LONGO DIA 57
Itshi Wajiya Gutshita Gula Wakalagala Gubola Guakoma?
Matangua ako wajiya gutshita ndaga yabola, ikhale wana zumba Yehowa muavula nu wana tshita ngolo ha gutuna gutshita ndaga yajiya gumusagesa. Uvi, gubola guko guana khala guakoma gubalega. (1 Kolinto 6:9, 10) Gula watshita gubola guakoma, utangizago egi Yehowa mbagashigo luko guguzumba; udi hehi ha gugutotesela nu ha gugukuatesa.
1. Itshi tudi naye gutshita hagula Yehowa atutotesele?
Athu anyi ana zumba Yehowa ana guvua gikenene giavula gula ajiya egi akalagala gubola guakoma. Uvi ana heta ngolo mu mbimbi jiazuelele Yehowa egi: ‘Gula gubola guenu gudi gulababa, mbanguphelegetesa gubola guene gifua mvula ya neji.’ (Yeshaya 1:18) Gula tuabalumuna diago mutshima, Yehowa mbawututotesela. Luholo lutshi tuajiya gubalumuna mutshima? Tudi naye gudibela mukunda nu gubola guetu, tushigo naye gukalagala luko ndaga yene, tudi naye nji gububila Yehowa ha gututotesela. Gungima tudi naye gutshita ngolo ha gusombegesa matangi nu makalegelo anyi atutumi ha gutshita gubola, nu gukamba gutumagela mikhuala ya Yehowa.—Tanga Yeshaya 55:6, 7.
2. Luholo lutshi Yehowa wana gutukuatesa mu njila ya akulu gula tuatshita gubola?
Yehowa udi gutuwambela egi, gula muthu watshita gubola guakoma “atamege akulu a mu hungu.” (Tanga Yakoba 5:14, 15.) Akulu ana zumba Yehowa nu akombeledi enji. Adi atagana ha gutukuatesa hagula tuajiya gukhala luko nu ufuta wakola nu Yehowa.—Galatiya 6:1.
Luholo lutshi akulu ana gutukuatesa gula tuakalagala gubola guakoma? Akulu mbadi nga thathu ajiya gutuhana malongo mu njila ya Biblia ha gutumonesa egi ndaga tuakalagala idi yabola. Mbaatuhana nji malongo nu gikhesa giajiya gutukuatesa ha gutuna gutshita luko gubola guene. Ajiya gututunyisa ha gutshita ndaga jiko mu hungu uu nu tangua mbatukolesa luko ufuta wetu nu Yehowa. Gula muthu wakalagala gubola guakoma uvi watuna gubalumuna mutshima, akulu adi naye gumuzola mu hungu ha gubamba aphangi ako mu makalegelo enji abola.
TUKAMBE GUJIYA NDAGA JIAVULA
Kamba gukotelesa muabonga luholo Yehowa wana gutukuatesa gula tuakalagala gubola guakoma, khala nji gumuhana mersi.
3. Guzuela gubola guana gutukuatesa ha guvutula ufuta wetu nu Yehowa
Gubola guagasue guana suanguluisa ndo Yehowa, gishina giene tudi naye gumuwambela ndaga yabola tuakalagala. Tanga Ngimbo 32:1-5, gungima zuelelenu muhu owu:
Mukunda natshi tudi naye guwambela Yehowa gubola guetu ha fundo dia gusuega ndaga tuakalagala?
Gula tuawambela Yehowa gubola guetu, gungima tuaya mutela akulu lumene mbatudivua muabonga. Tala VIDEO, gungima zuelelenu muhu owu walandula.
Mu video eyi tuatala, luholo lutshi akulu akuatesele Canon ha guvutuga gudi Yehowa?
Tudi naye guwambela akulu ndaga jiagasue, tushigo naye guasuegela ndaga jiko; handaga adi guene mukunda nu gutukuatesa. Tanga Yakoba 5:16, gungima zuelelenu muhu owu:
Mukunda natshi yajiya gukhala yaleba gudi akulu ha gutukuatesa gula tudi guawambela giamatshidia?
Zuela gubola guaye, wambela akulu ndaga jiagasue, tshigina ukuateshi wana hana Yehowa nu guzumba guagasue
4. Yehowa wana vila muthu watshitshi gubola khenda
Gula muthu wakalagala gubola guakoma, uvi watuna gubalumuna mutshima, udi naye guzolewa mu hungu. Muthu muene gashigo luko phangi etu, tuajiyilego gubalegesa n’enji tangua nga guta n’enji maga. Tanga 1 Kolinto 5:6, 11 nu 2 Yone 9-11, gungima zuelelenu muhu owu:
Gifua luholo levire yana jimbisa pate ya mapha, luholo lutshi gubalegesa tangua nu muthu munu watuna gubalumuna mutshima guajiya gubolesa aphangi mu hungu?
Akulu ana landula khadilo dia Yehowa dia guvila athu khenda, tangua ana kamba athu anyi azolewe mu hungu ha guakuatesa. Athu avula avutugile gale mu hungu handaga ndola yaahanewe, yaakuatesele ha gusombegesesa makalegelo awo. Ngimbo 141:5.
Gula muthu watshita gubola guakoma, luholo lutshi Yehowa wana monesa egi gashigo muenya ndaga jiakola-kola, wana vila athu khenda nu wana guazumba?
5. Yehowa wana gututotesela gula tuabalumuna mutshima
Yesu wahanele gifezegeselo giana gutukuatesa ha gukotelesa luholo Yehowa wana gudivua gula muthu wabalumuna mutshima. Tanga Luka 15:1-7, gungima zuelelenu muhu owu:
Lumene elu ludi gugulongesa itshi mukunda nu Yehowa?
Tanga Ezekiele 33:11, gungima zuelelenu muhu owu:
Ndaga itshi ya ndando tudi naye gutshita ha gumonesa egi tuabalumuna diago mutshima?
Yehowa wana gudisagesa muavula mukunda nu akombeledi enji gifua luholo mubambi wa imeme wana bamba imeme yenji
ATHU AKO ANA ZUELA EGI: “Ngudi muvua woma egi gula ngawambela akulu gubola guami, mbanguzolewa mu hungu.”
Itshi wajiya guwambela muthu udi mutangiza ngenyi?
NDAGA WALONGUGA
Gula tuakalagala gubola guakoma, tuadibela nu tuabemba khadilo diene, Yehowa mbawututotesela.
Mihu ya Guvutugila
Mukunda natshi idi nu ndando ha guzuela gubola guetu gudi Yehowa?
Itshi tudi naye gukalagala hagula Yehowa atutotesele?
Gula tuakalagala gubola guakoma, mukunda natshi tudi naye gukamba ukuateshi gudi akulu?
NDAGA JIKO JIA NDANDO
Tala luholo Yehowa wavuidile yala mumoshi khenda gifua luholo adi guyizuelela mu Yeshaya 1:18.
Luholo lutshi muthu wagasue wajiya guheta gubonga gula azola muthu mu hungu?
Tala luholo wajiya gukotelesela muthu munu gashigo Temue wa Yehowa gishina ana zolela athu ako mu hungu.
“Ukuateshi Mukunda nu Athu Azolewe mu Hungu” (Inzo Yaleha ya Mutaledi ya Aout 2024)
Tala lumene “Il fallait que je revienne vers Jéhovah” ha gujiya mukunda natshi yala munu watunyile giamatshidia wajile mukotelesa egi Yehowa wajiya gumutshigina luko.
“La Bible transforme des vies” (Inzo Yaleha ya Mutaledi ya 1 Avril 2012)