Phaula Watumiwa gu Roma

Vuayaje ya thathu ya gimisionere ya Phaula yasugile gu Yelusalema. Tangua diahetele muene gu Yelusalema, amukuatele, amumbile mu bologo. Mu phipha yene Yesu wamuwambelele mu vizio egi: ‘Mbawudi muya gu Roma ha gulongesa lukuma luabonga guene.’ Akatudile Phaula gu Yelusalema, amubatele gu Sezaleya, watshitshile guene ivo mbadi mu bologo. Tangua amubatele gutuama dia guvernere Fesituse ha gumusophesa, Phaula wazuelele egi: ‘Ngudi mutshigina egi Sezale angusophese gu Roma.’ Fesituse wazuelele egi: “Aye watoga egi mulonga waye uye gudi Sezale; mbawuya gudi Sezale.” Ambile Phaula mu masuwa akhalele muya gu Roma, aphangi ako mbadi Luka nu Aristarke ayile n’enji.

Tangua akhalele muzawuga mu kianga, funji yakola yabundjile masugu a avula. Athu agasue akhalele mutangiza egi adi mufua gawo. Uvi Phaula waawambelele egi: ‘Mala, muanjelo wanguwambela gu nzoji egi: “Phaula, uvigo woma. Mbawumuheta gu Roma, athu agasue adi nu aye mu masuwa mbaheta mu ubambi.” Khalenu nu gikhesa! Tushigo mufua.’

Funji yene yalanduile gubunda masugu 14. Gungima amonele mavu, yakhalele gu hongo dia Malete. Uvi masuwa adikumile gu mavu ene abogele itshinyi-itshinyi. Athu agasue 276 akhalele mu masuwa ene azogele goze mu ubambi. Athu abuile mu muta ayile nu guzua uu gonze; ako akuatele itshinyi ya masuwa yakhalele muzaluga, azogele gonze. Athu a gu hongo dia gu Malete a akuatesele, a ahagele tshuya ha guweta.

Gungima dia mbeji thathu, masuta ambile Phaula mu masuwa ako ayile n’enji gu Roma. Tangua ahetele, aphangi ajile mutagana Phaula. Haamonele muene, wahanele Yehowa mersi, wahetele nji gikhesa. Ikhale Phaula wakhalele muenya bologo, uvi amuhanele inzo ya gukhala; amuhanele nji suta mumoshi ha gumutalela. Phaula watshitshile ivo mbadi guene. Wakhalele mulongesa athu akhalele muza gumutala ndaga jiatadila Ufumu wa Nzambi nu ndaga jiatadila Yesu. Phaula wasonegele nji mikanda ha gutumila aphangi a gu Azi Minere nu a gu Yudea. Yehowa wakalegele diago Phaula ha gumuanga lukuma luabonga mu ifutshi yavula.