututadila, wajiya gutuhula gula tuawambela gale akulu ako ndaga yene. Wajiya nji gutuhula ha gujiya ndaga atuwambela. Khadilo dia gudibulumuisa diajiya gutuma mukulu muene ha gutoga malongo gudi akulu ako.​—Ish. 13:10.

GINEMO GIA MUTHU NU MUTHU

16. Ginemo gitshi muthu nu muthu udi nagio?

¹⁶ Akulu ana gukhala nu ginemo gia gutuhana malongo nu ana gutukuatesa gula tuatagana nu milonga, uvi ashigo nu ginemo gia gutuzudila badesizio. Muthu wagasue udi nu ginemo gia gunemesa mikhuala ya Nzambi. Mukut’etu agasue mbatudisophela gudi Nzambi mukunda nu ndaga tuana zuela nu tuana tshita. Mu ukuateshi wa Nzambi, tuajiya gubinga malamba tudi mutagana nawo nu gulandula gusala ya gujinginyina gudi muene. (Roma 14:12) Akulu anago gutuwambela ndaga tudi naye gutshita, uvi ana gutukuatesa ha gujiya matangi a Nzambi mu njila ya Biblia. Gula tudi mukalegela malongo a Biblia ana gutuhana akulu, mbayitukuatesa ha gukudisa ‘ndunge jietu’ ha guzula badesizio abonga.​—Heb. 5:14.

17. Desizio ditshi tuazula?

¹⁷ Tudi diago nu luendu lua gukhala imeme ya Yehowa! Yehowa watumine Yesu ‘mubambi wa imeme wabonga’ ha guhana gibawu mukunda nu esue hagula tuajiya guheta monyo wa ivo nu ivo. (Yone 10:11) Mu njila ya akulu a mu hungu, Yehowa wana tagenesa ndaga yalayele muene egi: ‘Mbangumihua abambi adi mukalagala ndaga mu gudivua nu gutshigina guami, ene mbaamituameza nu jindunge nu gutema.’ (Yel. 3:15) Tushigo naye guvua woma ha gutoga ukuateshi gudi akulu gula tudi mukata nga tualeba mu nyuma. Hene, tulandulenu gutshita yagasue ha guheta gubonga gua malongo ana gutuhana Yehowa mu njila ya akulu a mu hungu.