Kuata Mafuta nu Gutema

Mafuta abonga ana gutukuatesa ha gukhala nu gusuanguluga ikhale mu tangua diabonga nga mu tangua dia lamba. Uvi Biblia yana gutuwambela egi tushigo naye gukuata ufuta nu muthu wagasue. Luholo lutshi wajiya gukuata mafuta abonga? Tutadile mihu eyi yalandula.

1. Mafuta aye ajiya gugutuma ha gutshita itshi?

Matangua avula, tuana bua gifua athu anyi tuana balegesa nawo tangua. Tuajiya guzula makalegelo awo abonga nga abola​—ikhale tudi mubalegesa nawo tangua hamoshi nga mu Internet. Biblia yana zuela egi: ‘Muthu udi mukuata ufuta nu muenya ndunge mbawubua muenya ndunge, uvi muthu udi mukuata ufuta nu athu aheya [athu anyi ana zumba ndo Yehowa] mbawubua muthu waheya.’ (Ishima 13:20) Mafuta anyi ana zumba Yehowa nu ana gumukombelela ajiya gugukuatesa ha gusala ya gujinginyina gudi muene nu guzula badesizio abonga. Uvi mafuta anyi ashigo Matemue a Yehowa ajiya gubolesa ufuta waye n’enji. Gishina giene Biblia yana gututoga ha gukuata mafuta nu gutema guagasue! Gula mafuta etu ana zumba Nzambi, mbaatukuatesa muavula, esue nji mbatuakuatesa. Ngenyi, tuajiya gulandula “gudihana gikhesa nu gudikolesa.”​—1 Tesalonike 5:11.

2. Yehowa wana gudivua gikuatshi mukunda nu mafuta tuana kuata?

Yehowa wana tomba mafuta enji muabonga. “Muene wana kuata ufuta wakola nu athu abonga.” (Ishima 3:32) Yehowa wana gudivua gikuatshi gula tuakuata mafuta anyi anago gumuzumba? Wana vua diago gikenene! (Tanga Yakoba 4:4.) Gu khanda iko, Yehowa mbawusuanguluga nu mbawukuata ufuta nu esue gula tuatuna mafuta abola, tuakuata n’enji ufuta nu athu anyi ana gumuzumba.​—Ngimbo 15:1-4.

TUKAMBE GUJIYA NDAGA JIAVULA

3. Tuna mafuta abola

Athu anyi ana tuna guzumba Nzambi nu mikhuala yenji adi mafuta abola. Tala VIDEO, gungima zuelelenu muhu owu walandula.

VIDEO: Tuna Mafuta Abola (6:17)

• Luholo lutshi tuajiya gukuata mafuta abola uvi esue gujiya ndo?

Tanga 1 Kolinto 15:33, gungima zuelelenu mihu eyi:

• Akuatshi ajiya gukhala mafuta abola mukunda nu aye? Mukunda natshi?

Tanga Ngimbo 119:63, gungima zuelelenu muhu owu:

• Itshi mbayigukuatesa ha gujiya gula muthu mumoshi ngenyi udi futa diabonga?

4. Athu ako ajiya gubua mafuta etu abonga ikhale tushigo nawo luholo lumoshi

Biblia yana zuelela lumene lua mala mbadi a gu Isalele ikulu: Davidi nu Yonatana. Yonatana wakhalele mbuta ya Davidi, wakhalele nji mun’a fumu; uvi akhalele nu ufuta wakola. Tanga 1 Samuele 18:1, gungima zuelelenu muhu owu:

• Mukunda natshi tushigo naye gukuata ufuta phamba nu athu anyi tudi nawo gindongo gimoshi nga adi nu ndaga jia luholo lumoshi nu esue?

Tanga Roma 1:11, 12, gungima zuelelenu muhu owu:

• Luholo lutshi mafuta anyi ana zumba Yehowa ana gudihana gikhesa?

Mu video eyi, tala luholo muvuala mumoshi wa yala wahetele mafuta mu mafundo anyi gatangijilego. Tala VIDEO, gungima zuelelenu mihu eyi yalandula.

VIDEO: Wajiya Guheta Mafuta mu Mafundo Anyi Watangijilego (5:06)

• Mu video eyi tuatala, mukunda natshi mvuaji jia Akil jiakhalele gudisagesa mukunda nu mafuta a mun’awo a gu khalasa?

• Mukunda natshi Akil wasuangulugile gukuata mafuta ene?

• Itshi yamukuatesele ha gutuna gudivua hakhenji?

5. Luholo tuajiya gukolesa ufuta wabonga

VIDEO: Futa Diabonga udi Nanyi? (4:14)

Tanga Ishima 18:24 nu 27:17, gungima zuelelenu mihu eyi:

• Luholo lutshi mafuta abonga ana gudikuatesa?

• Aye nji wana khala nu mafuta abonga a luholo elu ba? Gula ishigo ngenyi, luholo lutshi wajiya guheta mafuta ene?

Tanga Filiphi 2:4, gungima zuelelenu muhu owu:

• Ha guheta mafuta abonga, udi naye gukhala futa diabonga. Mu luholo lutshi?

NDAGA WALONGUGA

Gula tuakuata mafuta nu gutema guagasue, tuana suanguluisa Yehowa nu tuana heta gubonga.

Mihu ya Guvutugila

• Mukunda natshi Yehowa wana tshigina egi tukuate mafuta abonga?

• Mafuta a luholo lutshi tudi naye gutuna?

• Luholo lutshi tuajiya gukolesa ufuta nu athu abonga?

NDAGA JIKO JIA NDANDO

Tala luholo mafuta abonga ajiya gutukuatesa mu tangua dia lamba.

“Kolesa Ufuta Waye nu Aphangi’aye Aklisto Gutuama egi Gisugishilo Gize” (Inzo Yaleha ya Mutaledi ya Novembre 2019)

Tala ndaga wajiya gutshita ha gukuata mafuta abonga.

“Comment choisir mes amis?” Les jeunes s’interrogent. Réponses pratiques (volume 1) mukhapho 8)

Itshi udi naye gujiya mu ndaga yatadila mafuta a mu Internet?

Monesa Gutema Tangua udi Mukalegela Internet (4:12)

Tala ndaga yakuatesele yala mumoshi ha gutomba mafuta abonga, mu lumene ludi muzuela egi: “J’avais tant besoin d’un père!”

“La Bible transforme des vies” (Inzo Yaleha ya Mutaledi ya 1 Avril 2012 ya français)