Gubatijiwa Guana Bata Gubonga Guavula!

Yesu wazuelele egi Aklisto adi naye gubatijiwa. (Tanga Matayo 28:19, 20.) Uvi gubatijiwa gudi mukotelesa itshi? Itshi muthu udi naye gutshita ha gubatijiwa?

1. Gubatijiwa gudi mukotelesa itshi?

Mbimbi ya Greke yabalumuiwe egi “gubatijiwa” yana kotelesa egi “guvomvua” mu meya. Tangua Yesu wabatijiwe, wavomvuewe mu Muta wa Yordane, gungima ‘wazogele mu meya.’ (Mako 1:9, 10) Luholo lumoshi nji, Aklisto a giamatshidia adi naye guvomvuewa muila wagasue mu meya tangua adi mubatijiwa.

2. Gubatijiwa guana monesa itshi?

Gula muthu wabatijiwa, yana monesa egi wadihanyi gale gudi Yehowa Nzambi. Luholo lutshi muthu wana gudihana gudi Nzambi? Gula muthu wazula desizio dia gubatijiwa, udi naye thomo gutshita gisambu gudi Yehowa, ha gumuwambela egi udi mutshigina gumukalegela mayilago. Udi naye gulaya ha gukombelela phamba Yehowa, nu gumonesa egi ndaga yabalega ndando mu monyo wenji idi gutshita gutshigina gua Nzambi. Muthu muene udi naye ‘gudituna nu . . . gulandula guhata’ malongo a Yesu nu gifezegeselo gienji. (Matayo 16:24) Gudihana nu gubatijiwa guenji guana gumukuatesa ha gukhala nu ufuta wakola nu Yehowa nu Aklisto ako.

3. Itshi muthu udi naye gutshita gutuama dia gubatijiwa?

Gutuama egi ubatijiwe, udi naye gulonguga ndaga jiatadila Yehowa nu gukolesa gutshigina guaye. (Tanga Hebelu 11:6.) Mbawuzumba Yehowa muavula gula wamujiya muabonga nu wakolesa gutshigina guaye. Ngenyi, mbawukhala nu nzala ya gulongesa ndaga jiatadila Yehowa nu gutumagela mikhuala yenji. (2 Timote 4:2; 1 Yone 5:3) Tangua muthu udi “[muwenda] mu luholo luatagana ludi musuanguluisa diago Yehowa,” wajiya guzula desizio dia gudihana gudi Nzambi nu gubatijiwa.​—Kolosai 1:9, 10.a

TUKAMBE GUJIYA NDAGA JIAVULA

4. Malongo tuajiya guzula mu luholo Yesu wabatijiwe

Tanga Matayo 3:13-17 ha gujiya ndaga jiavula jiatadila gubatijiwa gua Yesu. Gungima zuelelenu mihu eyi yalandula:

• Yesu wabatijiwe hakhalele muene mona wa gitebe ba?

• Luholo lutshi luabatijiwe muene? Amunyangele tumamboso tua meya ha muto ba?

Yesu wasendesele mudimo wa ndando wamuhanele Nzambi ha mavu tangua diabatijiwe muene. Tanga Luka 3:21-23 nu Yone 6:38, gungima zuelelenu muhu owu walandula:

• Gungima dia gubatijiwa gua Yesu, mudimo utshi wahagele muene ha fundo dia thomo mu monyo wenji?

5. Gubatijiwa gudi felela dia ndando udi naye gutagenesa

Gudihana gudi Nzambi nu gubatijiwa guajiya guguhana woma. Uvi gula walandula gulonguga ndaga jiatadila Yehowa, wamujiya muabonga, mbawushigo luko muvua woma ha gubatijiwa. Ha gumona luholo athu ako akatuile woma wene, tala VIDEO.

VIDEO: Kolesa Ufuta Waye nu Yehowa (1:11)

Tanga Yone 17:3 nu Yakoba 1:5, gungima zuelelenu muhu owu walandula:

• Ndaga itshi yajiya gukuatesa muthu ha gudilonda mukunda nu gubatijiwa?

1. Tuana gudihana gudi Yehowa tangua tuana gumuwambela mu gisambu egi tudi mutshigina gumukalegela mayilago

2. Gubatijiwa guetu guana monesa gu meso a athu agasue egi tuadihanyi gale gudi Nzambi

6. Gula tuabatijiwa tuana ngina mu fami ya Yehowa

Gula tuabatijiwa, tuana ngina mu fami ya aphangi a ha mavu agasue ana jinga hamoshi. Tuana khalago fundo dimoshi, tuana khala nji ndo nu kutime jia luholo lumoshi, uvi mukut’etu agasue tuana sha gutshigina gu ndaga jia luholo lumoshi, nu tuana tumagela mikhuala ya luholo lumoshi. Tanga Ngimbo 25:14 nu 1 Phetelo 2:17, gungima zuelelenu muhu owu walandula:

• Luholo lutshi gubatijiwa guana kuatesa muthu ha gukhala nu ufuta wakola nu Yehowa nu akombeledi enji ako?

NDAGA WALONGUGA

Yesu wazuelele egi Aklisto adi naye gubatijiwa. Ha gubatijiwa, muthu udi naye gukolesa gutshigina guenji gudi Yehowa, udi naye gutumagela mikhuala yenji nu gudihana gudi muene.

Mihu ya Guvutugila

• Gubatijiwa gudi mukotelesa itshi, nu mukunda natshi gudi nu ndando?

• Gudihana gudi Nzambi nu gubatijiwa guana monesa itshi?

• Ndaga jitshi muthu udi naye gutshita gutuama dia gudihana nu gubatijiwa?

NDAGA JIKO JIA NDANDO

Longuga ha gujiya gula gubatijiwa gudi diago itshi nu gushigo mukotelesa itshi.

“Qu’est-ce que le baptême?” (Longo edi didi mu jw.org)

Tadila ndaga muthu adi naye gutshita gutuama dia gubatijiwa.

“Guzumba nu guhana Yehowa mersi mbagugutuma ha gubatijiwa” (Inzo Yaleha ya Mutaledi ya Mars  2020)

Tanga longo edi ha gujiya ndaga yatumile yala mumoshi ha gubatijiwa.

“Ils voulaient que je découvre la vérité par moi-même” (Inzo Yaleha ya Mutaledi ya 1 Fevrier 2013 ya français)

Tanga longo edi ha gujiya mukunda natshi gubatijiwa gudi felela dia ndando udi naye gutagenesa nu luholo wajiya gudilondega gutuama dia gubatijiwa.

“Devrais-je me faire baptiser?” (Les jeunes s’interrogent. Réponses pratiques (volume 2), mukhapho 37)