Gubonga Tuana Heta Luholo Yehowa Wana Gutuzumba

1. Itshi tuajiya gutshita ha gusuanguluisa Yehowa?

TANGIZA gale egi wahana muthu mumoshi wana zumba kado gamoshi gandando ganyi gajiya gumukuatesa. Gula muthu muene wahaga kado gene ha fundo dimoshi ngenyi, gashigo gugatangiza luko nga hazonda, yajiya diago gugusagesa! Uvi wajiya gusuanguluga muavula gula muthu muene wakalegela kado gene muabonga nu waguhana mersi. Gifezegeselo egi gidi gutulongesa itshi? Yehowa wahanele mun’enji ha gufua mukunda nu esue. Hene udi naye gukhala nu gusuanguluga gula tudi gumuhana mersi mukunda kado gene gandando nu mukunda nu guzumba guenji handaga guene guamutumine ha gufuta gibawu!​—Yone 3:16; Roma 5:7, 8.

2. Itshi tuza muzuelela mu longo edi?

² Luholo ivo yavula yabalega gale, tuajiya gusendesa gumona gifua gibawu gishigo luko nu ndando yavula. Hene gula tushigo luko muhana Nzambi mersi mukunda nu gibawu, yajiya gukhala gifua tuahaga kado gatuhanele muene ha fundo dimoshi dinyi tuajiyilego gugamona nga gugatangiza luko. Hagula ndaga ya luholo elu itubuilago, tudi naye gutangigiza lusugu nu lusugu ndaga jiagasue Nzambi nu Klisto akalegele mukunda nu esue. Longo edi diajiya gutukuatesa ha gumonesa khadilo diene. Tuza muzuelela gubonga tuana heta mukunda nu gibawu sendese mangino nu mu masugu adi muza. Tuza mumona nji ndaga tuajiya gutshita ha guhana Yehowa mersi mukunda nu guzumba guenji, muavula gubalega mu sungi ya Guwunguluga Gufua gua Yesu.

GUBONGA TUANA HETA MANGINO MUKUNDA NU GIBAWU

3. Luholo lutshi tuana heta gubonga gua gibawu sendese mangino?

³ Sendese mangino tuana heta gubonga gua gibawu gia mulambu wa Klisto. Ha gufezegesa, Yehowa wana gututotesela gubola mu njila ya gibawu. Anago gumushinjiga ha guyitshita, uvi muene hakhenji wana tshigina gututotesela. Muyimbi wa ngimbo wahanele Yehowa mersi mukunda nu khadilo dienji dia gutotesela. Wazuelele egi: ‘Yehowa aye udi muenya gisemo nu wakhala hehi ha gutotesela.’​—Ngi. 86:5; 103:3, 10-13.

4. Yehowa wahanele gibawu mukunda nu akhuatshi? (Luka 5:32; 1 Timote 1:15)

⁴ Athu ako ajiya gutangiza egi ashigo atagana hagula Yehowa a atotesele. Idi yadiago egi mukut’etu agasue tushigo athu atagana. Mupostolo Phaula wakotelesele egi muene nji gakhalelego ‘watagana ha gutamegewa egi mupostolo.’ Uvi wazuelele luko egi: “Ngudi mutshita mudimo owu handaga Nzambi wanguvidile khenda jiavula.” (1 Kol. 15:9, 10) Gula tuabalumuna mutshima mu gubola guetu, Yehowa wana gututotesela. Mukunda natshi tuazuela ngenyi? Yehowa ganago gututotesela handaga udi naye guyitshita, uvi wana guyikagala handaga wana gutuzumba. Gula udi muvua gikenene egi ushigo watagana hagula Yehowa agutotesele, wunguluga egi gahanelego gibawu mukunda nu athu atagana uvi wahanele gibawu mukunda nu enya gubola.​—Tanga Luka 5:32; 1 Timote 1:15.

5. Mukunda natshi tushigo naye guzuela egi Yehowa udi naye gututotesela gubola guetu?

⁵ Gushigo nga muthu mumoshi udi naye guzuela egi Yehowa udi naye gutuvila khenda, ngatshima tuabalegesa gale ivo yavula mu mudimo wenji. Idi yadiago egi Yehowa wana wunguluga ndaga jiagasue tuana tshita mukunda nu muene. (Heb. 6:10) Wahanele gibawu gia mun’enji gifua kado gagituhu, uvi gamuhanelego ha gutufuta mukunda nu ndaga jiabonga tuana gumukalegela. Hene ishigo ndaga yabonga ha gutangiza egi luholo tuana kalagala ndaga jiavula mu mudimo wa Yehowa, udi naye gututotesela. Gula tuatangiza ngenyi tuajiya gusendesa gumona gifua tushigo nu funu ya gibawu.​—Tala nji Galatiya 2:21.

6. Mukunda natshi Phaula wadihanele muavula mu mudimo wa Yehowa?

⁶ Phaula wakhalele mujiya egi ishigo ndaga jiakalegele muene mu mudimo wa Yehowa jiakhalele naye gutuma Yehowa ha gumutotesela. Na mukunda natshi giwa Phaula wadihanele muavula mu mudimo wa Yehowa? Wakhalele guwutshita ha guhana Yehowa mersi mukunda nu gisemo nu khenda jiamuvidile muene. (Ef. 3:7) Gifua Phaula tuana kalegela Yehowa nu gikhesa giagasue, tuanago guyitshita hagula atuvuile khenda, uvi tuana guyitshita ha gumuhana mersi.

7. Gubonga gutshi guko tuana heta mangino mu njila ya gibawu? (Roma 5:1; Yakoba 2:23)

⁷ Gubonga guko tuana heta mu gibawu mangino gudi egi, gibawu giajiya gutukuatesa ha gukhala nu ufuta wabonga nu Yehowa.a Gifua luholo tuayimonyi mu longo diabalega, tangua tuana vualewa tuanago gukhala nu ufuta nu Nzambi. Uvi mu njila ya gibawu tuajiya gukhala mu “guhuima nu Nzambi” nu gukuata n’enji ufuta wakola.​—Tanga Roma 5:1; Yakoba 2:23.

8. Mukunda natshi tudi muhana Yehowa mersi mukunda nu luendu lua gutshita gisambu?

⁸ Ufuta wetu nu Yehowa wana gutuhana luendu lua gutshita gisambu. Yehowa ganago guvua phamba isambu tuana tshita tangua tuana gudibungisa nu athu ako, uvi wana guvua nji isambu ya muthu wagasue mukatshi dietu. Gisambu giajiya gutukuatesa ha gutuna gudisagesa muavula, uvi gudi nji nu gubonga guko guavula tuajiya guheta. Gisambu giajiya nji gukolesa ufuta wetu nu Nzambi. (Ngi. 65:2; Yak. 4:8; 1 Yone 5:14) Hakhalele Yesu ha mavu wakhalele mutshita gisambu mbala jiavula, handaga wakhalele mujiya egi Yehowa wakhalele gumutegelela, isambu yene nji yakhalele mukolesa ufuta wenji nu Sh’enji. (Luka 5:16) Tudi muhana Yehowa mersi yavula, handaga mu njila ya mulambu wa Yesu tuajiya gukuata n’enji ufuta nu guta n’enji maga mu gisambu!

GUBONGA TUAJIYA GUHETA MU MASUGU ADI MUZA MUKUNDA NU GIBAWU

9. Gubonga gutshi akombeledi a Yehowa agujinginyina mbaaheta mu masugu adi muza mu njila ya gibawu?

⁹ Gubonga gutshi akombeledi a Yehowa agujinginyina mbaaheta mu masugu adi muza mu njila ya gibawu? Mbaaheta monyo wa ivo nu ivo. Athu avula ana tangiza egi ndaga yene yajiyilego gukalegewa, handaga athu ana gufua gale sendese mualeha. Sendese gu gisendeselo felela dia Yehowa diakhalele egi athu akhale nu monyo wa ivo nu ivo. Gula nga Adama akalegelego gubola nga gushigo nu muthu wajiya gutangiza egi athu ajiyilego gukhala nu monyo ivo nu ivo, handaga athu agasue akhalele naye gujinga mayilago. Ikhale mangino idi lamba ha gutangiza egi tuajiya gujinga mayilago, Yehowa wahanele Mun’enji munu gana zumba muavula ha gutagenesa ndaga yene.​—Roma 8:32.

10. Mu ndaga jitshi Aklisto ambiwe maji mu nyuma nu imeme iko ana tangiza?

¹⁰ Ngatshima monyo wa ivo nu ivo idi gubonga mbatuheta mu masugu adi muza, uvi Yehowa udi mutshigina egi tutangigize gubonga guene sendese mangino. Aklisto ambiwe maji mu nyuma ana tangiza monyo mbaakhala nawo mu dilu tangua mbahinyina mavu nu Klisto. (Gumo. 20:6) Imeme iko yana tangiza monyo mbaakhala nawo ha mavu tangua Nzambi mbawukatula malamba nu gikenene. (Gumo. 21:3, 4) Wana khala nu felela dia gujinga mayilago ha mavu ba? Idi diago felela diabonga, handaga Yehowa wafugile athu ha gujinga mayilago ha mavu. Monyo wa mayilago ha mavu mbawutusuanguluisa diago muavula.

11-12. Gubonga gutshi mbatuheta mu Phaladiso tuajiya gusendesa gutangiza sendese mangino? (Tala nji ifuanesa.)

¹¹ Tangiza monyo mbawukhala nawo mu phaladiso ha mavu. Mbawudisagesago luko mukunda nu misongo nga gufua. (Yesh. 25:8; 33:24) Yehowa mbawuguhana ima yagasue yabonga udi nayo funu. Ndaga itshi wana tshigina gulonguga? Yajiya gukhala egi wana tshigina gujiya ndaga jiavula jiatadila shitu, nga gulonguga luholo lua gukalegela gima gimoshi gia gushigila miziki, nga ndo wana tshigina gulonguga luholo lua gulonda ifuanesa. Idi yadiago egi mu mavu ahe-ahe mbaakhala nu funu ya athu ana tshita ba plan a jinzo (architectes), nu athu ana tunga jinzo nu athu ana dima mahia. Athu mbaakhala nji nu funu ya ukuateshi mu ndaga gifua, gulonda ima ya gudia, gulonda ikadigilo iko nu gubamba mavu hagula alandule gukhala abonga. (Yesh. 35:1; 65:21) Tangua mbawujinga mayilago, mbawukhala nu tangua dia gukalagala ndaga eji jiagasue nu ndaga jiko muabonga diago.

¹² Mbatukhala nu gusuanguluga guavula ha guyamba athu afile anyi mbaafuzumuga! (Makal. 24:15) Tangiza gusuanguluga mbawukhala nago tangua mbawulonguga ima yavula yafugile Yehowa. (Ngi. 104:24; Yesh. 11:9) Tangiza nji gusuanguluga mbatukhala nago tangua gubola mbaguhua, nu mbatukhadigo luko mutoga Yehowa ha gututotesela mukunda nu gubola guetu! Mbawutuna gaye gungina mu Phaladiso mukunda nu gusuanguluga gua “tangua diazonda mu ndaga jiabola” ba? (Heb. 11:25) Ishigo ngenyi! Ishimbigo mbatuheta mu mavu ahe-ahe mbayikhala yabonga gubalega ima yagasue tuajiya guheta ha mavu awa abola. Tujimbilago egi Phaladiso ishigo nzoji. Mbayitagenesewa diago. Idi yadiago egi ndaga yene mbayitagenesewa diago handaga Yehowa wana gutuzumba muavula nu wahanele Mun’enji ha gufua mukunda nu esue!

NDAGA TUAJIYA GUTSHITA HA GUHANA YEHOWA MERSI MUKUNDA NU GUZUMBA GUENJI

13. Ndaga jitshi tuajiya gutshita ha guhana Yehowa mersi mukunda nu guzumba guatumonesele muene? (2 Kolinto 6:1)

¹³ Ndaga jitshi tuajiya gutshita ha guhana Yehowa mersi mukunda nu gibawu? Tuajiya gumuhana mersi gula tudi musha mudimo wenji ha fundo dia thomo mu monyo wetu. (Mat. 6:33) Idi yadiago egi Yesu wafile “hagula athu adi nu monyo, akhadigo luko nu monyo mukunda nu ene hakhawo, uvi akhale nu monyo mukunda nu muthu wafuile mukunda nu ene nu wafuzumuiwe.” (2 Kol. 5:15) Idi yadiago egi tushigo mutshigina gumonesa egi tuanago guzula nu ndando ndaga jiana tuma Yehowa ha gutuvila khenda jiavula.​—Tanga 2 Kolinto 6:1.

14. Luholo lutshi tuajiya gushila utuameji wa Yehowa mutshima?

¹⁴ Tuajiya nji guhana Yehowa mersi mukunda nu guzumba guatumonesele muene, gula tudi gumushila mutshima nu tudi mulandula utuameji wenji. Luholo lutshi? Tuajiya guyimonesa mu badesizio tudi muzula. Ha gufezegesa, tuajiya gudihula gula mbatutshita makhalasa aleha-leha nga gula mudimo utshi mbatutomba ha gutshita, tudi naye gukamba gujiya matangi a Yehowa mukunda nu ndaga jiene. (1 Kol. 10:31; 2 Kol. 5:7) Gula tudi muzula badesizio adi mumonesa egi tuana gusha gutshigina gudi Yehowa, gutshigina guetu nu ufuta wetu nu muene mbawukola. Felela dietu nji mbadikola.​—Roma 5:3-5; Yak. 2:21, 22.

15. Luholo lutshi tuajiya gumonesa egi tudi muhana Yehowa mersi mu sungi ya Guwunguluga Gufua gua Yesu?

¹⁵ Gudi nji nu ndaga jiko tuajiya gutshita ha gumonesa egi tuana hana Yehowa mersi mukunda nu guzumba guatumonesele muene. Ha gufezegesa, mu sungi ya Guwunguluga Gufua gua Yesu, tuajiya gudihana muavula mu mudimo wa Yehowa ha gumonesa egi tudi gumuhana mersi mukunda nu gibawu. Tangua tudi gudilondega mukunda nu gudibungisa gua Guwunguluga Gufua gua Yesu, tuajiya nji gutamega athu ako. (1 Tim. 2:4) Kotelesela athu udi mutamega ndaga mbajikalegewa mu gudibungisa guene. Gula luholo ludi guene wajiya nji guatalesa video, Mukunda Natshi Yesu Wafuile? nu video, Guwunguluga Gufua gua Yesu mu jw.org. Akulu adi naye gutamega aphangi anyi alebele gale mu nyuma. Tangiza gusuanguluga mbagukhala mu dilu nu ha mavu gula gimeme gimoshi giatotele giavutugila Yehowa! (Luka 15:4-7) Mu gudibungisa gua Guwunguluga Gufua gua Yesu, tushigo naye gumenega phamba aphangi’etu Aklisto tuana jiya gale, uvi tudi naye nji gumenega athu ahe-ahe nu aphangi abembele gale guza mu gudibungisa. Tudi naye guamonesa egi tuasuanguluga luholo aza mu gudibungisa guene!​—Roma 12:13.

16. Mukunda natshi tudi naye gudihana muavula mu mudimo wa gulongesa mu sungi ya Guwunguluga Gufua gua Yesu?

¹⁶ Wajiya gudihana muavula mu mudimo wa Yehowa mu sungi ya Guwunguluga Gufua gua Yesu ba? Gutshita ngenyi gudi ndaga yabonga ha gumonesa egi, tudi muhana Nzambi nu Klisto mersi mukunda nu ndaga jiagasue akalegele mukunda nu esue. Gula tudi gudihana muavula mu mudimo wa gulongesa, mbatumona luholo Yehowa mbawutukuatesa nu mbatukolesa gutshigina guetu gudi muene. (1 Kol. 3:9) Tshita ngolo ha gulandula programe ya lutango lua Biblia mu sungi ya Guwunguluga Gufua gua Yesu idi mu Examinons les Écritures chaque jour nga mu galuanda gana khala mu mukanda wa gukalegela mu gudibungisa. Wajiya nji gukalegela verse jiene mu gulonguga guaye hakhaye.

17. Itshi yana suanguluisa diago Yehowa? (Tala galuanda: “Ndaga Wajiya Gutshita ha Guhana Yehowa Mersi Mukunda nu Guzumba Guenji.”)

¹⁷ Yajiya gukhala egi, ndaga jia monyo waye jishigo guguhana njila ha gutshita ndaga jiagasue tuazuelela mu longo edi. Uvi ujimbilago egi Yehowa ganago gufuanesa ndaga wana tshita nu jinyi athu ako ana tshita, wana tala ndaga jidi mu mutshima waye. Wana suanguluga nji muavula tangua diana gugumona muene muhana mersi mukunda nu gibawu, handaga gidi kado gandando gatuhanele muene.​—1 Sam. 16:7; Mako 12:41-44.

18. Mukunda natshi tuana hana Yehowa Nzambi nu Yesu Klisto mersi?

¹⁸ Idi yadiago egi phamba mu njila ya gibawu Yehowa wana gututotesela gubola, tuajiya gukuata n’enji ufuta nga gukhala nu felela dia gujinga mayilago. Tulandulenu guhana Yehowa mersi mukunda nu guzumba guenji, handaga guene guamutumine ha gutuhana ima eyi ya ndando. (1 Yone 4:19) Tulandulenu nji guhana Yesu mersi, handaga muene nji watuzumbile muavula hene wahanele monyo wenji mukunda nu esue!​—Yone 15:13.