Luholo Lutshi Tuajiya Gukombelela Nzambi mu Luholo Luajiya Gumusuanguluisa?

Gifua luholo tuayimonyi mu longo diabalega, ikombelelo yagasue yana suanguluisa ndo Nzambi. Uvi tuajiya gukombelela Mufugi wetu mu luholo luajiya gumusuanguluisa. “Gukombelela” gua luholo lutshi guana gumusuanguluisa? (Yakoba 1:27) Tutadile ndaga Biblia yana zuela.

1. Ndaga jia gikombelelo gietu jidi naye gukatuga gui?

Ndaga tuana longuga mu gikombelelo gietu jidi naye gukatuga mu Biblia. Yesu wazuelele egi: “Mbimbi yaye idi giamatshidia.” (Yone 17:17) Ikombelelo iko yana jiya ndo giamatshidia gidi mu Mbimbi ya Nzambi, Biblia. Ana gugisombegesa nu malongo nu kutime jia athu. Uvi Yehowa gana suanguluga ndo nu athu anyi adi “mutuna mikhuala ya Nzambi.” (Tanga Mako 7:9.) Gu khanda iko, tuajiya gusuanguluisa Nzambi gula tudi mulandula malongo a Biblia ha gumukombelela.

2. Luholo lutshi tudi naye gukombelela Yehowa?

Tudi naye gukombelela phamba Yehowa handaga muene Mufugi wetu. (Gumonesa 4:11) Yakotelesa egi tudi naye gumuzumba nu gumukombelela phamba muene, uvi tushigo naye gukombelela isongo nu ifuanesa.​Tanga Yeshaya 42:8.

Gikombelelo gietu gidi naye gukhala gia ‘gijila giajiya gutshiginyiwa’ gudi Yehowa. (Roma 12:1) Yakotelesa egi tudi naye gutumagela mikhuala yenji. Ha gufezegesa, athu anyi ana zumba Yehowa ana tumagela mikhuala yenji mu ndaga yatadila ulo. Ana tuna makalegelo abola gifua, gunua makaya nu ima yabala nga matombe abala.a

3. Mukunda natshi tudi naye gukombelela Yehowa hamoshi nu aphangi ako?

Gudibungisa guetu phoso nu phoso guana gutuhana luendu lua ‘gutumbuisa Yehowa . . . mu hungu.’ (Ngimbo 111:1, 2) Guyimba ngimbo gudi mukatshi dia ndaga tuana tshita ha gutumbuisa Nzambi. (Tanga Ngimbo 104:33.) Yehowa wana gututoga ha guya mu gudibungisa handaga wana gutuzumba, nu wana jiya egi mbawutukuatesa ha guheta monyo wa ivo nu ivo. Tangua tuana gudibungisa hamoshi, tuana hana athu gikhesa, ene nji ana gutuhana gikhesa.

TUKAMBE GUJIYA NDAGA JIAVULA

4. Tushigo naye gukalegela isongo ha gukombelela Nzambi

VIDEO: Nzambi Wana Tshigina egi Tukalegele Isongo Tangua Tudi Gumukombelela Ba? (3:26)

• Itshi yakalegewe tangua akombeledi ako a Nzambi a mu tangua dikulu akhalele mukalegela isongo ha gumukombelela?

Athu ako ana kalegela isongo tangua ana kombelela, handaga ana tangiza egi yana guakuatesa ha gusuena hehi nu Nzambi. Gutshita ngenyi guajiyilego gutuma Nzambi ha gukhala gualeha nawo ba? Tanga Guzoga 20:4-6 nu Ngimbo 106:35, 36, gungima zuelelenu mihu eyi yalandula:

• Isongo ya luholo tshi wana mona athu ana kalegela ha gukombelela?

• Luholo lutshi Yehowa wana gudivua mukunda nu isongo yene?

• Aye wana gudivua luholo lutshi mukunda nu isongo?

5. Gukombelela phamba Yehowa guana gutukatula mu malongo a mambo

VIDEO: Giamatshidia Gianguzolele mu Uhiga (5:16)

Tanga Ngimbo 91:14, gungima zuelelenu muhu owu:

• Itshi Yehowa udi mutendelela ha gutshita mukunda nu esue luholo tuana gumuzumba nu tuana gumukombelela phamba muene?

6. Tuana kombelela Nzambi mu gudibungisa gua mu hungu

Tuana tumbuisa Yehowa nu tuana gudihana gikhesa tangua tuana yimba nu tuana hana ba komantere mu gudibungisa gua mu hungu. Tanga Ngimbo 22:22, gungima zuelelenu mihu eyi:

• Wana suanguluga nu ba komantere ana hanewa mu gudibungisa gua mu hungu ba?

• Wajiya gudilondega ha guhana komantere mu gudibungisa gua mu hungu ba?

7. Yehowa wana suanguluga tangua tuana wambela athu ako ndaga tudi mulonguga

Tudi nu maluholo avula tuajiya gulongesa athu giamatshidia gidi mu Biblia. Tanga Ngimbo 9:1 nu 34:1, gungima zuelelenu muhu owu walandula:

• Ndaga itshi walonguga mu Biblia udi mutshigina guwambela athu ako?

NDAGA WALONGUGA

Tuana suanguluisa Mufugi wetu tangua tuana gumukombelela phamba muene, tuana gumutumbuisa mu gudibungisa gua mu hungu, nu tuana wambela athu ako ndaga tudi mulonguga.

Mihu ya Guvutugila

• Luholo lutshi tuajiya gujiya luholo luabonga lua gukombelela Nzambi?

• Mukunda natshi tudi naye gukombelela phamba Yehowa?

• Mukunda natshi tudi naye gukombelela hamoshi nu aphangi ako ana tshigina gusuanguluisa Nzambi?

NDAGA JIKO JIA NDANDO

Tanga lumene ludi muzuela egi “Je ne suis plus esclave des idoles,” ha gumona luholo mukhetu mumoshi wabembele gukombelela isongo.

“La Bible transforme des vies” (Inzo Yaleha ya Mutaledi ya 1 Juillet 2011 ya français)

Tala ndaga yajiya gugukuatesa ha guhana komantere mu gudibungisa gua mu hungu.

“Loue Jéhovah dans l’assemblée” (Inzo Yaleha ya Mutaledi ya Janvier 2019 ya français)

Tala luholo muvuala mumoshi wahetele gubonga mu gudibungisa gua mu hungu ikhale yakhalelego yaleba mukunda nu muene ha guya.

Yehowa Wana Gudisagesa Mukunda nu Ame (3:07)

Athu avula ana tshigina egi mutshi wa gudikikisa (croix) wana monesa gikombelelo gia Uklisto, uvi tuajiya nji guwukalegela mu gukombelela guetu ba?

“Pourquoi les Témoins de Jéhovah n’utilisent pas la croix dans leur culte?” (Longo edi didi mu jw.org)