Landula Gukula mu Nyuma

Mukanda owu wagukuatesa ha gulonguga ndaga jiavula jiatadila Yehowa. Ndaga walonguga jiagukuatesa ha guzumba Yehowa muavula; mbala iko wadihanyi gale gudi muene nu wabatijiwa gale. Gula khenji udihana ndo, yajiya gukhala egi udi mutangiza gutshita ndaga yene mu masugu adi muza. Uvi ujimbilago egi udi naye gulandula gukula mu nyuma gungima dia gubatijiwa guaye. Wajiya gulandula gukolesa ufuta waye nu Yehowa mayilago. Luholo lutshi?

1. Mukunda natshi udi naye gulandula gukolesa ufuta waye nu Yehowa?

Tudi naye gutshita ngolo ha gulandula gukolesa ufuta wetu nu Yehowa. Mukunda natshi? “Hagula tujimbilago njila” yenji. (Hebelu 2:1) Itshi yajiya gutukuatesa ha gulandula gukombelela Yehowa nu gujinginyina guagasue? Tuajiya gudihana muavula mu mudimo wa gulongesa lukuma luabonga nu gukamba maluholo ako a gukombelela Nzambi muavula. (Tanga Filiphi 3:16.) Gukombelela Yehowa gudi ndaga ya ndando mu monyo wetu!​—Ngimbo 84:10.

2. Ndaga itshi iko udi naye gulandula gutshita?

Ulongugi waye wa Biblia waheta gu gisugishilo, uvi ujimbilago egi udi naye gulandula gukula mu nyuma. Biblia yana gutuwambela egi: “Sudigenu umuthu uhe-uhe.” (Efeso 4:23, 24) Gula walandula gulonguga Mbimbi ya Nzambi nu guya mu gudibungisa gua mu hungu, mbawulonguga ndaga jiko jiavula jiatadila Yehowa nu makalegelo enji. Kamba maluholo wajiya gulandula muabonga makalegelo enji mu monyo waye. Landula gutshita usombegeshi ha gusuanguluisa Yehowa.

3. Luholo lutshi Yehowa mbawugukuatesa ha gukula mu nyuma?

Biblia idi muzuela egi: “Nzambi . . . mbawumanesela gumihana formasio, mbawumihana gikhesa, mbawumihana ngolo, mbawumikuatesa nji ha gukhala ya gumagana tenyi.” (1 Phetelo 5:10) Mukut’etu agasue tuana lolewa ha gukalagala ndaga jiabola. Uvi Yehowa wana gutuhana ngolo tuana khala najio funu ha gutuna gubua mu gubola. (Ngimbo 139:23, 24) Walayele egi mbawuguhana nzala nu ngolo jia gumukombelela nu gujinginyina guagasue.​—Tanga Filiphi 2:13.

TUKAMBE GUJIYA NDAGA JIAVULA

4. Landula guta maga nu Futa diaye wa mu dilu

Gutshita gisambu nu gulonguga Biblia guagukuatesa ha gubua futa dia Yehowa. Luholo lutshi gutshita ndaga eji guagukuatesele ha gusuena hehi n’enji?

Tanga Ngimbo 62:8, gungima zuelelenu muhu owu:

• Ha gukolesa ufuta waye nu Yehowa, ndaga itshi udi naye gusombegesa tangua udi mutshita gisambu?

Tanga Ngimbo 1:2 nu mbimbi goshi’a diyiji mu nwt, gungima zuelelenu muhu owu:

• Luholo lutshi lutango lua Biblia luajiya gugukuatesa ha gukolesa ufuta waye nu Yehowa?

Itshi wajiya gutshita ha guheta gubonga guavula mu lutango luaye lua Biblia? Ha gumona ndaga wajiya gutshita, tala VIDEO, gungima zuelelenu mihu eyi yalandula.

VIDEO: Kudisa Luholo Luaye lua Gulonguga (5:22)

• Ndaga jitshi wamonyi mu video wajiya gukalegela?

• Malongo atshi wana tshigina gulonguga?

5. Dihagele mafelela a mu nyuma

Gudihagela mafelela mu mudimo wa Yehowa mbagugukuatesa ha gulandula gukula mu nyuma. Tala VIDEO, gungima zuelelenu muhu owu walandula.

VIDEO: Lujingu Luabonga (3:31)

• Mu video eyi, gubonga gutshi Cameron wahetele luholo luadihagele muene mafelela a mu nyuma?

Athu agasue ajiyilego guya mulongesa mu gifutshi giko. Uvi, mukut’etu agasue tuajiya gudihagela mafelela abonga. Tanga Ishima 21:5, gungima tadila mafelela wajiya gudihagela . . .

• mu hungu.

• mu mudimo wa gulongesa.

Luholo lutshi longo didi mu verse eyi diajiya ­gugukuatesa ha gutagenesa mafelela aye?

Mafelela anyi wajiya gutagenesa

• Sombegesa luholo luaye lua gukombelela.

• Tanga Biblia yagasue.

• Kamba gujiya athu agasue a mu hungu dienu.

• Sendesa gulonguga Biblia nu muthu.

• Wajiya gubua muvundji wa njila wa tangua diazonda nga wa tangua diagasue.

• Gula udi phangi wa yala, tagenesa ndaga jiana togewa ha gubua mukuateshi wa mudimo.

NDAGA WALONGUGA

Landula gukolesa ufuta waye nu ­Yehowa nu gudihagela mafelela a mu nyuma. Ngenyi mbawuheta ­monyo wa ivo nu ivo!

Mihu ya Guvutugila

• Mukunda natshi udi naye gusha mutshima egi Yehowa mbawugukuatesa ha gumukombelela nu gujinginyina guagasue?

• Luholo lutshi wajiya gukolesa ufuta waye nu Yehowa?

• Luholo lutshi gudishila mafelela a mu nyuma guajiya gugukuatesa ha gukula mu nyuma?

NDAGA JIKO JIA NDANDO

Itshi Yehowa wana zula nu ndando gubalega: Gukalagala ndaga jiakoma ha gumonesa egi tuadihanyi gudi muene, nga gumukombelela nu gujinginyina guagasue mu monyo wetu?

Soyons fidèles comme Abraham (9:20)

Mukombeledi wa gujinginyina wa Yehowa wajiya nji gutotesa gusuanguluga. Tala luholo wajiya guheta luko gusuanguluga guene.

Retrouve de la joie grâce à l’étude et à la méditation (5:25)

Luholo lutshi wajiya gudihagela mafelela a mu nyuma nu guatagenesa?

“Glorifiez votre Créateur en vous fixant des objectifs spirituels” (Inzo Yaleha ya Mutaledi ya 15 Juillet 2004 ya français)

Mukunda natshi idi nu ndando ha gubua Muklisto wa gukula mu nyuma? Luholo lutshi wajiya gukula mu nyuma?

“Portons-nous vers la maturité : ‘le grand jour de Jéhovah est proche’” (Inzo Yaleha ya Mutaledi ya 15 Mai 2009 ya français)