LONGO DIA 51
Luholo Lutshi Wajiya Gusuanguluisa Yehowa mu Mbimbi Jiaye?
Tangua Yehowa watufugile, watuhanele khapho dimoshi dia ndando, khapho diene didi guzuela. Yehowa wana gudisagesa mu luholo luetu lua guzuela ba? Ayi! (Tanga Yakoba 1:26.) Na luholo lutshi tuajiya guzuela ha gusuanguluisa Yehowa?
1. Luholo Lutshi Tuajiya Gukalegela Luendu Luetu lua Guzuela?
Biblia idi gutuwambela egi: “Khalenu gudihana gikhesa nu gudikolesa.” (1 Tesalonike 5:11) Udi mujiya muthu wajiya guhana gikhesa ba? Itshi wajiya gutshita ha gumukuatesa? Ha gufezegesa, muwambele egi wana gudisagesa mukunda nu muene. Wajiya nji gumuwambela ndaga imoshi yana kalagala muene nga khadilo dienji dimoshi diana gugusuanguluisa. Udi mujiya verse wajiya gutangela muthu ha gumuhana gikhesa ba? Verse jia luholo elu jidi jiavula mu Biblia. Jiya egi luholo luaye lua guzuela luajiya nji guhana athu ako gikhesa muavula gubalega mbimbi wakalegela. Hene, khala mutshita yagasue ha guzuela nu gisemo nu gutuluga guagasue.—Ishima 15:1.
2. Mbimbi jia Luholo Lutshi Tushigo Naye Guzuela?
Biblia yana zuela egi: “Nga mbimbi imoshi yabola izogigo mu kano dienu.” (Tanga Efeso 4:29.) Yakotelesa egi tudi naye gutuna mbimbi jiabola nu mashingo nga guzuela mbimbi jiajiya guhana muthu lamba gu mutshima. Tushigo naye nji gufeta athu ako nga guata mikumbu.—Tanga Ishima 16:28.
3. Itshi yajiya gutukuatesa ha guzuela mbimbi jiajiya guhana athu ako gikhesa?
Mbimbi udi muzuela jidi naye gumonesa athu ako luholo udi gudivua nu ndaga udi mutangiza mukunda nu ene. (Luka 6:45) Tudi naye gutshita ngolo ha gutangiza ndaga jia giamatshidia, jinyi athu ajiya gushila mutshima, jiabonga, jidi mukuatesa athu ha gukhala nu guzumba nu jinyi jidi mutumbuishiwa. (Filiphi 4:8) Ha gutagenesa ndaga eji jiagasue, tudi naye gumonesa gutema ha tudi mutomba mafuta nu saga jia gubalegesa tangua. (Ishima 13:20) Mbayitukuatesa nji ha gujiya ndaga tudi mutshigina guzuela nu luholo lua gujizuela. Tangiza gutuama luholo athu ajiya gudivua mu ndaga udi muzuela. Biblia yana zuela egi: ‘Mbimbi jia guheya jiana namenesa gifua phogo ya khusa, uvi mbimbi jia muthu watema jiana saga.’—Ishima 12:18.
TUKAMBE GUJIYA NDAGA JIAVULA
Tala luholo wajiya guzuela mbimbi jidi musuanguluisa Yehowa nu jidi muhana athu ako gikhesa.
4. Monesa gutema mu mbimbi jiaye
Matangua ako tuana zuela mbimbi jiabola, gungima tuana gudibela. (Yakoba 3:2) Tanga Galatiya 5:22, 23, gungima zuelelenu mihu eyi:
Mukatshi dia makalegelo awa, khadilo ditshi wajiya gutoga Yehowa hagula digukuatese ha guzuela mbimbi jiabonga? Luholo lutshi makalegelo awa ajiya gugukuatesa?
Tanga 1 Kolinto 15:33, gungima zuelelenu muhu owu:
Mukunda natshi mafuta aye nu saga jia gubalegesa tangua jiajiya gusombegesa luholo luaye lua guzuela?
Itshi yajiya gusombegesa luholo luaye lua guzuela?
Tanga Mulongeshi 3:1, 7, gungima zuelelenu muhu owu:
Tangua ditshi yajiya gutoga egi uhene tedie, nga gunengena tangua diabonga dia guzuela?
5. Zuela ndaga jiabonga mukunda nu athu ako
Luholo lutshi tuajiya gutuna mashingo nga mbimbi jidi muhana athu ako lamba gu mutshima? Tala VIDEO, gungima zuelelenu mihu eyi yalandula.
Mu video tuatala, mukunda natshi yakhalele mutoga egi phangi wa yala asombegese luholo luenji lua guzuela?
Itshi yakalegele muene ha gusombegesa?
Tanga Mulongeshi 7:16, gungima zuelelenu muhu owu:
Itshi tushigo naye gujimbila gula mulonga umoshi watutuma ha guzuela mbimbi jiabola mukunda nu muthu muko?
Tanga Mulongeshi 7:21, 22, gungima zuelelenu muhu owu:
Luholo lutshi verse eji jiajiya gugukuatesa ha gutuna guvua khabu gula muthu mumoshi wazuela mbimbi jiabola mukunda nu aye?
6. Zuela nu gisemo tangua udi muta maga nu enya fami yaye
Yehowa wana tshigina egi tumonese gisemo nu guzumba ha tudi muta maga nu enya fami yetu. Tala VIDEO, gungima zuelelenu muhu owu walandula.
Itshi yajiya gugukuatesa ha guzuela nu gisemo giagasue gudi enya fami yaye?
Tanga Efeso 4:31, 32, gungima zuelelenu muhu owu:
Mbimbi jia luholo lutshi jiajiya gukuatesa enya fami yetu ha gudivua muabonga?
Yehowa wamonesele luholo luadivile muene mukunda nu Mun’enji Yesu. Tanga Matayo 17:5, gungima zuelelenu muhu owu:
Luholo lutshi wajiya gulandula gifezegeselo gia Yehowa tangua udi muta maga nu enya fami yaye?
Khala hehi ha gushimana athu ako
ATHU AKO ANA ZUELA EGI: “Ngudi phungu ya uhululu. Ikhale athu ako ashigo musuanguluga nu ndaga yene, ishigo mulonga wami.”
Aye nji udi mutshigina matangi ene ba? Mukunda natshi wazuela ngenyi?
NDAGA WALONGUGA
Mbimbi tuana zuela jiajiya gukuatesa nga gusagesa athu ako. Tudi naye gutangiza muabonga ndaga tudi mutshigina guzuela, tangua tudi naye gujizuela nu luholo lua gujizuela.
Mihu ya Guvutugila
Maluholo atshi ako wajiya guzuela mbimbi jinyi jiajiya gukuatesa athu ako?
Mbimbi jia luholo lutshi udi naye gutuna?
Itshi yajiya gutukuatesa ha gulandula gumonesa gisemo nu guzuela mbimbi jidi mukolesa athu ako?
NDAGA JIKO JIA NDANDO
Itshi yajiya gutukuatesa ha guzuela mbimbi jiabonga?
Tala ndaga yajiya gugukuatesa ha gutuna guzuela mbimbi jiabola.
“Est-ce vraiment mal d’être grossier ?” (Longo edi didi mu jw.org)
Tala luholo wajiya gutuna khadilo dia gufeta athu ako.
Tala luholo Yehowa wakuatesele yala mumoshi ha gubemba guzuela mbimbi jiabola.