Luholo Wajiya Gukuatesa Hungu Dienu

Ha mavu agasue, ba milio a athu ana kombelela Yehowa nu gusuanguluga guagasue mu mahungu avula. Ana suanguluga muavula nu malongo nu utuameji ana heta, ana khala nji hehi ha gukuatesa hungu mu maluholo avula. Aye nji wana khala hehi ha gukuatesa hungu dienu ba?

1. Mu maluholo atshi wajiya guhana tangua nu ngolo jiaye ha gukuatesa hungu dienu?

Mukut’etu agasue tuajiya guhana mago ha gukuatesa hungu. Ha gufezegesa, mu hungu dienu mudi nu athu a gukola nga adi nu ukhashi mu muila ba? Wajiya guakuatesa ha guya nawo mu gudibungisa ba? Nga ndo wajiya guakuatesa mu maluholo ako gifua, guya guasumbila ima ya gudia nga gualondela inzo ba? (Tanga Yakoba 1:27.) Tuajiya nji gudihana ha gulondega nga guweva Inzo yetu ya Ufumu. Gushigo nu muthu mumoshi udi naye gutushinjiga ha gutshita ndaga jiene. ‘Tuana gudihana nu mutshima wagasue’ handaga tuana zumba Nzambi nu aphagi etu​—Ngimbo 110:3.

Matemue a Yehowa anyi abatijiwe gale ana kuatesa hungu mu maluholo ako. Aphangi a mala anyi atagenesele gale ndaga jiana togewa ana bua akuateshi a mudimo, gungima ana bua nji akulu. Aphangi a mala nu a akhetu ajiya gubua avundji a njila ha gukuatesa muavula mu mudimo wa gulongesa. Matemue ako ana gudihana ha gutunga mafundo etu a gukombelela nga guya mu mafundo adi nu funu ya ukuateshi ha guhana mago mu maluholo ako.

2. Luholo lutshi tuajiya guhana ima tudi naye ha gukuatesa hungu?

Tuajiya ‘gutumbuisa Yehowa nu ima Yetu ya ndando.’ (Ishima 3:9) Tuana suanguluga diago muavula ha guhana makuta nu ima yetu iko ha gukuatesa hungu nu mudimo wa gulongesa lukuma luabonga ha mavu agasue. (Tanga 2 Kolinto 9:7.) Misomo yetu yana kuatesa nji aphangi adi mutagana nu malamba. Athu avula mukatshi dietu ana ‘bamba ndambu ya makuta’ ha guhana musomo mbala nu mbala. (Tanga 1 Kolinto 16:2.) Tuana hana musomo mu mishete idi mu mafundo tuana kombelela nga mu Internet mu donate.jw.org. Yehowa wana gutuhana luendu lua gumonesa egi tuana gumuzumba tangua tuana gumuhana ima yetu.

TUKAMBE GUJIYA NDAGA JIAVULA

3. Tuajiya guhana ima yetu tudi naye

Yehowa nu Yesu ana zumba athu anyi ana hana nu gusuanguluga. Ha gufezegesa, Yesu washimanele mukhetu wa gafunda munu wakhalele nu makuta azonda uvi waahanele agasue gudi Yehowa. Tanga Luka 21:1-4, gungima zuelelenu mihu eyi:

• Tudi naye guhana musomo wavula ha gusuanguluisa Yehowa ba?

• Luholo lutshi Yehowa nu Yesu ana gudivua mukunda nu musomo tuana hana nu gusuanguluga?

Ha gujiya luholo ana kalegela misomo tuana hana, tala VIDEO. Gungima zuelelenu muhu owu walandula.

VIDEO: ‘Kado ga Guhana Yehowa’ (4:47)

• Luholo lutshi misomo yetu yana kuatesa mahungu agasue a ha mavu?

4. Tuajiya gudihana nu mutshima wagasue

Mu tangua dikulu, akombeledi a Yehowa akhalele gudihana nu gikhesa giagasue ha gubamba muabonga mafundo awo a gukombelela. Uvi akhalele nji muhana makuta ha gukuatesa mudimo wene. Tanga 2 Gudilanduluila 34:9-11, gungima zuelelenu muhu owu:

• Luholo lutshi enya Isalele agasue akhalele mukuatesa ha gubamba muabonga inzo ya Yehowa nga fundo dia gukombelela?

Ha gumona luholo Matemue a Yehowa ana landula gifezegeselo gia akombeledi a mu tangua dikulu, tala VIDEO. Gungima zuelelenu mihu eyi yalandula.

VIDEO: Luholo Lutshi Mukut’etu Agasue Tuajiya Gubamba Mafundo etu a Gukombelela? (3:31)

• Mukunda natshi idi nu ndando ha gulondega nu guweva Inzo yetu ya Ufumu?

• Mu maluholo atshi ako wajiya guhana ukuateshi?

5. Aphangi a mala ajiya gutagenesa ndaga ana toga ha guheta inemo iko mu hungu

Biblia yana toga Aklisto a mala ha gutshita yagasue ha gutagenesa ndaga jiana togewa ha gukuatesa hungu. Ha gumona gifezegeselo, tala VIDEO. Gungima hana mvutu gu muhu owu walandula.

VIDEO: Aphangi a Mala​—Tshiginenu ha Gukalagala Mudimo Wabonga (5:19)

• Mu video tuatala, luholo lutshi Ryan udi mutshita ngolo ha gukuatesa hungu muavula?

Biblia yana monesa ndaga aphangi a mala adi naye gutagenesa ha gubua akuateshi a mudimo nga akulu. Tanga 1 Timote 3:1-13, gungima zuelelenu mihu eyi:

• Itshi aphangi a mala anyi adi mutshigina gubua akuateshi a mudimo nga akulu adi naye gutshita?

• Itshi enya fami jiawo adi naye gutshita?​—Tala verse 4 nu 11.

• Gubonga gutshi hungu diana heta gula aphangi atagenesa ndaga eji jiagasue?

NDAGA WALONGUGA

Yehowa wana suanguluga luholo tuana hana tangua dietu, ngolo jietu nu ima yetu iko ha gukuatesa hungu.

Mihu ya Guvutugila

• Luholo lutshi tuajiya guhana tangua nu ngolo jietu ha gukuatesa hungu?

• Luholo lutshi tuajiya guhana ima tudi naye ha gukuatesa hungu?

• Mu maluholo atshi ako wana tshigina gukuatesa hungu?

NDAGA JIKO JIA NDANDO

Tala mukunda natshi Nzambi gana toga luko ndo giakumi.

“La dîme : Que dit la Bible à ce sujet ?” (Longo edi didi mu jw.org)

Kamba gujiya gula mbimbi eyi “muthu udi mutshigina gubua” mukulu nga mukuateshi wa mudimo mu hungu idi mukotelesa itshi.

«Aspires-tu à une fonction de surveillant» ? (Inzo Yaleha ya Mutaledi ya 15 Septembre 2014 ya français)

Tala luholo aphangi a mala adi mutshita ngolo ha gubatela aphangi ako mikanda.

Ils transportent des publications bibliques au Congo (4:25)

Tala ha gujiya luholo tuana khala ya gudisha nu mangumba ako mu ndaga yatadila makuta tuana kalegela midimo.

“Comment les Témoins de Jéhovah financent-ils leurs activités ?” (Longo edi didi mu jw.org)