LONGO DIA 13
LUNGIMBO 4 “Yehowa Udi Mubambi Wami”
Koko dia Yehowa Diana Khalago dia Hihia
“Koko dia Yehowa didi dia hihia ba?”—LUTANG. 11:23.
MU GUHIHIA
Longo edi diza gutukuatesa ha gusha diago mutshima egi Yehowa mbawulandula gutuhana ima yagasue tudi nayo funu.
1. Luholo lutshi Moize wamonesele egi wakhalele mushila Yehowa mutshima hatuamezele muene enya Isalele ha guzoga gu Ejipitu?
MUKANDA wa Hebelu wana zuelela athu avula anyi akhalele nu gutshigina gudi Yehowa; Moize wakhalele nji mukatshi dia athu ene, wakhalele nu gutshigina guakola diago. (Heb. 3:2-5; 11:23-25) Wamonesele gutshigina guene hatuamezele muene enya Isalele ha guzoga gu Ejipitu. Gavilego woma wa Farao nu masuta enji. Washile mutshima gudi Yehowa, watuamezele athu hazawugile ene Kianga Giabenga nu mu mavu a luselenga. (Heb. 11:27-29) Enya Isalele avula abembele gushila Yehowa mutshima, uvi Moize walanduile gumushila mutshima. Yehowa washimbigile gutshigina guenji, wahanele athu ima ya gudia nu meya mu mavu a luselenga.a—Guz. 15:22-25; Ngi. 78:23-25.
2. Mukunda natshi Nzambi wahudile Moize egi: “Koko dia Yehowa didi dia hihia ba”? (Lutango 11:21-23)
2 Moize wakhalele nu gutshigina guakola gudi Yehowa, uvi givo gimoshi gungima dia guzola enya Isalele gu Ejipitu, wasendesele gudihula gula Yehowa mbawuhana diago athu mbiji gifua mualayele muene. Moize gakhalelego mujiya gula Yehowa mbawuhana diago athu avula akhalele mu mavu a luselenga mbiji inyi ajiya gudia akutshi. Yehowa wamuhudile egi: “Koko dia Yehowa didi dia hihia ba?” (Tanga Lutango 11:21-23.) Mbimbi “koko dia Yehowa” azuelela mu verse eyi idi mukotelesa nyuma ya Nzambi nga ngolo jienji. Yakhalele gifua Yehowa udi muhula Moize egi: ‘Udi mutangiza diago egi ngajiyilego gutshita ndaga ngalayele ba?’
3. Mukunda natshi lumene lua Moize nu enya Isalele ludi nji gututadila?
3 Wadihudile gale gula Yehowa wajiya gutaganesa nzala jiaye nu enya fami yaye ba? Ikhale wadihudile gale ngenyi nga ndo, tutadilenu gishina Moize nu enya Isalele atunyile gushila Yehowa mutshima egi mbawutagenesa nzala jiawo. Tuza nji mumona verse jia Biblia jiajiya gutukuatesa ha gusha mutshima egi koko dia Yehowa dishigo dia hihia.
ZULA MALONGO MU GIFEZEGESELO GIA MOIZE NU ENYA ISALELE
4. Itshi yatumine athu avula ha gutangiza egi Yehowa mbagashigo guakuatesa?
4 Mukunda natshi enya Isalele avula asendesele gutangiza egi Yehowa mbagashigo guakuatesa? Enya Isalele nu “athu ako avula” anyi akhalelego enya Isalele akalegele masugu avula mu mavu a luselenga hakatugile ene gu Ejipitu ha guya mu Mavu a Gutendelela. (Guz. 12:38; Mikh. 8:15) Athu anyi akhalelego enya Isalele akhalele nu ngina ya gudia ima iko handaga gudia mana guaasegele, nu ene enya Isalele asendesele nji gudididila. (Lutang. 11:4-6) Asendesele gutangiza ima ya gudia akhalele nayo gu Ejipitu. Luholo athu akhalele gudidila Moize, Moize watangijile egi muene wakhalele naye guahana ima ya gudia mu ngolo jienji hakhenji.—Lutang. 11:13, 14.
5-6. Longo ditshi tuajiya guzula mu luholo enya Isalele alanduile khadilo diabola dia athu ako?
5 Athu anyi akhalelego enya Isalele akhalelego nu khadilo dia guhana Yehowa mersi mukunda nu ima yaahanele muene, enya Isalele alanduile nji khadilo diene. Ndaga ya luholo elu yajiya nji gutubuila. Gula athu tuana khala nawo ashigo nu khadilo dia guhana mersi, esue nji tuajiya gulandula khadilo diene nu gutuna guhana Yehowa mersi gu ima yana gutuhana muene. Tuajiya gusendesa gutangiza ima tuakhalele nayo thomo nga guvuila ima ya athu ako ginjiongo. Uvi tuajiya gukhala nu gusuanguluga gula tudi musuanguluga nu ima tuana khala nayo.
6 Enya Isalele akhalele naye guwunguluga egi Nzambi waalayele egi gula aheta mu Mavu a Gutendelela, muene mbawahana ima yavula. Laji diene diakhalele naye gutagenesewa mu Mavu a Gutendelela, uvi ishigo mu mavu a luselenga. Luholo lumoshi nji, ha fundo dia gutangiza ima tushigo nayo mu mavu awa abola, tudi naye gusha mutshima mu ndaga jiatulayele Yehowa ha gutuhana mu mavu ahe-ahe. Tudi naye nji gutangigiza verse jia Biblia jiajiya gutukuatesa ha gukolesa gutshigina guetu gudi Yehowa.
7. Mukunda natshi tudi naye gusha mutshima egi koko dia Yehowa dishigo dia hihia?
7 Wajiya gudihula egi mukunda natshi Nzambi wahudile Moize egi: “Koko dia Yehowa didi dia hihia ba?” Yehowa wakhalele mutshigina gukuatesa Moize ha gukotelesa egi koko dienji didi nu ngolo jiavula nu wajiya nji gukalegela ngolo jienji mu mafundo agasue. Nzambi wakhalele nu luholo lua guhana enya Isalele mbiji yavula diago ikhale akhalele gawo mu mavu a luselenga. Wamonesele egi “mu ngolo jienji jiavula,” wakhalele nu luholo lua gukuatesa athu enji fundo diagasue diakhalele ene. (Ngi. 136:11, 12) Hene, gula tudi mutagana nu lamba, tudi naye gusha mutshima egi koko dia Yehowa diajiya gutukuatesa fundo diagasue tudi.—Ngi. 138:6, 7.
8. Itshi tudi naye gutshita ha gutuna gubua mu muheto wabuile athu avula mu mavu a luselenga? (Tala nji gifuanesa.)
8 Yehowa watagenesele laji dienji; wahanele athu tumbangu tuavula ha gudia. Uvi enya Isalele ahanelego Nzambi mersi mukunda nu ndaga ya gushimana yakalegele muene. Uvi athu avula mukatshi diawo akhalele nu ngina hene akuatele tumbangu tuavula gubalega. Akuatele tumbangu tuavula diago phipha ya mudidi nu lusugu lualanduile lua mudidi. Yehowa wavuidile athu akhalele nu “ngina yakola ya guheta ima yabonga ya gudia” khabu, waahanele nji ndola. (Lutang. 11:31-34) Longo ditshi tuajiya guzula mu gifezegeselo giawo? Tudi naye gutshita yagasue ha gutuna gubua mu muheto wa ngina. Ikhale tudi enya umonyi nga ndo, tudi naye gutshita yagasue ha ‘gubambela umonyi wetu mu dilu,’ yakotelesa egi tudi naye gukolesa ufuta wetu nu Yehowa nu Yesu. (Mat. 6:19, 20; Luka 16:9) Gula tuatshita ngenyi, tuajiya gusha mutshima egi Yehowa mbawutukuatesa.
Khadilo ditshi athu avula akhalele nadio mu mavu a luselenga? Longo ditshi tuajiya guzula mu lumene elu? (Tala paragrafe 8)
9. Mu ndaga itshi tuajiya gushila Yehowa mutshima?
9 Yehowa wana khala hehi ha gukuatesa akombeledi enji mangino. Uvi ishigo mukotelesa egi tuajiyilego gutotesa ima tuana khala nayo nga guvua nzala.b Tudi naye gusha mutshima egi Yehowa mbagatubembigo nga hazonda. Mbawutukuatesa mu malamba agasue tudi mutagana nawo. Luholo lutshi tuajiya gumonesa egi tudi mushila Yehowa mutshima? Tutadilenu ndaga mbadi: 1) gula tudi nu lamba dia makuta, nu 2) gula tudi gudisagesa mu luholo mbatuheta makuta gula tuabua athu a gukola.
GULA TUDI NU LAMBA DIA MAKUTA
10. Malamba atshi tuajiya gutagana nawo?
10 Gisugishilo gia mavu awa giasuena hehi, tudi naye gujiya egi mbatutagana diago nu lamba dia makuta. Ndaga jia politike, ita, malamba a gisagumuisa nga misongo ya gisambugila yajiya gutshita egi tutotesa makuta etu, mudimo wetu, ima yetu nga jinzo jietu. Ndaga eji jiagasue jiajiya gututuma ha gukamba mudimo uhe-uhe nga gukamba guya mu dimbo diko nu enya fami yetu hagula tuajiya guheta ima yajiya guakuatesa. Itshi yajiya gutukuatesa ha guzula badesizio adi mumonesa egi tudi mushila Yehowa mutshima?
11. Itshi yajiya gugukuatesa gula udi nu lamba dia makuta? (Luka 12:29-31)
11 Ndaga ya thomo udi naye gukalagala idi guwambela Yehowa lamba diene mu gisambu. (Ish. 16:3) Mutoge ndunge jiajiya gugukuatesa ha guzula badesizio abonga nu ha gubemba “gudisagesa muavula” mukunda nu ndaga yene. (Tanga Luka 12:29-31.) Landula gumutoga ha gugukuatesa ha gusuanguluga nu ima udi nayo. (1 Tim. 6:7, 8) Kamba malongo mu mikanda yetu ha gujiya luholo wajiya gulua nu lamba diene. Athu avula ana zuela egi bavideo nu malongo adi mu jw.org aakuatesele tangua atagenele nu lamba dia makuta.
12. Mihu itshi Muklisto wajiya gudihula gula udi mutshigina guzula desizio diabonga mukunda nu fami yenji?
12 Athu avula atshiginyile midimo yaatumile ha guya gualeha nu enya fami jiawo, uvi gungima akotelesele egi yakhalele desizio diabola. Gutuama dia gutshigina mudimo umoshi, ushigo naye gutala phamba makuta mbawuheta, uvi tala nji gula mudimo wene mbawugukuatesa nu enya fami yaye ha gukhala nu ufuta wakola nu Yehowa. (Luka 14:28) Dihule egi: ‘Itshi yajiya gubua mu ulo wami gula ngudi gualeha nu mukaji’ami nga nu mulumi’ami? Mbangukhala nu tangua dia guya mu gudibungisa, mu mudimo wa gulongesa nga gubalegesa tangua nu aphangi a mu hungu ba?’ Gula udi nu ana, dihule nji egi: ‘Luholo lutshi mbangusasa an’ami “mu malongo nu mu mikhuala ya Yehowa” gula ngudi gualeha nawo?’ (Ef. 6:4) Tangua udi muzula desizio, kamba malongo a Yehowa uvi ulandulago malongo a enya fami nga mafuta anyi anago gutumagela Yehowa.c Phangi Tony wana khala gu Asie occidentale, wahetele ba okazio avula a gukalagala midimo yabonga uvi yakhalele mutoga egi aye mu gifutshi giko. Wakalegele gisambu, watele nji maga nu mukaji’enji mukunda nu ndaga yene, gungima watunyile midimo yene nu azudile desizio dia gukalegela makuta akhalele nawo mu luholo luabonga nu gutuna gutshita badepanse avula-vula. Mangino, phangi Tony udi muzuela egi: “Ngana khala nu luendu lua gukuatesa athu avula ha gujiya Yehowa, an’etu nji ana suanguluga muavula nu giamatshidia. Fami yetu yakotelesele gale egi gula tudi mukalagala ndaga gifua luholo Matayo 6:33 yana guyimonesa, Yehowa mbawutukuatesa diago.”
GULA TUDI GUDISAGESA MU LUHOLO MBATUHETA MAKUTA GULA TUABUA ATHU A GUKOLA
13. Itshi tuajiya gutshita sendese mangino ha gudikuatesa gula tuabua athu agukola?
13 Tuajiya nji gumonesa egi tuana shila Yehowa mutshima tangua tudi mukamba gulondega luholo monyo wetu mbawukhala gula tuabua athu a gukola. Biblia yana gutuwambela egi tudi naye gutshita mudimo wakola ha guheta ima yajiya gutukuatesa mu masugu adi muza. (Ish. 6:6-11) Gula luholo ludi guene, tudi naye gukhala nu khadilo dia gubamba makuta ajiya gutukuatesa mu masugu adi muza. Makuta ajiya gutukuatesa mu tangua dia lamba. (Mulo. 7:12) Uvi tushigo naye gusha makuta ha fundo dia thomo mu monyo wetu.
14. Luholo lutshi mukanda wa Hebelu 13:5 wajiya gutukuatesa ha gutuna gudisagesa muavula?
14 Yesu wahanele gifezegeselo gidi mumonesa egi gula muthu udi muvudisa umonyi wenji uvi “gu meso a Nzambi gashigo muenya umonyi,” udi diago muthu waheya. (Luka 12:16-21) Gushigo nu muthu udi mujiya ndaga yajiya gumubuila hamene. (Ish. 23:4, 5; Yak. 4:13-15) Tuana tagana nu malamba avula handaga tudi alandudi a Klisto. Yesu wazuelele egi tudi naye gukhala hehi ha ‘gubemba’ ima yetu yagasue ha gukhala alandudi enji. (Luka 14:33) Mu siekle ya thomo, Aklisto a gu Yudea atshiginyile gutotesa ima yawo nu gusuanguluga guagasue. (Heb. 10:34) Mangino nji, aphangi avula atotesele midimo yawo handaga atunyile guhana mago mu ndaga jia politike. (Gumo. 13:16, 17) Itshi yaakuatesele? Ashile mutshima mu ndaga yazuelele Yehowa egi: “Ame mbangugutunyigo nga hazonda nu mbangugubembigo nga hazonda.” (Tanga Hebelu 13:5.) Tuana tshita yagasue ha gubamba makuta ajiya gutukuatesa gula tuabua athu a gukola; tuana gusha nji mutshima egi Yehowa mbawutukuatesa gula ndaga imoshi yatubuila mu gisagumuisa.
15. Matangi atshi mvuaji jidi Aklisto adi naye gukhala nawo mukunda nu an’awo? (Tala nji gifuanesa.)
15 “Mu mafundo avula, mvuaji jiana vuala ana hagula ajiya guakuatesa gula abua athu a gukola.” Uvi Biblia yana zuela egi mvuaji jidi naye gutagenesa nzala jia an’awo. (2 Kol. 12:14) Yadiago, mvuaji jiajiya gukhala nu funu ya ukuatesa gula abua athu a gukola, ana avula nji ana khala nu gusuanguluga ha gukuatesa mvuaji jiawo. (1 Tim. 5:4) Uvi mvuaji jiana shila Yehowa mutshima jiana kotelesa egi ha gukhala nu gusuanguluga guavula, adi naye gukuatesa an’awo ha gubua akombeledi a Yehowa uvi ishigo gutuma an’awo ha gudishila mafelela anyi mbaahana makuta avula ha guakuatesa gula abua athu a gukola.—3 Yone 4.
Yala nu mukaji’enji adi mutadila malongo a Biblia gutuama dia guzula badesizio, gifua guvula gua ana mbaavuala (Tala paragrafe 15)d
16. Luholo lutshi mvuaji jiajiya gukuatesa an’awo ha gujiya luholo lua gukamba makuta ajiya gudikuatesa nawo mu masugu adi muza? (Efeso 4:28)
16 Tangua udi mukuatesa an’aye ha gujiya luholo ajiya gudikuatesa mu masugu adi muza, amonese nji egi wana shila Yehowa mutshima. Hadi ene ana azonda, akuatese ha gujiya egi gutshita mudimo wakola gudi nu ndando. (Ish. 29:21; tanga Efeso 4:28.) Tangua adi mukula, akuatese ha gudihana muavula mu khalasa. Mvuaji jiajiya guzula malongo mu Biblia ajiya guakuatesa ha gusasa nu gukuatesa an’awo ha guzula badesizio abonga mu ndaga yatadila makhalasa adi naye gulonguga. Felela dia mvuaji didi naye gukhala dia gukuatesa an’awo ha gujiya luholo mbaadikuatesa mu masugu adi muza nu gudihana muavula mu mudimo wa gulongesa, nga gubua avundji a njila.
17. Desizio ditshi tudi naye guzula?
17 Akombeledi a Yehowa ana gusha mutshima mu ndaga jiana zuela muene egi mbawakuatesa. Tudi musuena diago gu gisugishilo gia mavu awa, tudi naye gujiya egi gutshigina guetu gudi Yehowa mbagulolewa. Ikhale tuatagana nu ndaga ya luholo lutshi, tushilenu Yehowa mutshima egi muene mbawutukuatesa mu ngolo jienji. Tudi naye nji gujiya egi koko dienji dia ngolo mbadilandula gutukuatesa fundo diagasue tudi.
LUNGIMBO 150 Kamba Nzambi Hagula Uhete Monyo
a Tala “Mihu Yana Guhula Athu Ana Gutanga Mikanda Yetu” mu Inzo Yaleha ya Mutaledi ya Octobre 2023.
b Tala “Mihu Yana Guhula Athu Ana Gutanga Mikanda Yetu” mu Inzo Yaleha ya Mutaledi ya 15 Septembre 2014 ya français.
c Tala longo “Personne ne peut servir deux maîtres” mu Inzo Yaleha ya Mutaledi ya 15 Avril 2014 ya français.
d UKOTELESHI WA GIFUANESA: Phangi wa yala nu mukaji’enji adi muta maga nu mun’awo wa mukhetu nu mulumi’enji adi mu mudimo wa gutunga Jinzo jia Ufumu.