LONGO DIA 40
LUNGIMBO 30 Mon Ami, mon Dieu, mon Père
Yehowa ‘Wana Kuatesa Athu adi nu Gikenene’
‘Wana kuatesa athu adi nu gikenene; wana saga phuta jiawo.’—NGI. 147:3.
NDAGA JIDI MU LONGO EDI
Yehowa wana kuatesa athu adi gudisagesa mu matangi. Mu longo edi tuza mumona luholo Yehowa wana gutukuatesa tangua tuana gudisagesa nu luholo wana gutukalegela ha gukuatesa athu ako.
1. Luholo lutshi Yehowa wana gudivua mukunda nu akombeledi enji?
NDAGA jitshi Yehowa wana mona tangua diana tala muene akombeledi enji adi ha mavu? Wana mona tangua tuana khala nu gusuanguluga nu tangua tuana gudisagesa. (Ngi. 37:18) Wana khala nu gusuanguluga tangua diana mona muene luholo akombeledi enji ana tshita yagasue ha gumukombelela ngatshima adi mutagana nu malamba avula! Ndaga ya ndando idi egi wana khala hehi ha gutukuatesa nu gutuhana gikhesa.
2. Luholo lutshi Yehowa wana kuatesa athu adi nu gikenene? Luholo lutshi tuajiya guheta gubonga gua ukuateshi wene?
2 Ngimbo 147:3 idi muzuela egi Yehowa ‘wana saga phuta’ jia athu adi nu gikenene. Mbimbi eji jidi mumonesa egi Yehowa wana kuatesa athu adi nu gikenene. Itshi tudi naye gutshita hagula Yehowa atukuatese? Tutadilenu gifezegeselo gigi. Munganga wajiya gutshita yagasue ha gusaga muthu wanamana ha guvua muabonga. Uvi hagula muthu muene avue muabonga, udi naye gutumagela malongo amuhanyi munganga. Mu longo edi tuza mumona ndaga Yehowa wana zuela mu mbimbi yenji mukunda nu athu adi gudisagesa mu matangi. Tuza nji mumona luholo tuajiya gukalegela malongo ene.
YEHOWA WANA GUTUWUNGULUISA EGI TUDI NU NDANDO YAVULA
3. Mukunda natshi athu ako ana gudimona gifua ashigo nu ndando?
3 Athu avula ha mavu awa anago guzumba athu ako,ndaga yene yana tshita egi athu ako adimone gifua ashigo nu ndando. Phangi Helena wazuelele egi: “Ngakudile mu fami inyi athu akhalelego gudizumba. Tata wetu wakhalele muenya khuta nu wakhalele gunguwambela lusugu nu lusugu egi ngushigo nu ndando.” Yajiya gukhala egi wadivile gale egi ushigo nu ndando tangua muthu mumoshi wagusagesele nga ndo waguseguluile muavula. Gula idi ngenyi yajiya gukhala lamba gudi aye ha gutshigina egi gudi nu muthu wana guguzumba.
4. Ha gutadila Ngimbo 34:18, Ndaga itshi Yehowa udi gutulaya?
4 Ikhale athu ako agukalegele ndaga jiabola, uvi khala musha mutshima egi Yehowa wana guguzumba nu wana guguzula nu ndando. Wana ‘khala hehi nu athu adi nu gikenene.’ (Tanga Ngimbo 34:18.) Gula udi ‘gudisagesa’ ujimbilago egi Yehowa wamonele makalegelo aye abonga hene agunanele gudi muene. (Yone 6:44) Udi hehi ha gugukuatesa handaga wana guguzula nu ndando yavula.
5. Longo ditshi tuajiya guzula mu luholo Yesu wakhalele mukalagala ndaga gudi athu anyi akhalele gudimona gifua ashigo nu ndando?
5 Tuajiya gujiya luholo Yehowa wana gudivua gula tuatadila gifesegeselo gia Yesu. Ha gufezegesa, tangua Yesu wakhalele ha mavu, wakhalele mumonesa gisemo gudi athu anyi akhalele gudimona gifua ashigo nu ndando, handaga athu ako akhalelego guazula nu ndando. (Mat. 9:9-12) Tangua mukhetu mumoshi wakhalele mukata misongo yakola wakuatele mulele wa Yesu, washile mutshima egi udi muhuluishiwa. Yesu wamuhanele gikhesa nu wamushimanele mukunda nu gutshigina guenji. (Mako 5:25-34) Yesu walanduila diago gifezegeselo gia She’nji. (Yone 14:9) Hene sha mutshima egi Yehowa wana guguzula nu ndando nu wana mona makalegelo aye abonga nu gutshigina guaye nu guzumba guaye mukunda nu muene.
6. Itshi wajiya gutshita gula udi mutangiza egi ushigo nu ndando?
6 Itshi wajiya gutshita gula udi gudimona gifua ushigo nu ndando? Khala mutanga verse jia Biblia jidi mumonesa egi Yehowa wana guguzula nu ndando, khala nji mutangigiza verse jiene.b (Ngi. 94:19) Gula ushigo mutagenesa felela dimoshi ngenyi nga waleba muila handaga ushigo mutshita ndaga luholo athu ako adi mutshita, ukhadigo gudisagesa muavula. Jiya egi Yehowa ganago gugutoga ha gutshita ndaga jiavula gubalega jinyi wajiyilego gutshita. (Ngi. 103:13, 14) Gula muthu mumoshi wagukalegela ndaga imoshi yabola, ukhadigo mutangiza egi idi gubola guaye! Ujimbilago egi Yehowa mbawusophesa athu adi mukalegela ako gubola, uvi mbawukuatesa athu adi mukalegewa gubola. (1 Phet. 3:12) Tangua Sandra wakhalele mona wazonda muthu mumoshi wabungishile n’enji muila gu ngolo. Sandra udi muzuela egi: “Ngana toga Yehowa ha gungukuatesa ha gumona makalegelo abonga anyi ana mona muene gudi ame.”
7. Luholo lutshi ndaga tuataganele najio mu masugu abalega jiajiya gutukuatesa mu mudimo wa Yehowa?
7 Yadiago Yehowa wajiya gugukalegela ha gukuatesa athu ako. Waguhanele luendu lua gukalagala n’enji hamoshi mu mudimo wa gulongesa. (1 Kol. 3:9) Gula aye nji wataganele gale nu malamba, mbayikhala yaleba ha gukotelesa luholo athu ako adi mutagana nu malamba adi gudivua. Wajiya gutshita ngolo ha guakuatesa. Phangi Helen tuazuelela gu thunda wahetele ukuateshi, mangino muene nji wana kuatesa athu ako. Wazuelele egi: “Ngakhalele mumona egi ngushigo nu ndando, uvi Yehowa wangumonesele guzumba nu wangukalegele ha gukuatesa athu ako.” Phangi Helen udi nu gusuangululuga ha gukalegela Yehowa gifua muvundji wa njila wa tangua diagasue.
YEHOWA WANA TSHIGINA EGI TUSHE MUTSHIMA EGI WANA GUTUTOTESELA
8. Ndaga itshi Yehowa udi gutuwambela mu mukanda wa Yeshaya 1:18?
8 Matemue a Yehowa ako ana gudisagesa muavula mukunda nu ndaga akalegele mu masugu abalega, yakotelesa egi ndaga akalegele gutuama dia gubatijiwa nga gungima dia gubatijiwa guawo. Uvi idi ndaga yabonga gula tudi muwunguluga egi Yehowa wahanele mulambu handaga wana gutuzumba muavula. Wana tshigina egi tusuanguluge nu kado gene. Yehowa udi gututshiginyisa egi gula ‘tuadivisa n’enji,’c mbagashigo luko muwunguluga gubola guetu. (Tanga Yeshaya 1:18.) Tudi muhana Yehowa mersi luholo luana gututotesela muene! Ganago nji gujimbila ndaga jiabonga tuakalegele.—Ngi. 103:9, 12; Heb. 6:10.
9. Ha fundo dia gudisagesa mukunda nu ndaga tuakalegele, mukunda natshi idi nu ndando ha gutshita yagasue ha gudihana mu ndaga tudi mutshita mangino nga jinyi mbatukalagala mu masugu adi muza?
9 Gula udi muvua gikenene mukunda nu ndaga wakalegele mu masugu abalega, tshita yagasue ha gudihana mu ndaga udi mutshita mangino nga jinyi mbawukalagala mu masugu adi muza. Tutadilenu gifezegeselo gia mupostolo Phaula. Wakhalele gudisagesa luholo luasagesele muene Aklisto muavula, uvi wajiyile egi Yehowa wamutotesele. (1 Tim. 1:12-15) Phaula walanduile gudisagesa mukunda nu gubola guakalegele muene mu masugu abalegele ba? Ndo. Gifua luholo luabembele muene gutangiza ndaga gatshitshile gutuama dia gubua mu Falese munu athu akhalele munemesa, wabembele nji gutangiza ndaga jiakalegele muene gutuama dia gubua Muklisto. (Fili. 3:4-8, 13-15) Phaula wakhalele mutshita ngolo ha gudihana mu mudimo wa gulongesa nu gutangiza gubonga mbagaheta mu masugu adi muza. Gifua mupostolo Phaula, wajiyilego gusombegesa ndaga wakalegele mu masugu abalega. Uvi wajiya gutumbuisa Yehowa nu gumusuanguluisa sendese mangino gula udi mutangiza gubonga mbawuheta mu masugu adi muza.
10. Itshi tuajiya gutshita gula ndaga tuatshitshile jiasagesele athu ako?
10 Wajiya nji gudisagesa mukunda nu ndaga jiabola watshitshile jinyi jiahanele athu ako lamba. Gula idi ngenyi, itshi yajiya gugukuatesa? Tshita yagasue ha gulondega mulonga wene, wajiya gutoga muthu muene ha gugutotesela. (2 Kol. 7:11) Toga nji Yehowa ha gukuatesa athu anyi wakalegele gubola. Wajiya gugukuatesa nu gukuatesa nji athu anyi wakalegele gubola ha gukolesela nu ha gukhala luko mu guhuima.
11. Malongo atshi tuajiya guzula mu gifezegeselo gia profete Yona? (Tala nji gidi holu dia gizula.)
11 Zula malongo mu ndaga jiabola watshitshile nu bemba egi Yehowa agukalegele mu luholo ludi mutshigina muene. Tutadilenu gifezegeselo gia profete Yona. Nzambi wamuwambelele ha guya gu Ninive uvi muene wayile guma guko. Yehowa wamuhanele ndola, muene nji wahetele malongo mu ndaga yene. (Yona 1:1-4, 15-17; 2:7-10) Hene Yehowa walanduile gumukalegela gifua profete. Nzambi wahanele luko Yona luendu lua guya gu Ninive, mu tangua diene watumagele. Yona gabembelego egi gubola guakalegele muene mu masugu abalega gumutume ha gutuna mudimo unu Yehowa wamuhanele.—Yona 3:1-3.
Tangua Yona wazogele mu vumo dia ishui, Yehowa wamuhanele luko luendu lua guya gu Ninive ha gulongesa Mbimbi yenji (Tala paragrafe 11)
YEHOWA WANA GUTUHANA GIKHESA MU NJILA YA NYUMA YENJI
12. Luholo lutshi Yehowa wana gutuhana guhuima tangua tudi mutagana nu malamba? (Filiphi 4:6, 7)
12 Yehowa wana gutuhana gikhesa mu njila ya nyuma yenji tangua tudi gudisagesa nga tangua tudi mutagana nu malamba. Tutadilenu gifezegeselo gia phangi Ron nu mukaji’enji Carol. Ataganele nu ndaga ya lamba, mun’awo wa yala wadishiyile. Adi muzuela egi: “Tuakhalele mutagana nu malamba uvi ndaga yene yakhalele lamba diakola diago. Mbala jiavula mu phipha tuakhalelego mubanda tulo uvi tuakhalele mutshita isambu, gungima tuahetele guhuima gudi muzuelewa mu mukanda wa Filiphi 4:6, 7.” (Tanga.) Gula udi mutagana nu ndaga imoshi idi gugusagesa mu matangi, wajiya guwambela Yehowa luholo udi gudivua tangua diagasue watshigina. (Ngi. 86:3; 88:1) Ubembigo gutoga Yehowa nyuma yenji. Gula watshita ngenyi, muene mbawugukuatesa.—Luka 11:9-13.
13. Luholo lutshi nyuma ya Yehowa yajiya gugukuatesa ha gulandula gumukombelela nu gujinginyina guagasue? (Efeso 3:16)
13 Wataganele gale nu ndaga imoshi ya lamba inyi yagulebesele muila ba? Gula idi ngenyi, jiya egi nyuma ya Yehowa yajiya gugukuatesa ha gulandula gumukombelela nu gujinginyina guagasue. (Tanga Efeso 3:16.) Tuzuelelenu gifezegeselo gia phangi Flora. Muene nu mulumi’enji akhalele mukalegela Yehowa hamoshi gifua ba misionere, uvi gungima mulumi’enji watshitshile uthambi, hene ashiyile ulo. Phangi Flora udi muzuela egi: “Ndaga yene yangusagesele muavula nu ngakhalelego guyijimbila. Ngatogele Yehowa ha gunguhana nyuma yenji hagula yingukuatese ha gukolesela. Yehowa wangukuatesele ha gukolesela mu ndaga inyi ngakhalele mumona gifua ngajiyilego gukolesela.” Phangi Flora wakotelesele egi Nzambi wamukuatesele ha gumushila mutshima egi gula watagana nu ndaga ya lamba muene mbawumukuatesa. Udi muzuela luko egi: “Mbimbi jidi mu Ngimbo 119:32 jidi gungutadila ame: ‘Mbangulandula njila nu mikhuala yaye nu gikhesa giagasue, handaga aye udi guyihagela fundo mu mutshima wami.’”
14. Luholo lutshi tuajiya gubemba egi nyuma ya Nzambi yitukuatese?
14 Luholo lutshi wajiya gukalagala ndaga mu gudivua nu isambu yaye tangua udi mutoga Yehowa ha guguhana nyuma yenji? Khala mukalagala ndaga jiajiya guhana nyuma ya Nzambi njila ha gugukuatesa. Ndaga jiene jidi guya mu gudibungisa nu gulongesa lukuma luabonga. Khala mutanga Mbimbi ya Yehowa lusugu nu lusugu nu gutangigiza ndaga udi mutanga. (Fili. 4:8, 9) Tangua udi mutanga Biblia, khala musonega ba eksperianse a athu adi muzuelewa mu Biblia anyi ataganele nu malamba; khala nji mutangigiza luholo Yehowa waakuatesele ha gukolesela. Phangi Sandra tuazuelela gu thunda wakhalele gudisagesa muavula handaga wakhalele mutagana nu malamba mu monyo wenji. Udi muzuela egi: “Lumene lua Yozefe luangukuatesele diago muavula. Gabembelego egi malamba nu ndaga jiabola gakhalele mutagana najio jibolese ufuta wenji nu Yehowa.”—Gis. 39:21-23.
YEHOWA WANA GUTUKUATESA MU NJILA YA APHANGI’ETU AKLISTO
15. Akhuatshi ajiya gutuhana gikhesa? Luholo lutshi ajiya guyitshita? (Tala nji gifuanesa.)
15 Tangua tuana tagana nu malamba, aphangi’etu Aklisto ajiya gutuhana “diago gikhesa muavula.” (Kol. 4:11) Yehowa wana gutumonesela guzumba guenji mu njila ya aphangi’etu a mala nu a akhetu. Aphangi’etu Aklisto ajiya gutuhana gikhesa tangua adi mubalegesa tangua hamoshi nu esue nu adi gututegelela muabonga tangua tudi guawambela luholo tudi gudivua. Ajiya gututangela verse ya Biblia ha gutuhana gikhesa nga gutshita gisambu hamoshi nu esue.d (Roma 15:4) Matangua ako, aphangi’etu Aklisto ajiya gutuwunguluisa luholo Yehowa wana kalagala ndaga, ngenyi yajiya gutukuatesa ha gulandula gukolesela mu malamba tudi mutagana nawo. Ajiya nji gutukuatesa nu ima tudi nayo funu, gifua ima ya gudia.
Mafuta tuana gushila mutshima anyi ana zumba Yehowa ajiya gutukuatesa nu gutuhana gikhesa (Tala paragrafe 15)
16. Itshi tudi naye gutshita hagula athu ako atukuatese?
16 Matangua ako tuajiya gutoga ukuateshi gudi aphangi’etu a mala nu a akhetu. Aphangi’etu ene ana gutuzumba nu ana gutshigina gutukuatesa. (Ish. 17:17) Uvi ajiyilego gujiya luholo tudi gudivua nu ndaga tudi najio funu. (Ish. 14:10) Hene gula udi gudisagesa mu matangi, wambela mafuta abonga luholo udi gudivua. Ajiya gujiya luholo lua gugukuatesa. Wajiya nji guwambela mukulu mumoshi nga mbadi anyi udi mumona egi ajiya gugukuatesa. Aphangi ako a akhetu amonele egi idi yabonga ha guta maga nu phangi muko wa mukhetu wa gukula mu nyuma.
17. Malamba atshi ajiya gutukanga njila ha guheta ukuateshi tudi nawo funu? Luholo lutshi tuajiya guabinga?
17 Ukhadigo gudikhalela hakhaye. Yadiago gula udi gudikhalela, mbawushigo mukhala luko nu gusuanguluga ha gubalegesa tangua hamoshi nu athu ako. Ngenyi aphangi ajiyilego gukotelesa luholo udi gudivua nga ndo ajiya guzuela ndaga jishigo gugusuanguluisa. (Yak. 3:2) Ubembigo egi malamba udi mutagana nawo agukange njila ha guheta ukuateshi udi nawo funu. Phangi Gavin udi mukulu, wakatele misongo ya matangi (dépression), udi muzuela egi: “Matangua avula ngakhalelego mutshigina guta maga nga gubalegesa tangua nu mafuta ami.” Uvi phangi muene watshitshile ngolo ha gubalegesa tangua hamoshi nu aphangi, gutshita ngenyi guamukuatesele ha gudivua muabonga. Phangi wa mukhetu Amy udi muzuela egi: “Luholo ngakhalele mutangiza ndaga ngakhalele mutagana najio, yakhalele lamba gudi ame ha gushila athu ako mutshima. Uvi ngalongugile ha guzumba nu gushila aphangi a mala nu a akhetu mutshima gifua luholo Yehowa wana tshita. Ngakotelesele egi gutshita ngenyi guana suanguluisa Yehowa muavula, guana gungubatela nji gusuanguluga.”
NDAGA JIALAYELE YEHOWA MUKUNDA NU MASUGU ADI MUZA JIANA GUTUHANA GIKHESA
18. Ndaga jitshi Yehowa mbawutshita mu masugu adi muza? Itshi tudi naye gutshita sendese mangino?
18 Tuajiya gusha mutshima egi gualeha ndo, Yehowa mbawumanesela ndaga jiagasue jidi gutubatela malamba mangino. (Gumo. 21:3, 4) Mu tangua diene, ndaga jiagasue jia lamba ‘mbajitujilago luko mu mutshima.’ (Yesh. 65:17) Gifua luholo tuayimonyi, Yehowa ‘wana saga phuta jietu’ sendese mangino. Tudi naye gutshigina maluholo Yehowa wana kalegela ha gutukuatesa nu gutshigina ukuateshi wene. Tudi naye gusha mutshima egi Yehowa ‘wana gudisagesa mukunda nu esue.’—1 Phet. 5:7.
LUNGIMBO 7 Yehowa udi Muhuluishi Wetu
a Mu longo edi majina ako asombegesewe.
c Ha ‘gudivisa nu Yehowa’ tudi naye gubalumuna mutshima nu gumutoga ha gututotesela gubola guetu, tudi naye nji gusombegesa makalegelo etu abola. Gula tuakalagala gubola guakoma, tudi naye guwambela akulu hagula atukuatese.—Yak. 5:14, 15.