Khala Mulongesa nu Gikhesa Gifua Yesu

1. Khadilo ditshi diana buisa akombeledi a Yehowa agudisha nu athu a ha mavu awa?

NDAGA yana buisa akombeledi a Yehowa agudisha nu athu a ha mavu awa ana zuela egi adi Aklisto, idi luholo ana longesa lukuma luabonga nu gikhesa giagasue. (Tito 2:14) Uvi matangua ako yajiya gukhala lamba ha gulongesa nu gikhesa. Yajiya gukhala egi wana gudivua gifua luholo mukulu mumoshi wana gudihana muavula mu midimo ya mu hungu; wazuelele egi: “Matangua ako ngana khalago nu nzala ya gulongesa.”

2. Mukunda natshi matangua ako yajiya gukhala lamba ha gulongesa nu gikhesa?

² Yajiya gukhala egi tuana suanguluga muavula ha gutshita ndaga jiko mu mudimo wa Yehowa gubalega gutshita mudimo wa gulongesa. Mukunda natshi? Handaga tangua tuana tunga nu gulonda Jinzo jia Ufumu nga gukuatesa aphangi adi mubuila malamba nu guahana gikhesa, tuana suanguluga muavula handaga tuana mona gubonga gua mudimo wene muphushi. Tangua tuana tshita mudimo wene hamoshi nu aphangi, tuana gudivua mu guhuima nu tuana gudimonesela nji guzumba handaga tuana jiya egi aphangi ana suanguluga nu mudimo tuana tshita. Yajiya gukhala egi tuana longesa mu terituare imoshi ivo yavula yabalega gale, uvi athu avula ashigo mutshigina giamatshidia. Nga ndo tuajiya gutagana nu athu anago gusuanguluga nu giamatshidia. Tudi mujiya nji egi luholo gisugishilo gia mavua awa giasuena hehi, tuajiya gutagana nu usageshi. (Mat. 10:22) Na itshi yajiya gutukuatesa ha gubamba nu gukudisa gikhesa gietu mu mudimo wa gulongesa?

3. Lumene ludi mu Luka 13:6-9 ludi gutulongesa itshi mukunda nu Yesu?

³ Tuajiya guzula malongo mu gifezegeselo gia Yesu ha gukhala nu gikhesa mu mudimo wa gulongesa. Hakhalele Yesu ha mavu, walanduile gutshita ngolo ha gulongesa lukuma luabonga. Idi yadiago egi gungima watshitshile luko mudimo wene muavula. (Tanga Luka 13:6-9.) Yesu wafuanesele mudimo wenji wa gulongesa nu mukunyi wa mbuto wakunyile mutshi wa figi, uvi mutshi wene watshitshile ivo thathu guhaga ndo mabundu. Luholo lumoshi muene nji wabalegesele ivo thathu nu gulongesa enya Yuda uvi avula mukatshi diawo atshiginyilego. Uvi gifua luholo mukunyi wa mbuto walanduile gudifelela egi mutshi wene mbawuhaga mabundu, Yesu nji walanduile gulongesa enya Yuda. Watshitshile ngolo ha guakuatesa ha gutshigina lukuma luabonga.

4. Ndaga jitshi nguana tuajiya gulonguga mu gifezegeselo gia Yesu?

⁴ Mu longo edi tuza muzuelela luholo Yesu wamonesele gikhesa mu mudimo wa gulongesa mu mbeji samano jia gisugishilo jia mudimo wenji ha mavu. (Tala note d’étude ya Luka 10:1 “Après cela.”) Gula tudi mulonguga ndaga jiazuelele Yesu nu jinyi jiakalegele muene mbayitukuatesa ha gukhala nu gikhesa. Tutadilenu ndaga nguana tuajiya gutshita ha gulandula gifezegeselo gia Yesu: 1) Wadihanele ha gutshita gutshigina gua Yehowa, 2) wakhalele mukotelesa nu gutshita ndaga mu gudivua nu profesi jia Biblia, 3) washile mutshima egi Yehowa mbawumukuatesa 4) wakhalele nu gutshigina egi athu ako mbaamutegelela.

WAKHALELE GUDIHANA HA GUTSHITA GUTSHIGINA GUA YEHOWA

5. Luholo lutshi Yesu wamonesele egi wakhalele musha gutshigina gua Nzambi ha fundo dia thomo?

⁵ Yesu wakhalele mulongesa “lukuma luabonga lua ufumu” nu gikhesa giagasue handaga wajiyile egi yakhalele gutshigina gua Nzambi. (Luka 4:43) Yesu wakhalele musha mudimo wa gulongesa ha fundo dia thomo mu monyo wenji. Ikhale gu gisugishilo gia mudimo wenji wa gulongesa wakhalele muya mu “membo akoma nu azonda ha gulongesa” lukuma luabonga. (Luka 13:22) Wahanele nji alandudi enji avula formation ha gulongesa lukuma luabonga n’enji.​—Luka 10:1.

6. Mu luholo lutshi mudimo wa gulongesa wana gudivua nu midimo iko tuana tshita? (Tala nji gifuanesa.)

⁶ Mangino Yehowa nu Yesu ana tshigina egi tushe mudimo wa gulongesa ha fundo dia thomo mu monyo wetu. (Mat. 24:14; 28:19, 20) Midimo yagasue tuana tshita mu ulondegi wa Yehowa yana khala mukunda nu gukuatesa mudimo wa gulongesa. Ha gufezegesa, tuana tunga jinzo jia Ufumu nga gukalagala mudimo gu Betele ha guhana mago mu mudimo wa gulongesa. Tuana kuatesa aphangi’etu ana buila malamba ha guvutugila luko ndaga jia mu nyuma nu gulongesa lukuma luabonga. Gula tudi mujiya egi mudimo wa gulongesa udi nu ndando yavula nu gujiya egi Yehowa wana gututoga ha gutshita mudimo wene, mbatukhala nu nzala ya gulongesa lukuma luabonga phoso nu phoso. Phangi János udi mukulu gu Hongrie udi muzuela egi: “Ngana jiya egi mudimo wa gulongesa udi nu ndando yavula mukatshi dia midimo ya Ufumu tuana kalagala, handaga wene mudimo wetu wa thomo.”

7. Mukunda natshi Yehowa wana tshigina egi tulandule gulongesa lukuma luabonga? (1 Timote 2:3, 4)

⁷ Tuajiya gukudisa gikhesa gietu mu mudimo wa gulongesa gula tudi mutadila athu luholo Yehowa wana guatadila. Wana tshigina egi athu avula ategelele lukuma luabonga nu alutshigine. (Tanga 1 Timote 2:3, 4.) Ha gutagenesa felela diene, Yehowa wana gutuhana formasio yana gutukuatesa ha gulongesa muabonga lukuma luabonga elu luana huluisa athu. Ha gufezegesa, gamukanda Zumba Athu​—Abuise Alandudi gana khala nu malongo ajiya gutukuatesa ha gusendesa guta maga nu athu nu felela dia guabuisa alandudi. Mangino athu ako ajiya gutuna gawo lukuma luabonga, uvi yajiya gukhala egi gutuama dia gisugishilo gia lamba diakola athu ene ajiya gutshigina lukuma luabonga. Yajiya gukhala egi mu masugu adi muza, mbaawunguluga ndaga tudi guawambela mangino nu mbaatshigina lukuma luabonga. Uvi athu ene ajiya gutshigina lukuma luene phamba gula tudi mulandula gulongesa.

WAKHALELE MUKOTELESA NU GUTSHITA NDAGA MU GUDIVUA NU PROFESI JIA BIBLIA

8. Profesi jitshi jia Biblia jiakuatesele Yesu ha gukalegela tangua dienji mu luholo luabonga?

⁸ Yesu wakhalele mujiya egi profesi jia Biblia mbajitagenesewa. Ha gufezegesa, wakhalele mujiya egi mudimo wenji wa gulongesa mbawutshita phamba ivo thathu nu ndambo. (Dan. 9:26, 27) Wakhalele nji mujiya profesi jiakhalele mumonesa tangua nu luholo mbalufua muene. (Luka 18:31-34) Luholo Yesu wakhalele mujiya ndaga mbajibua mu masugu adi muza, wakalegele tangua dienji mu luholo luabonga. Gishina giene walongesele lukuma luabonga nu gikhesa giagasue ha gumanesela mudimo wamuhanewe.

9. Luholo lutshi profesi jia Biblia jiana gututuma ha gulongesa nu gikhesa giagasue?

⁹ Gukotelesa profesi jia Biblia guajiya gututuma ha gulongesa lukuma luabonga nu gikhesa giagasue. Tudi mujiya egi gisugishilo gia mavu awa gia suena hehi. Tudi nji mujiya egi ndaga jidi mutshitshiwa ha mavu awa nu makalegelo a athu jidi mumonesa ndaga Biblia yazuelele mukunda nu masugu a gisugishilo. Tudi mumona luholo umbalagaji udi mukatshi dia Puissance mondiale anglo-américaine (Ngolo Jidi Muhinyina Mavu a Mudidi) nu Russie nu ifutshi yana guahana mago idi mutagenesa profesi yana zuelela fumu wa gu nord nu wa gu sud mu ‘masugu a gisugishilo.’ (Dan. 11:40) Tuana jiya nji egi Puissance mondiale anglo-américaine, idi mumonesa ikanzo ya gisongo idi muzuelewa mu mukanda wa Danyele 2:43-45. Tudi musha mutshima egi luholo profesi jidi guyimonesa, gualeha ndo Ufumu wa Nzambi mbawushiya ba guvernema a ana athu. Profesi eji jiagasue jidi mumonesa egi tudi diago mu masugu a gisugishilo. Hene tudi naye gukalegela tangua dietu mu luholo luabonga ha gulongesa lukuma luabonga.

10. Mu maluholo atshi profesi jia Biblia jiana gugukuatesa ha gulandula gulongesa nu gikhesa?

¹⁰ Profesi jia Biblia jidi nu mene jiana gutubuisa mutshima zagu-zagu ha gulongesa athu ako lukuma luabonga. Phangi Carrie wana kalegela Yehowa mudimo gu République dominicaine udi muzuela egi: “Tangua ngana tangiza ndaga jiabonga jialayele Yehowa mukunda nu masugu adi muza, yana gungutuma ha gulongesa athu ako. Udi muzuela luko egi: “Tangua ngana mona ndaga jia lamba athu adi mutagana najio mangino, ngana kotelesa egi ndaga jiabonga Yehowa walayele mukunda nu masugu adi muza jidi nji guatadila.” Profesi jia Biblia jiana gutuhana gikhesa ha gukalagala mudimo wa gulongesa, handaga jiana monesa egi Yehowa wana gutukuatesa ha gutshita mudimo wene. Phangi Leila wana khala gu Hongrie udi muzuela egi: “Yeshaya 11:6-9 yana gungukuatesa ha gulongesa lukuma luabonga gudi athu anyi ana monega gifua ajiyilego gutshigina lukuma luene. Ngana jiya egi mu ukuateshi wa Yehowa muthu wagasue wajiya gusombegesa.” Phangi Christopher wana khala gu Zambie wazuelele egi: “Gifua luholo mukanda wa Mako 13:10 wana monesa egi lukuma luabonga ludi naye gulongesewa mu ifutshi yagasue, ngana khala nu gusuanguluga ha gukuatesa athu ha gutagenesa profesi yene.” Profesi jitshi jia Biblia jiana gugukuatesa ha gulandula gulongesa?

WAKHALELE MUSHA MUTSHIMA EGI YEHOWA MBAWUMUKUATESA

11. Mukunda natshi Yesu wakhalele naye gusha mutshima egi Yehowa mbawumukuatesa ha gulandula gulongesa nu gikhesa giagasue? (Luka 12:49, 53)

¹¹ Yesu wakhalele musha mutshima egi Yehowa mbawumukuatesa ha gulandula gulongesa lukuma luabonga nu gikhesa giagasue. Wakhalele munemesa athu ako tangua diakhalele muene mulongesa uvi wajiyile egi lukuma luabonga mbaluhana athu ako khabu nu mbalubata umbalagaji. (Tanga Luka 12:49, 53.) Mafumu a ikombelelo akhalelego musuanguluga nu ndaga jiakhalele mulongesa Yesu, hene akambele gumushiya. (Yone 8:59; 10:31, 39) Uvi Yesu walanduile gulongesa handaga wajiyile egi Yehowa wakhalele n’enji. Wazuelele egi: “Ngushigo hakhami, uvi ngudi nu Tata wangutumine. . . . Muene gangubembelego ame hakhami, handaga tangua diagasue ngana kalagala ndaga jiana gumusuanguluisa.”​—Yone 8:16, 29.

12. Ndaga jitshi Yesu wawambelele alandudi enji ha guakuatesa mukunda nu umbalagaji wakhalele naye guabuila?

¹² Yesu wawungulushile alandudi enji egi ene nji ajiya gutoga ukuateshi gudi Yehowa. Wakhalele guawambela egi Yehowa mbawakuatesa ikhale mu tangua dia usageshi. (Mat. 10:18-20; Luka 12:11, 12) Hene waawambelele ha gumonesa gutema. (Mat. 10:16; Luka 10:3) Waawambelele egi gula athu atuna guategelela, ashigo naye guashinjiga. (Luka 10:10, 11) Waawambelele nji ha gulenga gula atagana nu usageshi. (Mat. 10:23) Yesu wakhalele nu gikhesa nu wakhalele mushila Yehowa mutshima uvi gakalegelego ndaga jiajiya gumumba mu gingonza.​—Yone 11:53, 54.

13. Mukunda natshi wajiya gusha mutshima egi Yehowa mbawugukuatesa?

¹³ Mangino nji tuana khala nu funu ya ukuateshi wa Yehowa ha gulandula gulongesa nu gikhesa giagasue tangua tudi mutagana nu usageshi. (Gumo. 12:17) Mukunda natshi tuajiya gusha mutshima egi Yehowa mbawutukuatesa? Tuzuelelenu gisambu gia tshitshile Yesu gidi mu mukanda wa Yone mukhapho 17. Yesu watogele Yehowa ha gubamba apostolo enji, Yehowa wahanele mvutu gu gisambu giene. Mukanda wa Makalegelo udi mumonesa luholo Yehowa wakuatesele apostolo ha gulongesa nu gikhesa giagasue ikhale akhalele mutagana nu usageshi. Yesu watogele luko Yehowa ha gukuatesa athu akhalele musha gutshigina mu ndaga jiakhalele mulongesa apostolo. Aye nji udi mukatshi dia athu ene. Yehowa gabembelego guhana mvutu gu isambu ya Yesu, mbawugukuatesa nji gifua luholo luakuatesele muene apostolo.​—Yone 17:11, 15, 20.

14. Mukunda natshi tuajiya gusha mutshima egi mbatulandula gulongesa ikhale tudi mutagana nu malamba? (Tala nji gifuanesa.)

¹⁴ Luholo gisugishilo gia mavu awa gia suena hehi, yajiya gukhala lamba ha gulongesa lukuma luabonga nu gikhesa giagasue, uvi tudi naye gusha mutshima egi Yehowa mbawutukuatesa. (Luka 21:12-15) Gifua muatshitshile Yesu nu alandudi enji, esue nji tuana bemba egi athu ene hakhawo azule desizio dia gutshigina nga dia gutuna uvi tuanago guamanesa. Tangua ana tunyisa mudimo wetu, aphangi ana landula gulongesa lukuma luabonga handaga ana shila Yehowa mutshima uvi ngolo jiawo hakhawo ndo. Gifua luholo Yehowa wahanele akombeledi enji a mu siekle ya thomo ngolo, mangino nji wana hana akombeledi enji ngolo hagula “lukuma luabonga lulongesewe muabonga” ha gumusuanguluisa. (2 Tim. 4:17) Tuajiya diago gusha mutshima egi gula tuashila Yehowa mutshima, muene mbawutukuatesa ha gulandula gulongesa nu gikhesa giagasue.

WAKHALELE MUSHA MUTSHIGINA EGI ATHU AKO MBAAMUTEGELELA

15. Itshi idi mumonesa egi Yesu wakhalele nu matangi abonga mukunda nu mudimo wa gulongesa?

¹⁵ Yesu wakhalele nu matangi abonga mukunda nu mudimo wa gulongesa. Gutshita ngenyi guamukuatesele ha gulandula gulongesa nu gusuanguluga guagasue. Ha gufezegesa, gutuama egi atagenese givo gimoshi mu mudimo wenji wa gulongesa, wakotelesele egi athu avula akhalele mutshigina guvua lukuma luabonga, hene waafuanesele nu mbuto jiakodi gale ha gukatudiwa. (Yone 4:35) Wawambelele nji alandudi enji egi: “Mbuto jia gukatula mu dihia jidi jiavula.” (Mat. 9:37, 38) Gungima wazuelele luko egi: “Mbuto jia gukatula mu dihia jidi jiavula . . . Hene, togenu Fumi’a dihia, hagula atume enya mudimo ha gukatula mbuto mu dihia.” (Luka 10:2) Yesu wakhalele mulandula gusha mutshima egi athu ako mbaavua lukuma luabonga, hene wakhalele musuanguluga tangua athu ene akhalele muvua lukuma luene.​—Luka 10:21.

16. Luholo lutshi ifezegeselo yakalegele Yesu idi mumonesa egi wakhalele nu matangi abonga mukunda nu mudimo wa gulongesa? (Luka 13:18-21) (Tala nji gifuanesa.)

¹⁶ Yesu wawambelele alandudi enji ha gukhala nu matangi abonga mukunda nu mudimo wa gulongesa, gutshita ngenyi guakhalele naye guahana gikhesa. Ha gufezegesa, tutadilenu ifezegeselo mbadi yahanele muene. (Tanga Luka 13:18-21.) Yesu wakalegele gifezegeselo gia lumbale lua mutada ha gumonesa egi lukuma luabonga mbalumuangana mu luholo lua gushimana nu gushigo nu muthu mbawulukanga njila. Wahanele nji gifezegeselo gia levire ha gumonesa luholo lukuma luabonga mbalumuangana ha mavu agasue nu mbalukuatesa athu ha gukalagala usombegeshi unu wajiyilego gumonega mbala imoshi. Yesu wakuatesele alandudi enji ha gujiya egi lukuma luabonga akhalele mulongesa mbalukuatesa athu avula.

17. Ndaga jitshi jidi gututuma ha gukhala nu matangi abonga mukunda nu mudimo wa gulongesa?

¹⁷ Mangino tuana landula gulongesa nu gikhesa giagasue handaga lukuma luabonga luana kuatesa athu avula ha mavu. Givo nu givo, athu avula ana suanguluga nu lukuma luabonga anaza mu gudibungisa gua Guwunguluga Gufua gua Yesu nu ana longuga Biblia nu esue. Athu avula adi mubatijiwa nu adi muza gutusanga ha gukalagala nawo hamoshi mudimo wa gulongesa. Tushigo mujiya gula athu guvula gutshi mbaadimutshgina lukuma luabonga tudi mulongesa, uvi tudi mujiya egi Yehowa udi mubungisa thundu yakoma ha guyihuluisa mu tangua dia lamba diakola. (Gumo. 7:9, 14) Fumu wa mudimo udi mujiya egi athu mbaalandula gutshigina lukuma luabonga, hene tudi naye gulandula gutshita mudimo wa gulongesa.

18. Ndaga itshi tuana tshigina egi athu akotelese tangua tuana longesa?

¹⁸ Alandudi a Yesu ana jiyiwa luholo ana longesa lukuma luabonga nu gikhesa giagasue. Tangua athu amonele apostolo mulongesa nu gikhesa giagasue, akotelesele egi “akhalele mukhala nu Yesu.” (Makal. 4:13) Tangua athu ana gutumona mulongesa nu gikhesa giagasue, ajiya gukotelesa egi esue nji tuana landula gifezegeselo gia Yesu.