LONGO DIA 34
LUNGIMBO 107 Tulandule Guzumba gua Nzambi
Luholo Akulu Ana Monesela Athu Akalagala Gubola Guzumba nu Ana Guavila Khenda
“Nzambi mu mutshima wenji wabonga, udi mutshigina gugukuatesa ha gubalumuna mutshima.”—ROMA 2:4.
NDAGA JIDI MU LONGO EDI
Luholo akulu ana kuatesa athu akalagala gubola guakoma mu hungu.
1. Itshi yajiya gukalegewa gula muthu mumoshi watshita gubola guakoma?
MU LONGO diabalega tuamonele luholo mupostolo Phaula walondele mulonga wa muthu wakalegele gubola guakoma gu Kolinto. Muthu muene wazolewe mu hungu handaga gabalumuinego mutshima. Uvi gifua luholo verse yakuata longo edi idi guyimonesa, Nzambi wajiya gukuatesa muthu wakalagala gubola ha gubalumuna mutshima. (Roma 2:4) Luholo lutshi akulu ajiya gumukuatesa ha gubalumuna mutshima?
2-3. Itshi tudi naye gutshita gula tuajiya egi phangi mumoshi wakalagala gubola guakoma? Mukunda natshi?
2 Gutuama egi akulu akuatese muthu wakalagala gubola, adi naye thomo gujiya ndaga yene. Na itshi tudi naye gutshita gula tuajiya egi phangi mumoshi wakalagala gubola guakoma? Tudi naye gumuwambela ha guya mutoga ukuateshi gudi akulu.—Yesh. 1:18; Makal. 20:28; 1 Phet. 5:2.
3 Uvi itshi tuajiya gutshita gula muthu wakalagala gubola watuna guya mumona akulu? Tudi naye guya muwambela akulu mulonga wene, hagula ajiya gumukuatesa. Yene ndaga yabonga tuajiya gutshita hagula phangi muene ahete ukuateshi watagana. Uvi gula muthu muene gashigo musombegesa makalegelo enji abola, wajiya gubolesa ufuta wenji nu Yehowa. Wajiya nji gubolesa lukuma lua hungu. Hene, ngatshima yajiya gukhala lamba, uvi tudi naye guya mumona akulu, handaga tuana zumba Yehowa nu muthu wakalagala gubola.—Ngi. 27:14.
LUHOLO AKULU ANA KUATESA MUTHU WAKALAGALA GUBOLA GUAKOMA
4. Felela dia akulu diakhala itshi tangua anata maga nu muthu wakalagala gubola guakoma?
4 Gula phangi mumoshi mu hungu wakalagala gubola guakoma, hunji dia akulu diana tomba akulu thathu mukatshi diawo ha guya mumona phangi muene. Akulu ene ana tshita komite ya akulu.a Aphangi ene ana khala diago nu khadilo dia gudibulumuisa. Tangua ana guya ha gukuatesa muthu wakalagala gubola, ana gumushinjigago gu ngolo ha gubalumuna mutshima. (Mikh. 30:19) Akulu ana jiya egi ishigo mukotelesa egi muthu wagasue wakalagala gubola mbawubalumuna mutshima gifua muatshitshile Fumu Davidi. (2 Sam. 12:13) Ako ajiya gutuna gawo malongo a Yehowa. (Gis. 4:6-8) Uvi, felela dia akulu diakhala dia gutshita yagasue ha gukuatesa muthu wakalagala gubola ha gubalumuna mutshima. Itshi akulu adi naye guwunguluga tangua adi mutshigina guya mumona muthu wakalagala gubola?
5. Ndaga itshi akulu ana jiya tangua ana guta maga nu muthu wakalagala gubola? (2 Timote 2:24-26) (Tala nji gifuanesa.)
5 Akulu ana jiya egi ikhale muthu wakalagala gubola guakoma, udi nu ndando yavula gu meso a Yehowa. (Luka 15:4, 6) Hene, tangua adi muta maga nu phangi muene ana zuela ndo mbimbi jiabola, anago gumukalegela ndaga gisemo ndo nga gumubalela; ana tangiza nji ndo egi adi naye phamba gumuhula mihu ha gujiya luholo ndaga jiabalega. Uvi ana monesa makalegelo adi mu mukanda wa 2 Timote 2:24-26. (Tanga.) Akulu ana monesa khadilo dia gutuluga nu gisemo tangua ana kuatesa muthu wakalagala gubola ha gubalumuna mutshima.
Gifua luholo abambi a imeme akhalele mutshita mu tangua dikulu, akulu nji ana kamba gimeme ginyi giatotshi (Tala paragrafe 5)
6. Luholo lutshi akulu ana kamba utuameji wa Yehowa gutuama egi ate maga nu muthu wakalagala gubola? (Roma 2:4)
6 Akulu ana kamba utuameji wa Yehowa. Ana tshita ngolo ha gukalegela athu akalagala gubola ndaga gifua Yehowa. Ana wunguluga ndaga jiazuelele Phaula egi: “Nzambi mu mutshima wenji wabonga, udi mutshigina gugukuatesa ha gubalumuna mutshima.” (Tanga Roma 2:4.) Akulu adi abambi a imeme, hene adi naye gulandula utuameji wa Klisto nu gifezegeselo gienji tangua adi mubamba imeme. (Yesh. 11:3, 4; Mat. 18:18-20) Gutuama egi komite ya akulu ite maga nu muthu wakalagala gubola, ana tshita thomo gisambu ha gujiya luholo lua gukuatesa muthu muene ha gubalumuna mutshima. Ana tshita ba recherche mu Biblia nu mu mikanda yetu. Ana tshita nji gisambu hagula Yehowa a ahane ndunge. Ana kamba gujiya ndaga jiatumi muthu muene ha gusendesa gutangiza ndaga jiabola nu ha gutshita gubola.—Ish. 20:5.
7-8. Luholo lutshi akulu ana landula khadilo dia guhuiminyina dia Yehowa tangua adi muta maga nu muthu wakalagala gubola?
7 Akulu ana landula khadilo dia Yehowa dia guhuiminyina. Ana jiya luholo Yehowa wakuatesele athu akalegele gubola mu tangua dikulu. Ha gufezegesa, wakuatesele Gayino nu guhuiminyina guagasue. Wamuwambelele malamba ajiya gumubuila gula gasombegeselego khadilo dienji diabola nu gubonga mbaaheta gula wasombegesa. (Gis. 4:6, 7) Yehowa watumile profete Natana ha guhana Davidi malongo. Profete muene wahanele gifezegeselo gimoshi giakuatesele Davidi ha gubalumuna mutshima. (2 Sam. 12:1-7) Tangua enya Isalele akhalele mulumbugila Yehowa, ‘walanduile gutuma’ baprofete enji ‘mbala jiavula’ ha guakuatesa. (Yel. 7:24, 25) Yehowa gakhalelego munengenena egi enya Isalele abalumune thomo mutshima gutuama dia guakuatesa. Uvi wakhalele guakuatesa ha gubalumuna mutshima mu tangua diakhalele ene mutshita gubola.
8 Akulu ana landula gifezegeselo gia Yehowa tangua ana kuatesa muthu wakalagala gubola guakoma. Gifua luholo 2 Timote 4:2 idi guyimonesa, akulu ana monesa khadilo dia gutuluga nu dia guhuiminyina ha gukuatesa muthu wakalagala gubola ha gubalumuna mutshima. Gula akulu avua khabu nga gisegela, yajiya gukhala lamba gudi muthu ayi mukuatesa ha guategelela nga ndo wajiya genji gutuna ha gubalumuna mutshima.
9-10. Luholo lutshi akulu ajiya gukuatesa muthu wakalagala gubola ha gujiya ndaga jia mutumi ha gutshita gubola?
9 Akulu ana kamba gujiya ndaga jiatumi muthu muene ha gutshita gubola. Ha gufezegesa ana kamba guheta mvutu gu mihu yiyi: Phangi muene watshitshi gubola handaga gana tshita ndo luko gulonguga guenji hakhenji nga guya mu mudimo wa gulongesa ba? Idi handaga ganago gutshita luko isambu muavula nga ndo isambu yenji yakhala holu-holu ba? Wabembele genji egi nzala imoshi yabola imubuise ba? Mafuta enji ana khala akuatshi? Saga jia luholo lutshi ana tshita? Luholo lutshi ndaga jiana tshita muene jiabolesele matangi enji? Udi mujiya egi ndaga yakalagala muene idi musagesa Yehowa ba?
10 Gula akulu ahula muthu watshitshi gubola mihu nu gutema guagasue, atuna guhula ndaga jinyi jishigo diago guatadila, mbaakuatesa muthu wakalagala gubola ha gujiya ndaga jiamutumi ha gubua mu gubola nu ha gubalumuna mutshima. (Ish. 20:5) Profete Natana wahanele gifezegeselo ha gukuatesa Davidi; akulu nji ajiya guhana muthu watshitshi gubola ifezegeselo ha gumukuatesa ha gutangiza nu ha gukotelesa gubola guenji. Muthu muene wajiya gusendesa gudibela mukunda nu ndaga jiatshitshi muene mu mbala ya thomo akulu adi muta nenji maga. Wajiya gubalumuna mutshima.
11. Luholo Yesu Wakalegele athu atshitshile gubola ndaga?
11 Akulu ana tshita ngolo ha gulandula gifezegeselo gia Yesu. Tangua Yesu wakuatesele Saula, wamuhudile muhu nu gutema guagasue egi: “Saula, Saula, mukunda natshi udi gungumonesa lamba?” Muhu wene wamukuatesele ha gutangiza ndaga jiabola jiakhalele mutshita muene. (Makal. 9:3-6) Yesu wazuelele mukunda nu “Yezabele” egi: “Ngamubembediele tangua hagula abalumune mutshima.”—Gum. 2:20, 21.
12-13. Luholo lutshi akulu ana bembela muthu wakalagala gubola tangua dia gubalumuna mutshima? (Tala nji gifuanesa.)
12 Akulu anago guzula desizio mbala imoshi egi muthu wakalagala gubola mbagashigo mubalumuna mutshima, handaga ana landula gifezegeselo gia Yesu. Muthu muko wajiya gubalumuna mutshima mu mbala ya thomo komite ya akulu idi muta n’enji maga, uvi gudi athu ako yana toga tangua diavula ha gubalumuna mutshima. Hene akulu adi naye guta n’awo maga mbala jiavula. Gungima dia guta maga nu muthu mu mbala ya thomo, muthu muene wajiya gusendesa gutangigiza muavula ndaga jiamuwambela akulu. Wajiya nji gutoga Yehowa mu gisambu nu gudibulumuisa guagasue ha gumutotesela gubola guenji. (Ngi. 32:5; 38:18) Ngenyi, tangua akulu mbaavutuga luko ha guta n’enji maga, wajiya gumonesa diago egi wasombegesa makalegelo enji.
13 Ha gukuatesa muthu watshitshi gubola ha gubalumuna mutshima, akulu adi naye gumuvila khenda nu gumumonesela gisemo. Ana toga Yehowa ha guakuatesa mu ndaga jiagasue adi mukalagala nu ana sha mutshima egi muthu muene wajiya gubalumuna mutshima.—2 Tim. 2:25, 26.
Akulu ajiya guta maga mbala jiavula nu muthu wakalagala gubola ha gumukuatesa ha gusombegesa (Tala paragrafe 12)
14. Nanyi udi naye guzula lutumbu gula muthu wakalagala gubola wabalumuna mutshima? Mukunda natshi?
14 Tuana suanguluga muavula gula muthu wakalagala gubola wabalumuna mutshima! (Luka 15:7, 10) Nanyi udi naye guzula lutumbu mukunda nu ndaga yene? Idi akulu ba? Tuwungulugenu ndaga yasonegele mupostolo Phaula mukunda nu athu akalegele gubola. Wazuelele egi: “Nzambi wajiya guakuatesa ha gubalumuna mutshima.” (2 Tim. 2:25) Idi Yehowa wana kuatesa athu ene ha gusombegesa makalegelo awo uvi ishigo athu. Phaula wamonesele nji gubonga muthu wana heta gula wabalumuna mutshima. Wana heta ujiyi wa diago wa giamatshidia, wana khala nu matangi abonga nu wana zoga mu muheto wa Diabulu.—2 Tim. 2:26.”
15. Luholo lutshi akulu ana landula gukuatesa muthu wabalumuna mutshima mu gubola guenji?
15 Gula muthu muene wabalumuna mutshima, akulu atadila mulonga wenji adi naye gulandula guya gumutala ha gumuhana gikhesa nu gumukuatesa ha gulenga miheto ya Satana nu ha gulandula gutshita ndaga jiabonga. (Heb. 12:12, 13) Uvi akulu ene ashigo naye guwambela nga muthu mumoshi ndaga jiabola jiakalagala muthu muene. Na, luholo lutshi aphangi a mu hungu ajiya gujiya ndaga yene?
“MUBALELE HA MESO A ATHU AGASUE”
16. Ha gutadila 1 Timote 5:20, “athu agasue” adi muzuelela Phaula adi akhuatshi?
16 Tanga 1 Timote 5:20. Phaula wasonegele Timote munu wakhalele nji mukulu ndaga eji, ha gumuwambela luholo adi naye gukalegela “muthu udi mutshita gubola” ndaga. Yakotelesa itshi? “Athu agasue” akhalele muzuelela Phaula ishigo mukotelesa egi idi hungu dia mudidi. Uvi wakhalele muzuelela athu anyi ajiyile gubola guene. Yajiya gukhala athu amonele ndaga yene, nga athu anyi muthu wakalegele gubola wayile mutela lumene. Akulu adi naye guawambela mu gisuegi egi atadila gale mulonga wa muthu muene nu amubalela.
17. Gula gubola guakalagala muthu guajiyiwa gale mu hungu nga ndo mbagumujiyiwa mu masugu adi muza, itshi akulu adi naye gutshita? Mukunda natshi?
17 Matangua ako, yajiya gukhala egi hungu diagasue diajiyi gale gubola guakalagala muthu, nga ndo gubola guene mbagumujiyiwa mu masugu adi muza. Mu tangua diene, mbimbi “athu agasue” idi mukotelesa hungu dia mudidi. Hene mukulu mumoshi udi naye guhana kominike egi phangi muene wabalelewa. Mukunda natshi? Phaula udi muhana mvutu egi: “Hagula itemese athu ako” ha gutuna gutshita gubola.
18. Luholo lutshi akulu adi naye gulondega mulonga wa Muklisto munu udi khenji gatagenesa galego ivo 18? (Tala nji gifuanesa.)
18 Itshi akulu adi naye gutshita gula Muklisto wakalagala gubola guakoma udi mona wazonda, munu khenji gatagenesago ivo 18? Hunji dia akulu didi naye gutomba akulu mbadi ha guya muta maga nu mona muene hamoshi nu mvuaji jienji jidi Aklisto.b Akulu adi naye gukamba gujiya ndaga mvuaji jiakalagala gale ha gukuatesa mun’awo ha gubalumuna mutshima. Gula mona muene wavua malongo a mvuaji jienji nu wasombegesa makalegelo enji, akulu ene mbadi ajiya gubembela mvuaji ginemo gia gukuatesa mun’awo; handaga ene Nzambi wahanele ginemo gia guhana an’awo ndola nu guzumba guagasue. (Mikh. 6:6, 7; Ish. 6:20; 22:6; Ef. 6:2-4) Akulu adi naye guta maga nu mvuaji jia mona muene ha gujiya gula adi mulandula gumukuatesa. Uvi, itshi akulu adi naye gutshita gula mona muene watuna gubalumuna mutshima? Komite ya akulu idi naye guta n’enji maga hamoshi nu mvuaji jienji jidi Aklisto.
Gula Muklisto munu udi mona wazonda watshita gubola guakoma, akulu mbadi adi naye guta n’enji maga hamoshi nu mvuaji jienji jidi Aklisto (Tala paragrafe 18)
“YEHOWA WANA KHALA NU GUZUMBA GUAKOLA NU KHENDA JIAVULA”
19. Luholo lutshi akulu ana landula gifezegeselo gia Yehowa tangua adi mukuatesa muthu wakalagala gubola guakoma?
19 Yehowa wahanele akulu ginemo gia gubamba hungu hagula dikhale diaphelegeta. (1 Kol. 5:7) Akulu ana tshita yagasue ha gukuatesa muthu wakalagala gubola ha gubalumuna mutshima. Gishina giene, tangua akulu ana kuatesa muthu ana sha mutshima egi wajiya gusombegesa. Mukunda natshi? Handaga ana tshigina gulandula gifezegeselo gia Yehowa gia gukhala nu “guzumba guakola nu khenda jiavula.” (Yak. 5:11) Tutalenu luholo mupostolo Yone wamonesele khadilo diene. Wasonegele egi: “An’ami azonda, ngudi gumisonegela ndaga eji hagula mutshitshigo gubola. Uvi gula muthu watshita gubola, tudi nu mukuateshi udi nu Tata, mukuateshi muene udi Yesu Klisto muthu wabonga.”—1 Yone 2:1.
20. Itshi mbatulonguga mu longo dialandula?
20 Ndaga ya gikenene idi egi, matangua ako muthu watshitshi gubola wajiya gutuna gubalumuna mutshima. Ngenyi udi naye guzolewa mu hungu. Luholo lutshi akulu ana londega mulonga wa muthu wakalagala gubola guakoma? Mbatutadila ndaga yene mu longo dialandula.
LUNGIMBO 103 Les bergers, des dons de Dieu
a Thomo, komite yene yakhalele mutamegewa egi komite ya gusophesa. Uvi gusophesa gudi phamba ndaga imoshi mukatshi dia ndaga jiavula jiana kalagala akulu. Hene, mbatushigo luko mutamega komite yene egi komite ya gusophesa. Uvi mbayikhala mutamegewa egi komite ya akulu.
b Ndaga adi muzuela mu paragrafe yiyi jidi mutadila nji muthu muko wa gukula wana khala nu mona muene nga muthu wa mu fami udi nu ginemo gia gutala mona muene.