Luholo Lutshi Tuajiya Gulandula Gifezegeselo gia Yehowa Gula Muthu Mumoshi Wakalagala Gubola Guakoma?

1. Ndaga itshi Yehowa wana tshigina egi muthu wagasue atshite?

YEHOWA watuhanele luendu lua guditombela ndaga tudi naye gutshita. Tuana kalegela luendu luene tangua tuana zula badesizio. Desizio diabalega ndando muthu wagasue wajiya guzula didi gudihana gudi Yehowa nu gungina mu fami yenji. Yene ndaga Yehowa wana tshigina egi muthu wagasue atshite. Mukunda natshi? Idi handaga wana zumba athu nu wana tshigina egi akhale muabonga. Wana tshigina nji egi akhale nu ufuta wakola n’enji nu ahete monyo wa ivo nu ivo.​—Mikh. 30:19, 20; Gal. 6:7, 8.

2. Ndaga itshi Yehowa udi mutoga athu akalagala gubola guakoma uvi ashigo gubalumuna mutshima? (1 Yone 2:1)

² Uvi, Yehowa ganago gushinjiga nga muthu mumoshi ha gumukombelela. Wana bemba egi muthu wagasue aditombele ndaga idi mutshigina muene gutshita. Itshi akulu ajiya gutshita gula ­Muklisto mumoshi watshita gubola guakoma? Gula phangi muene gabalumuinego mutshima, udi naye guzolewa mu hungu. (1 Kol. 5:13) Uvi, ikhale muthu muene wazolewa mu hungu, Yehowa wana tshigina egi abalumune mutshima nu avutuge luko gudi muene. Ndaga ya ndando yatumile Yehowa ha guhana gibawu, idi ha gutotesela athu agasue adi mubalumuna mutshima mu gubola guawo (Tanga 1 Yone 2:1.) Tata wetu wa guzumba wana toga athu agasue akalagala gubola guakoma ha gubalumuna mutshima.​—Zak. 1:3; Roma 2:4; Yak. 4:8.

3. Ndaga itshi tuza mumona mu longo edi?

³ Yehowa wana gutumonesa luholo luana gudivua muene mukunda nu ndaga jiabola, nu luholo luana tadila muene muthu wakalagala gubola guakoma. Udi mutshigina egi esue nji tulandule gifezegeselo gienji. Mu longo edi tuza mumona ndaga mupostolo Phaula wawambelele aphangi a gu Kolinto ha gutshita tangua phangi mumoshi wakalegele gubola guakoma. Gungima tuza mumona ndaga Phaula waawambelele ha gutshita tangua muthu muene wabalumuine mutshima. Tuza nji mumona malongo tuajiya guzula mu luholo Yehowa wana tadila athu akalagala gubola guakoma.

NDAGA ITSHI AKLISTO A MU SIEKLE YA THOMO AKALEGELE TANGUA MUTHU MUMOSHI WAKALEGELE GUBOLA GUAKOMA?

4. Mu siekle ya thomo, ndaga itshi yabuile mu hungu dia gu Kolinto? (1 Kolinto 5:1, 2)

⁴ Tanga 1 Kolinto 5:1, 2. Tangua diakhalele Phaula mu vuayaje ya thathu ya gimisionere, wavile lumene lua ndaga imoshi yabola yakalegewe mu hungu dihe-dihe dia gu Kolinto. Phangi mumoshi wa mu hungu diene wakhalele mubungisa muila nu mukaji’a sh’enji. Ndaga yene yakhalele diago musagesa athu; ikhale athu anyi akhalelego mukombelela Nzambi akhalelego mutshita ndaga jia luholo elu! Uvi aphangi a mu hungu dia gu Kolinto akhalelego mumona egi idi ndaga yabola; amubembele gawo mu hungu. Yajiya gukhala egi ako mukatshi diawo akhalele mutangiza egi adi mulandula gifezegeselo gia Yehowa gia guvila athu akalagala gubola khenda. Uvi Yehowa gana tshigina ndo egi nga mukombeledi wenji mumoshi akalagale gubola. Yajiya gukhala egi ndaga yabola yakalegele muthu muene, yatshishile egi athu anyi akhalelego mukombelela Yehowa azuele ndaga jiabola mukunda nu akombeledi enji. Yakhalele naye nji gutuma aphangi ako a mu hungu diene anyi akhalele mubalegesa tangua n’enji ha gulandula gifezegeselo gienji. Itshi mupostolo Phaula wawambelele aphangi a mu hungu diene ha gutshita?

5. Ndaga itshi Phaula wawambelele aphangi a mu hungu dia gu Kolinto ha gutshita? Ndaga yene yakhalele mukotelesa itshi? (1 Kolinto 5:13) (Tala nji gifuanesa.)

⁵ Tanga 1 Kolinto 5:13. Nyuma ya Nzambi yakuatesele Phaula ha gusonegela aphangi a mu hungu dia gu Kolinto mukanda. Waawambelele egi muthu wakalagala gubola uvi gashigo mutshigina gubalumuna mutshima udi naye guzolewa mu hungu. Luholo lutshi aphangi a mu hungu diene akhalele naye gumukalegela ndaga? Phaula waawambelele egi “mukuatshigo ufuta” nu muthu muene. Ndaga yene yakhalele mukotelesa itshi? Phaula wamonesele egi ashigo ‘naye gudia nu muthu’ muene. (1 Kol. 5:11) Gudia hamoshi nu muthu muene guakhalele naye guatuma ha gukuata luko n’enji ufuta. Phaula wamonesele egi aphangi a mu hungu akhalelego naye gubalegesa tangua hamoshi nu muthu muene. Gutshita ngenyi guakhalele naye gubamba aphangi mu hungu, hagula alandulago gifezegeselo gienji. (1 Kol. 5:5-7) Guakhalele naye nji gukuatesa muthu muene ha gukotelesa egi wakalagala gubola guakoma. Ngenyi, wajiya gudibela mukunda nu gubola guene nu gubalumuna mutshima.

6. Itshi Aklisto a mu hungu dia gu Kolinto akalegele tangua ahetele mukanda wa Phaula? Itshi muthu wakalegele gubola watshitshile tangua amuzolele mu hungu?

⁶ Gungima dia gutumila Aklisto a gu Kolinto mukanda wene, Phaula wakhalele gudihula gula aphangi ene mbakalegela ndaga jiene. Uvi gungima, Tito wamuwambele ndaga imoshi yamusuanguluishile muavula. Wamuwambelele egi Aklisto a gu Kolinto akalegela ndaga jiaasonegele muene. (2 Kol. 7:6, 7) Atumagele malongo a ahanele Phaula, azolele muthu muene mu hungu. Uvi gungima dia mbeji jiazonda, muthu muene wabalumuine mutshima! Wasombegesele makalegelo enji nu luholo luenji lua gutadila ndaga. Wasendesele nji gutumagela mikhuala ya Yehowa. (2 Kol. 7:8-11) Ndaga itshi Phaula wawambelele aphangi a mu hungu diene ha gutshita?

LUHOLO LUTSHI HUNGU DIAKHALELE NAYE GUTADILA MUTHU MUNU WABALUMUINE MUTSHIMA

7. Itshi muthu munu wakalegele gubola watshitshile tangua amuzolele mu hungu? (2 Kolinto 2:5-8)

⁷ Tanga 2 Kolinto 2:5-8. Phaula waawambelele egi: “Ndola yinyi athu avula ahanele muthu muene idi yatagana.” Mu guzuela guko, luholo muthu muene wabaluime mutshima tangua amuhanele ndola, Aklisto akhalelego naye gulandula gumuhana disipline.​—Heb. 12:11.

8. Ndaga itshi Phaula wawambelele aphangi a gu Kolinto ha gutshita?

⁸ Phaula wawambelele aphangi a gu Kolinto egi: “Mudi naye gumutotesela nu mutshima umoshi nu gumukuatesa” ha “gumonesa muthu muene egi muana gumuzumba.” Phaula wakhalele mutshigina egi akulu avutule muthu wabalumuine mutshima mu hungu nu amumonese mu mbimbi nu mu makalegelo awo egi amutotesela nu ana gumuzumba. Ngenyi, muthu muene wakhalele naye gumona egi aphangi adi nu gusuanguluga luholo luavutuga muene mu hungu.

9. Mukunda natshi yajiya gukhala egi yakhalele lamba gudi athu ako ha gutotesela phangi munu wabalumuine mutshima?

⁹ Yakhalele lamba gudi aphangi ako ha gumonesela muthu muene gisemo ba? Biblia yanago guyizuelela, uvi yajiya gukhala ngenyi. Ndaga yakalegele muthu muene yasagesele aphangi agasue mu hungu; yajiya gukhala nji egi ako avile musonyi wavula mukunda nu ndaga yene. Yajiya gukhala nji egi aphangi ako anyi akhalele mutshita ngolo ha gutumagela mikhuala ya Yehowa asuangulugilego tangua avutudile muthu watshitshile gubola guakoma mu hungu. (Fuanesa nu Luka 15:28-30.) Mukunda natshi yakhalele nu ndando egi aphangi a mu hungu dia gu Kolinto amonesele phangi muene guzumba gua giamatshidia?

10-11. Itshi yakhalele naye gubua gula nga akulu atunyile gututosela muthu munu wabalumuine mutshima?

¹⁰ Luholo lutshi muthu muene wakhalele naye gudivua gula nga akulu atunyile gumuvutula mu hungu? Wakhalele naye gudivua gikhuatshi gula nga aphangi amumoneselego guzumba tangua diavutugile muene mu hungu? Wakhalele naye guvua “gikenene giavula gubalega,” nga gutangiza egi gajiyilego luko guvutuga mu hungu. Wakhalele naye nji gutangiza egi Yehowa gajiyilego gumutotesela nu ishigo diago nu ndando ha gusombegesa makagelo enji.

¹¹ Itshi yakhalele naye gubua gula nga aphangi a mala nu a akhetu atunyile gututosela muthu munu wabalumuine mutshima? Akhalele naye gubolesa ufuta wawo nu Yehowa. Mukunda natshi tuazuela ngenyi? Handaga gutshita ngenyi guakhalele naye gumonesa egi ashigo mulandula khadilo dia Yehowa dia gutotesela muthu wakalagala gubola, uvi adi mulandula khadilo dia Satana dia gukalegela athu ndaga nu khuta yagasue nu gutuna guatotesela. Yakhalele naye gubua gifua, Satana udi guakalegela ha gulebesa gutshigina gua muthu muene.​—2 Kol. 2:10, 11; Ef. 4:27.

12. Mu luholo lutshi aphangi a gu Kolinto alanduile gifezegeselo gia Yehowa?

¹² Mu luholo lutshi aphangi a gu Kolinto alanduile gifezegeselo gia Yehowa, uvi gia Satana ndo? Alanduile gifezegeselo gienji tangua atotesele muthu munu wabalumuine mutshima mu gubola guenji. Tutalenu ndaga athu ako asonegele Biblia azuelele mukunda nu Yehowa. Davidi wazuelele egi: Udi Nzambi ‘wabonga, wana khala hehi ha gutotesela athu.’ (Ngi. 86:5) Mika wasonegele egi: ‘Gushigo nu Nzambi muko udi gifua aye, wana totesela athu nu wana buita mutshima mu gubola guawo.’ (Mik. 7:18) Yeshaya wazuelele egi: ‘Muthu wabola abembe makalegelo enji; muthu udi mutshita ndaga jiabola abembe matangi enji abola; avutuge gudi Yehowa, muene mbawumuvila khenda, ayi avutuge gudi Nzambi wetu, muene mbawumutotesela nu mutshima umoshi.’​—Yesh. 55:7.

13. Mukunda natshi yakhalele nu ndando egi avutule muthu wakalegele gubola mu hungu? (Tala galuanda “Tangua Ditshi Muenya gu Kolinto Munu Wakalegele Gubola Wavutugile mu Hungu?”)

¹³ Ha gulandula gifezegeselo gia Yehowa, Aklisto a gu Kolinto akhalele naye gusuanguluga luholo muthu wakalegele gubola wavutugile mu hungu nu gumumonesela guzumba gua giamatshidia. Akhalele naye nji gutumagela ndaga jiazuelele Phaula egi, gula atotesela muthu wakalagala gubola, mbaamonesa diago egi ana “tumaga mu ndaga jiagasue.” (2 Kol. 2:9) Idi yadiago egi muthu muene watshitshile phamba mbeji jiazonda gonze, gungima wavutugile mu hungu. Uvi ndola yamuhanewe yamukuatesele ha gubalumuna mutshima. Yakhalelego nu ndando egi akulu anengenene matangua avula ha gumuvutula mu hungu.

LANDULA GIFEZEGESELO GIA YEHOWA GIA GUKALEGELA ATHU NDAGA MU LUHOLO LUABONGA NU GUAVILA KHENDA

14-15. Malongo atshi tuazula mu luholo alondele mulonga wa muenya gu Kolinto munu wakalegele gubola guakoma? (2 Phetelo 3:9) (Tala nji gifuanesa.)

¹⁴ Lumene elu ludi muzuelela luholo alondele mulonga wa muenya gu Kolinto munu wakalegele gubola, luasonegewe mu Biblia ha “gutulongesa.” (Roma 15:4) Ludi gutulongesa egi, Yehowa gana bembago muthu wakalagala gubola guakoma nu gashigo mubalumuna mutshima ha gusala mu hungu. Athu ako ajiya gutangiza egi luholo Yehowa udi muenya khenda, mbawubemba muthu watshitshi gubola nu ashigo mubalumuna mutshima ha gusala mu hungu. Uvi ishigo ngenyi. Idi yadiago egi Yehowa udi muenya khenda, uvi ganago gutubemba ha gutshita ndaga jiagasue tuatshigina; ganago gusombegesa nji mikhuala yenji yatadila ndaga jiabonga nu jiabola. (Yuda 4) Gula Yehowa wabemba athu adi mutshita ndaga jiabola nu ashigo mubalumuna mutshima ha gusala mu hungu, mbaabolesa hungu dia mudidi. Gutshita ngenyi mbagushigo mumonesa egi udi guavila khenda.​—Ish. 13:20; 1 Kol. 15:33.

¹⁵ Tuamona egi Yehowa gana tshigina ndo egi nga muthu mumoshi afue. Wana tshita yagasue ha guhuluisa athu. Wana totesela athu ana balumuna mutshima nu ana tshita ngolo ha guvutugila luko ufuta wawo n’enji. (Ezek. 33:11; tanga 2 Phetelo 3:9.) Gishina giene, tangua muenya gu Kolinto wabalumuine mutshima nu wasombegesele makagelelo enji, Yehowa wakalegele mupostolo Phaula ha gusonegela aphangi a gu Kolinto egi, adi naye gumuvutula mu hungu nu gumutotesela.

16. Udi gudivua luholo lutshi tangua wajiya luholo alondele mulonga wa muenya gu Kolinto?

¹⁶ Gifezegeselo gia muenya gu Kolinto munu wakalegele gubola gidi gutukuatesa ha gukotelesa egi Yehowa wana zumba athu nu wana guakalegela ndaga mu luholo luabonga. (Ngi. 33:5) Gujiya ndaga eji jiagasue gudi naye gututuma ha gumutumbuisa muavula, handaga mukut’etu agasue tuana tshita gubola, tuana tshigina nji egi atutotesele. Tudi nji nu gusuanguluga guavula luholo Yehowa wahanele gibawu ha gututotesela gubola guetu. Tuana heta diago gikhesa tangua tuana jiya egi Yehowa wana zumba diago akombeledi enji nu wana tshigina egi akhale nu gusuanguluga!

17. Itshi mbatulonguga mu longo dialandula?

¹⁷ Mangino luholo lutshi ana londega mulonga wa muthu wakalagala gubola? Luholo lutshi akulu ana landulula gifezegeselo gia Yehowa gia gukuatesa muthu wakalagala gubola ha gubalumuna mutshima? Itshi aphangi adi naye gutshita gula akulu azola nga avutula muthu mu hungu? Mbatuheta mvutu jia mihu eyi mu longo dialandula.