Ukuateshi Mukunda nu Athu Azolewe mu Hungu

1-2. a) Luholo lutshi Yehowa wana tadila muthu wakalagala gubola uvi gashigo mubalumuna mutshima? b) Itshi Yehowa wana tshigina egi muthu wakalagala gubola atshite?

YEHOWA gana suangulugago nu makalegelo abola a maluholo agasue; ganago gutshigina gubola. (Ngi. 5:4-6) Wana tshigina egi tunemese mikhuala yenji yatagana idi mu Biblia. Wana jiya egi tushigo athu atagana nu tuajiyilego gukalagala ndaga mu luholo luatagana tangua diagasue. (Ngi. 130:3, 4) Uvi ganago gukanga meso mu ndaga jiana tshita athu ‘adi mubuisa khenda jienji jiavula gifua luendu ha gukalagala ndaga jia musonyi.’ (Yuda 4) Biblia yana zuela egi “athu ashigo munemesa Nzambi” mbaashiyiwa gu Ita ya Alemagedona.​—2 Phet. 3:7; Gumo. 16:16.

² Uvi Yehowa gana tshiginago egi nga muthu mumoshi ashiyiwe. Gifua luholo tuayimonele mu malongo abalega, Biblia yana monesa haphelo egi Yehowa “wana tshigina egi athu agasue abalumune mutshima.” (2 Phet. 3:9) Akulu ana landula gifezegeselo gia Yehowa tangua ana tshita ngolo ha gukuatesa nu guhuiminyina guagasue muthu wakalagala gubola ha gubalumuna mutshima nu ha guvutugila luko ufuta wenji nu Yehowa. Uvi athu ako, gula akalagala gubola ana tshigina ndo ukuateshi wene. (Yesh. 6:9) Ako ana landula gawo gutshita ndaga jiabola ikhale akulu adihana nu mutshima umoshi ha guakuatesa ha gubalumuna mutshima. Itshi akulu adi naye gutshita mukunda nu athu a luholo elu?

“KATULENU MUTHU WABOLA MUKATSHI DIENU”

3. a) Biblia yana zuela egi itshi akulu adi naye gutshita muthu gashigo mubalumuna mutshima? b) Gula muthu watuna gubalumuna mutshima, mukunda natshi tuajiya guzuela egi muene watombi ha guzolewa mu hungu?

³ Gula muthu gashigo mubalumuna mutshima, akulu adi naye gulandula longo didi mu 1 Kolinto 5:13 didi muzuela egi: “Katulenu muthu wabola mukatshi dienu.” Muthu udi mukalagala gubola wana jiya egi gula gabalumuine ndo mutshima mbawuzolewa mu hungu. Ngenyi gila wazolewa, idi gifua udi mukatula mbuto jiakunyile muene. (Gal. 6:7) Mukunda natshi tuazuela ngenyi? Handaga muthu muene watunyi gusombegesa ikhale akulu atshitshi yagasue ha gumukuatesa. (2 Maf. 17:12-15) Wamonesa diago mu makalegelo enji egi gashigo mutshigina gutumagela mikhuala ya Yehowa.​—Mikh. 30:19, 20.

4. Mukunda natshi ana hana kominike gula muthu wazolewa mu hungu?

⁴ Gula muthu watunyi gubalumuna mutshima wazolewa mu hungu, akulu ana hana kominike ha guwambela aphangi egi muthu muene gashigo luko Temue wa Yehowa. Kominike yene yana hanewago ha guhana muthu wakalagala gubola musonyi. Uvi yana hanewa ha gukuatesa aphangi a mu hungu ha gutumagela ndaga Biblia yana zuela egi ‘ashigo naye gukuata ufuta’ nu muthu wa luholo elu nga “gudia” n’enji. (1 Kol. 5:9-11) Yehowa wakhala nu ishina yabonga yamutumile ha gusha mukhuala owu. Mupostolo Phaula wasonegele egi: “Levire yazonda yana gujimbisa pate yagasue.” (1 Kol. 5:6) Gula muthu wakalagala gubola gashigo muzolewa mu hungu, athu ako ajiya gutangiza egi ene nji ashigo nu funu yagutumagela mikhuala ya Yehowa.​—Ish. 13:20; 1 Kol. 15:33.

5. Luholo lutshi tudi naye gutadila phangi wazolewa mu hungu? Mukunda natshi?

⁵ Luholo lutshi tudi naye gutadila phangi wazolewa mu hungu? Idi yadiago egi tushigo naye gukalagala ndaga hamoshi n’enji nga gukuata ufuta n’enji, uvi tudi naye gumutadila gifua gimeme giatoshi. Gula gimeme giatota, giajiya guvutuga luko. Tujimbilago egi muthu muene wadihanele gudi Yehowa. Uvi ndaga ya gikenene idi egi gashigo luko munemesa laji dialayele muene Yehowa, ndaga yene yamumba nji mu gingonza. (Ezek. 18:31) Uvi tudi naye gusha mutshima egi muthu muene wajiya gusombegesa ha guvutuga luko mu hungu, handaga Yehowa wana landula guvila athu khenda uu nu mangino. Luholo lutshi akulu ajiya gukuatesa muthu wazolewa mu hungu?

LUHOLO LUTSHI AKULU ANA KUATESA MUTHU WAZOLEWA MU HUNGU?

6. Ndaga jitshi akulu ana tshita ha gukuatesa muthu wazolewa mu hungu?

⁶ Gula muthu wazolewa mu hungu, akulu ana bemba gumukuatesa ha guvutuga gudi Yehowa ba? Ndo sha! Tangua akulu ana wambela muthu wakalagala gubola egi wazolewa mu hungu, ana gumuwambela nji ndaga adi naye gutshita ha guvutuga luko mu hungu. Uvi akulu ana kalagala ndaga jiko jiavula. Matangua avula, ana wambela muthu muene egi mbaaza luko gumutala gungima dia mbeji jiazonda ha gujiya gula wasombegesa makalegelo enji. Gula gungima dia mbeji jiazonda muthu muene watshigina guta luko maga nu akulu, akulu mbaamuhana gikhesa ha gubalumuna mutshima nu ha guvutuga mu hungu. Gula uu nu mu tangua diene muthu muene khenji gabalumuna galego mutshima, akulu mbaalandula gutshita yagasue ha guya gumutala luko mu masugu adi muza nu ha gulandula gumuhana gikhesa ha gubalumuna mutshima.

7. Luholo lutshi akulu ana landula khadilo dia Yehowa dia khenda tangua ana kalegela muthu wazolewe mu hungu ndaga? (Yelemiya 3:12)

⁷ Akulu ana landula gifezegeselo gia Yehowa yago wana vuila athu azolewe mu hungu khenda. Ha gufezegesa, mu tangua dikulu Yehowa gakhalelego munengena egi enya Isalele anyi akalegele gubola akhale athu a thomo ha gutshita yagasue ha guvutuga gudi muene. Uvi muene wakhalele mutshita yagasue ha guya guakamba gutuama egi asombegese makalegelo awo nu abalumune mutshima. Gifua luholo tuayimonyi mu longo dia mbadi dia Inzo Yaleha ya Mutaledi eyi, Yehowa wamonesele khadilo dienji dia khenda ha wambelele muene profete Hoshea ha gutotesela mukaji’enji nu ha gumuvutula luko gumbo dienji ikhale mukhetu muene wakhalele mulandula gulumbuga. (Hosh. 3:1; Mal. 3:7) Akulu nji ana landula gifezegeselo gia Yehowa mu luholo ana tshigina nu mutshima wagasue egi muthu watshitshi gubola avutuge gudi Yehowa nu anago gumukolesela ndaga.​—Tanga Yelemiya 3:12.

8. Luholo lutshi gifezegeselo gia Yesu gia mona watotele giana monesa khadilo dia khenda dia Yehowa? (Luka 15:7)

⁸ Udi muwunguluga luko gifezegeselo gia Yesu gia mona watotele, ginyi tuazuelele mu longo dia mbadi dia Inzo Yaleha ya Mutaledi eyi ba? Tangua sh’a mona muene wamonele mun’enji muvutuga gu inzo, “wayile phushi gumutagana, wamuyambele, wamuhanele beze nu gisemo giagasue.” (Luka 15:20) Tuakotelesa egi tata owu ganengenenego egi mun’enji aze amububile ha gumutotesela. Uvi muene hakhenji wayile gumuyamba handaga wakhalele gumuzumba. Akulu ana tshita yagasue ha gumonesela athu azolewe mu hungu khadilo dia luholo elu. Ana tshigina egi imeme yene ivutugile Yehowa. (Luka 15:22-24, 32) Gusuanguluga guana khala guavula mu dilu nu ha mavu gula muthu wavutuga luko gudi Yehowa!​—Tanga Luka 15:7.

9. Yehowa wana tshigina egi athu azolewe mu hungu atshite itshi?

⁹ Gifua luholo tuayimonyi gu thunda, Yehowa gana kanga ndo meso gu ndaga jiabola jiana tshita athu ashigo mubalumuna mutshima. Uvi gana guakaya nji ndo gu meso enji. Wana tshigina egi avutuge gudi muene. Mu Mukanda wa Hoshea 14:4, Yehowa wana monesa luholo luana gudivua muene mukunda nu athu ana balumuna mutshima. Udi muzuela egi: ‘Mbanguvutula athu ami gudi ame. Mbanguazumba nu mutshima wami wagasue, mbanguavilago luko khabu.’ Akulu, luholo muajiya luholo Yehowa wana gudivua mukunda nu athu azolewe mu hungu, khalenu mukamba gijiyishilo giagasue gidi mumonesa egi muthu muene wasendesa gubalumuna mutshima. Ndaga eji jidi naye nji gukuatesa athu agasue azolewe mu hungu ha gujiya egi Yehowa wana guazumba nu udi mutshigina egi avutuge gudi muene.

10-11. Luholo lutshi akulu ajiya gukuatesa athu azolewe gale mu hungu sendese mualeha?

¹⁰ Itshi tuajiya guzuela mukunda nu athu azolewe mu hungu sendese mualeha nga ndo ivo yavula yabalega gale? Yajiya gukhala egi athu a luholo elu abembele gale gawo gutshita gubola gunu guaatumile ha guzolewa mu hungu. Matangua ako, yajiya gukhala egi abuitshile gale mutshima gu ndaga yatshitshile egi azolewe mu hungu. Ikhale ngenyi nga ndo, akulu adi naye gutshita yagasue ha gujiya mafundo ana khala nu guya guatala. Gula aya guatala, adi naye gutshita nawo gisambu nu guatoga gula atshigina ha guvutuga luko mu hungu. Idi yadiago egi gula muthu wazolewe gale mu hungu sendese mualeha, mbawukhala nu funu ya gujiya luko Yehowa muabonga nu giamatshidia gidi mu Biblia. Ngenyi, gula muthu muene wamonesa egi udi mutshigina guvutuga luko mu hungu, akulu adi naye gumukambela phangi mumoshi mbawulonguga n’enji Biblia ikhale khenji gavutuga galego mu hungu. Yadiago, phamba akulu adi naye gumukambela phangi ha gulonguga n’enji Biblia.

¹¹ Ha gulandula khadilo dia khenda dia Yehowa, akulu adi naye gukamba nu gukuatesa athu azolewe gale mu hungu ha gujiya egi mufulo udi wagukangula mukunda nu ene gula adi mutshigina guvutuga gudi Yehowa. Gula muthu wakalegele gubola wabemba makalegelo enji abola nu wabalumuna mutshima, akulu ashigo naye gunengenena, ajiya gumuvutula mu hungu.​—2 Kol. 2:6-8.

12. a) Mu ndaga jitshi akulu adi naye gumonesa diago gutema? b) Mukunda natshi tushigo naye gutangiza egi Yehowa gajiyilego gutotesela athu akalegele gubola gumoshi ngenyi? (Tala nji mbimbi goshi’a diyiji.)

¹² Matangua ako, akulu adi naye gumonesa diago gutema gutuama dia guvutula muthu mu hungu. Ha gufezegesa, gula muthu ­wabungishile muila nu mona wazonda nga wakhalele aposta nga ndo watshitshile ndaga imoshi nu khuta ha gushiya ulo wenji, akulu adi naye gumutadila diago muabonga ha gujiya gula wabalumuna diago mutshima. (Mal. 2:14; 2 Tim. 3:6) Adi naye gutshita ngenyi ha gubamba aphangi a mu hungu. Uvi tudi naye gujiya egi Yehowa wakhala hehi ha gutshigina muthu wagasue wakalegele gubola nga gua luholo lutshi uvi wabalumuna diago mutshima nu wabemba makalegelo enji abola. Ikhale akulu adi naye gutadila muabonga gula muthu wakalegele athu ako gubola wabalumuna diago mutshima, uvi ashigo naye gutangiza egi Yehowa gajiyilego gutotesela muthu wa luholo elu nga gumuvuila khenda.a​—1 Phet. 2:10.

NDAGA APHANGI A MU HUNGU AJIYA GUTSHITA

13. Gudisha gutshi gudi mukatshi dia ndaga tudi naye gukalegela muthu wavutuga mu hungu nu muthu wazolewa mu hungu?

¹³ Gifua luholo tuayimonele mu longo diabalega, gula ahana kominike egi muthu mumoshi wavutuga mu hungu, tuajiya gukuata n’enji ufuta handaga tudi mujiya egi wabembele gale makalegelo enji abola nu wabalumuna diago mutshima. (1 Tim. 5:20) Udi phangi’etu wa nyuma, tudi naye gubalegesa n’enji tangua ha gumukuatesa ha gulandula gutshita ndaga jiabonga. (Heb. 10:24, 25) Uvi tushigo naye gutshita ngenyi nu muthu wazolewa mu hungu. Tushigo naye ‘gukuata ufuta’ nu muthu wa luholo elu nga “gudia” n’enji.​—1 Kol. 5:11.

14. Desizio ditshi Muklisto wajiya guzula gula muthu wazolewe mu hungu waza mu gudibungisa? (Tala nji gifuanesa.)

¹⁴ Longo didi mu 1 Kolinto 5:11 didi mutshigina gukotelesa egi tuajiyilego gutamega muthu wazolewe mu hungu ha guza mu gudibungisa nga gumumenega gula waza mu gudibungisa ba? Ndo. Idi yadiago egi tushigo naye gukuata n’enji ufuta nga gubalegesa tangua n’enji. Uvi Muklisto muene hakhenji udi naye gutadila ndaga jiana longuga muene mu Biblia ha gujiya gula wajiya gutamega muenya fami yenji nga futa dienji munu wazolewe gale mu hungu ha guza mu gudibungisa. Na gula waza giwa mu gudibungisa, itshi tuajiya gutshita? Thomo tuakhalelego mumenega muthu wa luholo elu. Uvi Henyaha, Muklisto wagasue udi naye gutomba gula udi naye gumenega muthu muene nga ndo. Athu ako ajiya gawo guzula desizio dia guhana muthu muene moyo nga gumuwambela egi “guza guabonga” gula waza mu gudibungisa. Uvi tushigo naye gulehesa maga nga gubalegesa n’enji tangua.

15. Athu a luholo lutshi Biblia yana zuelela mu 2 Yone 9-11? (Tala nji galuanda “Yone nu Phaula Akhalele Muzuelela Gubola gua Luholo Lumoshi ba?”)

¹⁵ Aphangi ako ajiya guzuela egi: ‘Biblia yana zuela egi gula Muklisto wamenega muthu wa luholo elu, udi gudibungisa n’enji mu midimo yenji yabola.’ (Tanga 2 Yone 9-11.) Uvi gula tuatadila ndaga jidi guthunda nu gu mbongo ya 2 Yone 9-11, tudi mukotelesa egi verse jiene jiana zuelela ba aposta nu athu ana tuma athu ako ha gutshita ndaga jiabola jinyi Biblia yana tunyisa. (Gumo. 2:20) Hene, gula muthu wazolewe mu hungu wabua aposta nga ndo udi mulandula gutshita ndaga jiabola, akulu ashigo naye guya gumutala. Idi yadiago egi tuajiya gusha mutshima egi nga muene muthu wa luholo elu wajiya nji gubalumuna mutshima. Uvi gula uu nu luenyelu muthu muene khenji gabalumunga ndo mutshima, tushigo naye gumumenega nga gumutamega ha guza mu gudibungisa gua mu hungu.

KHALA MULANDULA KHADILO DIA KHENDA DIA YEHOWA

16-17. a) Yehowa wana tshigina egi athu akalegele gubola atshite itshi? (Ezekiele 18:32) b) Luholo lutshi akulu ajiya gumonesa egi ana gutshita hamoshi nu Yehowa tangua ana kuatesa athu akalegele gubola?

¹⁶ Ndaga jitshi tualonguga mu malongo thano a Inzo Yaleha ya Mutaledi eyi? Yehowa gana tshiginago egi nga muthu mumoshi ashiyiwe! (Tanga Ezekiele 18:32.) Wana tshigina egi athu agasue ana tshita ndaga jiabola abalumune mutshima nu adivue muabonga n’enji. (2 Kol. 5:20) Gishina giene, sendese mu tangua dikulu uu nu mangino, Yehowa wana tamega akombeledi enji anyi amutunyile ha gubalumuna mutshima nu ha guvutuga gudi muene. Akulu akhala nu luendu lua gutshita hamoshi nu Yehowa ha gukuatesa athu akalegele gubola guakoma ha gubalumuna mutshima.​—Roma 2:4; 1 Kol. 3:9.

¹⁷ Gusuanguluga guana khala guavula mu dilu tangua athu ana balumuna mutshima! Yehowa Sh’etu wa mu dilu wana khala nu gusuanguluga guavula tangua diagasue gimeme gienji giatotele giana vutuga mu hungu. Tuana zumba Yehowa muavuala gulabalega tangua tuana tangigiza khadilo dienji dia khenda nu dia gisemo.​—Luka 1:78.